“Reklama toʻgʻrisida”gi Oʻzbekiston Respublikasi Qonunini bajarish yuzasidan va iqtisodiy islohotlarni chuqurlashtirish, tovarlar (ishlar, xizmatlar) bozorida raqobatni rivojlantirish maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi huzuridagi Monopoliyadan chiqarish va raqobatni rivojlantirish qoʻmitasi hamda uning hududiy organlariga reklama toʻgʻrisidagi Oʻzbekiston Respublikasi qonun hujjatlariga rioya etilishi ustidan davlat nazoratini amalga oshirish funksiyasi yuklansin.

Oʻzbekiston Respublikasi Vazirlar Mahkamasining 1996-yil 23-maydagi 188-son qarori bilan tasdiqlangan Oʻzbekiston Respublikasi Moliya vazirligi huzuridagi Monopoliyadan chiqarish va raqobatni rivojlantirish qoʻmitasi toʻgʻrisidagi Nizomga 1-ilovaga muvofiq oʻzgartirish va qoʻshimchalar kiritilsin.

2. “Reklama toʻgʻrisida”gi Oʻzbekiston Respublikasi Qonuni talablari ijro etilishini taʼminlash 2-ilovaga muvofiq davlat boshqaruv organlariga va joylardagi davlat hokimiyati organlariga yuklansin.

Davlat boshqaruvi va joylardagi davlat hokimiyatining koʻrsatib oʻtilgan organlari bir oy muddatda oʻzlarining amaldagi nizomlariga tegishli oʻzgartirish va qoʻshimchalar toʻgʻrisida belgilangan tartibda takliflar kiritsinlar.

3. Monopoliyadan chiqarish va raqobatni rivojlantirish qoʻmitasi huzurida Reklama boʻyicha idoralararo kengash tuzilsin.

Reklama boʻyicha idoralararo kengash toʻgʻrisidagi Nizom 3-ilovaga muvofiq va uning tarkibi 4-ilovaga* muvofiq tasdiqlansin.

Quyidagilar Idoralararo kengashning asosiy vazifalari etib belgilansin:

davlat boshqaruv organlari va joylardagi hokimiyat organlarining, shuningdek, respublika jamoat birlashmalari (tashkilotlari)ning reklama toʻgʻrisidagi qonun hujjatlari talablarini bajarish masalalari boʻyicha oʻzaro hamkorligini taʼminlash;

tovarlar (ishlar, xizmatlar) bozorlarida, shu jumladan, jismoniy va yuridik shaxslarning pul mablagʻlaridan foydalanish bilan bogʻliq bank, sugʻurta va boshqa xizmatlar bozorlarida, shuningdek, qimmatli qogʻozlar bozorlarida reklamani tarqatishda halol raqobatni va jamiyat manfaatlarini himoya qilish;

reklama beruvchilar, reklama ishlab chiqaruvchilar, reklama tarqatuvchilar va reklamadan foydalanuvchilarning jahon standartlariga va milliy anʼanalarga zid boʻlmagan manfaatlariga rioya qilish.

4. Monopoliyadan chiqarish va raqobatni rivojlantirish qoʻmitasi vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda reklamani joylashtirish tartibini bir oy muddatda 2-ilovaga muvofiq ishlab chiqsin, tasdiqlasin va belgilangan tartibda amalga kiritsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari B. Hamidov va Oʻzbekiston Respublikasi Bosh vazirining oʻrinbosari H. Karomatov zimmasiga yuklansin.

1. Muqaddimadagi “va “Isteʼmolchilar huquqlarini muhofaza qilish toʻgʻrisida” soʻzlari “Isteʼmolchilar huquqlarini muhofaza qilish”, “Reklama toʻgʻrisida” va” soʻzlari bilan almashtirilsin.

2. 1-banddagi “hamda isteʼmolchilar huquqlarini muhofaza qilish” soʻzlari “isteʼmolchilar huquqlarini, reklamani muhofaza qilish” soʻzlari bilan almashtirilsin.

3. 3-band quyidagi mazmundagi oltinchi xatboshi bilan toʻldirilsin:

“reklama toʻgʻrisidagi qonuni hujjatlariga rioya qilinishi ustidan davlat nazorati”.

