LexUZ sharhi
Mazkur qaror O‘zbekiston Respublikasi Prezidentining 2022-yil 15-yanvardagi PF-52-sonli “Turizm, madaniyat, madaniy meros va sport sohalarini yanada rivojlantirish uchun qo‘shimcha sharoitlar yaratish to‘g‘risida”gi Farmoniga asosan o‘z kuchini yo‘qotgan.
Hududlarning sayyohlik salohiyatini dunyoga keng targ‘ib qilish, mamlakatimizga tashrif buyurishi kutilayotgan sayyohlarga qulay sharoitlar yaratish, sohadagi mavjud muammolarni tizimli asosda bartaraf etish, ushbu vazifalarni amalga oshirishda joylardagi mahalliy davlat hokimiyati organlarining mas’uliyatini oshirish hamda turizm sohasini yanada rivojlantirish maqsadida:
1. O‘zbekiston Respublikasi Iqtisodiyot vazirligi, Turizmni rivojlantirish davlat qo‘mitasi, Xorazm, Buxoro, Samarqand va Toshkent viloyatlari hokimliklari hamda Moliya vazirligining Xorazm, Buxoro, Samarqand va Toshkent viloyati hokimlarining turizm va sportni rivojlantirish masalalari bo‘yicha o‘rinbosarlari lavozimlarini joriy etish va ularning kotibiyatlarini tashkil qilish to‘g‘risidagi takliflari ma’qullansin.
(1-band O‘zbekiston Respublikasi Prezidentining 2021-yil 9-fevraldagi PF-6165-sonli Farmoni tahririda — Qonun hujjatlari ma’lumotlari milliy bazasi, 10.02.2021-y., 09/21/6165/0104-son)
2. Quyidagilar viloyatlar hokimlarining turizm va sportni rivojlantirish masalalari bo‘yicha o‘rinbosarlarining asosiy vazifalari etib belgilansin:
hududda turizm va sport sohasida davlat siyosatini amalga oshirish, soha bo‘yicha qabul qilingan konsepsiya va dasturlarning ijrosini ta’minlashga qaratilgan tadbirlarni belgilash;
chet el mamlakatlari bilan turizm sohasida, ayniqsa, turistlar oqimini ko‘paytirish hamda ularni jalb qilish bo‘yicha hamkorlik va kelishuvlarni vakolatli organlar bilan birgalikda amalga oshirish;
sohani chuqur tahlil qilish asosida turistik xizmatlarga bo‘lgan talabni o‘rganish, bu boradagi mavjud muammolar va to‘siqlarni aniqlash, sohani rivojlantirish hamda takomillashtirishning maqsadga muvofiq modellarini ishlab chiqish va kelgusi rejalarni belgilash;
turizm sohasining iqtisodiy, ekologik, ijtimoiy, madaniy va boshqa yo‘nalishlardagi infratuzilmasini takomillashtirish va turizm yo‘nalishidagi diqqatga sazovor joylar, ularni yaxshilash bo‘yicha aniq chora-tadbirlarni belgilash hamda amalga oshirish;
qo‘shimcha turizm marshrutlarini ishlab chiqish, chet el yoshlarini keng jalb etish maqsadida ko‘ngilochar komplekslar barpo etish, madaniy meros obyektlarida xalqimizning tarixi, turmush tarzi, urf-odatlari, an’analarini o‘zida aks ettirgan ekspozitsiyalarni tashkil etish;
turizm va sport sohasida hududiy dasturlarini ishlab chiqish va amalga oshirishni muvofiqlashtirish;
turizmni va sportni rivojlantirish masalalari bo‘yicha mas’ul vazirlik, idora va qo‘mitalarning hududiy boshqarmalari ish faoliyatini muvofiqlashtirish;
