Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasini tashkil etish toʻgʻrisida” 2017-yil 30-avgustdagi PF-5174-sonli Farmoni ijrosini taʼminlash hamda oʻsimliklar karantini qoidalari va fitosanitariya normalarining bajarilishi ustidan davlat nazorati tizimini yanada takomillashtirish, Oʻzbekiston Respublikasi hududida maqbul fitosanitariya sharoitlarini taʼminlash maqsadida:

1. Quyidagilar:

Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasining tashkiliy tuzilmasi 1-ilovaga* muvofiq;

Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasining boshqaruv xodimlari cheklangan soni 20 nafardan iborat markaziy apparati tuzilmasi 2-ilovaga* muvofiq;

oʻsimliklar karantini boʻyicha hududiy inspeksiyalarning namunaviy tuzilmasi va xodimlarning cheklangan soni, shuningdek, avtomobil yoʻllaridagi, temir yoʻl stansiyalari, aeroportlar va daryo portidagi oʻsimliklar karantini boʻyicha chegara punktlari hamda pochtamtdagi punkt roʻyxati 3-, 3a, 3b-ilovalariga* muvofiq tasdiqlansin.

Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasi boshligʻiga, zarur hollarda, oʻsimlik karantini inspeksiyasining markaziy apparati tuzilmasiga, hududiy inspeksiyalar, shuningdek, Inspeksiya tarkibiga kiruvchi boshqa tashkilotlarning tuzilmalariga xodimlarning belgilangan umumiy shtatlari soni chegarasida oʻzgartirishlar kiritish huquqi berilsin.

2. 2017 — 2019-yillarda Oʻzbekiston Respublikasining karantin xizmati faoliyatini takomillashtirish chora-tadbirlari dasturi (keyingi oʻrinlarda chora-tadbirlar Dasturi deb ataladi) 4-ilovaga* muvofiq maʼqullansin.

Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasi, Oʻzbekiston Respublikasi Qishloq va suv xoʻjaligi vazirligi, tegishli vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari rahbarlari zimmasiga chora-tadbirlar Dasturida belgilangan tadbirlarning oʻz vaqtida va sifatli bajarilishini tashkil qilish yuzasidan shaxsiy javobgarlik yuklansin.

3. Oʻzbekiston Respublikasi Moliya vazirligi, Iqtisodiyot vazirligi, Qishloq va suv xoʻjaligi vazirligining Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasining Oʻsimliklar karantini tizimini rivojlantirish jamgʻarmasini (keyingi oʻrinlarda Jamgʻarma deb ataladi) tashkil etish toʻgʻrisidagi taklifi qabul qilinsin.

Quyidagilar Jamgʻarma mablagʻlarini shakllantirishning asosiy manbalari etib belgilansin:

urugʻliklar, oʻsimliklar va oʻsimlik mahsulotlarini import qilish uchun karantin ruxsatnomalarini rasmiylashtirish uchun olinadigan toʻlovlar;

tarkibida urugʻlar, oʻsimliklar va oʻsimlik mahsulotlari boʻlgan, Oʻzbekiston Respublikasi hududi orqali tranzit boʻyicha olib oʻtilayotgan yuklarga karantin ruxsatnomasini rasmiylashtirishdan olingan toʻlovlar;

urugʻlar, oʻsimliklar va oʻsimlik mahsulotlarini eksport qilishda fitosanitariya sertifikatlarini rasmiylashtirish uchun olinadigan toʻlovlar;

eksport va import qilinayotgan oʻsimliklar karantini nazoratidagi mahsulotlarning namunalarini laboratoriya ekspertizasidan oʻtkazilishi uchun olinadigan toʻlovlar;

eksport va import qilinayotgan oʻsimliklar karantini nazoratidagi mahsulotlarni zararsizlantirish boʻyicha fumigatsiya ishlari oʻtkazilganligi uchun olinadigan toʻlovlar;

karantindagi yuklarni Oʻzbekiston Respublikasi hududi ichida karantin fitosanitariya sertifikatini rasmiylashtirganlik va taqdim etganlik uchun olinadigan toʻlovlar;

oʻsimliklar karantini sohasidagi maʼmuriy huquqbuzarlik uchun qonunchilikka muvofiq undiriladigan jarimalar;

qonunchilikda taqiqlanmagan boshqa manbalar.

4. Belgilab qoʻyilsinki, Jamgʻarma mablagʻlaridan Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasiga yuklangan vazifalar va funksiyalarni hal etish, ilmiy-tadqiqot ishlarini moliyalashtirish, moddiy-texnika bazasini mustahkamlash, mutaxassislarni qayta tayyorlash va ularning malakasini oshirish tizimini takomillashtirish, shuningdek, oʻsimliklar karantini davlat xizmati xodimlarini moddiy ragʻbatlantirish uchun foydalaniladi.

5. Oʻzbekiston Respublikasi Vazirlar Mahkamasi ikki oy muddatda:

Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasi toʻgʻrisidagi nizomni;

Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasining Oʻsimliklar karantini tizimini rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizomni tasdiqlasin.

6. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasini zarur aloqa vositalari, shu jumladan hukumat aloqasi bilan belgilangan tartibda taʼminlasin.

7. Oʻzbekiston Respublikasi Vazirlar Mahkamasi huzuridagi Oʻsimliklar karantini davlat inspeksiyasi Oʻzbekiston Respublikasi Adliya vazirligi hamda boshqa manfaatdor vazirliklar va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

8. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari — qishloq va suv xoʻjaligi vaziri Z.T. Mirzayev zimmasiga yuklansin.