4. 4-bandda:

ikkinchi xatboshidagi “va isteʼmolchilar huquqlarini muhofaza qilish toʻgʻrisidagi qonunchilikka” soʻzlari “isteʼmolchilar huquqlarini muhofaza qilish va reklama toʻgʻrisidagi qonun hujjatlari” soʻzlari bilan almashtirilsin;

oʻn birinchi xatboshi chiqarib tashlansin;

band quyidagi xatboshi bilan toʻldirilsin:

“jismoniy va yuridik shaxslar tomonidan yoʻl qoʻyilgan ishonchsiz reklama hollarining oldini oladi, ularga barham beradi”;

reklama beruvchilarga, reklama ishlab chiqaruvchilar va reklama tarqatuvchilarga qonunchilikni buzishni toʻxtatish toʻgʻrisidagi koʻrsatmalarni, aksilreklama amalga oshirilishi haqidagi qarorlarni yuboradi;

reklama isteʼmolchilarining manfaatlarini himoya qilish maqsadida ishonchsiz reklama boʻyicha sodir etilgan bitishuvlarni haqiqiy emas deb eʼtirof etish toʻgʻrisida sudga yoki xoʻjalik sudiga daʼvo beradi;

qonun hujjatlarida nazarda tutilgan boshqa funksiyalarni amalga oshiradi”.

5. 5-bandda:

ikkinchi xatboshidagi “ularning oqibatlarini bartaraf etish” soʻzlaridan keyin “reklama toʻgʻrisidagi qonun hujjatlari buzilishi toʻxtatilishi haqida” soʻzlari qoʻshilsin;

oltinchi xatboshidagi “isteʼmolchilar huquqlari muhofaza qilinishi toʻgʻrisidagi” soʻzlaridan keyin “va reklama toʻgʻrisidagi” soʻzlari qoʻshilsin;

oʻn birinchi, oʻn sakkizinchi va yigirma ikkinchi xatboshilaridagi “va isteʼmolchilarning huquqlari muhofaza qilinishi toʻgʻrisidagi qonunchilik” soʻzlari “isteʼmolchilarning huquqlari muhofaza qilinishi va reklama toʻgʻrisidagi qonun hujjatlari” soʻzlari bilan almashtirilsin;

oʻn ikkinchi xatboshidagi “Oʻzistiqbolstat” davlat qoʻmitasining” soʻzlari “Makroiqtisodiyot va statistika vazirligining” soʻzlari bilan almashtirilsin;

yigirmanchi xatboshiga “isteʼmolchilarning huquqlarini muhofaza qilish toʻgʻrisida” soʻzlaridan keyin “va reklama toʻgʻrisidagi” soʻzlari qoʻshilsin.

1. Reklama boʻyicha idoralararo kengash (keyingi oʻrinlarda Kengash deb ataladi) Oʻzbekiston Respublikasi davlat organlari va jamoat birlashmalarining reklamani ishlab chiqarish, tarqatish va joylashtirish, reklama foydalanuvchilarini chalgʻitadigan yoki fuqarolar salomatligiga, fuqarolar yoki yuridik shaxslar mol-mulkiga, atrof muhitga yoxud koʻrsatib oʻtilgan shaxslar shaʼniga, qadr-qimmatiga yoki ishdagi obroʻsiga zarar yetkazadigan, shuningdek, jamoat manfaatlariga, insonparvarlik va axloq tamoyillariga tahdid soladigan reklamadan jamiyatni muhofaza qilish masalalari boʻyicha oʻzaro hamkorlikni takomillashtirish maqsadida tuziladi.

Kengash maslahat organi hisoblanadi va oʻz faoliyatini jamoatchilik asosida amalga oshiradi.

2. Kengash oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonun hujjatlariga, shuningdek, ushbu Nizomga amal qiladi.

3. Quyidagilar Kengashning asosiy vazifalari hisoblanadi:

“Reklama toʻgʻrisida”gi Oʻzbekiston Respublikasi Qonunining reklamani ishlab chiqarish, joylashtirish va tarqatish sohasidagi munosabatlarni tartibga soluvchi boshqa qonunlar va meʼyoriy hujjatlarning qoʻllanish amaliyotini tahlil qilish;

tovarlar (ishlar va xizmatlar) bozorida reklamani ishlab chiqarish, joylashtirish va tarqatish jarayonida paydo boʻladigan xulq-atvorning madaniyatli norma va qoidalarini shakllantirishga yoʻnaltirilgan chora-tadbirlar tizimini ishlab chiqish va amalga oshirish;

yuridik va jismoniy shaxslarning reklama faoliyatiga koʻmaklashish, reklama toʻgʻrisidagi qonun hujjatlari buzilishining oldini olish, reklama faoliyatini tartibga solish mexanizmini takomillashtirish;

tovarlar (ishlar va xizmatlar) bozorlarida, shu jumladan jismoniy va yuridik shaxslarning pul mablagʻlaridan foydalanish bilan bogʻlik bank, sugʻurta va boshqa xizmatlar bozorlarida shuningdek, qimmatli qogʻozlar bozorlarida reklamani tarqatishda halol raqobatni va jamiyat manfaatlarini himoya qilish;

reklama beruvchilar, reklama ishlab chiqaruvchilar, reklama tarqatuvchilar va reklamadan foydalanuvchilar manfaatlariga rioya etish;

