Moliyalashtirishning markazlashtirilgan manbalari hisobiga qurilgan foydalanishga topshirilayotgan obyektlarning muhandislik tarmoqlari va inshootlarini xizmat koʻrsatuvchi tashkilotlar balansiga berish jarayonini tartibga solish maqsadida Vazirlar Mahkamasi qaror qiladi:

1. Moliyalashtirishning markazlashtirilgan manbalari hisobiga qurilgan foydalanishga topshirilayotgan obyektlarning muhandislik tarmoqlari va inshootlarini xizmat koʻrsatuvchi tashkilotlar balansiga berish tartibi toʻgʻrisidagi nizom ilovaga muvofiq tasdiqlansin.

2. Belgilab qoʻyilsinki, tashqi muhandislik tarmoqlari va inshootlarini “Oʻzbekenergo” davlat-aksiyadorlik kompaniyasi, “Oʻzkommunxizmat” agentligi, “Oʻztransgaz” aksiyadorlik kompaniyasining mintaqalararo unitar korxonalari, tumanlar va shaharlar hokimliklarining issiqlik-suv taʼminoti va kommunal xoʻjaligi tashkilotlari balansiga bepul berishda ushbu tarmoqlar va inshootlarning qiymati daromad (foyda) soligʻini va qoʻshilgan qiymat soligʻini hisoblab chiqishda soliq solish obyekti hisoblanmaydi.

3. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Qurilish, qurilish materiallari sanoati, kommunal xizmat koʻrsatish va transport kompleksi kotibiyatiga yuklansin.

1. Mazkur Nizom moliyalashtirishning markazlashtirilgan manbalari hisobiga qurilayotgan obyektlarning yagona buyurtmachisi xizmatlari (keyingi oʻrinlarda matnda “buyurtmachi” deb yuritiladi) tomonidan foydalanishga topshirilayotgan obyektlarning tashqi muhandislik tarmoqlari va inshootlarini (keyingi oʻrinlarda matnda “tashqi muhandislik tarmoqlari va inshootlar” deb yuritiladi) “Oʻzbekenergo” davlat-aksiyadorlik kompaniyasi, “Oʻzkommunxizmat” agentligi, “Oʻztransgaz” aksiyadorlik kompaniyasining mintaqalararo unitar korxonalari,tumanlar va shaharlar hokimliklarining issiqlik-suv taʼminoti va kommunal xoʻjaligi tashkilotlari (keyingi oʻrinlarda matnda “xizmat koʻrsatuvchi tashkilotlar” deb yuritiladi) balansiga bepul berish tartibini belgilaydi.

2. Quyidagi muhandislik tarmoqlari va inshootlar xizmat koʻrsatuvchi tashkilotlar balansiga berilishi kerak:

a) energetika xoʻjaligi boʻyicha — 6—10 kv. elektr tarmoqlari, shu jumladan transformator punktlari va ularni elektr bilan taʼminlovchi yuqori kuchlanish tarmoqlari, transformator kichik stansiyalari hamda markaziy taqsimlash punktlaridan chiqish izolyatorlaridan boshlab shuningdek tashqi qurilmalar (tayanchlar, chiroqlar, havo va kabel tarmoqlari);

b) markazlashtirilgan issiqlik taʼminoti boʻyicha — binolar va inshootlarning taqsimlovchi (mavze ichidagi va hovli ichidagi) tashqi suv va bugʻ tarmoqlari kirishidan berkituvchi zadvijkalar yoki ventillargacha, shuningdek alohida turgan issiqlik punktlari va binolar guruhiga issiqlikni taqsimlovchi boyler punktlar;

v) suv quvuri-kanalizatsiya xoʻjaligi boʻyicha:

suv quvurlarining mavze ichidagi va hovli ichidagi tarmoqlari, quduqlar va boshqarish uzellari kameralari bilan, shaharlar va tumanlar hokimliklarining suv quvuri-kanalizatsiya tashkilotlariga tegishli boʻlgan suv quvuri liniyalariga ulanish joyidan boshlab suv quvuri liniyasi olib boriladigan binolarning devorlari va yakka tartibdagi uy-joylarning hovlilari hududlari toʻsiqlarigacha, shuningdek alohida turgan nasos qurilmalari, suv olish kolonkalari va artezian quduqlar;

mavze ichidagi va hovli ichidagi xoʻjalik-fekal kanalizatsiya tarmoqlari hamda ularga qurilgan inshootlar, shu jumladan binolar kanalizatsiyasining chiqish quduqlari (yakka tartibdagi uy-joylarning va tashkilotlarning oʻralgan hovlisi hududi va ularga qurilgan inshootlardan tashqari);

g) gaz xoʻjaligi boʻyicha — mavze ichidagi va hovli ichidagi gaz quvurlari ularga joylashgan gaz taqsimlash punktlari va gaz taqsimlashni boshqarish punktlari bilan birgalikda, gaz tarmoqlari va suyuq gazning hovlidagi idishlari, uylardagi guruh qilib oʻrnatilgan gaz ballonlari.

