Oʻzbekiston Respublikasi Prezidentining “Nodavlat taʼlim xizmatlarini koʻrsatish faoliyatini yanada rivojlantirish chora-tadbirlari toʻgʻrisida” 2017-yil 15-sentabrdagi PQ-3276-son qarori ijrosini taʼminlash, shuningdek, nodavlat taʼlim xizmatlari koʻrsatish sohasida faoliyat koʻrsatayotgan yuridik shaxslar uchun qulay shart-sharoitlar yaratish, davlat-xususiy sheriklik asosida tashkil etilayotgan taʼlim muassasalari tarmogʻini kengaytirish, mazkur faoliyatni tartibga soluvchi normativ-huquqiy hujjatlarni takomillashtirish hamda nodavlat taʼlim xizmatlari koʻrsatish sohasidagi faoliyatni litsenziyalash tartibini soddalashtirish orqali litsenziya daʼvogarlariga qulay imkoniyatlar yaratish maqsadida Vazirlar Mahkamasi qaror qiladi:

1. Belgilab qoʻyilsinki, 2018-yil 1-apreldan boshlab nodavlat taʼlim xizmatlari koʻrsatish sohasidagi faoliyat Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi tomonidan litsenziyalanadi.

2. Nodavlat taʼlim xizmatlari koʻrsatish sohasidagi faoliyatni litsenziyalash tartibi toʻgʻrisida nizom 1-ilovaga muvofiq tasdiqlansin.

3. Oʻzbekiston Respublikasi Maktabgacha taʼlim vazirligi va Xalq taʼlimi vazirligi har bir tuman (shahar) maktabgacha va xalq taʼlimi boʻlimlaridan malakali mutaxassislarni nodavlat taʼlim xizmatlari koʻrsatish sohasidagi faoliyatni litsenziyalashda ekspertiza xulosalarini tayyorlash va litsenziya daʼvogariga taqdim etish jarayoniga jalb etish choralarini koʻrsinlar.

4. Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi oʻn besh kun muddatda Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Adliya vazirligi hamda boshqa vazirliklar va idoralar bilan birgalikda nodavlat taʼlim xizmatlari koʻrsatishga litsenziya daʼvogarlarining arizalarini davlat xizmatlari markazlari va Yagona interaktiv davlat xizmatlari portali orqali qabul qilish va koʻrib chiqish tizimini ishlab chiqib amaliyotga joriy etsin.

5. Oʻzbekiston Respublikasi Hukumatining 2-ilovaga muvofiq ayrim qarorlari 2018-yil 1-apreldan boshlab oʻz kuchini yoʻqotgan deb hisoblansin.

6. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Q.V. Akmalov va Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi boshligʻi U.N. Tashkenbayev zimmasiga yuklansin.

1. Ushbu Nizom nodavlat taʼlim xizmatlari koʻrsatish sohasidagi faoliyatni litsenziyalash tartibini belgilaydi.

2. Nodavlat taʼlim xizmatlari koʻrsatish sohasidagi faoliyatni tashkil etish uchun yuridik shaxslarga litsenziya berish, litsenziyaning amal qilishini toʻxtatib turish yoki tugatish, shuningdek, uni bekor qilish va qayta rasmiylashtirish Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi tomonidan amalga oshiriladi.

3. Nodavlat taʼlim xizmatlari koʻrsatuvchi yuridik shaxslarga taʼlimning har bir turi uchun alohida litsenziya beriladi. Litsenziyada faoliyatning litsenziyalanayotgan turi, taʼlim faoliyati yoʻnalishlari roʻyxati aniq koʻrsatiladi.

Nodavlat taʼlim muassasalarining chet tillarni oʻrganish boʻyicha oʻquv kurslarini tashkil etish sohasidagi faoliyatini litsenziyalash tartibi qonun hujjatlari bilan belgilanadi.

