Aholi punktlarini qurishda shaharsozlik va yer toʻgʻrisidagi qonun hujjatlariga qatʼiy rioya etilishini taʼminlashda mahalliy davlat hokimiyati organlarining masʼuliyatini oshirish, tadbirkorlik maqsadlari uchun yer ajratish tartibini yanada takomillashtirish, oʻzboshimchalik bilan qurilgan imoratni aniqlash hamda bartaraf etish choralarini kuchaytirish maqsadida Vazirlar Mahkamasi qaror qiladi:

1. Oʻzboshimchalik bilan qurilgan imoratni aniqlash hamda bartaraf etish (buzib tashlash)ni tashkil etish tartibi toʻgʻrisida nizom 1-ilovaga muvofiq tasdiqlansin.

2. Quyidagilar Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlarining aholi punktlarini qurishda shaharsozlik va yer toʻgʻrisidagi qonun hujjatlariga qatʼiy rioya etilishini taʼminlashdagi asosiy vazifalari etib belgilansin:

aholi punktlarida va qishloqlararo hududlarda tuman (shahar) hokimlari tomonidan imoratlar qurilishi uchun yer uchastkalarining tegishli ruxsat berish hujjatlarini qonun hujjatlarida belgilangan tartibda rasmiylashtirmasdan berilishining oldini olish;

yuridik va jismoniy shaxslar tomonidan yer uchastkalarini oʻzboshimchalik bilan egallash va oʻzboshimchalik bilan imoratni qurishga yoʻl qoʻymaslik yuzasidan aniq chora-tadbirlarni ishlab chiqish va amalga oshirish;

aholi punktlarini qurishda ularning bosh rejalari qoʻpol ravishda buzilganligi, shaharsozlik normalari va qoidalariga rioya etilishi yuzasidan nazoratni susaytirganligi uchun tegishli mansabdor shaxslarni belgilangan tartibda javobgarlikka tortish choralarini koʻrish;

aholi punktlarini qurishda shaharsozlik va yer toʻgʻrisidagi qonun hujjatlariga qatʼiy rioya etilishini taʼminlash borasida olib borilayotgan ishlarning ommaviy axborot vositalarida muntazam ravishda yoritib borilishini tashkil etish.

3. Oʻzbekiston Respublikasi Davlat arxitektura va qurilish qoʻmitasi va Yer resurslari, geodeziya, kartografiya va davlat kadastri davlat qoʻmitasi:

davlat va xoʻjalik boshqaruvi organlari, mahalliy davlat hokimiyati organlari, yuridik va jismoniy shaxslar tomonidan shaharsozlik va yer toʻgʻrisidagi qonun hujjatlariga rioya etilishi yuzasidan taʼsirchan nazoratni taʼminlasin;

boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

4. Oʻzbekiston Respublikasi Hukumatining ayrim qarorlariga 2-ilovaga muvofiq oʻzgartirish va qoʻshimchalar kiritilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov zimmasiga yuklansin.

1. Ushbu Nizom Oʻzbekiston Respublikasining Shaharsozlik kodeksi, Yer kodeksi va Fuqarolik kodeksiga muvofiq oʻzboshimchalik bilan qurilgan (qurilayotgan) uy-joy, boshqa bino, inshoot yoki oʻzga koʻchmas mulkni (keyingi oʻrinlarda oʻzboshimchalik bilan qurilgan imorat deb ataladi) aniqlash va bartaraf etish (buzib tashlash)ni tashkil etish tartibini belgilaydi.

2. Oʻzboshimchalik bilan qurilgan imoratlarni aniqlash hamda bartaraf etish (buzib tashlash)ni tashkil etish ushbu sohada vakolatga ega davlat organlari tomonidan shaharcha, qishloq, ovul, mahalla fuqarolar yigʻini (keyingi oʻrinlarda fuqarolarning oʻzini oʻzi boshqarish organlari deb ataladi) bilan hamkorlikda amalga oshiriladi.

