Tadbirkorlik subyektlarining huquqlari va qonuniy manfaatlarini himoya qilish kafolatlarini kuchaytirish, ularning faoliyatiga davlat organlari asossiz aralashuvining oldini olish, xususiy mulk daxlsizligining huquqiy mexanizmlarini yanada mustahkamlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakili institutini ta’sis etish to‘g‘risida” 2017-yil 5-maydagi PF-5037-son Farmoniga muvofiq O‘zbekiston Respublikasi Prezidenti huzurida Tadbirkorlik subyektlarining huquqlari va qonuniy manfaatlarini himoya qilish bo‘yicha vakil instituti (keyingi o‘rinlarda Tadbirkorlarning huquqlarini himoya qilish bo‘yicha vakil deb ataladi) ta’sis etilganligi ma’lumot uchun qabul qilinsin.

2. O‘zbekiston Respublikasi Moliya vazirligi:

2017-yilda Tadbirkorlarning huquqlarini himoya qilish bo‘yicha vakil apparatiga joriy ta’minot, idora mebeli, kompyuter texnikasi, tashkiliy texnika sotib olish uchun asoslangan hisob-kitoblar bo‘yicha O‘zbekiston Respublikasi Vazirlar Mahkamasining zaxira jamg‘armasidan mablag‘lar ajratsin;

2018-yildan boshlab Tadbirkorlarning huquqlarini himoya qilish bo‘yicha vakil apparatiga joriy ta’minot, xorijiy tillardagi adabiyotlarni sotib olish, jurnallarga va boshqa davriy nashrlarga obuna bo‘lish uchun O‘zbekiston Respublikasi Davlat budjetidan har yili mablag‘lar ajratishni nazarda tutsin;

Tadbirkorlarning huquqlarini himoya qilish bo‘yicha vakil apparati xodimlariga transport xizmati ko‘rsatishga limitlar ajratilishini ta’minlasin.

3. Belgilansinki, quyidagilar:

texnik ko‘maklashish mablag‘lari, xalqaro va xorijiy hukumat, nohukumat tashkilotlarning grantlari;

qonunchilikda taqiqlanmagan boshqa manbalar Tadbirkorlarning huquqlarini himoya qilish bo‘yicha vakil apparatini moliyalashtirishning qo‘shimcha manbalari hisoblanadi.

4. Tadbirkorlarning huquqlarini himoya qilish bo‘yicha vakil apparatini transport vositalari bilan ta’minlash belgilangan limitlarga muvofiq O‘zbekiston Respublikasi Prezidenti Administratsiyasi Moliya-xo‘jalik departamenti tomonidan amalga oshiriladi.

5. O‘zbekiston Respublikasi Investitsiyalar va tashqi savdo vazirligi Tashqi ishlar vazirligi bilan birgalikda Tadbirkorlarning huquqlarini himoya qilish bo‘yicha vakil faoliyatini moddiy-texnik va axborot bilan ta’minlash uchun texnik ko‘maklashish mablag‘lari, xalqaro va xorijiy hukumat, nohukumat tashkilotlarning grantlarini jalb etish masalasini xalqaro va xorijiy tashkilotlar bilan ishlab chiqishda Tadbirkorlarning huquqlarini himoya qilish bo‘yicha vakil apparatiga ko‘maklashsin.

6. O‘zbekiston Respublikasi Tashqi ishlar vazirligi:

Tadbirkorlarning huquqlarini himoya qilish bo‘yicha vakil apparati xodimlarining xorijiy mamlakatlarga chiqib ilg‘or xorijiy tajribani o‘rganishi, shuningdek xorijiy ekspertlarni taklif qilishni tashkil etish masalasini xalqaro va xorijiy tashkilotlar bilan ishlab chiqishda Tadbirkorlarning huquqlarini himoya qilish bo‘yicha vakil apparatiga ko‘maklashsin;

Tadbirkorlarning huquqlarini himoya qilish bo‘yicha vakilning buyurtmanomalari bo‘yicha Tadbirkorlarning huquqlarini himoya qilish bo‘yicha vakilning faoliyatini moddiy-texnik va axborot bilan ta’minlash bo‘yicha loyihalarni amalga oshirishda ishtirok etayotgan, shuningdek tajriba almashayotgan xorijiy mutaxassislarga konsullik yig‘imlari va boshqa yig‘imlar undirilmasdan kirish vizalari rasmiylashtirilishini ta’minlasin.

