Oʻzbekiston Respublikasi Prezidentining “Ijtimoiy-iqtisodiy islohotlarni amalga oshirish, mamlakatni modernizatsiya qilish, inson huquq va erkinliklarining ishonchli himoyasini taʼminlashda prokuratura organlarining rolini kuchaytirish toʻgʻrisida” 2017-yil 18-apreldagi PF-5019-son Farmoniga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A.Qoʻchqorov zimmasiga yuklansin.

1. Vazirlar Mahkamasining 2001-yil 6-iyuldagi 291-son qarori bilan tasdiqlangan Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentida xizmatni oʻtash toʻgʻrisidagi Nizomda (Oʻzbekiston Respublikasi QT, 2001-y., 7-son, 37-modda):

a) 17-bandga quyidagi mazmundagi xatboshilar qoʻshilsin:

“Ushbu Nizomning 64¹-bandida sanab oʻtilgan Departament xodimlariga darajali unvonlari ular egallab turgan lavozimdan qatʼi nazar, belgilangan muddatlarda beriladi.

Prokuratura organlarining amaldagi kadrlar zaxirasiga kiritilgan va unda boʻlgan Oʻzbekiston Respublikasi Prezidenti devoni xodimlariga darajali unvonlar Oʻzbekiston Respublikasi Bosh prokurori tomonidan Oʻzbekiston Respublikasi Prezidenti devonining tegishli tarkibiy boʻlinmasi rahbarining tavsiyanomasiga asosan beriladi”;

b) 19-bandga quyidagi mazmundagi xatboshi qoʻshilsin:

“Oʻzbekiston Respublikasi Prezidenti devonining boshqaruv xodimi sifatida ishlangan davr darajali unvoni olish uchun zarur boʻlgan ish stajiga qoʻshiladi”;

v) 20-bandning uchinchi xatboshi quyidagi tahrirda bayon qilinsin:

“Departament organlariga birinchi marta xizmatga qabul qilingan va darajali unvonlarga ega boʻlmagan xodimlarga 3-darajali yurist unvoni, ular attestatsiyadan oʻtgandan soʻng beriladi”;

g) 23-bandda:

ikkinchi xatboshidagi “ushbu Nizomning 16-bandida koʻrsatilgan muddat tugamasdan avval” soʻzlari “belgilangan muddat tugamasdan avval” soʻzlari bilan almashtirilsin;

quyidagi mazmundagi xatboshi qoʻshilsin:

“attestatsiyadan oʻtishi talab etilmaydigan xodimlarga ishda oʻrnak koʻrsatganligi uchun darajali unvonlar berish”;

d) 27-bandning uchinchi xatboshidagi “pensiyaga chiqishi munosabati bilan xizmatdan boʻshagan” soʻzlaridan keyin “shuningdek prokuratura organlarining amaldagi kadrlar zaxirasiga kiritilgan va unda boʻlgan xodimlar” soʻzlari qoʻshilsin;

e) 29-bandda:

quyidagi mazmundagi oʻninchi xatboshi qoʻshilsin:

“I, II, III darajali “Aʼlo xizmatlari uchun” koʻkrak nishoni bilan taqdirlash”;

oʻninchi — oʻn toʻrtinchi xatboshilar tegishli ravishda oʻn birinchi — oʻn beshinchi xatboshilar deb hisoblansin;

oʻninchi xatboshidagi “Markaziy Qoʻmitasining” soʻzlari “Respublika kengashining” soʻzlari bilan almashtirilsin;

j) 31-bandning uchinchi xatboshi quyidagi tahrirda bayon etilsin:

“qimmatbaho sovgʻa, Oʻzbekiston Respublikasi Bosh prokurorining Faxriy yorligʻi bilan taqdirlash, navbatdan tashqari darajali unvon yoki navbatdagi darajali unvonni belgilangan muddatdan oldin, yoxud egallab turgan lavozimidan qatʼi nazar, berish, “Oʻzbekiston Respublikasi prokuraturasining Faxriy xodimi”, “I, II, III darajali “Aʼlo xizmatlari uchun” koʻkrak nishonlari bilan taqdirlash, shuningdek Oʻzbekiston Respublikasi Bosh prokurori hamda Davlat muassasalari va ijtimoiy xizmat koʻrsatish xodimlari kasaba uyushmasi Respublika kengashining Faxriy yorligʻi bilan taqdirlash, Oʻzbekiston Respublikasining davlat mukofotlariga taqdim etish Oʻzbekiston Respublikasi Bosh prokurori tomonidan amalga oshiriladi.”;

k) 51-bandning toʻrtinchi xatboshi quyidagi tahrirda bayon etilsin:

“Koʻp yillik xizmati uchun ustamani hisoblash huquqini beruvchi maxsus staj Bosh prokurorning buyrugʻi bilan tasdiqlangan va Oʻzbekiston Respublikasi Bandlik va mehnat munosabatlari vazirligi hamda Moliya vazirligi bilan kelishilgan Oʻzbekiston Respublikasi prokuratura organlarining xodimlariga koʻp yillik xizmati uchun ustamalar toʻlash tartibi toʻgʻrisidagi nizomda nazarda tutilgan qoidalar boʻyicha hisoblab chiqariladi.”;

l) 60-bandda:

beshinchi xatboshi quyidagi tahrirda bayon etilsin:

“taraflarning ixtiyoriga bogʻliq boʻlmagan holatlarda tugatiladi”;

quyidagi mazmundagi oltinchi — oʻn birinchi xatboshilar qoʻshilsin:

“Xizmatni oʻtashni taraflar ixtiyoriga bogʻliq boʻlmagan holatlar boʻyicha bekor qilinishiga quyidagilar asos boʻladi:

Departament xodimining boshqa ishga, shu jumladan saylab qoʻyiladigan lavozimga oʻtishi;

xodim harbiy xizmatga chaqirilishi;

shu ishni ilgari bajarib kelgan xodimning xizmatga tiklanishi;

xodimning vafot etishi, uning bedarak yoʻqolgan deb topilishi yoki vafot etgan deb eʼlon qilinishi;

qonun hujjatlarida nazarda tutilgan boshqa holatlar”;

oltinchi — oʻn beshinchi xatboshilar tegishli ravishda oʻn ikkinchi — yigirma birinchi xatboshilar deb hisoblansin;

m) quyidagi mazmundagi 64¹ — 64⁴-bandlar qoʻshilsin:

“64¹. Oʻzbekiston Respublikasi Oliy Majlisi Senati aʼzoligiga saylangan (tayinlangan) yoki Oʻzbekiston Respublikasi Oliy Majlisi Qonunchilik palatasi deputati etib saylangan, shuningdek Oʻzbekiston Respublikasi Prezidentining lavozimga tayinlash yoki tasdiqlash toʻgʻrisidagi qarori yoki taqdimnomasiga asosan davlat hokimiyati va boshqaruv organlariga oʻtgan yoxud Qoraqalpogʻiston Respublikasi Vazirlar Kengashi Raisi, Rais oʻrinbosari, viloyat, Toshkent shahri, tuman (shahar) hokimi yoki hokim oʻrinbosari lavozimiga tayinlangan va tasdiqlangan Departament xodimi Bosh prokurorning buyrugʻi bilan prokuratura organlarining amaldagi kadrlar zaxirasiga kiritilishi mumkin.

Alohida hollarda, boshqa davlat organlari va tashkilotlariga ishga oʻtgan Departament xodimi Bosh prokuraturaning attestatsiya komissiyasi taklifiga asosan Bosh prokurorning buyrugʻi bilan prokuratura organlarining amaldagi kadrlar zaxirasiga kiritilishi mumkin.

Xodimning ushbu bandda koʻrsatilgan faoliyat muddati navbatdagi darajali unvonni berish huquqini beruvchi, koʻp yillik xizmati uchun toʻlanadigan ustamani toʻlash, pullik taʼminot maoshini belgilash yoki pensiya tayinlash uchun Departament organlaridagi xizmat stajiga qoʻshiladi.

64². Ushbu Nizomning 64¹-bandida koʻrsatilgan prokuratura organlarining amaldagi kadrlar zaxirasiga kiritilgan va unda boʻlgan xodimlar, ular saylangan yoki tayinlangan organlardagi mehnat sharoitlarini hisobga olgan holda, prokuratura organlari xodimlari uchun belgilangan barcha imtiyozlar, moddiy va ijtimoiy muhofaza qilish choralaridan foydalanadilar.

Ushbu Nizomning 64¹-bandida koʻrsatilgan prokuratura organlarining amaldagi kadrlar zaxirasiga kiritilgan va unda boʻlgan xodimlarga ushbu Nizomning III boʻlimida belgilangan tartibda darajali unvonlar va harbiy unvonlar, shuningdek Oʻzbekiston Respublikasi Bosh prokurori tomonidan belgilangan shaklda prokuratura organlarining amaldagi kadrlar zaxirasi xodimi guvohnomasi beriladi.