turizm sohasiga zamonaviy axborot-kommunikatsiya vositalarini jalb etish, xorijiy turoperatorlar va ommaviy axborot vositalari bilan hamkorlik qilish orqali respublikaning mavjud sayyohlik salohiyatini keng yoritish choralarini ko‘rish;
jismoniy tarbiya-sport tashkilotlarini tashkil etishga ko‘maklashish hamda ularning faoliyatini qo‘llab-quvvatlash;
ommaviy jismoniy tarbiya va sport tadbirlarini tashkil etish hamda o‘tkazishga, jismoniy tarbiya va sport sohasidagi mutaxassislarni tayyorlash, qayta tayyorlash va ularning malakasini oshirishga ko‘maklashish ishlarini muvofiqlashtirish;
tegishli hududda jismoniy tarbiya-sog‘lomlashtirish va sport inshootlaridan maqsadli foydalanilishi ustidan nazoratni ta’minlash;
havaskorlik jismoniy tarbiya-sport harakatini rivojlantirish uchun fuqarolarning ish joyi, yashash joyi hamda dam olish joyida shart-sharoitlar yaratish;
jismoniy tarbiya-sog‘lomlashtirish va sport uchun mo‘ljallangan tovarlar ishlab chiqarilishini tashkil etishga ko‘maklashish choralarini ko‘rish.
O‘zbekiston Respublikasi Bosh vazirining o‘rinbosari — Turizmni rivojlantirish davlat qo‘mitasi raisi viloyatlar hokimlarining turizm va sportni rivojlantirish masalalari bo‘yicha o‘rinbosarlarining faoliyatini muvofiqlashtiradi.
(2-band O‘zbekiston Respublikasi Prezidentining 2021-yil 9-fevraldagi PF-6165-sonli Farmoni tahririda — Qonun hujjatlari ma’lumotlari milliy bazasi, 10.02.2021-y., 09/21/6165/0104-son)
3. Xorazm, Buxoro, Samarqand va Toshkent viloyati hokimliklari O‘zbekiston Respublikasi Turizmni rivojlantirish davlat qo‘mitasi bilan birgalikda joriy etilayotgan viloyat hokimining turizm va sportni rivojlantirish masalalari bo‘yicha o‘rinbosarining funksional vazifalari va ularning kotibiyati to‘g‘risidagi nizomlarni bir oy muddatda ishlab chiqib, tasdiqlasinlar.
(3-band O‘zbekiston Respublikasi Prezidentining 2021-yil 9-fevraldagi PF-6165-sonli Farmoni tahririda — Qonun hujjatlari ma’lumotlari milliy bazasi, 10.02.2021-y., 09/21/6165/0104-son)
4. O‘zbekiston Respublikasi Prezidentining Davlat maslahatchisi U.S. Ismailov va O‘zbekiston Respublikasining Bosh vaziri A.N. Aripov joriy etilayotgan lavozimlarni puxta maxsus bilimlarga, yuqori kasbiy mahoratga ega bo‘lgan, chet tillarini yaxshi biladigan, tajribali va malakali kadrlar bilan to‘ldirish yuzasidan bir oy muddatda taklif kiritsinlar.
Oldingi tahrirga qarang.
(5-band O‘zbekiston Respublikasi Prezidentining 2017-yil 3-noyabrdagi PQ-3374-sonli qaroriga asosan o‘z kuchini yo‘qotgan — Qonun hujjatlari ma’lumotlari milliy bazasi, 04.11.2017-y., 07/17/3374/0208-son)
6. Mazkur qarorning bajarilishini nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Prezidentining Davlat maslahatchisi U.S. Ismailov zimmasiga yuklansin.
Oldingi tahrirga qarang.
(ilova O‘zbekiston Respublikasi Prezidentining 2017-yil 3-noyabrdagi PQ-3374-sonli qaroriga asosan o‘z kuchini yo‘qotgan — Qonun hujjatlari ma’lumotlari milliy bazasi, 04.11.2017-y., 07/17/3374/0208-son)