Tovarlar va boyliklarni O‘zbekiston Respublikasining Davlat chegarasi orqali noqonuniy olib o‘tilishini bartaraf etishda chegara xizmatlari va bojxona organlarining o‘zaro hamkorligini mustahkamlash, namuna ko‘rsatgan harbiy xizmatchilar va xodimlarning moddiy rag‘batlantirilishini ta’minlash, shuningdek chegara va bojxona postlarining moddiy-texnika bazasini rivojlantirish maqsadida Vazirlar Mahkamasi qaror qiladi:

1. O‘zbekiston Respublikasi Davlat xavfsizlik xizmatining Davlat chegaralarini himoya qiluvchi qo‘mitasi va Davlat bojxona qo‘mitasiga Davlat xavfsizlik xizmati huzurida budjetdan tashqari yagona Ijtimoiy rivojlantirish va tovarlarning O‘zbekiston Respublikasi chegarasi orqali qonuniy olib o‘tilishini ta’minlovchi xodimlarni moddiy rag‘batlantirish jamg‘armasini tashkil qilishga ruxsat etilsin.

Belgilab qo‘yilsinki, ko‘rsatib o‘tilgan budjetdan tashqari yagona Jamg‘arma mablag‘laridan Davlat xavfsizlik xizmati Chegara qo‘shinlari hamda bojxona organlarining tovarlar va mol-mulkning O‘zbekiston Respublikasi chegarasi orqali noqonuniy olib o‘tilishini bartaraf etishda bevosita qatnashuvchi harbiy xizmatchilari va xodimlarini rag‘batlantirishda, Davlat xavfsizlik xizmati Chegara qo‘shinlari harbiy xizmatchilarining ipoteka krediti bo‘yicha dastlabki badalni to‘lashida, shuningdek bojxona va chegara postlarining moddiy-texnika bazasini mustahkamlashda maqsadli foydalaniladi.

2. 2004-yil 1-noyabrdan boshlab O‘zbekiston Respublikasi chegarasi orqali noqonuniy olib o‘tilishi natijasida bojxona organlari va chegarachilar tomonidan olib qo‘yilgan hamda qonunchilikda belgilangan tartibda davlat daromadiga o‘tkazilgan tovarlar yoki boshqa boyliklarni sotishdan olingan mablag‘larni taqsimlashning quyidagi tartibi belgilansin:

42 foizi — davlat budjetiga;

50 foizi — budjetdan tashqari yagona Ijtimoiy rivojlantirish va tovarlarning chegara orqali qonuniy olib o‘tilishini ta’minlovchi xodimlarni moddiy rag‘batlantirish jamg‘armasiga;

8 foizi — Sudlar va adliya organlarini rivojlantirish jamg‘armasiga.

3. Quyidagi tartib belgilansin, unga ko‘ra davlat daromadiga o‘tkazilgan tovarlarni sotish umumiy summasidan ko‘rsatib o‘tilgan budjetdan tashqari yagona Jamg‘armaga tushadigan mablag‘lar teng ulushlarda qayta taqsimlanadi:

Milliy xavfsizlik xizmatining Chegara qo‘shinlariga — 25 foiz;

Davlat bojxona qo‘mitasiga — 25 foiz hamda tegishli subhisob raqamlariga o‘tkaziladi.

4. O‘zbekiston Respublikasi Moliya vazirligi Milliy xavfsizlik xizmati va Davlat bojxona qo‘mitasi bilan birgalikda 2004-yil 1-noyabrgacha bo‘lgan muddatda budjetdan tashqari yagona Ijtimoiy rivojlantirish va tovarlarning chegara orqali qonuniy olib o‘tilishini ta’minlovchi xodimlarni moddiy rag‘batlantirish jamg‘armasiga mablag‘larni o‘tkazish, ularni qayta taqsimlash hamda ulardan foydalanish tartibi to‘g‘risidagi nizomni belgilangan tartibda ishlab chiqsin va tasdiqlasin.

5. O‘zbekiston Respublikasi Adliya vazirligi Moliya vazirligi va boshqa manfaatdor idoralar bilan birgalikda bir oy muddatda amaldagi qonun hujjatlariga ushbu qarordan kelib chiquvchi o‘zgartirishlar va qo‘shimchalar to‘g‘risida Vazirlar Mahkamasiga takliflar kiritsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.