7. Tadbirkorlarning huquqlarini himoya qilish bo‘yicha vakil apparati:

O‘zbekiston Respublikasi Vazirlar Mahkamasining qarorlari va farmoyishlari, O‘zbekiston Respublikasi vazirliklari, davlat qo‘mitalari va idoralari tomonidan qabul qilingan normativ-huquqiy hujjatlar;

O‘zbekiston Respublikasi Iqtisodiyot va moliya vazirligi, Kambag‘allikni qisqartirish va bandlik vazirligi, Ichki ishlar vazirligi, Milliy statistika qo‘mitasi, Soliq qo‘mitasi, Iqtisodiyot va moliya vazirligi huzuridagi Bojxona qo‘mitasi, Bosh prokuratura, Oliy sudning statistika axboroti;

Axborot va ommaviy kommunikatsiyalar agentligining Ommaviy kommunikatsiyalar masalalari bo‘yicha markazining byulletenlari va yillik ma’lumotnomalari;

O‘zbekiston Respublikasi Prezidenti Administratsiyasi huzuridagi Iqtisodiy tadqiqotlar va islohotlar markazi xorijiy matbuot sharhlari va tahliliy ma’ruzalari, O‘zbekiston Respublikasi Iqtisodiyot va sanoat vazirligi huzuridagi Prognozlashtirish va makroiqtisodiy tadqiqotlar instituti va O‘zbekiston Respublikasi Moliya vazirligi huzuridagi Budjet-soliq tadqiqotlari institutining tahliliy materiallari majburiy tartibda yuboriladigan reyestrga kiritilsin.

8. O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi Tadbirkorlarning huquqlarini himoya qilish bo‘yicha vakil apparatini bosma va kitob mahsulotlarining (huquqiy, ijtimoiy-siyosiy va iqtisodiy nashrlar) bepul nazorat nusxasini oladigan tashkilotlar ro‘yxatiga kiritsin va Tadbirkorlarning huquqlarini himoya qilish bo‘yicha vakilning buyurtmanomalari bo‘yicha axborot-tahliliy va ilmiy mahsulotlar nashr etilishiga ko‘maklashsin.

9. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi Tadbirkorlarning huquqlarini himoya qilish bo‘yicha vakil apparatining so‘rovi bo‘yicha belgilangan tartibda:

Tadbirkorlarning huquqlarini himoya qilish bo‘yicha vakil apparati aloqaning zarur turlari va vositalari, shu jumladan Hukumat aloqasi bilan jihozlanishini, shuningdek butunjahon Internet axborot tarmog‘idan keng polosali foydalanishini;

O‘zbekiston Milliy kutubxonasi bilan birgalikda Tadbirkorlarning huquqlarini himoya qilish bo‘yicha vakil apparatining O‘zbekiston Milliy kutubxonasining axborot-kutubxona fondidan va yetakchi xorijiy litsenzion axborot-kutubxona resurslari fondlaridan doimiy ravishda elektron foydalanishini ta’minlasin.

10. Belgilansinki, Tadbirkorlarning huquqlarini himoya qilish bo‘yicha vakil apparati yuridik shaxs hisoblanadi, O‘zbekiston Respublikasining Davlat gerbi tasviri tushirilgan va o‘z nomi yozilgan muhrga va blankalarga, shuningdek qonunchilikka muvofiq ochiladigan bank hisob raqamlariga ega bo‘ladi.

12. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari J.A. Qo‘chqorov va moliya vaziri B.A. Xo‘jayev zimmasiga yuklansin.