4. Nodavlat taʼlim xizmatlari faoliyatini amalga oshirish huquqini beruvchi litsenziya 5 yil muddatga beriladi.

5. Quyidagilar nodavlat taʼlim xizmatlari koʻrsatuvchi yuridik shaxslar faoliyatini amalga oshirishda litsenziya talablari va shartlari hisoblanadi:

Oʻzbekiston Respublikasining taʼlim sohasidagi qonun va qonunosti hujjatlariga majburiy rioya qilish;

taʼlim-tarbiya jarayonini davlat taʼlim standartlariga (davlat talablariga), oʻquv rejalariga va taʼlim dasturlariga muvofiq tashkil etish;

litsenziya daʼvogarida litsenziyalanayotgan faoliyatni bajarish uchun moʻljallangan, unga mulkiy yoki boshqa ashyoviy huquq bilan tegishli boʻlgan, belgilangan talablarga muvofiq binolarning (xonalarning) mavjud boʻlishi;

auditoriyalarni, oʻquv xonalarini zamonaviy axborot-kommunikatsiya asbob-uskunalari, oʻqitishning texnik vositalari va anjomlar bilan jihozlash;

taʼlim dasturlarining belgilangan darajasini amalga oshirish uchun oʻquv binolarini zarur darsliklar, oʻquv-metodik adabiyotlar va boshqa kutubxona-axborot resurslari hamda vositalari bilan taʼminlash;

taʼlim dasturlarini umumiy oʻrta, kasb-hunar va oliy taʼlim davlat taʼlim standartlariga muvofiq, shuningdek, maktabgacha taʼlim, maktabdan tashqari taʼlim, kadrlar malakasini oshirish va ularni qayta tayyorlashga qoʻyiladigan davlat talablariga muvofiq amalga oshirish;

taʼlimning majburiy ravishda dunyoviy xarakterda boʻlishi, taʼlim jarayonida urushni, zoʻravonlikni targʻib qilishdan foydalanishga, fuqarolarning konstitutsiyaviy huquqlari va erkinligi kamsitilishiga, mamlakatdagi xavfsizlik va ijtimoiy-siyosiy barqarorlikka, jamiyatning huquqiy va maʼnaviy asoslari, fuqarolar osoyishtaligiga, millatlararo va dinlararo totuvlikka raxna solinishiga, Oʻzbekiston Respublikasi toʻgʻrisida notoʻgʻri axborotlar tarqatilishiga hamda uning tarixiy, madaniy va maʼnaviy qadriyatlari buzib koʻrsatilishiga yoʻl qoʻymaslik;

iqtidorli bolalar va isteʼdodli yoshlarni aniqlash va qoʻllab-quvvatlash orqali taʼlim-tarbiyaning yuqori sifatini taʼminlaydigan qulay shart-sharoitlar yaratish;

ilgʻor xalqaro tajribalarni inobatga olib, oʻqitishning innovatsion shakllari hamda zamonaviy texnologiyalaridan foydalanish asosida taʼlim sohasidagi samaradorlik va natijadorlikni oshirish;

ijtimoiy himoyaga muhtoj oilalarning qobiliyatli va iqtidorli farzandlarini tanlov asosida muassasadagi jami tarbiyalanuvchilar, oʻquvchilar umumiy sonining 10 foizidan kam boʻlmagan miqdorda bepul oʻqishga qabul qilish;

bitiruvchilarga belgilangan tartibda taʼlim toʻgʻrisida hujjat berish.

6. Yuridik shaxslarning avtomototransport vositalari va shahar elektr transport vositalari haydovchilarini tayyorlash, qayta tayyorlash va ularning malakasini oshirish bilan bogʻliq yoʻnalishlar boʻyicha faoliyatni litsenziyalash uchun qoʻshimcha litsenziya talablari va shartlari quyidagilardan iborat:

oʻquv jarayoniga darslarning oʻzlashtirilishini oshirishga yoʻnaltirilgan oʻqitish monitoringini olib borish va rejalashtirishning avtomatlashtirilgan axborot tizimini joriy etish;

