Oʻzbekiston Respublikasi Prezidentining “Aholiga transport xizmati koʻrsatish hamda shaharlar va qishloqlarda avtobuslarda yoʻlovchilar tashish tizimini yanada takomillashtirish chora-tadbirlari toʻgʻrisida” 2017-yil 10-yanvardagi PQ-2724-son qarorini bajarish yuzasidan, yoʻlovchilar tashish xavfsizligini va yoʻlovchilarga xizmat koʻrsatish madaniyatining zarur darajasini, yoʻlovchi tashish yoʻnalishlarida transport vositalari harakati maromini, belgilangan jadvallar va intervallarni, shuningdek tashuvchilarning moliyaviy barqarorligini taʼminlash maqsadida Vazirlar Mahkamasi qaror qiladi:

1. Quyidagilar:

Yoʻlovchilar avtovokzallari va avtostansiyalarini qurish va rekonstruksiya qilish parametrlari 1-ilovaga* muvofiq;

Oʻzbekiston avtomobil va daryo transporti agentligi markaziy apparatining yangilangan tuzilmasi 2-ilovaga muvofiq;

Oʻzbekiston avtomobil va daryo transporti agentligi hududiy boshqarmalarining yangilangan namunaviy tuzilmasi 3-ilovaga muvofiq tasdiqlansin.

2. Oʻzbekiston avtomobil va daryo transporti agentligi markaziy apparati xodimlarining cheklangan umumiy soni 53 nafar, shu jumladan boshqaruv xodimlari soni 43 nafar etib belgilansin.

3. Qoraqalpogʻiston Respublikasi Vazirlar Kengashi, viloyatlar hokimliklari:

Oʻzbekiston avtomobil va daryo transporti agentligi bilan birgalikda — avtobus yoʻnalishlarini tashkil etish, yangi avtobuslar va mikroavtobuslar sotib olish, yoʻlovchilar avtovokzallari, avtostansiyalarini, toʻxtash bekatlarini qurish va rekonstruksiya qilish tadbirlarini amalga oshirish tarmoq jadvallarining bajarilishi yuzasidan muntazam monitoringni taʼminlasinlar;

yangi avtostansiyalar, oxirgi toʻxtash bekatlarini qurish uchun yer uchastkalari ajratishda ularni yoʻlovchilar uchun qulay boʻlgan joylarda, yoʻlovchilar toʻplanadigan yirik punktlarda (temir yoʻl vokzallari, aeroportlar, bozorlar va boshqalarda), asosan xususiy investorlarni jalb etib, ularga yoʻlovchilar harakati xavfsizligiga toʻsqinlik qilmaydigan faoliyatning boshqa turlarini tashkil etish imkoniyatini bergan holda, joylashtirishni nazarda tutsinlar;

Oʻzbekiston Respublikasi Ichki ishlar vazirligi, Avtomobil yoʻllari davlat qoʻmitasi hamda Oʻzbekiston avtomobil va daryo transporti agentligi bilan birgalikda — har yili faoliyat koʻrsatib turgan va yangidan tashkil etilayotgan avtobus yoʻnalishlarida yoʻl sharoitlarining harakat xavfsizligi talablariga muvofiqligini tekshirsinlar, zarurat boʻlganda, taʼmirlash ishlari oʻtkazilishini taʼminlasinlar;

yoʻlovchi tashishning amalda vujudga kelayotgan xarajatlarini qoplashni taʼminlash chora-tadbirlarini ishlab chiqqan holda shahar yoʻlovchi transportida yurish tariflarini oʻz vaqtida qayta koʻrib chiqsinlar;

Oʻzbekiston Respublikasi Iqtisodiyot vazirligi, Oʻzbekiston avtomobil va daryo transporti agentligi bilan birgalikda — tadbirlarni amalga oshirish natijalarini har tomonlama tahlil qilish asosida, zarurat boʻlganda, 2017 — 2021-yillarda shaharlar va qishloqlarda avtotransport xizmatlarini yanada rivojlantirish dasturida nazarda tutilgan yangi avtobuslar va mikroavtobuslar sotib olish, avtobus yoʻnalishlarini tashkil etish, yoʻlovchilar avtovokzallari va avtostansiyalarini qurish va rekonstruksiya qilish parametrlariga tuzatishlar kiritish yuzasidan Oʻzbekiston Respublikasi Vazirlar Mahkamasiga takliflar kiritsinlar.

4. Oʻzbekiston avtomobil va daryo transporti agentligiga quyidagi qoʻshimcha funksiyalar yuklansin:

avtomobil transportida yoʻlovchilar va yuklar tashuvchi avtotransport vositalarida litsenziya kartochkalari mavjud boʻlishini nazorat qilish;

Oʻzbekiston Respublikasining xalqaro shartnomalarida nazarda tutilgan, Oʻzbekiston Respublikasi hududida (Oʻzbekiston Respublikasi Davlat chegarasi orqali oʻtkazish punktlaridan tashqari) xalqaro avtomobillarda tashuvlarni amalga oshirish shartlariga rioya etilishini nazorat qilish.

