2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasiga muvofiq, shuningdek, jismoniy tarbiya va sport sohasida tadbirkorlikni hamda xususiy sektorni yanada rivojlantirish, aholiga koʻrsatiladigan sport-sogʻlomlashtirish xizmatlari sifatini yaxshilash, jismoniy tarbiya va sport sohasida davlat-xususiy sheriklik uchun qulay sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Jismoniy tarbiya va sport vazirligi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasining tijorat tashkilotlari tomonidan Jismoniy tarbiya va sport vazirligining jismoniy tarbiya-sogʻlomlashtirish va sport inshootlari, shu jumladan boʻsh turgan va faoliyat koʻrsatmayotgan inshootlari, shuningdek, suzish havzalari (keyingi oʻrinlarda sport inshootlari deb ataladi) bazasida jismoniy tarbiya-sport hamda sogʻlomlashtirish xizmatlarini (keyingi oʻrinlarda sogʻlomlashtirish xizmatlari deb ataladi) davlat-xususiy sheriklik asosida koʻrsatish tartibini joriy etish toʻgʻrisidagi taklifi maʼqullansin.

2. Quyidagilar sogʻlomlashtirish xizmatlarini koʻrsatish boʻyicha davlat-xususiy sheriklikni yanada rivojlantirishning asosiy yoʻnalishlari va vazifalari etib belgilansin:

iqtidorli bolalar va isteʼdodli yoshlarni aniqlash hamda qoʻllab-quvvatlash orqali jismoniy tarbiya va sport bilan shugʻullanishning yuqori sifatini taʼminlaydigan qulay shart-sharoitlar yaratish;

sogʻlom raqobat muhitini shakllantirish uchun anʼanaviy xizmatlar bilan bir qatorda, sifatli va ommabop sogʻlomlashtirish xizmatlaridan foydalanishning muqobil imkoniyatlarini taqdim etish boʻyicha pulli sogʻlomlashtirish xizmatlari bozorini jadal rivojlantirish;

ilgʻor xalqaro tajribani hisobga olgan holda, jismoniy tarbiya va sport bilan shugʻullanish uchun innovatsion shakllar, uslublar va zamonaviy texnologiyalardan foydalanish asosida jismoniy tarbiya va sport sohasida samaradorlik va natijadorlikni oshirish.

3. Oʻzbekiston Respublikasi Jismoniy tarbiya va sport vazirligi:

a) davlat-xususiy sheriklik subyektlarining faoliyatini yanada rivojlantirishga oid asosiy yoʻnalishlar va vazifalarni hisobga olgan holda pulli sport toʻgaraklari, seksiyalari va boshqa sport-sogʻlomlashtirish tadbirlarini tashkil etish orqali Sport inshootlaridan samarali va oqilona foydalanish chora-tadbirlari rejasini bir oy muddatda ishlab chiqsin hamda tasdiqlasin;

zamonaviy axborot-kommunikatsiya texnologiyalari hamda ommaviy axborot vositalaridan foydalangan holda, davlat-xususiy sheriklik asosida taqdim etiladigan sport inshootlari toʻgʻrisida manfaatdor jismoniy hamda yuridik shaxslarning keng xabardor qilinishini taʼminlasin;

b) ikki oy muddatda:

sport inshootlarining namunaviy shtatlarini;

sport inshootlaridan foydalanganlik uchun ijara toʻlovlari stavkalarini hisob-kitob qilish metodikasi toʻgʻrisida, jumladan, birinchi navbatda, davlat-xususiy sheriklik asosida tashkil etilgan subyektlarga muayyan imtiyozlar berish nazarda tutilgan nizomni;

oʻn olti yoshgacha boʻlgan bolalar, nogironlar va aholining ijtimoiy himoyaga muhtoj boshqa toifalariga imtiyozli shartlar asosida yoki bepul xizmatlar koʻrsatish nazarda tutilgan sport inshootlarida aholiga sogʻlomlashtirish xizmatlari koʻrsatish tartibi toʻgʻrisidagi nizomni ishlab chiqsin va belgilangan tartibda tasdiqlasin.

4. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari bilan birgalikda sogʻlomlashtirish xizmatlarini koʻrsatish faoliyati bilan shugʻullanadigan yuridik shaxslarga davlat mulki boʻlgan va foydalanilmayotgan binolar, obyektlar hamda inshootlarning davlat-xususiy sheriklik shartlari asosida, belgilangan tartibda sotilishini taʼminlasin.

5. Sogʻlomlashtirish xizmatlarini koʻrsatish faoliyati bilan shugʻullanadigan yuridik shaxslarga ilgʻor xorijiy tajribani hisobga olgan holda:

bolalarda sportga muhabbat hissini, oʻsib kelayotgan yosh avlod ongida sport bilan shugʻullanishning muhimligi, sogʻlom turmush tarzini yuritish, maʼnaviy va jismoniy komilikka intilish tushunchasini shakllantirish, ularni salbiy taʼsirlardan himoya qilish va zararli odatlardan xalos qilish, bolalarda qatʼiy feʼl-atvor, Vatanga muhabbat va oʻz mamlakati bilan faxrlanish tuygʻularini qaror toptirish;

jismoniy tarbiya-sport jarayonini zamonaviy texnologiyalardan foydalangan holda sport koʻnikmalarini chuqur oʻrganish yoʻnalishida tashkil etish;

jismoniy tarbiya-sport jarayoniga mashgʻulotlar oʻtkazish uchun xorijiy trenerlar va mutaxassislarni jalb etish, shuningdek, ilgʻor tajribani joriy qilish tavsiya etilsin.

6. Oʻzbekiston Respublikasi tijorat banklariga yangi tashkil etilayotgan va oʻz faoliyatini kengaytirayotgan nodavlat sport tashkilotlarini qoʻllab-quvvatlash maqsadida Oʻzbekiston Respublikasi Jismoniy tarbiya va sport vazirligi tomonidan taqdim etiladigan manzilli roʻyxatlar asosida tadbirkorlarga sport inshootlarini qurish, rekonstruksiya qilish hamda zamonaviy sport uskunalarini xarid qilish uchun belgilangan tartibda kreditlar berish tavsiya etilsin.

7. Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari barpo etiladigan va rekonstruksiya qilinadigan nodavlat sport hamda sport-sogʻlomlashtirish inshootlarini barcha zarur tashqi muhandislik-kommunikatsiya infratuzilmasi (elektr energiyasi, gaz, suv taʼminoti, kanalizatsiya, avtomobil yoʻllari va boshqalar) bilan belgilangan tartibda taʼminlasinlar.

8. Oʻzbekiston Respublikasi Jismoniy tarbiya va sport vazirligi, Oʻzbekiston yoshlar ittifoqi, Oʻzbekiston Xotin-qizlar qoʻmitasi aholini, ayniqsa, uyushmagan yoshlarni jismoniy tarbiya va sport bilan shugʻullanishga keng jalb qilish uchun davlat-xususiy sheriklik shartlari asosida sogʻlomlashtirish xizmatlari koʻrsatuvchi tashkil etilayotgan tashkilotlarni qoʻllab-quvvatlashga doir amaliy chora-tadbirlarni muntazam amalga oshirsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari K.V. Akmalov hamda Oʻzbekiston Respublikasi Jismoniy tarbiya va sport vaziri Sh.X. Isroilov zimmasiga yuklansin.