butun oʻquv jarayonini qamrab oladigan animatsiya effektlari va videokontentga ega elektron oʻquv-uslubiy qoʻllanmalarning mavjud boʻlishi, har bir taʼlim oluvchini (tinglovchini) ushbu oʻquv qoʻllanmalari bilan taʼminlash;

malaka oshirish kurslarida bilimlar oʻzlashtirilishini aniqlash uchun animatsiya effektlariga ega yagona test dasturining mavjud boʻlishi;

har bir oʻqituvchini oʻquv dasturlari, turli pedagogika texnologiyalaridan foydalanish yoʻriqnomalarini oʻz ichiga olgan batafsil texnologik xaritalar bilan taʼminlash;

har biri kamida 40 kvadrat metr maydonga ega boʻlgan va bitta hududda joylashgan ikki yoki undan koʻp auditoriyalarning mavjud boʻlishi;

har bir auditoriyada videoproyektorlar, kompyuterlar, audio va video kuzatuv tizimlari, Yoʻl harakati qoidalari boʻyicha koʻrgazmali qoʻllanmalar, shuningdek, oʻquv jarayoni va yakuniy test sinovining oshkoraligini taʼminlash uchun jarayonni yozib olish tizimining mavjud boʻlishi;

taʼlim oluvchilarning bilimlarini yakuniy test sinovidan oʻtkazish uchun kompyuterlar bilan jihozlangan alohida auditoriyaning mavjud boʻlishi.

7. Nodavlat taʼlim xizmatlari koʻrsatish sohasida taʼlim turlari boʻyicha litsenziya olish uchun litsenziya daʼvogari quyidagi hujjatlarni davlat xizmatlari markazlariga taqdim etadi yoki elektron shaklda Yagona interaktiv davlat xizmatlari portaliga yuboradi:

litsenziya berish toʻgʻrisidagi ariza (unda yuridik shaxsning nomi va tashkiliy-huquqiy shakli, joylashgan joyi, pochta manzili, taʼlim faoliyatini amalga oshirish joyining manzili, bank muassasasining nomi va bankdagi hisob raqami, faoliyatning litsenziyalanayotgan turi, taʼlim faoliyati yoʻnalishlari roʻyxati. Litsenziya berish toʻgʻrisidagi arizada litsenziya daʼvogarining litsenziya talablari va shartlariga rioya qilishi toʻgʻrisidagi roziligi va elektron manzili koʻrsatiladi);

yongʻin va sanitariya-epidemiologiya nazorati organlarining mavjud binolar va xonalarning yongʻin xavfsizligi talablariga va sanitariya-gigiyena normalariga muvofiqligi toʻgʻrisidagi xulosalari;

pedagog kadrlar haqida maʼlumot;

oʻquv rejasi va dasturlarining elektron nusxalari;

ariza koʻrib chiqilganligi uchun litsenziya daʼvogari tomonidan yigʻim toʻlanganligini tasdiqlovchi hujjat nusxasi.

Litsenziya berish toʻgʻrisidagi arizada litsenziya daʼvogarining elektron manzili koʻrsatilgani uning arizasi boʻyicha qabul qilingan qaror haqida axborot tizimi orqali elektron shaklda xabarnoma olishga boʻlgan roziligi hisoblanadi.

8. Ishonchsiz yoki notoʻgʻri maʼlumotlar taqdim etilganligi uchun litsenziya daʼvogari qonun hujjatlariga muvofiq javob beradi.

9. Litsenziya daʼvogarining arizasi koʻrib chiqilganligi uchun eng kam oylik ish haqining ikki baravari miqdorida yigʻim undiriladi.

Litsenziya daʼvogarining litsenziya berish toʻgʻrisidagi arizasi koʻrib chiqilganligi uchun yigʻim summasi litsenziyalovchi organ hisob raqamiga oʻtkaziladi.