Soliq imtiyozlari va moliyaviy imtiyozlarning, shuningdek, boshqa moddiy afzalliklarning qoʻllanilishi Departament xodimi saylangan yoki tayinlangan organ tomonidan unda amalda boʻlgan lavozim boʻyicha maoshi va boshqa toʻlovlar miqdori saqlangan holda amalga oshiriladi.

Shu bilan birga, bunday xodimlarga darajali unvonlar, koʻp yillik xizmati uchun ustamalar hamda Departament xodimlari uchun belgilangan mehnatning alohida sharoitlari uchun har oylik ustamaning oʻrtacha miqdori toʻlanadi.

64³. Prokuratura organlarining amaldagi kadrlar zaxirasiga oʻtkazilgan xizmatni oʻtashni tugatgan xodimlar, shuningdek, ularning oila aʼzolari bevosita Departament organlarida xizmat oʻtashni tugatgan xodimlar va ularning oila aʼzolari kabi huquqlar, imtiyozlar va afzalliklardan foydalanadilar.

64⁴. Ushbu Nizom 64¹ — 64³-bandlarining amal qilishi Departamentdan ushbu Nizomning 64¹-bandida koʻrsatilgan organlarga avval saylangan yoki oʻtgan xodimlarga ham prokuratura organlarining amaldagi kadrlar zaxirasiga kiritilgan vaqtdan boshlab tatbiq etiladi”;

n) 65-band quyidagi tahrirda bayon etilsin:

“65. Amaldagi kadrlar zaxirasiga kiritilgan va unda boʻlgan Departament xodimlariga ularning boshqa davlat organlaridagi vakolat muddatlari tugaganidan soʻng, muqaddam Departament organlarida egallagan yoki unga teng lavozim berilishi kafolatlari taʼminlanadi, xodimning egallab turgan lavozimiga noloyiqligi yoki sogʻligʻi holatiga yoxud mehnat (xizmat) majburiyatlarini bajarmaganligi uchun mehnat faoliyati tugatilgan hollar bundan mustasno”.

2. Vazirlar Mahkamasining 2006-yil 23-iyundagi 123-son qarori bilan tasdiqlangan Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy faoliyatdan olingan daromadlarni legallashtirishga qarshi kurashish departamentida axborotlarni toʻplash va qayta ishlashning tashkiliy-funksional sxemasida:

“Jinoiy faoliyatdan olingan daromadlarni legallashtirishga qarshi kurashish boshqarmasi” soʻzlari “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish boshqarmasi” soʻzlari bilan almashtirilsin;

“Axborot texnologiya boʻlimi”, “Moliyaviy operatsiyalar monitoringi va tizimli tahlili boʻlimi” va “Jinoiy faoliyatdan olingan daromadlarni legallashtirishga qarshi kurashishni tezkor taʼminlash boʻlimi” bloklari tegishli ravishda “Axborot-kommunikatsiya texnologiyalarini joriy etish va axborot xavfsizligini taʼminlash boʻlimi”, “Terrorizmni moliyalashtirishga qarshi kurashish boʻlimi” va “Jinoiy daromadlarni legallashtirishga qarshi kurashish boʻlimi” bloklari bilan almashtirilsin.

3. Vazirlar Mahkamasining “Sudyalarga, prokuratura organlari hamda Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti xodimlariga imtiyozli shartlarda uy-joy sotib olishga uzoq muddatli ipoteka kreditlari berish tartibi toʻgʻrisidagi nizomni hamda sudyalarga, prokuratura organlari hamda Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti xodimlariga uy-joylarni ijaraga olganlik (ijaraga turganlik) uchun har oylik pul kompensatsiyasi toʻlash tartibi toʻgʻrisidagi nizomni tasdiqlash haqida” 2012-yil 31-oktabrdagi 312-son qarorida (Oʻzbekiston Respublikasi QT, 2012-y., 10-son, 78-modda):

1-ilovaga quyidagi mazmundagi 7¹-band qoʻshilsin:

“7¹. Ipoteka kreditlari prokuratura organlari xodimlariga uch yillik imtiyozli davr bilan beriladi va mazkur davr mobaynida kreditlar boʻyicha faqat foizlar toʻlanadi”;

2-ilovaning 2-bandi birinchi xatboshidagi “doimiy yashash joyidan tashqari mintaqada lavozimga tayinlangan (saylangan) hamda” soʻzlari chiqarib tashlansin.