3. Quyidagi tashqi muhandislik tarmoqlari va inshootlar xizmat koʻrsatuvchi tashkilotlar balansiga berilmaydi:

a) energetika xoʻjaligi boʻyicha — ishlab chiqarish korxonalarining texnologiya maqsadlaridagi elektr tarmoqlari;

b) suv quvuri-kanalizatsiya xoʻjaligi boʻyicha:

binolar ichida joylashgan sugʻorish va yuvish uchun moʻljallangan suv quvurlari, texnik yoʻlaklar va tonnellardagi boshqa muhandislik tarmoqlari bilan birgalikda;

binolarda joylashgan suv quvuri qoʻshimcha nasos qurilmalari;

yakka tartibdagi uy-joylar, tashkilotlarning oʻralgan hovlisi hududida joylashgan suv quvuri, kanalizatsiya tarmoqlari va inshootlar, suv olish kolonkalari va qurilmalar, texnik shartlarga koʻra ulushli qatnashish mablagʻlari hisobiga qurilgan tarmoqlar va inshootlardan tashqari;

binodan kanalizatsiya qudugʻigacha chiqish liniyasi;

v) gaz xoʻjaligi boʻyicha — gaz bilan taʼminlovchi tashkilotlar tomonidan texnik xizmat koʻrsatishda foydalaniladigan uylarning ichidagi gaz apparatlari (gaz plitalari, taganlar, suv isitish apparatlari, uylarning ichidagi bugʻ qozonlarini va yakka tartibdagi uylar, kvartiralarni isitish uchun oʻrnatilgan gorelkalar va avtomatlar).

4. Tashqi muhandislik tarmoqlari va inshootlarni xizmat koʻrsatuvchi tashkilotlar balansiga berish buyurtmachi tomonidan moliyalashtirishning markazlashtirilgan manbalari hisobiga qurilgan obyektni foydalanishga qabul qilib olish toʻgʻrisida davlat komissiyasining belgilangan tartibda tasdiqlangan dalolatnomasi asosida amalga oshiriladi.

5. Moliyalashtirishning markazlashtirilgan manbalari hisobiga qurilgan, foydalanishga topshirilayotgan obyektni qabul qilib olishda buyurtmachi tomonidan har bir xizmat koʻrsatuvchi tashkilot boʻyicha balansga berilayotgan tashqi muhandislik tarmoqlari va inshootlarning amaldagi qiymati majburiy tartibda alohida aniqlanishi shart.

6. Tashqi muhandislik tarmoqlari va inshootlarni xizmat koʻrsatuvchi tashkilotlar balansiga berishda buyurtmachi moliyalashtirishning markazlashtirilgan manbalari hisobiga qurilgan obyektni foydalanishga qabul qilib olish toʻgʻrisida davlat komissiyasining dalolatnomasiga muvofiq berilayotgan tashqi muhandislik tarmoqlari va inshootlarga oldindan tayyorlangan va belgilangan tartibda rasmiylashtirilgan ijro etuvchi hujjatlarni xizmat koʻrsatuvchi tashkilotlarga majburiy tartibda berishi kerak.

Davlat komissiyasining dalolatnomasiga berilayotgan asosiy fondlarning joriy narxlardagi qiymati va oʻrnatilgan asbob-uskunalarning spetsifikatsiyasi koʻrsatilgan holda ular toʻgʻrisidagi maʼlumotlar ilova qilinadi.

7. Xizmat koʻrsatuvchi tashkilotlar tomonidan tashqi muhandislik tarmoqlari va inshootlarni balansga qabul qilish ularni foydalanishga qabul qilish dalolatnomasi boʻyicha belgilangan tartibda amalga oshiriladi.

8. Xizmat koʻrsatuvchi tashkilotlar balansiga berilayotgan tashqi muhandislik tarmoqlari va inshootlarning chegaralari muhandislik tarmoqlari va inshootlardan texnik foydalanish qoidalariga muvofiq belgilanadi.

9. Xizmat koʻrsatuvchi tashkilotlar tashqi muhandislik tarmoqlari va inshootlarni oʻz balansiga qabul qilib olgandan keyin joriy yilga oʻzlarining prognoz ishlab chiqarish-moliyaviy koʻrsatkichlarini belgilangan tartibda aniqlashtiradilar.

10. Xizmat koʻrsatuvchi tashkilotlar tomonidan qabul qilingan tashqi muhandislik tarmoqlari va inshootlar taʼminoti xizmat koʻrsatuvchi tashkilotlar tomonidan koʻrsatib oʻtilgan tashqi muhandislik tarmoqlari va inshootlardan foydalanishdan olingan daromadlar hisobiga amalga oshiriladi.

11. Moliyalashtirishning markazlashtirilgan manbalari hisobiga qurilgan, foydalanishga topshirilgan, biroq xizmat koʻrsatuvchi tashkilotlar balansiga berilmagan obyektlarning tashqi muhandislik tarmoqlari va inshootlarini xizmat koʻrsatuvchi tashkilotlar balansiga berish ham mazkur Nizomda belgilangan tartibda amalga oshiriladi.

12. Uy-joy mulkdorlari shirkatlari hovlilarning hududlaridan foydalanishda qopqoqli tuynuklarning saqlanishini hamda hovlilar, mavzelar, kichik dahalar va uy-joylar hududida joylashgan suv quvurlari va kanalizatsiyaning koʻrish quduqlariga, boshqaruv uzellariga erkin yaqinlashishni taʼminlashlari kerak.