3. Oʻzboshimchalik bilan qurilgan imoratni aniqlash:

qonun hujjatlarida belgilangan tartibda qurilish maqsadlari uchun yer uchastkasini ajratish toʻgʻrisidagi tuman (shahar) hokimining qarori mavjudligini;

davlat arxitektura-qurilishi nazorati hududiy inspeksiyasining qurilish-montaj ishlarini amalga oshirish uchun ruxsatnomasi yoki uy-joy qurishi uchun tuman (shahar) arxitektori bilan kelishilgan yakka tartibda ishlab chiqilgan loyihaning mavjudligini;

shaharsozlik normalari va qoidalariga muvofiq qurilganligini tekshirish orqali amalga oshiriladi.

4. Quyidagilar oʻzboshimchalik bilan qurilgan imoratlarni aniqlash hamda ularni bartaraf etish (buzib tashlash)ni tashkil etish sohasidagi vakolatli davlat organlari (keyingi oʻrinlarda vakolatli organlar deb ataladi) hisoblanadi:

Qoraqalpogʻiston Respublikasi Vazirlar Kengashi, viloyatlar va Toshkent shahri, tumanlar (shaharlar) hokimliklari;

Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi hamda uning hududiy organlari;

Oʻzbekiston Respublikasi Davlat arxitektura va qurilish qoʻmitasi hamda uning hududiy organlari;

Oʻzbekiston Respublikasi Ekologiya va atrof-muhitni muhofaza qilish davlat qoʻmitasi hamda uning hududiy organlari;

Oʻzbekiston Respublikasi Madaniyat vazirligi huzuridagi Madaniy meros departamenti va uning hududiy boshqarmalari.

Vakolatli organlar fuqarolarning oʻzini oʻzi boshqarish organlari bilan hamkorlikda faoliyat yuritadi.

5. Vakolatli organlar har yili oʻzlarining oʻzboshimchalik bilan qurilgan imoratni aniqlash hamda bartaraf etish (buzib tashlash)ni tashkil etish chora-tadbirlar rejasini (keyingi oʻrinlarda Chora-tadbirlar rejasi deb ataladi) ishlab chiqadi va tasdiqlaydi.

Chora-tadbirlar rejalarining ishlab chiqilishi va ularning ijrosini Qoraqalpogʻiston Respublikasi Vazirlar Kengashi, viloyatlar, Toshkent shahri hamda tumanlar (shaharlar) hokimliklari tegishliligi boʻyicha muvofiqlashtiradi.

6. Oʻzboshimchalik bilan qurilgan imoratlarni aniqlash hamda bartaraf etish (buzib tashlash)ni tashkil etish ushbu Nizomning ilovasidagi sxemaga muvofiq amalga oshiriladi.

7. Har bir vakolatli organning hududiy organi ushbu Nizomning 5-bandida nazarda tutilgan oʻzining Chora-tadbirlar rejasiga muvofiq oʻzboshimchalik bilan qurilgan imoratlarni mustaqil ravishda yoki boshqa organlar bilan birgalikda aniqlab boradi.

8. Vakolatli organ fuqarolarning oʻzini oʻzi boshqarish organlari bilan hamkorlikda:

imoratni qurish uchun ushbu Nizomning 3-bandida nazarda tutilgan hujjatlarning mavjudligi hamda shaharsozlik normalari va qoidalari asosida qurilganligini aniqlaydi;

oʻzboshimchalik bilan qurilgan imorat aniqlangan taqdirda ushbu imoratni qurgan shaxsga mazkur qurilishning noqonuniyligi va uning huquqiy oqibatlari haqida batafsil tushuntirishlar beradi hamda imoratni oʻn besh kunlik muddatda ixtiyoriy ravishda bartaraf etish (buzib tashlash) toʻgʻrisida dalolatnoma tuzadi.

