Siyosiy, iqtisodiy va gumanitar sohalarda Yaponiya bilan strategik sheriklik, doʻstlik va hamkorlik munosabatlarini yanada rivojlantirish, ikki tomonlama parlament, taʼlim, ilmiy va madaniy aloqalarni kengaytirish, respublika vazirliklari va idoralari, ishbilarmon doiralari va jamoat tashkilotlarining Yaponiya bilan hamkorlik masalalari boʻyicha faoliyati muvofiqlashtirilishini va oʻzaro samarali hamkorlik qilishini taʼminlash maqsadida Vazirlar Mahkamasi qaror qiladi:

1. Yaponiyada Oʻzbekiston bilan hamkorlik qoʻmitasi tashkil etilganligi, uning tarkibiga Yaponiya parlamenti, Hukumati, ishbilarmon doiralari vakillari, taniqli fan, taʼlim va madaniyat arboblari kiritilganligi maʼlumot uchun qabul qilinsin.

2. Oʻzbekiston Respublikasi Tashqi ishlar vazirligi, Iqtisodiyot vazirligi, Tashqi iqtisodiy aloqalar agentligi, jamoat tashkilotlarining 1-ilovaga* muvofiq tarkibda Yaponiya bilan hamkorlik qoʻmitasini tashkil etish toʻgʻrisidagi taklifi qabul qilinsin.

3. Yaponiya bilan hamkorlik qoʻmitasi toʻgʻrisidagi nizom 2-ilovaga muvofiq tasdiqlansin.

4. Quyidagilar Qoʻmitaning asosiy vazifalari etib belgilansin:

respublika vazirliklari va idoralari, ishbilarmon doiralari va jamoat tashkilotlarining Yaponiya bilan strategik sheriklik, doʻstlik va hamkorlik munosabatlarini yanada rivojlantirishga yoʻnaltirilgan faoliyati muvofiqlashtirilishini va oʻzaro samarali hamkorlik qilishini taʼminlash;

ikkala davlat oʻrtasida siyosiy, iqtisodiy, ilmiy-texnik, madaniy va gumanitar sohalarda hamkorlik qilish dasturlarini ishlab chiqish, ularning amalga oshirilishi ustidan muntazam nazoratni tashkil etish;

ikkala mamlakatning qonunchilik organlari, Hukumatga qarashli, Hukumatga qarashli boʻlmagan, jamoat va gumanitar tashkilotlari oʻrtasida aloqalarni mustahkamlash;

respublikada tarkibiy oʻzgartirishlarni jadallashtirishga koʻmaklashish uchun zamonaviy texnologiyalarni va Yaponiya investitsiyalarini jalb etishga yoʻnaltirilgan iqtisodiy va investitsiya hamkorligini kengaytirish va chuqurlashtirish;

ikki tomonlama munosabatlarning huquqiy va institutsional bazasini takomillashtirish yuzasidan takliflar tayyorlash;

taʼlim, fan va madaniyat sohalarida oʻzaro ayirboshlashlarni, shaharlar, viloyatlar, prefekturalar, mahalliy hokimiyat organlari darajasida hamkorlikni kengaytirish.

Qoʻshma majlislarda 3-ilovaga* muvofiq ustuvor loyihalarni amalga oshirish bilan bogʻliq masalalarni muhokama qilish Qoʻmitaning eng muhim vazifasi hisoblansin.

5. Yaponiya bilan hamkorlik qoʻmitasining kotibiyati funksiyalari Oʻzbekiston Respublikasi Tashqi ishlar vazirligining Osiyo-Tinch okeani mintaqasi mamlakatlari boshqarmasiga yuklansin.

6. Yaponiya tomonining Hamkorlik qoʻmitalarining qoʻshma majlislarini har yili navbati bilan Yaponiya va Oʻzbekistonda oʻtkazish hamda birinchi qoʻshma majlisni 2004-yil iyul oyida Tokio shahrida oʻtkazish toʻgʻrisidagi takliflariga rozilik berilsin.

