Qishloq xoʻjalik tovar ishlab chiqaruvchilari tomonidan davlat ehtiyojlari uchun yetkazib berilgan mahsulotlarga oʻz vaqtida boʻnak berilishi va hisob-kitob qilinishini taʼminlash maqsadida:

1. Oʻzbekiston Respublikasi Moliya vazirligi huzurida davlat ehtiyojlari uchun xarid qilinadigan qishloq xoʻjalik mahsulotlarining hisob-kitob Jamgʻarmasi tashkil etilsin.

2. Jamgʻarma zimmasiga quyidagi vazifalarni hal qilish yuklansin:

davlat ehtiyojlari uchun yetishtiriladigan hamda yetkazib boriladigan paxta, gʻalla va sholi uchun boʻnaklar va uzil-kesil hisob-kitoblarni oʻz vaqtida moliyalash;

davlat ehtiyojlari uchun xarid qilinadigan mazkur qishloq xoʻjalik mahsulotlarini boʻnak bilan taʼminlash va uzil-kesil hisob-kitob qilish uchun ajratiladigan mablagʻlardan maqsadli foydalanilishini nazorat qilish;

xarid qilinadigan mahsulot uchun hisob-kitoblarni taʼminlaydigan barcha boʻgʻinlar — Oʻzbekiston Respublikasi Moliya vazirligi, banklar, tayyorlov tashkilotlari hamda qishloq xoʻjalik tovar ishlab chiqaruvchilari faoliyatini muvofiqlashtirish.

3. Quyidagilar Jamgʻarmani shakllantirishning asosiy manbalari etib belgilansin:

paxta tolasini eksport qilish boʻyicha forvard shartnomalaridan tushadigan boʻnak toʻlovlari hamda ular yuzasidan uzil-kesil hisob-kitoblar boʻyicha tushadigan mablagʻlar;

davlat ehtiyojlari uchun xarid qilinadigan mahsulotlarni qayta baholashdan hosil boʻladigan mablagʻlar;

kredit mablagʻlari;

budjetdan tashqari boshqa mablagʻlar.

5. Oʻzbekiston Respublikasi Markaziy bankiga bir hafta muddatda Jamgʻarmaning moliyaviy operatsiyalarini olib borish uchun paxta, gʻalla va sholini xarid qilish boʻyicha tuzilgan shartnoma hajmlarini moliyalash boʻyicha budjetdan tashqari uchta asosiy hisobvaraq, shuningdek, kredit mablagʻlarini toʻlash yuzasidan mablagʻlarni jamlash uchun mazkur mahsulot turlari boʻyicha uchta ilova hisobvaragʻi ochish tavsiya etilsin.

6. Oʻzbekiston Respublikasi moliya vaziriga Jamgʻarma mablagʻlarini boshqarish vakolati berilsin.

Oʻzbekiston Respublikasi Moliya vazirligining markaziy apparati tarkibida Jamgʻarmaning ishchi apparati tarzidagi maxsus boʻlinma tuzilib, vazirlik markaziy apparatining soni 5 kishiga koʻpaytirilsin.

7. Oʻzbekiston Respublikasi Markaziy bankining:

“Paxtabank”ni — paxta yetishtirish, xarid qilish va qayta ishlashni moliyalash boʻyicha;

“Gʻallabank”ni — gʻalla va sholi yetishtirish, xarid qilish hamda qayta ishlashni moliyalash boʻyicha Jamgʻarmaning asosiy moliya agentlari etib tayinlash toʻgʻrisidagi taklifi maʼqullansin.

Jamgʻarmaning moliya agentlari zimmasiga maxsus ochiladigan maqsadli hisobvaraqlar orqali davlat ehtiyojlari uchun yetkazib beriladigan ushbu mahsulotlarga ajratiladigan mablagʻlardan aniq maqsad yoʻlida foydalanilishi va hisob-kitoblarning oʻz vaqtida amalga oshirilishi, shuningdek berilgan kreditlarning belgilangan muddatlarda qaytarilishi ustidan nazorat oʻrnatish vazifasi yuklansin.