Davlat xizmatlari markazlariga shaxsan murojaat qilingan taqdirda, arizani koʻrib chiqish uchun toʻlanadigan yigʻimlar summasining 20 foizi belgilangan tartibda Oʻzbekiston Respublikasi Adliya vazirligi huzuridagi Davlat xizmatlari agentligining maxsus hisob raqamiga, Yagona interaktiv davlat xizmatlari portali orqali murojaat qilinganda arizani koʻrib chiqish uchun toʻlanadigan yigʻimlar summasining 10 foizi belgilangan tartibda Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining maxsus hisob raqamiga oʻtkaziladi.

Litsenziya daʼvogari berilgan arizadan voz kechgan taqdirda toʻlangan yigʻim summasi qaytarib berilmaydi.

10. Nodavlat taʼlim xizmatlari koʻrsatish sohasidagi faoliyatni litsenziyalash ushbu Nizomga ilovadagi sxemaga muvofiq amalga oshiriladi.

Ariza davlat xizmatlari markazlari orqali topshirilganda masʼul xodim roʻyxat asosida litsenziya berish uchun ariza va boshqa maʼlumotlarni qabul qiladi. Davlat xizmatlari markazining masʼul xodimi arizachiga ariza qabul qilingan sana qayd etilgan roʻyxatga olish nusxasini beradi.

Davlat xizmatlari markazlarining masʼul xodimi litsenziya daʼvogarining arizasini zarur maʼlumotlari bilan birga Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasiga hujjat qabul qilingan kuni yuboradi.

Ariza Yagona interaktiv davlat xizmatlari portali orqali yuborilganda, litsenziya daʼvogarining arizasi qabul qilinganligi haqidagi elektron xabar Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasining masʼul xodimi tomonidan litsenziya daʼvogarining elektron manziliga yuboriladi.

Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi arizani qabul qilgandan soʻng 10 kun ichida hujjatlarning litsenziya talablari va shartlariga muvofiqligini oʻrganadi, ijobiy qaror qabul qilinganda elektron litsenziyani generatsiya qiladi, elektron raqamli imzo bilan tasdiqlab, davlat boji toʻlanganidan keyin davlat xizmatlari markazlari yoki Yagona interaktiv davlat xizmatlari portali orqali litsenziya daʼvogariga taqdim etadi.

Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi Maktabgacha taʼlim vazirligi va Xalq taʼlimi vazirligi bilan birgalikda har bir tuman (shahar) maktabgacha va xalq taʼlimi boʻlimlaridan malakali mutaxassislarni jalb etgan holda, nodavlat taʼlim xizmatlari koʻrsatish sohasidagi faoliyatni litsenziyalash uchun ekspertiza xulosalarini tayyorlash va litsenziya daʼvogariga taqdim etish jarayonini tashkil etadi.

Litsenziya berishni rad etish toʻgʻrisida qaror qabul qilingan taqdirda, 1 kun muddat ichida litsenziya daʼvogariga rad etish sabablari va litsenziya daʼvogari ularni bartaraf etgan holda qayta koʻrib chiqish uchun ariza berishi mumkin boʻlgan muddat koʻrsatilgan bildirishnomani davlat xizmatlari markazlari yoki Yagona interaktiv davlat xizmatlari portali orqali yuboradi.

Litsenziya berish yoki litsenziya berishni rad etish toʻgʻrisidagi qaror litsenziya daʼvogarining arizasi olingan kundan boshlab 10 kundan ortiq boʻlmagan muddatda qabul qilinadi.

11. Litsenziyalar qonunchilikda belgilangan tartibda rasmiylashtiriladi.

Berilgan, toʻxtatib turilgan, yangilangan, qayta rasmiylashtirilgan, bekor qilingan, shuningdek, amal qilishi toʻxtatilgan litsenziyalar “Litsenziya” axborot tizimlari kompleksi reyestriga kiritiladi.

12. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunida nazarda tutilgan sabablar boʻyicha rad etilishi mumkin.

Litsenziya daʼvogari litsenziya berishning rad etilishi toʻgʻrisidagi qaror, shuningdek, Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi xodimlarining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga ega.