7. Yaponiya bilan hamkorlik qoʻmitasi huzurida Yaponiya bilan hamkorlikni rivojlantirish jamgʻarmasi tashkil etilsin, Qoʻmita tadbirlarini, shu jumladan uning Yaponiyaning Oʻzbekiston bilan hamkorlik qoʻmitasi bilan qoʻshma majlislarini, koʻrgazmalar va seminarlarni, qoʻshma axborotlarni nashr etish, taʼlim, fan va madaniyat sohasidagi ayirboshlashlarni hamda boshqa qoʻshma tadbirlarni moliyalashtirish uning asosiy vazifasi etib belgilansin.

8. Belgilab qoʻyilsinki:

Oʻzbekiston va Yaponiya yuridik va jismoniy shaxslarining ixtiyoriy homiylik badallari, shuningdek qonun hujjatlarida taqiqlanmagan boshqa manbalar Yaponiya bilan hamkorlikni rivojlantirish jamgʻarmasining moliyaviy manbalari hisoblanadi.

yuridik va jismoniy shaxslarining soliq solinadigan daromadi (foydasi) koʻrsatib oʻtilgan Jamgʻarmaga badallar summasiga kamaytiriladi.

9. Yaponiya bilan hamkorlik qoʻmitasi (R.S. Azimov):

Oʻzbekiston Respublikasi Adliya vazirligi bilan birgalikda bir oy muddatda Yaponiya bilan hamkorlik qoʻmitasi huzuridagi Yaponiya bilan hamkorlikni rivojlantirish jamgʻarmasining ustavi ishlab chiqilishini va tasdiqlanishini, Jamgʻarmaning yuridik shaxs sifatida roʻyxatdan oʻtkazilishini taʼminlasin;

chora-tadbirlar kompleksini amalga oshirish, shu jumladan Yaponiya jamoatchiligini Oʻzbekiston Respublikasida ijtimoiy-iqtisodiy islohotlarning borishi toʻgʻrisida xabardor qilish, koʻrgazmalar, seminarlar hamda ikkala mamlakatning Hukumatga qarashli tashkilotlarini, jamoat tashkilotlarini, ishbilarmon va ilmiy doiralarini jalb qilgan holda boshqa tadbirlarni oʻtkazish masalalarida Iqtisodiy hamkorlik boʻyicha Oʻzbekiston-Yaponiya qoʻmitasi bilan oʻzaro yaqin hamkorlikni taʼminlasin.

10. Oʻzbekiston Respublikasi Tashqi ishlar vazirligi, Tashqi iqtisodiy aloqalar agentligi, Yaponiya bilan hamkorlik dasturlarini amalga oshirishda qatnashayotgan boshqa manfaatdor vazirliklar va idoralar Qoʻmita faoliyatiga koʻmaklashsinlar.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Yaponiya bilan hamkorlik qoʻmitasi (keyingi oʻrinlarda Qoʻmita deb ataladi) turli darajalarda siyosiy, iqtisodiy va gumanitar sohalarda Yaponiya bilan strategik sheriklik, doʻstlik va hamkorlik munosabatlarini rivojlantirish, ikki tomonlama parlament, amaliy, taʼlim, ilmiy va madaniy aloqalarni mustahkamlash maqsadida tashkil etilgan.

Qoʻmita respublika vazirliklari va idoralari, ishbilarmon doiralari va jamoat tashkilotlarining Yaponiya bilan hamkorlik masalalari boʻyicha oʻzaro hamkorligini muvofiqlashtirishni va uning samaradorligini taʼminlashga daʼvat etilgan.

2. Qoʻmita oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi qarorlariga, Oʻzbekiston Respublikasi Prezidenti qarorlari va farmoyishlariga, Oʻzbekiston Respublikasi Vazirlar Mahkamasi qarorlari va farmoyishlariga, Oʻzbekiston Respublikasining boshqa normativ-huquqiy hujjatlariga, Oʻzbekiston Respublikasining xalqaro shartnomalariga, shuningdek mazkur Nizomga amal qiladi.