8. “Oʻzpaxtasanoatsotish” uyushmasi — paxtani;

“Oʻzdonmahsulot” DAK — gʻalla va sholini xarid qilish, saqlash, qayta ishlash hamda sotish boʻyicha Jamgʻarmaning tijorat agentlari etib tayinlansin.

Belgilab qoʻyilsinki, Jamgʻarma davlat ehtiyojlari uchun paxta xarid qilish umumiy hajmi boʻyicha “Oʻzpaxtasanoatsotish” uyushmasi bilan, gʻalla va sholi xarid qilish umumiy hajmi boʻyicha esa “Oʻzdonmahsulot” davlat aksiyadorlik korporatsiyasi bilan Bosh bitim tuzadi. Mazkur uyushma va korporatsiya Jamgʻarma nomidan hamda u bilan kelishgan holda va tegishli ravishda “Paxtabank” hamda “Gʻallabank” ishtirokida mahsulot xarid qilish toʻgʻrisidagi kontraktatsiya shartnomalari oʻz vaqtida tuzilishini, xarid qilinadigan qishloq xoʻjalik mahsulotiga boʻnak berilishi va uzil-kesil hisob-kitob qilinishini, uni xarid qilish, saqlash va qayta ishlash chogʻida belgilangan standartlarga rioya etilishi ustidan nazoratni taʼminlaydilar.

9. Quyidagilar belgilab qoʻyilsin:

davlat ehtiyojlari uchun xarid qilinadigan qishloq xoʻjalik mahsulotiga boʻnak berish va uzil-kesil hisob-kitob qilish uchun Jamgʻarmadan mablagʻ ajratish 1999-yilgi hosildan boshlab amalga oshiriladi;

kalendar yili oxirida Jamgʻarma mablagʻlarining qoldiqlari olib qoʻyilmaydi, budjetdan tashqari hisobvaraqlarda hisobga olinadi va kelgusi yilda qishloq xoʻjalik tovar ishlab chiqaruvchilariga boʻnak berish hamda ular bilan uzil-kesil hisob-kitob qilish uchun moliyaviy mablagʻlarga boʻlgan ehtiyoj balansi hisob-kitoblarida foydalaniladi.

10. Jamgʻarma mablagʻlaridan maqsadli foydalanilishini, toʻlovlarning oʻz vaqtida oʻtishi va hisob-kitoblar oʻz vaqtida amalga oshirilishini nazorat qilish vazifasi yilning har choragida yoppasiga va tanlab tekshirishlar oʻtkazish yoʻli bilan Oʻzbekiston Respublikasi Moliya vazirligining Bosh nazorat-taftish boshqarmasi zimmasiga yuklansin.

Mansabdor shaxslar ogohlantirib qoʻyilsinki, vakolatlari boʻlmagan holda Jamgʻarma mablagʻlaridan foydalanishga aralashish yoʻlidagi urinishlari uchun ular amaldagi qonunchilikka muvofiq javobgarlikka, hatto jinoiy javobgarlikka ham tortiladilar.

11. Oʻzbekiston Respublikasi Moliya vazirligi:

Oʻzbekiston Respublikasi Markaziy banki bilan birgalikda oʻn kun muddatda davlat ehtiyojlari uchun xarid qilinadigan qishloq xoʻjalik mahsulotlarining hisob-kitob Jamgʻarmasi toʻgʻrisidagi Nizomni ishlab chiqib, tasdiqlasin;

Oʻzbekiston Respublikasi Qishloq va suv xoʻjaligi vazirligi, “Oʻzpaxtasanoatsotish” uyushmasi hamda “Oʻzdonmahsulot” davlat aksiyadorlik korporatsiyasi bilan birgalikda bir oy muddatda 1999-yilgi hosildan davlat ehtiyojlari uchun xarid qilinadigan paxta, gʻalla va sholining xarid narxlari toʻgʻrisidagi takliflarni, shuningdek bajariladigan Qishloq xoʻjalik ishlarining mavsumiyligini hisobga olgan holda yil choraklari boʻyicha Jamgʻarmaning moliyaviy mablagʻlarga boʻlgan ehtiyojlari balansini kiritsin.

12. Ushbu Farmonning ijrosini nazorat qilish Bosh vazir oʻrinbosarlari B. Hamidov va B. Olimjonov zimmalariga yuklansin.