13. Litsenziya berish rad etilishiga asos boʻlgan sabablar litsenziya daʼvogari tomonidan bartaraf etilgan taqdirda, hujjatlarni takroran koʻrib chiqish litsenziya daʼvogarining arizasi olingan kundan boshlab 10 kundan ortiq boʻlmagan muddatda koʻrib chiqiladi.

Litsenziya daʼvogarining arizasini qayta koʻrib chiqishda litsenziya berishni rad etish toʻgʻrisida avvalgi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi.

Litsenziya daʼvogarlarining arizalari takroran koʻrib chiqilgani uchun yigʻim undirilmaydi.

Litsenziya berish rad etilgani toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

14. Litsenziat qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtganidan keyin bir oy muddatda litsenziyalovchi organga, koʻrsatib oʻtilgan maʼlumotlarni tasdiqlovchi tegishli hujjatlarni ilova qilgan holda, litsenziyani qayta rasmiylashtirish toʻgʻrisida davlat xizmatlari markazlariga yoki Yagona interaktiv davlat xizmatlari portali orqali elektron shaklda litsenziyani qayta rasmiylashtirish toʻgʻrisida ariza berishi shart.

15. Litsenziat taʼlim faoliyatini olib borish manzili oʻzgarsa, qoʻshimcha manzilda faoliyat olib borsa, qoʻshimcha taʼlim yoʻnalishlari boʻyicha faoliyat olib bormoqchi boʻlsa, qayta roʻyxatdan oʻtganidan keyin bir oy muddatda litsenziyalovchi organga, koʻrsatib oʻtilgan maʼlumotlarni tasdiqlovchi tegishli hujjatlarni ilova qilgan holda, litsenziyani qayta rasmiylashtirish toʻgʻrisida Davlat xizmatlari markazlariga yoki Yagona interaktiv davlat xizmatlari portali orqali ariza berishi shart.

16. Litsenziat litsenziya qayta rasmiylashtirilgunga qadar unda koʻrsatilgan faoliyatni avval berilgan litsenziya asosida amalga oshiradi.

17. Litsenziya Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi tomonidan tegishli hujjatlar ilova qilingan holda litsenziyani qayta rasmiylashtirish toʻgʻrisidagi ariza olingan kundan boshlab 10 kundan ortiq boʻlmagan muddatda qayta rasmiylashtiriladi.

Litsenziyani qayta rasmiylashtirishda litsenziya daʼvogarining litsenziya berish toʻgʻrisidagi arizasi koʻrib chiqilgani uchun toʻlanadigan yigʻimning 50 foizi undiriladi. Yigʻim summasi litsenziyalovchi organ hisob raqamiga oʻtkaziladi.

Litsenziyani qayta rasmiylashtirish toʻgʻrisidagi ariza davlat xizmatlari markazlari orqali yuborilganda, arizani koʻrib chiqish uchun toʻlanadigan yigʻimlar summasining 20 foizi belgilangan tartibda Oʻzbekiston Respublikasi Adliya vazirligi huzuridagi davlat xizmatlari agentligining maxsus hisob raqamiga, Yagona interaktiv davlat xizmatlari portali orqali murojaat qilinganda, arizani koʻrib chiqish uchun toʻlanadigan yigʻimlar summasining 10 foizi belgilangan tartibda Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining maxsus hisob raqamiga oʻtkaziladi.

18. Litsenziyaning amal qilish muddati litsenziatning arizasiga koʻra uzaytiriladi.

Litsenziyaning amal qilish muddatini uzaytirish toʻgʻrisidagi ariza davlat xizmatlari markazlariga yoki Yagona interaktiv davlat xizmatlari portali orqali elektron shaklda litsenziyaning amal qilish muddati tugagunga qadar ikki oydan kechikmay berilishi kerak.

19. Litsenziya daʼvogarining amaldagi litsenziyasi amal qilish muddatini uzaytirish uchun arizasini koʻrib chiqishda eng kam oylik ish haqining ikki baravari miqdorida yigʻim undiriladi.