3. Qoʻmitaga rais boshchilik qiladi va Qoʻmita Oliy Majlis deputatlaridan, Hukumat, vazirliklar, idoralar, mahalliy davlat hokimiyati organlari, korxonalar, muassasalar hamda Oʻzbekiston Respublikasining Yaponiya bilan ikki tomonlama hamkorlik boʻyicha aniq dasturlarini amalga oshirishda faol qatnashuvchi jamoat tashkilotlarining rahbarlari va masʼul xodimlaridan iborat boʻladi.

Qoʻmita oʻz tarkibiga Yaponiya bilan sheriklik, doʻstlik va hamkorlik munosabatlarini rivojlantirishdan manfaatdor boʻlgan tashkilotlar nomidan vakillik qiluvchi yangi aʼzolarning kirishi uchun ochiq hisoblanadi.

4. Qoʻmitaning har yilgi majlisida:

5 kishidan iborat Prezidium saylanadi, u majlislar oraligʻidagi davrda Qoʻmita nomidan ish olib boradi va uning manfaatlarini ifodalaydi. Prezidium majlislari zaruriyatga koʻra, lekin har chorakda kamida bir marta oʻtkaziladi;

Yaponiya bilan hamkorlikni rivojlantirish jamgʻarmasi rahbariyatining Jamgʻarma faoliyati yakunlari toʻgʻrisidagi axborotlari eshitiladi;

boshqa masalalar, shu jumladan Qoʻmitaga aʼzolik masalalari koʻrib chiqiladi.

5. Quyidagilar Qoʻmitaning asosiy vazifalari hisoblanadi:

respublika vazirliklari va idoralari, ishbilarmon doiralari va jamoat tashkilotlarining Yaponiya bilan hamkorlik boʻyicha faoliyati muvofiqlashtirilishini va oʻzaro samarali hamkorlik qilishini taʼminlash;

ikkala davlat oʻrtasida siyosiy, iqtisodiy, ilmiy-texnik, madaniy va gumanitar sohalarda hamkorlik qilish dasturlarini ishlab chiqish, ularning amalga oshirilishi ustidan muntazam nazoratni tashkil etish;

ikkala mamlakatning qonunchilik organlari, Hukumatga qarashli, Hukumatga qarashli boʻlmagan, jamoat va gumanitar tashkilotlari oʻrtasida aloqalarni mustahkamlash;

respublikada tarkibiy oʻzgartirishlarni jadallashtirishga koʻmaklashish uchun zamonaviy texnologiyalar va Yaponiya investitsiyalarini jalb etishga yoʻnaltirilgan iqtisodiy va investitsiya hamkorligini kengaytirish va chuqurlashtirish;

ikki tomonlama munosabatlarning huquqiy va institutsional bazasini takomillashtirish yuzasidan takliflar tayyorlash;

taʼlim, fan va madaniyat sohalarida oʻzaro ayirboshlashlarni, shaharlar, viloyatlar, prefekturalar, mahalliy hokimiyat organlari darajasida hamkorlikni kengaytirish.

6. Koʻrsatib oʻtilgan vazifalarni amalga oshirish doirasida Qoʻmita:

Hukumatni va ishbilarmon doiralarni, shuningdek Yaponiya jamoatchiligini Oʻzbekiston Respublikasida siyosiy, iqtisodiy va ijtimoiy islohotlarning borishi toʻgʻrisidagi axborotlar bilan taʼminlash boʻyicha chora-tadbirlar kompleksini amalga oshiradi;

ikkala mamlakat xalqlari oʻrtasidagi oʻzaro hamfikrlikni kengaytirish maqsadida, Oʻzbekiston va Yaponiyaning siyosiy, iqtisodiy, ijtimoiy va akademik doiralari vakillarini jalb etgan holda seminarlar, davra suhbatlari va boshqa tadbirlar oʻtkazadi;

taʼlim, fan va madaniyat sohasida istiqbolli yosh mutaxassislarni almashish, shuningdek ikkala davlatlarning shaharlari, viloyatlari (prefekturalari) darajasida hamkorlikni faollashtirish ishlarini amalga oshiradi;

zarurat boʻlganda, Oʻzbekiston bilan hamkorlik boʻyicha Yaponiya qoʻmitasi bilan kelishilgan aniq tadbirlarni taʼminlash uchun manfaatdor tashkilotlar mutaxassislaridan ekspert guruhlar tashkil qiladi, Vazirlar Mahkamasiga ikki tomonlama hamkorlikning huquqiy va institutsional bazasini takomillashtirish boʻyicha takliflar kiritadi.

