Oʻzbekiston Respublikasi Prezidentining 2017-yil 7-fevraldagi PF-4947-son Farmoni bilan tasdiqlangan “Xalq bilan muloqot va inson manfaatlari yili”da 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini amalga oshirish Davlat dasturini bajarish yuzasidan hamda aholini ijtimoiy muhofaza qilish va salomatligini himoya qilish tizimini yanada takomillashtirish, shuningdek “Ezgu maqsad” xalqaro xayriya jamoat fondi faoliyatini tashkil etishga doir vazifalarni amalga oshirishni davom ettirish uchun qulay shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Ezgu maqsad” xalqaro xayriya jamoat fondini tashkil etish toʻgʻrisida” 2017-yil 14-iyuldagi PQ-3135-son qarori bilan “Xorazm shakar” AJ, “Angren shakar” MCHJ va bir qator xorijiy kompaniyalarning “Ezgu maqsad” xalqaro xayriya jamoat fondini tashkil etish toʻgʻrisidagi tashabbusi qoʻllab-quvvatlanganligi maʼlumot uchun qabul qilinsin.

2. “Ezgu maqsad” xalqaro xayriya jamoat fondiga, istisno tariqasida, Fondning vakolatli bank tomonidan xizmat koʻrsatiladigan hisob raqamlariga xorijiy jismoniy va yuridik shaxslardan begʻaraz asosda mablagʻlar olishiga ruxsat etilsin.

3. “Ezgu maqsad” xalqaro xayriya jamoat fondi olingan mablagʻlardan Fondning ustavdagi vazifalariga qatʼiy muvofiq ravishda maqsadli va manzilli foydalanilishini taʼminlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov hamda ijro etuvchi direktor vazifasini vaqtincha bajaruvchi K.K. Sharipova zimmasiga yuklansin.