Ushbu dalolatnomada quyidagilar aks ettiriladi:

oʻzboshimchalik bilan qurilgan imoratni aniqlashda ishtirok etgan vakolatli organ va fuqarolarning oʻzini oʻzi boshqarish organi vakili lavozimi, familiya va ismi-sharifi hamda imorat qurgan shaxsning nomi (yuridik shaxs boʻlganda) yoki familiya va ismi-sharifi (jismoniy shaxs boʻlganda);

oʻzboshimchalik bilan qurilgan imoratning aniq manzili, qurilish maqsadi hamda qurilishning holati va hajmi;

oʻzboshimchalik bilan imoratni qurgan shaxs tomonidan uni oʻn besh kunlik muddatda ixtiyoriy ravishda bartaraf etish (buzib tashlash) toʻgʻrisida koʻrsatma.

9. Vakolatli organ oʻzboshimchalik bilan imoratni qurgan shaxsga ushbu Nizomning 8-bandida nazarda tutilgan dalolatnomani fuqarolarning oʻzini oʻzi boshqarish organi vakili va tuman (shahar) ichki ishlar boshqarmasining (boʻlimining) profilaktika inspektori ishtirokida topshirilishini taʼminlaydi.

10. Oʻzboshimchalik bilan imorat qurgan shaxs dalolatnomani olishni rad etgan holda vakolatli organ ushbu holat toʻgʻrisida kamida uch kishi (vakolatli organ va fuqarolarning oʻzini oʻzi boshqarish organi vakillari hamda tuman (shahar) ichki ishlar boshqarmasining (boʻlimining) profilaktika inspektori) ishtirokida bayonnoma tuzilishini taʼminlaydi.

Bayonnomada dalolatnomani topshirayotgan shaxslarning lavozimi va ismi-sharifi, oʻzboshimchalik bilan imoratni qurgan shaxs tomonidan dalolatnomani olishdan bosh tortgan sana va bosh tortish sabablari (mavjud boʻlganda) koʻrsatib oʻtiladi.

11. Oʻzboshimchalik bilan imoratni qurgan shaxs oʻn besh kun muddat ichida uni oʻz hisobidan bartaraf etishi shart.

Oʻzboshimchalik bilan imoratni qurgan shaxs tomonidan ushbu imoratni bartaraf etilishi (buzib tashlanishi)ni vakolatli organ fuqarolarning oʻzini oʻzi boshqarish organi bilan hamkorlikda nazorat qiladi.

Oʻzboshimchalik bilan imoratni qurgan shaxs tomonidan imoratga nisbatan mulk huquqini eʼtirof etish toʻgʻrisida sudga daʼvo berilgan taqdirda daʼvo berilgan kundan boshlab sudning yakuniy qarori qabul qilinishiga qadar ushbu imoratni bartaraf etilishi vaqtincha toʻxtatib turiladi.

12. Oʻzboshimchalik bilan qurilgan imorat bartaraf etish (buzib tashlash) uchun belgilangan muddat tugagandan soʻng vakolatli organ fuqarolarning oʻzini oʻzi boshqarish organi bilan hamkorlikda ikki ish kuni mobaynida ushbu toʻgʻrisida Oʻzbekiston Respublikasi Yer kodeksining 34-moddasiga muvofiq tuman (shahar) hokimligi huzuridagi Yer uchastkalarini berish (realizatsiya qilish) masalalarini koʻrib chiquvchi komissiyaga (keyingi oʻrinlarda Komissiya deb ataladi) xabarnoma kiritadi.

Xabarnomada oʻzboshimchalik bilan imoratni qurgan shaxsning nomi (yuridik shaxs boʻlganda) yoki familiya va ismi-sharifi (jismoniy shaxs boʻlganda), imoratning aniq manzili, qurilish maqsadi, qurilishning holati va hajmi koʻrsatilgan maʼlumotlar aks ettiriladi hamda unga ushbu Nizomning 8-bandida nazarda tutilgan dalolatnoma va 10-bandida nazarda tutilgan bayonnoma ilova qilinadi.

