Tovarlarni import qilish va ularni sotish bilan shugʻullanuvchi jismoniy shaxslar faoliyatini yanada tartibga solish, savdoning uyushgan, madaniyatli shakllarini rivojlantirish maqsadida Vazirlar Mahkamasi qaror qiladi:

1. Maʼlumot uchun qabul qilinsinki, Hukumat tomonidan qabul qilingan qarorlarga muvofiq tijorat faoliyati uchun moʻljallangan tovarlarni olib keluvchi jismoniy shaxslar (“chetdan tovar olib keluvchilar”):

eksport-import operatsiyalarini va chakana savdoni amalga oshirish huquqi bilan yuridik shaxs boʻlmasdan yakka tartibdagi tadbirkorlar sifatida roʻyxatdan oʻtishlari shart;

“Erkin muomalaga chiqarish” rejimida rasmiylashtirilgan yuk bojxona deklaratsiyasi, muvofiqlik sertifikatlari mavjud boʻlganda, bojxona va boshqa toʻlovlar toʻlangan taqdirda buyum bozorlarida yakka tartibdagi tadbirkorning faqat oʻzi bevosita olib kelgan import tovarlar bilan chakana savdoni amalga oshirishga haqlidirlar.

2. 2004-yil 1-sentabrdan boshlab tijorat faoliyati uchun moʻljallangan tovarlarni olib keluvchi jismoniy shaxslar (“chetdan tovar olib keluvchilar”)ni yuridik shaxs boʻlmasdan yakka tartibdagi tadbirkorlar sifatida davlat roʻyxatidan oʻtkazish jismoniy shaxsning yashash joyidagi tumanlar (shaharlar) Davlat soliq inspeksiyalarida (hozir boʻlish tartibida) amalga oshiriladigan tartib belgilansin.

Yuridik shaxs boʻlmasdan, import tovarlarni olib keluvchi yakka tartibdagi tadbirkorlar oʻz faoliyatini amalga oshirish uchun:

Oʻzbekiston Respublikasi Tashqi iqtisodiy aloqalar agentligida va bojxona organlarida tashqi iqtisodiy aloqalar qatnashchilari sifatida roʻyxatdan oʻtishlari;

tijorat bankida hisob raqamlari ochishi;

eksport-import operatsiyalarini va chakana savdoni amalga oshirish huquqiga ruxsatnomani belgilangan tartibda rasmiylashtirishi;

davlat roʻyxatidan oʻtkazilgan joydagi soliq organlaridan import operatsiyalar subyektining hisobga olish kartasini olishi shart.

Oʻzbekiston Respublikasi Davlat soliq qoʻmitasi, Iqtisodiyot vazirligi, Moliya vazirligi, Tashqi iqtisodiy aloqalar agentligi, Davlat bojxona qoʻmitasi, Markaziy banki, Adliya vazirligi yuridik shaxs boʻlmasdan tijorat faoliyati uchun moʻljallangan tovarlarni olib kelayotgan yakka tartibdagi tadbirkorlarni davlat roʻyxatidan oʻtkazish, hisobga qoʻyish va import operatsiyalar subyektlarining hisobga olish kartalarini berish tartibi toʻgʻrisidagi nizomni 2004-yil 1-sentabrgacha boʻlgan muddatda ishlab chiqsinlar va tasdiqlash uchun Vazirlar Mahkamasiga kiritsinlar.

Yuridik shaxs boʻlmasdan tijorat faoliyati uchun moʻljallangan tovarlarni olib kelayotgan yakka tartibdagi tadbirkorlarni davlat roʻyxatidan oʻtkazish boʻyicha mazkur qarorda nazarda tutilgan chora-tadbirlarga rioya etilishi uchun shaxsiy javobgarlik Oʻzbekiston Respublikasi Davlat soliq qoʻmitasi va hududiy soliq organlarining birinchi rahbarlari zimmasiga yuklansin.

3. Tumanlar (shaharlar) hokimliklari huzuridagi tadbirkorlik subyektlarini roʻyxatdan oʻtkazish inspeksiyalarida ilgari davlat roʻyxatidan oʻtgan yuridik shaxs boʻlmasdan tijorat faoliyati uchun moʻljallangan tovarlarni olib kelayotgan yakka tartibdagi tadbirkorlar 2004-yil 1-noyabrgacha boʻlgan muddatda yashash joyidagi tumanlar (shaharlar)ning Davlat soliq inspeksiyalarida qayta roʻyxatdan oʻtishlari shart.

4. Yuridik shaxs boʻlmasdan tijorat faoliyati uchun moʻljallangan tovarlarni olib kelayotgan yakka tartibdagi tadbirkorlar davlat roʻyxatidan oʻtkazilganligi uchun tumanlar (shaharlar) soliq inspeksiyalari tomonidan eng kam oylik ish haqining 5 baravari miqdorida roʻyxatdan oʻtkazish yigʻimi undiriladi.

5. Oʻzbekiston Respublikasi Davlat soliq qoʻmitasi 2004-yil 1-sentabrdan boshlab:

yuridik shaxs boʻlmasdan tovarlar importi bilan shugʻullanayotgan yakka tartibdagi tadbirkorlarning hisobga olish registri yuritilishini, unga sodir etilgan import operatsiyalari va budjetga tegishli toʻlovlar toʻgʻrisidagi maʼlumotlar kiritilishini;

belgilangan tartibda roʻyxatdan oʻtkazilgan va registrga kiritilgan yakka tartibdagi tadbirkorlarga import operatsiyalari subyektlarining hisobga olish kartalari berilishini taʼminlasin.

6. Oʻzbekiston Respublikasi Tashqi iqtisodiy aloqalar agentligi yuridik shaxs boʻlmasdan tovarlar importi bilan shugʻullanayotgan yakka tartibdagi tadbirkorlarni roʻyxatdan oʻtkazsin, 1 yil muddatga tegishli guvohnoma bergan holda ularni tashqi iqtisodiy aloqalar qatnashchilari reyestriga tegishli hisobga olish tartib raqami bilan kiritsin.

7. Belgilansinki, mazkur qaror chiqqunga qadar yakka tartibdagi tadbirkorlar tomonidan Oʻzbekiston Respublikasi hududiga olib kelingan va “Vaqtincha saqlash” rejimida joylashtirilgan tovarlarning bojxona rasmiylashtiruvi ilgari belgilangan tartibda amalga oshiriladi.

8. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda amaldagi qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida bir oy muddatda Vazirlar Mahkamasiga takliflar kiritsin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.