Qishloq xoʻjaligi ishlab chiqarishini barqaror rivojlantirish, qishloq xoʻjaligi ekinlari hosildorligini oshirish va davlat xaridi uchun qishloq xoʻjaligi mahsulotlari yetishtirishning barcha tashkiliy boʻgʻinlari va bosqichlarida moliyalashtirishning uzviy va samarali yagona tizimini yanada takomillashtirish, shuningdek, agrosanoat majmuasi tovar ishlab chiqaruvchilari texnika parkini zamonaviy, yuqori samarali qishloq xoʻjaligi ishlab chiqarish texnikasi bilan tubdan yangilash va jihozlash maqsadida:

1. Oʻzbekiston Respublikasi Vazirlar Mahkamasi huzuridagi Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi negizida Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi (keyingi oʻrinlarda — Jamgʻarma) tashkil etilsin.

2. Belgilab qoʻyilsinki, Jamgʻarma Oʻzbekiston Respublikasi Vazirlar Mahkamasi huzuridagi Davlat ehtiyojlari uchun xarid qilinadigan qishloq xoʻjalik mahsulotlarining hisob-kitob jamgʻarmasining barcha huquqlari, majburiyatlari va shartnomalari boʻyicha huquqiy vorisi hisoblanadi.

3. Quyidagilar Jamgʻarmaning asosiy vazifalari etib hisoblansin:

davlat xaridi uchun yetishtiriladigan paxta va gʻalla hosili hisob-kitobini oʻz vaqtida moliyalashtirish;

davlat xaridi uchun qishloq xoʻjalik mahsulotlarini yetishtirishda ishtirok etadigan fermer xoʻjaliklari va boshqa qishloq xoʻjaligi tashkilotlariga zamonaviy, yuqori samarali qishloq xoʻjaligi texnikasini imtiyozli lizing shartlarida yetkazib berishni ragʻbatlantirish uchun qaytariladigan qarz mablagʻlarini ajratish;

maqsadli ajratiladigan mablagʻlardan toʻgʻri va samarali foydalanish yuzasidan tizimli nazoratni taʼminlash;

xarid qilinadigan mahsulot uchun hisob-kitoblarni taʼminlaydigan barcha boʻgʻinlar — Oʻzbekiston Respublikasi Moliya vazirligi, banklar, tayyorlov, xizmat koʻrsatuvchi, lizing tashkilotlari, yetkazib beruvchilar hamda qishloq xoʻjaligi tovar ishlab chiqaruvchilari faoliyatini muvofiqlashtirish;

zamonaviy axborot va kompyuter texnologiyalaridan foydalanish asosida hisob-kitob tizimini yanada takomillashtirish va joriy etishni moliyalashtirish;

keyinchalik uning ijobiy natijalarini respublikada joriy etish maqsadida rivojlanayotgan va rivojlangan davlatlarning agrar sohasini moliyalashtirish tajribasini oʻrganish.

4. Quyidagilar Jamgʻarmani shakllantirishning asosiy manbalari etib belgilansin:

paxta tolasini eksport qilish va ichki isteʼmolchilarga sotishdan tushadigan avans mablagʻlar, shuningdek, ular yuzasidan yakuniy hisob-kitob qilishdan tushadigan mablagʻlar;

tasdiqlangan preyskurantdagi ulgurji narxlardan yuqori boʻlgan mablagʻlar, paxta tolasini sotish yakunlari boʻyicha tegishli yil hosili — ijobiy tafovutining toʻliq miqdordagi yakuniy summasi;

don, un va un mahsulotlarini sotish va qayta baholashdan, shuningdek, mahsulotlar eksportidan tushgan valyuta mablagʻlarini erkin birja savdolari orqali sotishdan tushadigan mablagʻlar;

maqsadli ajratilgan mablagʻlarni qaytarishdan tushadigan tushumlar va ularga hisoblangan foizlar;

budjet tizimining budjet mablagʻlari;

jalb etiladigan kreditlar;

xalqaro moliya institutlari grantlari va donor tashkilotlar mablagʻlari;

Jamgʻarmaning boʻsh qoldiq mablagʻlarini joylashtirishdan tushadigan daromadlar;

qonun hujjatlarida taqiqlanmagan boshqa manbalar.