13. Komissiya vakolatli organlar tomonidan kiritilgan xabarnoma kelib tushgan sanadan eʼtiboran uch ish kuni mobaynida Oʻzbekiston Respublikasi Fuqarolik kodeksining 212-moddasi uchinchi qismiga muvofiq oʻzboshimchalik bilan qurilgan imoratni bartaraf etish (buzib tashlash) toʻgʻrisidagi tuman (shahar) hokimining daʼvo arizasini sudga kiritilishini taʼminlaydi.

14. Oʻzboshimchalik bilan qurilgan imoratni bartaraf etish (buzib tashlash) toʻgʻrisidagi daʼvo arizaga ushbu Nizomning 8-bandida nazarda tutilgan dalolatnoma, 10-bandida nazarda tutilgan bayonnoma, 12-bandida nazarda tutilgan xabarnoma, oʻzboshimchalik bilan qurilgan imoratning joylashuv sxemasi, imoratning fotosuratlari (kamida toʻrt tomonidan tushirilgan) ilova qilinadi.

15. Oʻzbekiston Respublikasi Yer kodeksining 91-moddasiga muvofiq oʻzboshimchalik bilan egallab olingan yer uchastkalari ularga gʻayriqonuniy ravishda egalik qilingan va foydalanilgan vaqtda qilingan sarf-xarajatlar qoplanmagan tarzda tegishliligiga koʻra qaytariladi.

Yer uchastkalarini foydalanish uchun yaroqli holatga keltirish, shu jumladan undagi imoratlarni buzish yer uchastkalarini oʻzboshimchalik bilan egallab olgan shaxslar hisobidan amalga oshiriladi.

Oʻzboshimchalik bilan egallab olingan yer uchastkasini yer egasiga, yerdan foydalanuvchiga, yer uchastkasi ijarachisiga yoki mulkdoriga qaytarish tegishli tuman, shahar, viloyat hokimining qaroriga binoan yoki sudning hal qiluv qaroriga koʻra amalga oshiriladi.

16. Oʻzboshimchalik bilan qurilgan imoratni qonun hujjatlariga muvofiq fuqarolarning huquqlari va qonuniy manfaatlariga ziyon yetkazmagan holda bartaraf etish choralari koʻriladi.

17. Mazkur Nizom talablari buzilishida aybdor boʻlgan shaxslar qonun hujjatlariga muvofiq javob beradilar.

1. Vazirlar Mahkamasining “Shaharsozlik faoliyatini amalga oshirish hamda qishloq xoʻjaligiga oid boʻlmagan ehtiyojlar uchun yer uchastkalari berish, shuningdek obyektlarni qurishga ruxsatnomalar berish tartibini tubdan soddalashtirish chora-tadbirlari toʻgʻrisida” 2013-yil 25-fevraldagi 54-son qarorida (Oʻzbekiston Respublikasi QT, 2013-y., 2-son, 13-modda):

a) Shaharsozlik faoliyatini amalga oshirish uchun aholi punktlarida yer uchastkalari berish, qurilish obyektlarini loyihalashtirish va roʻyxatdan oʻtkazish, shuningdek obyektlarni foydalanishga qabul qilish tartibi toʻgʻrisidagi Nizomda:

11-band quyidagi tahrirda bayon qilinsin:

“11. Tuman (shahar) arxitektura va qurilish boʻlimi (boshqarmasi) yuridik va jismoniy shaxslar bilan tuzilgan shartnoma asosida yigirma uch kun mobaynida yer uchastkasini tanlash boʻyicha materiallarni tayyorlaydi va vakolatli organlar (tashkilotlar) bilan kelishadi.

Yer uchastkasini tanlash boʻyicha materiallarni tayyorlaganlik va kelishganlik uchun Oʻzbekiston Respublikasi Vazirlar Mahkamasi tomonidan belgilangan miqdorda toʻlov undiriladi.