Oʻzbekiston Respublikasining ijodiy uyushmalari, jamoat birlashmalari, nufuzli xorijiy va xalqaro tashkilotlar bilan reklama faoliyati masalalari boʻyicha aloqalarni rivojlantirish;

reklama faoliyatini yoritishga, halol raqobatni, reklamada ijodkorlikni qoʻllab-quvvatlashga yoʻnaltirilgan tadbirlar (konferensiyalar, simpoziumlar, seminarlar va tanlovlar)ni tashkil etish va oʻtkazishga koʻmaklashish;

reklama faoliyatini davlat tomonidan tartibga solish va oʻzini oʻzi tartibga solish boʻyicha chet el tajribasini tahlil qilish;

reklama faoliyatini amalga oshirish ustidan nazoratning samaradorligi masalasi boʻyicha jamoatchilik fikrini oʻrganishni tashkil etish;

ijtimoiy reklamani ishlab chiqarish, joylashtirish va tarqatishda tashabbuskorlik koʻrsatish.

4. Kengash quyidagi huquqlarga ega:

reklamani nazorat qilishga taalluqli qonunlar va meʼyoriy hujjatlarni takomillashtirish boʻyicha takliflar ishlab chiqishda qatnashish;

Kengash vazifalarini hal etish uchun ishchi guruhlar, komissiyalar tuzish va ular ishida jamoatchilik asosida ishlash uchun tegishli mutaxassislarni jalb etish.

5. Kengash vazirliklarning, davlat boshqaruvi respublika boshqa organlari, jamoat birlashmalari vakillaridan, ular rahbarlarining taqdimnomasiga binoan shakllantiriladi.

Kengashda ishlash uchun (ularning roziligiga koʻra) mutaxassislar, olimlar, ekspertlar hamda reklamani ishlab chiqarish, joylashtirish va tarqatish faoliyati sohasiga kiradigan turli tashkilotlar va muassasalar, shu jumladan, xorijiy tashkilotlar va muassasalar vakillari jalb etilishi mumkin.

Kengash tarkibi Oʻzbekiston Respublikasi Vazirlar Mahkamasi tomonidan tasdiqlanadi hamda Rais, ikki nafar oʻrinbosar, kotib va oʻz faoliyatini jamoatchilik asosida amalga oshiruvchi Kengash aʼzolaridan iborat boʻladi.

6. Kengash Raisi:

Kengash faoliyatiga rahbarlik qiladi;

Kengash majlislarini chaqiradi, ularning kun tartibini tuzadi, uni Kengash majlisi oʻtkaziladigan kungacha toʻrt kundan kechikmay Kengash aʼzolariga yetkazishni tashkil qiladi;

Kengash aʼzolarining Kengash qarorlari va vazifalarini bajarish boʻyicha ishlarini muvofiqlashtirib boradi;

Kengash tomonidan tuzilgan seksiyalar, ishchi guruhlar va komissiyalar faoliyatini nazorat qiladi;

davlat organlari, jamoat birlashmalari, boshqa yuridik va jismoniy shaxslar bilan munosabatlarda Kengash nomidan vakillik qiladi;

Kengash qabul qilgan qarorlarning bajarilishi ustidan nazoratni amalga oshiradi;

Kengash tomonidan oʻziga yuklangan boshqa vazifalar va funksiyalarni bajaradi.

7. Kengashda ish yuritishni kotib amalga oshiradi.

8. Kengash oʻz ishini oʻzi tasdiqlaydigan ish tartibi asosida amalga oshiradi. Kengash majlislari zaruriyatiga koʻra, lekin yilning har choragida kamida bir marta oʻtkaziladi va protokollar bilan rasmiylashtiriladi. Kengash oʻz ishlari boʻyicha har yili yakun chiqaradi.

9. Kengash qarorlari tavsiyanoma tusida boʻladi va majlisda raislik qiluvchi hamda kotib tomonidan imzolanadi.

10. Kengashda koʻrib chiqish uchun kiritilgan masalalar va uning qarorlari loyihalari Kengash aʼzolari tomonidan, ish rejasiga muvofiq vazirliklar, davlat boshqaruvi respublika boshqa organlari va jamoat tashkilotlari vakillari ishtirokida tayyorlanadi.