5. Jamgʻarma barcha turdagi soliqlardan va davlat maqsadli jamgʻarmalariga majburiy ajratmalardan ozod qilinsin.

6. Belgilab qoʻyilsinki, Jamgʻarmaning barcha hisob raqamlariga, shu jumladan, Jamgʻarma aylanma mablagʻlari boʻyicha operatsiyalar oʻtkaziladigan tegishli bank hisob raqamlariga nisbatan cheklovchi choralar qoʻllanilmaydi.

7. Jamgʻarma mablagʻlaridan maqsadli foydalanishni, toʻlovlarning oʻz vaqtida oʻtishi va hisob-kitoblarning oʻz vaqtida amalga oshirilishini nazorat qilish yilning har choragida yoppasiga va tanlab tekshirishlar oʻtkazish yoʻli orqali Oʻzbekiston Respublikasi Moliya vazirligining Nazorat-taftish bosh boshqarmasiga yuklansin.

8. Oʻzbekiston Respublikasi Vazirlar Mahkamasi Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi faoliyatini tashkil etish toʻgʻrisidagi Oʻzbekiston Respublikasi Prezidentining qarori loyihasini bir hafta muddatda belgilangan tartibda kiritsin.

9. Oʻzbekiston Respublikasi Prezidentining ayrim hujjatlari ilovaga muvofiq oʻz kuchini yoʻqotgan deb hisoblansin.

10. Oʻzbekiston Respublikasi Moliya vazirligi Oʻzbekiston Respublikasi Adliya vazirligi hamda manfaatdor vazirliklar va idoralar bilan birgalikda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida bir oy muddatda Oʻzbekiston Respublikasi Vazirlar Mahkamasiga takliflar kiritsin.

11. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

1. Oʻzbekiston Respublikasi Prezidentining “Davlat ehtiyojlari uchun xarid qilinadigan qishloq xoʻjalik mahsulotlarining hisob-kitob jamgʻarmasini tashkil etish toʻgʻrisida” 1998-yil 31-dekabrdagi PF-2165-sonli Farmoni.

2. Oʻzbekiston Respublikasi Prezidentining “Oʻzbekiston Respublikasi Prezidentining baʼzi farmonlariga oʻzgartishlar kiritish toʻgʻrisida” 2005-yil 20-maydagi PF-3610-sonli Farmoni.

3. Oʻzbekiston Respublikasi Prezidentining “Oʻzbekiston Respublikasi Prezidentining ayrim hujjatlariga oʻzgartishlar kiritish toʻgʻrisida” 2009-yil 25-maydagi PF-4114-sonli Farmoni ilovasining 2-bandi.

4. Oʻzbekiston Respublikasi Prezidentining “Oʻzbekiston Respublikasi Prezidentining “Davlat ehtiyojlari uchun xarid qilinadigan qishloq xoʻjalik mahsulotlarining hisob-kitob jamgʻarmasini tashkil etish toʻgʻrisida” 1998-yil 31-dekabrdagi PF-2165-sonli Farmoniga qoʻshimcha kiritish toʻgʻrisida” 2016-yil 28-martdagi PF-4786-sonli Farmoni.

5. Oʻzbekiston Respublikasi Prezidentining “Oʻzbekiston Respublikasi Prezidentining ayrim hujjatlariga oʻzgartishlar kiritish toʻgʻrisida” 2016-yil 2-noyabrdagi PF-4854-sonli Farmoni ilovasining 1-bandi.

6. Oʻzbekiston Respublikasi Prezidentining “Oʻzbekiston Respublikasi Prezidentining ayrim hujjatlariga oʻzgartishlar kiritish toʻgʻrisida” 2016-yil 15-noyabrdagi PF-4856-sonli Farmoni ilovasining 1-bandi.