Tuman (shahar) arxitektura va qurilish boʻlimi (boshqarmasi) yer uchastkasini tanlash boʻyicha materiallarni tayyorlashga va vakolatli organlar (tashkilotlar) bilan kelishishga yuridik va jismoniy shaxslar tomonidan bajariladigan ishlarning 15 foizi miqdoridan kam boʻlmagan avans toʻlovi amalga oshirilgandan soʻng kirishadi”;

15-band quyidagi tahrirda bayon qilinsin:

“15. Tuman (shahar) arxitektura va qurilish boʻlimi (boshqarmasi) yer uchastkasini tanlash boʻyicha materiallarni tuman (shahar) hokimining xati bilan tegishliligiga koʻra Qoraqalpogʻiston Respublikasi Vazirlar Kengashi va viloyatlar hokimliklari huzuridagi yer uchastkalarini berish (realizatsiya qilish) masalalarini koʻrib chiquvchi komissiyaga yuboradi.

Qoraqalpogʻiston Respublikasi Vazirlar Kengashi va viloyatlar hokimliklari huzuridagi yer uchastkalarini berish (realizatsiya qilish) masalalarini koʻrib chiquvchi komissiya Qoraqalpogʻiston Respublikasi Vazirlar Kengashi Raisi va viloyat hokimi rahbarligida toʻrt kun mobaynida yer uchastkasini tanlash boʻyicha materiallarni koʻrib chiqadi va maʼqullangan taqdirda tegishli ravishda rasmiylashtirilgan bayon bilan Qoraqalpogʻiston Respublikasi Arxitektura va qurilish qoʻmitasi yoki viloyat arxitektura va qurilish bosh boshqarmasining xati bilan ularni bosh loyiha-qidiruv tashkilotlariga kelishish uchun yuboradi.

Toshkent shahrida yer uchastkasini tanlash boʻyicha materiallarni bosh loyiha-qidiruv tashkilotlariga kelishish uchun Toshkent shahar arxitektura va qurilish bosh boshqarmasi yuboradi”;

Nizomga 1-ilovaning matni quyidagi tahrirda bayon qilinsin:

b) Qishloq xoʻjaligiga oid boʻlmagan ehtiyojlar, shuningdek ikki va undan ortiq tumanlar (shaharlar) yoki viloyatlar hududida joylashtiriladigan obyektlar qurilishi uchun aholi punktlari tashqarisidan yer uchastkalari berish tartibi toʻgʻrisidagi Nizomda:

10-band quyidagi tahrirda bayon qilinsin:

“10. Davlat korxonasi yigirma uch kun mobaynida yuridik va jismoniy shaxslar bilan tuzilgan shartnoma asosida yer uchastkasini tanlash boʻyicha materiallarni tayyorlaydi va vakolatli organlar (tashkilotlar) bilan kelishadi.

Yer uchastkasini tanlash boʻyicha materiallarning tayyorlanganligi va kelishilganligi uchun Oʻzbekiston Respublikasi Vazirlar Mahkamasi tomonidan belgilangan miqdorda toʻlov undiriladi.

Davlat korxonasi yer uchastkasini tanlash boʻyicha materiallarni tayyorlashga va vakolatli organlar (tashkilotlar) bilan kelishishga yuridik va jismoniy shaxslar tomonidan bajariladigan ishlarning 15 foizi miqdoridan kam boʻlmagan avans toʻlovi amalga oshirilgandan soʻng kirishadi”;

13-bandda:

oʻn uchinchi xatboshidagi “uch” soʻzi “besh” soʻzi bilan almashtirilsin;

quyidagi mazmundagi oʻn beshinchi va oʻn oltinchi xatboshilar qoʻshilsin:

“Yer uchastkasini tanlash boʻyicha materiallar birinchi navbatda faqat tuman arxitektura va qurilish boʻlimi (boshqarmasi) bilan kelishiladi. Yer uchastkasini tanlash boʻyicha materiallarni tuman arxitektura va qurilish boʻlimi (boshqarmasi) maʼqullagandan soʻng ular boshqa vakolatli organlar (tashkilotlar) bilan kelishishga yuboriladi.