Litsenziyaning amal qilish muddatini uzaytirish toʻgʻrisidagi ariza davlat xizmatlari markazlari yoki Yagona interaktiv davlat xizmatlari portali orqali berilgan taqdirda, yigʻim summasi litsenziyalovchi organning hisob raqamiga oʻtkaziladi.

Litsenziyaning amal qilish muddatini uzaytirish toʻgʻrisidagi ariza davlat xizmatlari markazlari orqali yuborilganda, arizani koʻrib chiqish uchun toʻlanadigan yigʻim summasining 20 foizi belgilangan tartibda Oʻzbekiston Respublikasi Adliya vazirligi huzuridagi Davlat xizmatlari agentligining maxsus hisob raqamiga, Yagona interaktiv davlat xizmatlari portalining elektron manzili orqali murojaat qilinganda, arizani koʻrib chiqish uchun toʻlanadigan yigʻim summasining 10 foizi belgilangan tartibda Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining maxsus hisob raqamiga oʻtkaziladi.

Litsenziyaning amal qilish muddatini uzaytirish yoki uzaytirishni rad etish toʻgʻrisidagi qaror litsenziya berish uchun nazarda tutilgan tartibda qabul qilinadi.

20. Litsenziya blankalari qatʼiy hisobda turadigan hujjatlar hisoblanadi, hisobga olish seriyasi, tartib raqami va himoyalanganlik darajasiga ega boʻladi.

21. Litsenziat litsenziya berish toʻgʻrisida qaror qabul qilingani haqida bildirishnoma yuborilgan (topshirilgan) vaqtdan boshlab ikki oy mobaynida, litsenziyalovchi organga litsenziya berilgani uchun davlat boji toʻlanganligini tasdiqlovchi hujjatni taqdim etmasa, Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi litsenziyani bekor qilish toʻgʻrisida qaror qabul qilishga haqli.

22. Litsenziya daʼvogari tomonidan nodavlat taʼlim xizmatlari koʻrsatish maqsadida litsenziya olish uchun ariza topshirgani litsenziya shartlari va talablariga rioya etishiga boʻlgan roziligi hisoblanadi

23. Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi, taʼlim tizimi boshqaruvi va vakolatli organlar litsenziya shartlari va talablariga litsenziat tomonidan rioya etilishini qonun hujjatlarida belgilangan tartibda nazorat qiladi.

24. Litsenziyalovchi organ litsenziya talablari va shartlariga rioya etilishini nazorat qilishda oʻz vakolatlari doirasida quyidagi huquqlarga ega:

litsenziya talablari va shartlariga litsenziat tomonidan rioya etilishini rejali tekshirish;

litsenziya talablari va shartlari litsenziat tomonidan buzilganligidan dalolat beruvchi hollar mavjud boʻlgan taqdirda, litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar boʻyicha zarur axborotni litsenziatdan talab qilish va olish;

tekshirishlar natijalari asosida litsenziya talablari va shartlarining litsenziat tomonidan buzilishlarini aniq koʻrsatgan holda dalolatnomalar (maʼlumotnomalar) rasmiylashtirish;

litsenziatga litsenziya talablari va shartlarining buzilishlarini bartaraf etish majburiyatini yuklovchi qarorlar chiqarish, ularni bartaraf etish muddatlarini belgilash;

litsenziyaning amal qilishini toʻxtatib turish va tugatish yoxud litsenziyani bekor qilish toʻgʻrisida qonun hujjatlarida belgilangan tartibda qaror chiqarish.

25. Litsenziya talablari va shartlariga rioya etilishini nazorat qilishda litsenziyalovchi organning tekshiruvchi xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi tegishliligi boʻyicha Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasida qoladi.

26. Litsenziyaning amal qilishini toʻxtatib turish va tugatish, litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunida nazarda tutilgan hollarda va tartibda Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi qaroriga koʻra amalga oshiriladi.

