“Umumiy harbiy majburiyat va harbiy xizmat toʻgʻrisida”gi Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. Oʻzbekiston Respublikasining Qurolli Kuchlari saflaridan:

muddatli harbiy xizmatning belgilangan muddatlarini oʻtab boʻlgan fuqarolar — rezervga;

muqobil xizmatning belgilangan muddatlarini oʻtab boʻlgan fuqarolar — zaxiraga boʻshatilsin.

2. 1977—1986-yillarda tugʻilgan, chaqirilish muddatini kechiktirish huquqiga ega boʻlmagan Oʻzbekiston Respublikasi fuqarolari 2004-yilning oktyabr-noyabr oylarida muddatli harbiy xizmatga chaqirilsin.

Muddatli harbiy xizmatni oʻtashga yaroqli hamda chaqirilish muddatini kechiktirish va chaqirilishdan ozod etilish huquqiga ega boʻlmagan, biroq ushbu chaqiruv mobaynida Qurolli Kuchlar safiga chaqirilmaydigan fuqarolar safarbarlik chaqiruvi rezerviga olinsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Mudofaa vazirligi bilan birgalikda, Qurolli Kuchlarning chaqiriluvchilar bilan sifatli toʻldirilishini taʼminlash maqsadida, joylardagi chaqiruv komissiyalarining samarali ishlashini, shuningdek Qurolli Kuchlarga muddatli harbiy xizmatga chaqirilgan fuqarolarni qoʻshinlarga tantanali kuzatib qoʻyishni tashkil etsinlar.

5. Oʻzbekiston Respublikasi Sogʻliqni saqlash vazirligi (F.Gʻ. Nazirov) Mudofaa vazirligi (Q.Gʻ. Gʻulomov) bilan birgalikda chaqiruv uchastkalarini zarur tibbiyot asbob-anjomlari va buyumlari bilan taʼminlab chaqiriluvchilarning sifatli, har tomonlama va xolisona tibbiy koʻrikdan oʻtkazilishini, chaqiruv komissiyalarining ishiga turli ixtisoslikka ega boʻlgan yuqori malakali vrachlar jalb etilishini, muqobil tibbiy komissiyalarning samarali ishlashini tashkil etsin.

6. Oʻzbekiston Respublikasi Mudofaa vazirligi (Q.Gʻ. Gʻulomov), Ichki ishlar vazirligi (Z.A. Almatov), Milliy xavfsizlik xizmati (R.R. Inoyatov), Qurolli Kuchlar Birlashgan shtabi (I. Ergashev), harbiy okruglar qoʻshinlari qoʻmondonlari:

muddatli harbiy xizmatga yangidan chaqirilgan harbiy xizmatchilarni qoʻshilmalarga va qismlarga qabul qilishda yuksak uyushqoqlikni, harbiy intizomni, qoʻshinlarning jangovar tayyorgarligini, muddatli harbiy xizmatga yangidan chaqirilgan harbiy xizmatchilarni harbiy mutaxassisliklarga oʻqitish jarayonida xavfsizlik chora-tadbirlariga rioya etilishini;

muddatli harbiy xizmatga chaqirilgan harbiy xizmatchilarda maqsadga intilishni, zarur maʼnaviy fazilatlarni va irodalilikni, oʻzini oʻzi roʻyobga chiqarish va takomillashtirishga doimiy intilishni rivojlantirishga, ularning aniq hayotiy nuqtai nazarga ega boʻlishiga, jismoniy va aql-zakovat darajasi oshirilishiga, ularga Vatanga muhabbat va armiyamiz bilan faxrlanish tuygʻularini singdirishga qaratilgan jangovar va maʼnaviy-axloqiy tarbiyalash dasturi yanada takomillashtirilishini;

muddatli harbiy xizmatga chaqirilgan harbiy xizmatchilar uchun zamonaviy uy-joy-maishiy shart-sharoitlar yaratilishini, ularning belgilangan talablarga va taʼminot normalariga muvofiq oʻz vaqtida va sifatli moddiy taʼminlanishini;

mahalliy davlat hokimiyati organlari, mahalla qoʻmitalari, jamoatchilik bilan birgalikda muddatli harbiy xizmatning belgilangan muddatini oʻtagan fuqarolarni yashash joyiga kuzatib qoʻyish va tantanali kutib olish tashkil etilishini taʼminlasinlar.

7. Moliya vazirligi (S.B. Rahimov) mahalliy davlat hokimiyati organlari bilan birgalikda tashkilotlar va korxonalar, shuningdek safarbarlik chaqiruvchi rezerviga va muqobil xizmatga olingan fuqarolar tomonidan moliyaviy majburiyatlar oʻz vaqtida bajarilishi yuzasidan kompleks chora-tadbirlar koʻrsin.

8. Oʻzbekiston Respublikasi Mehnat va aholini ijtimoiy muhofaza qilish vazirligi (O.O. Obidov) mahalliy davlat hokimiyati organlari bilan birgalikda Qurolli Kuchlardan boʻshatilgan fuqarolarni ularning egallagan harbiy va fuqarolik mutaxassisliklarini hisobga olgan holda qonun hujjatlarida belgilangan tartibda ishga joylashtirish chora-tadbirlarini koʻrsin.

Belgilab qoʻyilsinki, Oʻzbekiston Respublikasi Qurolli Kuchlarida muddatli harbiy xizmatni oʻtagan fuqarolar davlat muassasalari, tashkilotlari va korxonalariga ishga qabul qilishda mardlik va vatanparvarlik tarbiyasining armiya maktabini oʻtagan, harbiy tayyorgarlik koʻrgan va hayotiy tajriba orttirgan, mamlakatning eng faol va tayyorgarlik koʻrgan kadrlar zaxirasi hisoblangan shaxslar sifatida ustunlik huquqidan foydalanadilar.

9. “Oʻzteleradio” kompaniyasi (A.K. Koʻchimov), Oʻzbekiston Milliy axborot agentligi (M. Hazratqulov)ga yoshlarni Qurolli Kuchlarda xizmat qilishga tayyorlashning borishini, fuqarolarni muddatli harbiy xizmatga chaqirishning amalga oshirilishini, chaqiruv komissiyalari ishini, safarbarlik chaqiruvi rezervida xizmatning tashkil qilinishini va Qurolli Kuchlardan rezervga boʻshatilgan harbiy xizmatchilarni joylarda kutib olish boʻyicha tantanali tadbirlar uyushtirilishini ommaviy axborot vositalarida keng yoritish tavsiya qilinsin.

10. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.