Oʻzbekiston Respublikasi Prezidentining 2017-yil 2-iyundagi PQ-3029-son “Oʻzbekiston Respublikasi Favqulodda vaziyatlar vazirligi faoliyatini yanada takomillashtirish boʻyicha tashkiliy tadbirlar toʻgʻrisida”gi qarori hamda Oʻzbekiston Respublikasi Vazirlar Mahkamasining 2017-yil 12-maydagi 283-son “Oʻzbekiston Respublikasida fuqaro havo kemalari bilan sodir boʻladigan aviatsiya halokati va insidentlarni surishtirish qoidalariga oʻzgartirish va qoʻshimchalar kiritish haqida”gi qaroriga muvofiq buyuraman:

1. Oʻzbekiston Respublikasi Parvozlar xavfsizligini nazorat qilish davlat inspeksiyasi boshligʻining 2007-yil 12-sentabrdagi 141-son buyrugʻi (roʻyxat raqami 1723, 2007-yil 29-sentabr) (Oʻzbekiston Respublikasi qonun hujjatlari toʻplami, 2007-y., 41-42-son, 420-modda) bilan tasdiqlangan Oʻzbekiston Respublikasi samoviy hududida fuqaro va eksperimental aviatsiyasining parvoz qilish aviatsiya qoidalariga (OʻzR AQ-91) ilovaga muvofiq oʻzgartirishlar va qoʻshimcha kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. 160-band quyidagi tahrirda bayon etilsin:

“160. Oʻzbekiston Respublikasi FAsi parvozlarining meteorologik taʼminoti Oʻzbekiston Respublikasi Favqulodda vaziyatlar vazirligi huzuridagi Gidrometeorologiya xizmat markazi tomonidan Xalqaro FAsi toʻgʻrisidagi Konvensiyaning 3-ilovasiga (1944-y.), JMT (Jahon meteorologik tashkiloti)ning texnik reglamentiga, Oʻzbekiston Respublikasining “Fuqaro va eksperimental aviatsiyasi parvozlarining meteorologik taʼminoti” aviatsiya qoidalariga (OʻzR AQ-180), Oʻzbekiston Respublikasining “Fuqaro va eksperimental aviatsiyasi aerodromlarining foydalanishga yaroqlilik normalari” aviatsiya qoidalariga, har bir muayyan aeroport uchun ishlab chiqilgan parvozlarning meteorologik taʼminoti boʻyicha yoʻriqnomaga muvofiq tashkil etiladi.”.

2. 555-bandda “tabiatni” degan soʻz “ekologiya va atrof-muhitni” degan soʻzlar bilan almashtirilsin.

3. 730-band quyidagi mazmundagi jumla bilan toʻldirilsin:

“Ushbu talablar paraplanlar, deltaplanlar, motodeltaplanlar va motoparaplanlar ekspluatantlariga nisbatan tatbiq etilmaydi.”.

4. 731-banddagi “(kichik samolyotlar, paraplanlar, deltaplanlar, motodeltaplanlar, motoparaplanlar, deltalyotlar va h.k.)” degan soʻzlar “(kichik samolyotlar, deltalyotlar)” degan soʻzlar bilan almashtirilsin.

5. 757-banddagi “Deltaplan, paraplan, motodeltaplan, motoparaplan, deltaletlarda” degan soʻzlar “Deltaplan, paraplan, motodeltaplan, motoparaplanda” degan soʻzlar bilan almashtirilsin.

6. 789³-band quyidagi tahrirda bayon etilsin:

“789³. UUQlarining parvozlari erdagi boshqarish stansiya monitori orqali (boshqarish pultidan) doimiy nazorat qilgan holda oddiy meteosharoitlarda amalga oshiriladi.”.

7. 1059-band quyidagi tahrirda bayon etilsin:

“1059. Komissiya yetib kelguniga qadar erdagi va bortdagi magnitofonlarni ochish va eshitish, bort oʻzi yozgichlarini ochish va yozuvlarini rasshifrovka qilish taʼqiqlanadi va faqat komissiya raisining yoki komissiya raisi oʻrinbosarining qaroriga muvofiq uning ixtiyoriga topshirilgandan soʻng darhol amalga oshirilishi mumkin.”.

8. Mazkur oʻzgartirishlar va qoʻshimcha Oʻzbekiston Respublikasi Mudofaa vazirligi, Oʻzbekiston Respublikasi Favqulodda vaziyatlar vazirligi huzuridagi Gidrometeorologiya xizmati markazi hamda “Oʻzbekiston havo yoʻllari” milliy aviakompaniyasi bilan kelishilgan.