27. Litsenziat litsenziyaning amal qilishini toʻxtatib turish yoki tugatish, uni bekor qilish toʻgʻrisidagi qaror yuzasidan sudga shikoyat qilishi mumkin.

28. Litsenziyalovchi organ taʼlim turlari boʻyicha “Litsenziya” axborot tizimlari kompleksida litsenziyalar reyestrini yuritadi.

Litsenziyalar reyestrlarida quyidagilar koʻrsatilishi shart:

litsenziatlar toʻgʻrisidagi asosiy maʼlumotlar, shu jumladan, yuridik shaxsning nomi va indentifikatsiya raqami, tashkiliy-huquqiy shakli, tashkilot rahbarining familiyasi, ismi, otasining ismi;

nodavlat taʼlim xizmatining turi, litsenziyalanayotgan taʼlim yoʻnalishi, amalga oshiriladigan manzil, ish joyi telefoni, faks;

litsenziyaning berilgan sanasi va tartib raqami;

litsenziyaning amal qilish muddati;

litsenziyani qayta rasmiylashtirishning asoslari va sanasi, uning amal qilish muddatining uzaytirilishi va tiklanishi;

litsenziyaning amal qilish muddatini toʻxtatish asoslari va sanasi;

litsenziyani bekor qilishning asoslari va sanasi.

29. Litsenziyalar reyestridagi maʼlumotlar “Litsenziya” axborot tizimlari kompleksidagi veb-saytda joylashtiriladi va tanishish uchun ochiq hisoblanadi.

30. Nodavlat taʼlim xizmatlari koʻrsatuvchi yuridik shaxslarga faoliyatni amalga oshirish huquqiga litsenziya berganlik va uning amal qilish muddatini uzaytirganlik uchun Oʻzbekiston Respublikasi qonun hujjatlarida belgilangan eng kam oylik ish haqining oʻn baravari miqdorida davlat boji undiriladi.

31. Toʻlangan davlat bojining 20 foizi miqdoridagi mablagʻlar axborot-kommunikatsiya xizmatlaridan foydalangan holda xizmatlar koʻrsatish hamda moddiy-texnika bazasini mustahkamlash uchun litsenziyalovchi organning vakolatli bankdagi maxsus hisob raqamiga oʻtkaziladi.

Litsenziya berish uchun davlat bojining qolgan qismi Oʻzbekiston Respublikasi Davlat budjetiga oʻtkaziladi.

32. Mazkur Nizomning qoidalari buzilishida aybdor boʻlgan shaxslar qonun hujjatlariga muvofiq javob beradi.

1. Vazirlar Mahkamasining “Nodavlat taʼlim muassasalari faoliyatini litsenziyalash toʻgʻrisidagi nizomni tasdiqlash haqida” 2004-yil 1-martdagi 100-son qarori (Oʻzbekiston Respublikasi QHT, 2004-y., 9-son, 107-modda).

2. Vazirlar Mahkamasining 2006-yil 22-maydagi 92-son qaroriga ilovaning 42-bandi (Oʻzbekiston Respublikasi QHT, 2006-y., 20-21-son, 181-modda).

3. Vazirlar Mahkamasining 2012-yil 1-fevraldagi 26-son qaroriga ilovaning 24-bandi (Oʻzbekiston Respublikasi QHT, 2012-y., 6-son, 57-modda).

4. Vazirlar Mahkamasining 2012-yil 1-noyabrdagi 313-son qaroriga 1-ilovaning 57-bandi (Oʻzbekiston Respublikasi QHT, 2012-y., 44-son, 507-modda).

5. Vazirlar Mahkamasining 2013-yil 14-iyundagi 169-son qaroriga 4-ilovaning 2-bandi (Oʻzbekiston Respublikasi QHT, 2013-y., 25-son, 324-modda).

6. Vazirlar Mahkamasining 2018-yil 23-fevraldagi 139-son qaroriga 2-ilovaning 2-bandi.