Xorijda joylashgan va Oʻzbekiston Respublikasi sudlarining qarorlariga asosan davlat daromadiga oʻtkazilgan mulkdan samarali foydalanishni taʼminlash maqsadida:

1. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi huzuridagi “Davlat aktivlarini boshqarish markazi” davlat unitar korxonasiga (keyingi oʻrinlarda — Markaz) xorijda joylashgan va Oʻzbekiston Respublikasi sudlarining qarorlariga asosan davlat daromadiga oʻtkazilgan yoki ixtiyoriy ravishda Oʻzbekiston Respublikasi mulki etib (keyingi oʻrinlarda — mulk) topshirilgan mulk egaligi huquqini Oʻzbekiston Respublikasi nomidan amalga oshirish vakolati berilsin.

2. Belgilansinki, Markaz:

Oʻzbekiston Respublikasi vakolatli organlari tomonidan tegishli qaror qabul qilingunga kadar Oʻzbekiston Respublikasining chet eldagi mulkini, mazkur davlat hamda Oʻzbekiston Respublikasi boshqa davlat organlarining xorijiy vakolatxonalari bilan kelishilgan holda Oʻzbekiston Respublikasining xorijiy muassasalari ehtiyoji uchun vaqtinchalik bepul topshirish. Shu bilan birga, Oʻzbekiston Respublikasining xorijdagi muassasalari va Oʻzbekiston Respublikasi boshqa davlat organlari xorijiy vakolatxonalari rahbarlari, ularga topshirilgan xorijdagi mulkning but holda saqlanishi uchun shaxsan javobgar hisoblanadilar.

mulkni ijaraga yoki ishonchli boshqaruvga belgilangan tartibda topshirish;

zarur hollarda mazkur qarorning matnini xorijiy davlatning vakolatli organlariga taqdim qilish;

xorijda bank hisobvaraqlarini ochish, mazkur hisobvaraqlardagi mablagʻlarni mustaqil tasarruf etish huquqiga ega boʻlish;

toʻgʻridan-toʻgʻri shartnomalar asosida mulkni boshqarish uchun zarur boʻlgan mustaqil ekspertlarni, auditorlik, advokatlik, konsalting firmalarini, sugʻurta kompaniyalari hamda boshqa xizmat koʻrsatish kompaniyalari va tashkilotlarini, shu jumladan, xorijiy tashkilotlarni jalb qilish huquqiga ega.

3. Mulkni boshqarish markazining, shu jumladan, xorijiy mamlakatlarda amalga oshirilayotgan xarajatlarini moliyalashtirish manbalari etib quyidagilar belgilansin:

Markazning maxsus hisobvaraqlaridagi mablagʻlar;

Xususiylashtirilgan korxonalarga koʻmaklashish jamgʻarmasi mablagʻlari;

mulkni ijaraga yoki ishonchli boshqaruvga berishdan tushadigan tushumlar;

vaqtincha boʻsh mablagʻlarni joylashtirishdan tushadigan mablagʻlar;

qonun hujjatlarida taqiqlanmagan boshqa daromadlar.

Shu bilan birga, mulkni sotishdan, ijaraga yoki ishonchli boshqaruvga topshirishdan tushgan mablagʻlar mulkni boshqarish yoki sotish (baholash tashkilotlari, savdo tashkilotchilari, vositachilar, depozitariylar xizmatlariga haq toʻlash, safar xarajatlari va boshqa sarf-xarajatlar) bilan bogʻliq xarajatlar chiqarib tashlangandan soʻng Markazning maxsus hisobvaraqlarida jamlanib boriladi.

4. Markaz Oʻzbekiston Respublikasi hududida mulkka boʻlgan egalik huquqini rasmiylashtirish hamda amalga oshirish bilan bogʻliq boʻlgan soliq yigʻim va boshqa majburiy toʻlovlardan ozod qilinsin.

5. Markaz:

Adliya vazirligi va Oliy sud bilan birgalikda mulkni davlat daromadiga oʻtkazishni nazarda tutuvchi Oʻzbekiston Respublikasi sudlarining hukmlarini mazkur xorijiy davlatning vakolatli organlariga ijro etish uchun belgilangan tartibda yoʻllasin;

Davlat raqobat qoʻmitasi, Tashqi ishlar vazirligi, Moliya vazirligi va Bosh prokuratura bilan birgalikda Oʻzbekiston Respublikasi sudlarining qarorlari xorijiy davlatlarda ijro etilganidan keyin mulklarni inventarizatsiya qilishni va Oʻzbekiston Respublikasining mulkka egaligi rasmiylashtirilishini taʼminlasin;

Davlat raqobat qoʻmitasi bilan birgalikda mulkni yanada samarali tasarruf etish, shu jumladan uni sotish, Oʻzbekiston Respublikasi davlat organlariga belgilangan tartibda ijaraga yoki ishonchli boshqaruvga topshirish toʻgʻrisida Vazirlar Mahkamasiga takliflar kiritsin.

6. Belgilansinki, Oʻzbekiston Respublikasining mulk boʻyicha huquqlarini himoya qilish, daʼvo, sud, arbitraj va boshqa ishlarni koʻrib chiqish, shuningdek, xorijiy auditorlik, advokatlik, konsalting tashkilotlari va boshqa tashkilotlarni, mustaqil ekspertlarni jalb qilish bilan bogʻlik boʻlgan xarajatlar yuzaga kelgan taqdirda Markazning maxsus hisobvaraqlarida jamgʻarib borilayotgan mablagʻlari hisobiga, mablagʻlar yetarli boʻlmagan taqdirda esa Markazning asoslangan talabnomalari asosida Oʻzbekiston Respublikasi Vazirlar Mahkamasining zaxira jamgʻarmasidan ajratiladigan mablagʻlar hisobidan amalga oshiriladi.

7. Markaz Davlat raqobat qoʻmitasi bilan birgalikda belgilangan tartibda milliy va xorijiy valyutada maxsus bank hisobvaraqlari ochilishini taʼminlasin.

9. Oʻzbekiston Respublikasi Adliya vazirligi:

Tashqi ishlar vazirligi, Davlat raqobat qoʻmitasi bilan birgalikda Markazning soʻrovnomalariga koʻra belgilangan tartibda uning xodimlariga mazkur qarorning 1-bandida nazarda tutilgan vakolatlarni tasdiqlovchi ishonchnoma va boshqa hujjatlarni bersin;

Bosh prokuratura, Tashqi ishlar vazirligi bilan birgalikda Oʻzbekiston Respublikasining mulk egaligini rasmiylashtirishda, shu jumladan Oʻzbekiston Respublikasi sudlarining qarorlari ijro etilishida Markazga koʻmaklashsin;

Oʻzbekiston Respublikasi Tashqi ishlar vazirligi, Oliy sudi, Bosh prokuraturasi bilan birgalikda fuqarolik oila va jinoyat ishlari boʻyicha huquqiy yordam hamda huquqiy munosabatlar toʻgʻrisida ikki tomonlama va koʻp tomonlama bitimlarni ishlab chiqish hamda qabul qilish sohasida xorijiy davlatlarning vakolatli organlari bilan hamkorlikni tashkillashtirish borasidagi ishlarni faollashtirsin.

10. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Bosh prokurori O.B. Murodov zimmasiga yuklansin.