Yer uchastkasini tanlash boʻyicha materiallar vakolatli organlar (tashkilotlar) bilan kelishilganda yer uchastkasini joylashtirish planiga ularning rahbarlari imzosi qoʻyiladi. Vakolatli organlar (tashkilotlar) rahbarlarining imzosi ushbu organning (tashkilotning) muhri bilan tasdiqlanadi”;

14-band quyidagi tahrirda bayon qilinsin:

“14. Davlat korxonasi yer uchastkasini tanlash boʻyicha materiallarni tuman (shahar) hokimining xati bilan tegishliligiga koʻra Qoraqalpogʻiston Respublikasi Vazirlar Kengashi va viloyat hokimliklari huzuridagi yer uchastkalarini berish (realizatsiya qilish) masalalarini koʻrib chiquvchi komissiyaga yuboradi.

Qoraqalpogʻiston Respublikasi Vazirlar Kengashi va viloyatlar hokimliklari huzuridagi yer uchastkalarini berish (realizatsiya qilish) masalalarini koʻrib chiquvchi komissiya Qoraqalpogʻiston Respublikasi Vazirlar Kengashi Raisi va viloyat hokimi rahbarligida toʻrt kun mobaynida yer uchastkasini tanlash boʻyicha materiallarni koʻrib chiqadi va maʼqullangan taqdirda tegishli ravishda rasmiylashtirilgan bayon bilan Qoraqalpogʻiston Respublikasi Arxitektura va qurilish qoʻmitasi yoki viloyat arxitektura va qurilish bosh boshqarmasining xati orqali ularni “Qishloqqurilishloyiha” MCHJga yuboradi”;

Nizomga 1-ilovaning matni quyidagi tahrirda bayon qilinsin:

2. Vazirlar Mahkamasining 2015-yil 7-oktabrdagi 285-son qarori (Oʻzbekiston Respublikasi QT, 2015-y., 10-son, 89-modda) bilan tasdiqlangan Yuridik va jismoniy shaxslarga tadbirkorlik faoliyatini amalga oshirish uchun doimiy foydalanishga tanlov asosida yer uchastkalari berish tartibi toʻgʻrisidagi Nizomda:

a) 3-bandga quyidagi mazmundagi yettinchi va sakkizinchi xatboshilar qoʻshilsin:

“namunaviy loyihalar asosida yakka tartibdagi uy-joylar qurilayotgan massivlarda;

besh yil davomida faoliyat turini oʻzgartirmaslik va yer uchastkasidan doimiy foydalanish huquqini boshqa shaxsga oʻtkazmaslik sharti bilan tadbirkorlik subyektlariga ilgari berilgan yer uchastkalariga qoʻshimcha ravishda (ilgari berilgan yer uchastkasi oʻlchamidan koʻp boʻlmagan miqdorda) faqat ishlab chiqarishni va aholiga koʻrsatilayotgan savdo, maishiy, tibbiy va boshqa xizmatlarni kengaytirish hamda turlarini koʻpaytirish (yer uchastkasining qoʻshimcha ravishda berilishi asoslangan tadbirkorlik subyektining biznes rejasi tuman (shahar) hokimlari tomonidan tasdiqlangan boʻlishi kerak), tadbirkorlik subyektlarining mulki boʻlgan binolarga qoʻshimcha kirish-chiqish maydonchalari, yertoʻlaga tushish va yuqori qavatlarga chiqish zinalarini tashkil etish, bino va inshootlarning qismlariga yuk tashish va oʻt oʻchirish avtomobillarini oʻtishiga yoʻl tashkil etish uchun yer uchastkalarini qoʻshib berishga”;

yettinchi xatboshi toʻqqizinchi xatboshi deb hisoblansin;

b) 7-bandga quyidagi mazmundagi ikkinchi va uchinchi xatboshilar qoʻshilsin:

“Avans toʻlovlari tanlov gʻoliblaridan tushadigan mablagʻlarni jamlash uchun ochiladigan Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining maxsus hisob raqamlaridan toʻlanadi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining maxsus hisob raqamlarida mablagʻ boʻlmagan holatlarda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari mablagʻlari yoki Qoraqalpogʻiston Respublikasi respublika budjetining, viloyatlar viloyat budjetlarining va Toshkent shahri shahar budjetining zaxira jamgʻarmalari hisobidan toʻlab beriladi”;

v) 11-bandda “yilning 15-yanvargacha va 15-iyulgacha” soʻzlar “chorakning birinchi oʻn kunligigacha (10-yanvargacha, 10-aprelgacha, 10-iyulgacha va 10-oktabrgacha)” soʻzlar bilan almashtirilsin;

g) 12-bandda “10-yanvargacha va 10-iyulgacha” soʻzlar “chorakning birinchi oyini birinchi sanasigacha (1-yanvargacha, 1-aprelgacha, 1-iyulgacha va 1-oktabrgacha)” soʻzlar bilan almashtirilsin;

d) 13-bandda “10-yanvargacha va 10-iyulgacha” soʻzlar “chorakning birinchi oyini birinchi sanasigacha (1-yanvargacha, 1-aprelgacha, 1-iyulgacha va 1-oktabrgacha) soʻzlar bilan almashtirilsin;

e) 14-bandda “20-yanvargacha va 20-iyulgacha” soʻzlar “chorakning birinchi oʻn kunligigacha (10-yanvargacha, 10-aprelgacha, 10-iyulgacha va 10-oktabrgacha)” soʻzlar bilan almashtirilsin;

j) quyidagi mazmundagi 14¹-band bilan toʻldirilsin:

“14¹. Qoraqalpogʻiston Respublikasi Arxitektura va qurilish qoʻmitasiga, viloyatlar va Toshkent shahar arxitektura va qurilish bosh boshqarmalari oʻzlarining huzuridagi hududiy arxitektura-shaharsozlik kengashlarida yer uchastkalari berish boʻyicha materiallarni tayyorlashdan oldin asosiy va qoʻshimcha roʻyxatlardagi har bir yer uchastkasini shaharsozlik norma va qoidalarga muvofiqligini baholaydilar.

Shaharsozlik norma va qoidalarga nomuvofiq boʻlgan yer uchastkalari oldin asosiy va qoʻshimcha roʻyxatlardan chiqarib tashlanadi”;

z) 17-bandda “1-aprelgacha va 1-oktabrgacha” soʻzlar “chorakning birinchi oyini uchinchi oʻn kunligigacha (30-yanvargacha, 30-aprelgacha, 30-iyulgacha va 30-oktabrgacha)” soʻzlar bilan almashtirilsin;

i) 25-bandda “20-aprelgacha va 20-oktabrgacha” soʻzlar “chorakning ikkinchi oyini ikkinchi oʻn kunligigacha (20-fevralgacha, 20-maygacha, 20-avgustgacha va 20-noyabrgacha)” soʻzlar bilan almashtirilsin;

k) 34-bandga quyidagi mazmundagi ikkinchi xatboshi qoʻshilsin:

“Koʻchmas mulk savdo xizmati” MCHJning hududiy filiallari tomonidan axborot-maslahat xizmatlari uchun talabgorlardan qoʻshimcha toʻlov talab qilishga yoʻl qoʻyilmaydi”;

l) 36-bandga quyidagi mazmundagi uchinchi xatboshi qoʻshilsin:

“Koʻchmas mulk savdo xizmati” MCHJning hududiy filiallari xodimlari tomonidan ushbu Nizomning 35-bandida nazarda tutilgan hujjatlarni muhrlanmagan konvertlarda qabul qilish, muhrlangan konvertlarni ochish va talabgorning imzolari mavjudligini tekshirish bahonasida ulardagi hujjatlar bilan tanishishga yoʻl qoʻyilmaydi”;

uchinchi — yettinchi xatboshilar tegishli ravishda toʻrtinchi — sakkizinchi xatboshilar deb hisoblansin;

m) 39-bandda:

“j” kichik banddan “tanlov taklifi faqat bir nafar talabgordan tushganda” soʻzlar chiqarib tashlansin;

quyidagi mazmundagi xatboshi qoʻshilsin:

“Tanlov taklifi faqat bir nafar talabgordan tushganda tanlov komissiyasi tomonidan tanlov boʻlib oʻtmagan deb eʼlon qilinadi va uning qarori bilan belgilangan muddatlarda takroriy tanlov oʻtkaziladi. Takroriy tanlov oʻtkazishda tanlov taklifi yana faqat bir nafar talabgordan tushganda tanlov komissiyasi tomonidan tanlov oʻtmagan deb eʼlon qilinadi va tanlov komissiyasining tanlov natijalari toʻgʻrisidagi protokolida ushbu talabgorga yer uchastkasi berilishi qayd etiladi”;

n) 40-bandga quyidagi mazmundagi uchinchi va toʻrtinchi xatboshilar qoʻshilsin:

“konvertlarni ochishda va tanlov natijalarini eʼlon qilishda talabgorlar yoki ularning ishonchli vakillarining hamda tegishli tumanlar (shaharlar) hokimliklarining vakillarining ishtirok etishi uchun sharoit yaratish;

konvertlar ochilmaganligini va ulardagi muhrlarning buzilmaganligini tekshirish”;

uchinchi — oltinchi xatboshilar tegishli ravishda beshinchi — sakkizinchi xatboshilar deb hisoblansin;

o) quyidagi mazmundagi 48¹-band qoʻllansin:

“48¹. Qishloq joylarda va uzoq tumanlarda yer uchastkalarini tanlov asosida berishda yer uchastkasidan doimiy foydalanish huquqini olgan tanlov gʻoliblari tanlov predmeti qiymatini bir yilgacha boʻlib-boʻlib toʻlashi mumkin, tanlov zakalati va boshqa belgilangan avans toʻlovlari bundan mustasno”;

p) Nizomning 1-ilovasining “Muddatlar” boʻlimida:

“yili 10-yanvargacha va 10-iyulgacha” soʻzlar “chorakning birinchi oyini birinchi sanasigacha (1-yanvargacha, 1-aprelgacha, 1-iyulgacha va 1-oktabrgacha)” soʻzlar bilan almashtirilsin;

“yili 15-yanvargacha va 15-iyulgacha” soʻzlar “chorakning birinchi oyini beshinchi sanasigacha (5-yanvargacha, 5-aprelgacha, 5-iyulgacha va 5-oktabrgacha)” soʻzlar bilan almashtirilsin;

“yili 20-yanvargacha va 20-iyulgacha” soʻzlar “chorakning birinchi oʻn kunligigacha (10-yanvargacha, 10-aprelgacha, 10-iyulgacha va 10-oktabrgacha)” soʻzlar bilan almashtirilsin;

“yili 1-aprelgacha va 1-oktabrgacha” soʻzlar “chorakning ikkinchi oyini oʻn beshinchi sanasigacha (15-fevralgacha, 15-maygacha, 15-avgustgacha va 15-noyabrgacha) soʻzlar bilan almashtirilsin;

“yili 20-aprelgacha va 20-oktabrgacha” soʻzlar “chorakning ikkinchi oyini ikkinchi oʻn kunligigacha “(20-fevralgacha, 20-maygacha, 20-avgustgacha va 20-noyabrgacha)” soʻzlar bilan almashtirilsin.