7. Qoʻmita majlislari zaruriyatga koʻra, lekin har yili kamida bir marta oʻtkaziladi.

Navbatdan tashqari majlislar Qoʻmita raisining tashabbusiga koʻra chaqiriladi.

Qoʻmita majlislariga materiallar, shu jumladan Yaponiya bilan ikki tomonlama munosabatlarning ularni yanada rivojlantirish boʻyicha aniq takliflar ishlab chiqilgan holdagi tahlili tayyorlanadi.

8. Qoʻmita har yili Oʻzbekiston bilan hamkorlik boʻyicha Yaponiya qoʻmitasi bilan navbatma-navbat Yaponiyada va Oʻzbekistonda qoʻshma majlislar oʻtkazadi.

Qoʻmitalarning qoʻshma majlislarini oʻtkazish yakunlari boʻyicha, turli yoʻnalishlardagi ikki tomonlama hamkorlikni faollashtirishga doir tadbirlar rejalarini ishlab chiqish hamda ularni amalga oshirish uchun qoʻshma ishchi guruhlar tashkil etilishi mumkin.

9. Qoʻmita kotibiyati — Oʻzbekiston Respublikasi Tashqi ishlar vazirligining Osiyo-Tinch okeani mintaqasi mamlakatlari boshqarmasi Qoʻmita majlislarini tashkiliy va texnik jihatdan tayyorlashni taʼminlaydi.

Qoʻmita kotibiyati:

Oʻzbekiston bilan Yaponiya oʻrtasidagi hamkorlikni rivojlantirish toʻgʻrisidagi axborotlarni umumlashtiradi;

manfaatdor tashkilotlardan Qoʻmita majlislarini tayyorlash uchun zarur axborotlar va materiallarni oladi;

Qoʻmitaning qoʻshma majlislarida erishilgan ahdlashuvlarni amalga oshirishning doimiy monitoringini olib boradi.

10. Har qaysi yil yakunlari boʻyicha, Qoʻmita kotibiyati tomonidan toʻplangan materiallar asosida maxsus axborotnoma nashr etiladi, unda Oʻzbekiston-Yaponiya hamkorligini rivojlantirishning ahvoli va istiqbollari yoritiladi.

11. Yaponiya bilan hamkorlik qoʻmitasi huzurida Yaponiya bilan hamkorlikni rivojlantirish jamgʻarmasi tashkil etiladi.

12. Yaponiya bilan hamkorlik qoʻmitasi tadbirlarini, shu jumladan Oʻzbekiston bilan hamkorlik boʻyicha Yaponiya qoʻmitasi bilan uning qoʻshma majlislarini, koʻrgazmalar va seminarlarni, qoʻshma axborotlar nashr etishni, fan va madaniyat vakillarining xizmat safarlarini va boshqa tadbirlarni moliyalashtirish Yaponiya bilan hamkorlikni rivojlantirish jamgʻarmasining asosiy vazifalari hisoblanadi.

13. Oʻzbekiston va Yaponiya tashkilotlari, yuridik va jismoniy shaxslarining ixtiyoriy homiylik badallari, shuningdek qonun hujjatlarida taqiqlanmagan boshqa manbalar Yaponiya bilan hamkorlikni rivojlantirish jamgʻarmasining moliyaviy manbalari hisoblanadi.

14. Yaponiya bilan hamkorlikni rivojlantirish jamgʻarmasi yuridik shaxs hisoblanadi, banklarda hisob raqamlariga va oʻz nomi yozilgan muhrga ega boʻladi.

15. Qoʻmita faoliyati Oʻzbekiston Respublikasi Vazirlar Mahkamasining qaroriga muvofiq toʻxtatiladi.