5. Oʻzbekiston avtomobil va daryo transporti agentligi:

tadbirkorlar tomonidan tegishli davlat xizmatlarini olishda ruxsat beruvchi va litsenziya tartib-taomillarini maksimal soddalashtirishni, soʻraladigan hujjatlar sonini, ularni taqdim etish muddatlarini qisqartishni nazarda tutuvchi yagona-axborot-integratsiya tizimi joriy etilishini 2017-yilning birinchi yarim yilligida tugallasin;

fuqarolarning Internet tarmogʻi, “ishonch telefoni”, Oʻzbekiston Respublikasi Prezidentining virtual qabulxonasi orqali tushayotgan murojaatlariga tezkor munosabat bildirilishini taʼminlasin;

yoʻnalishlarda yoʻlovchi tashish transportida xizmat koʻrsatish yuzasidan namunaviy kontraktlarni bir oy muddatda ishlab chiqsin, ularda yoʻlovchilar huquqlariga rioya etilishini taʼminlash va tender kontrakt shartlari bajarilmasligi yoki zarur tarzda bajarilmasligining har bir aniq holati uchun avtomobilda yoʻlovchilar tashuvchilarga nisbatan choralarni nazarda tutsin hamda yoʻlovchi tashishni tashkil etish boʻyicha barcha hududiy komissiyalar tomonidan oʻz vaqtida bajarilishi uchun yetkazsin;

Avtomobil transportida yoʻlovchilar va yuklar tashuvchi avtotransport vositalarida litsenziya kartochkalari mavjud boʻlishini, Oʻzbekiston Respublikasi hududida xalqaro avtomobillarda tashuvlarni amalga oshirish shartlariga rioya etilishini, haydovchilarning mehnat va dam olish rejimiga rioya etilishini nazorat qilish tartibi toʻgʻrisidagi Nizomni, shuningdek Agentlikning nazoratni amalga oshiruvchi xodimlariga nisbatan malaka talablarini ikki oy muddatda ishlab chiqsin va tasdiqlasin;

Agentlik xodimlarini formali kiyim-bosh bilan taʼminlash yuzasidan ikki oy muddatda Oʻzbekiston Respublikasi Vazirlar Mahkamasiga takliflar kiritsin.

6. Belgilab qoʻyilsinki:

Oʻzbekiston Respublikasining Maʼmuriy javobgarlik toʻgʻrisidagi kodeksining 146¹-moddasida (tashuvchining oʻz fuqarolik javobgarligini majburiy sugʻurta qilish boʻyicha qonunda belgilangan majburiyatini bajarmasligi), 165-moddasida (faoliyat bilan litsenziyasiz va boshqa ruxsat beruvchi hujjatlarsiz shugʻullanish), 176³-moddasida (avtomobil transportida yoʻlovchilar tashish faoliyati bilan litsenziyasiz shugʻullanish), 176⁴-moddasida (taksilarni yagona tanish belgilari bilan jihozlashga, yagona tanish belgilari bilan jihozlanmagan yoki belgilangan talablar buzilgan holda jihozlangan taksilarni yoʻlga chiqarmaslikka doir talablarni buzish,), 198-moddasida (hokimiyat vakilining qonuniy talablarini bajarmaslik yoki xizmat vazifalarini bajarishiga toʻsqinlik qilish) nazarda tutilgan avtomobillarda tashuvlar sohasida huquqbuzilishlar toʻgʻrisidagi protokollar Oʻzbekiston avtomobil va daryo transporti agentligi hududiy boshqarmalarining inspektorlari tomonidan tuziladi;

undiriladigan jarimalar summasining 25 foizi Oʻzbekiston avtomobil va daryo transporti agentligining maxsus bank hisob raqamiga oʻtkaziladi va ulardan Agentlikning moddiy-texnika bazasini rivojlantirish uchun foydalaniladi.

7. “Oʻzavtosanoat” AK:

yetkazib berish va moliyalashtirishning tasdiqlangan tarmoq jadvallariga qatʼiy muvofiq ravishda avtobuslarning xaridorlarga belgilangan muddatlarda yetkazib berilishini taʼminlasin;

respublikada yoʻlovchilar tashish mikroavtobuslari ishlab chiqarishni tashkil etishni yetakchi xalqaro kompaniyalar bilan ishlab chiqishni jadallashtirsin va takliflar kiritsin.

8. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirish va qoʻshimchalar kiritilsin, shuningdek baʼzilari oʻz kuchini yoʻqotgan deb hisoblansin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov zimmasiga yuklansin.

1. Vazirlar Mahkamasining 1998-yil 17-avgustdagi 350-son qarori bilan tasdiqlangan Shaharda yoʻlovchilar tashish yoʻnalishlarini joylashtirish uchun ochiq tenderlarni oʻtkazish toʻgʻrisidagi Nizomning 7-bandida:

quyidagi mazmundagi sakkizinchi xatboshi qoʻshilsin:

“boʻlib oʻtmagan tender munosabati bilan yoʻnalish tashuvchining xizmatisiz qoladi. Komissiya yoʻnalishga (yoʻnalishlar paketiga yoki jadvaliga) takroriy tender natijalarigacha boʻlgan davrga kontraktning amalda boʻlishini uzaytiradi yoxud istalgan tashuvchiga ushbu davrda mazkur yoʻnalishga xizmat koʻrsatishni yuklaydi”;

sakkizinchi va toʻqqizinchi xatboshilar tegishli ravishda toʻqqizinchi va oʻninchi xatboshilar deb hisoblansin.

2. Vazirlar Mahkamasining 1999-yil 29-iyuldagi 368-son qarori (Oʻzbekiston Respublikasi QT, 1999-y., 7-son, 44-modda) bilan tasdiqlangan Shahar atrofi, shaharlararo (viloyat ichida, viloyatlararo) va xalqaro yoʻlovchilar tashish yoʻnalishlarini joylashtirish uchun ochiq tenderlar tashkil etish va oʻtkazish toʻgʻrisidagi Nizomda:

2-banddagi “Har bir transport vositasini bittalab koʻrikdan oʻtkazish boʻyicha belgilangan namunadagi, Davlat avtomobil nazorati boshqarmasining muhri bilan tasdiqlangan ijobiy dalolatnomaning mavjud boʻlishi qatnashchi uchun majburiy shart hisoblanadi” soʻzlari chiqarib tashlansin.

5-bandga quyidagi mazmundagi sakkizinchi xatboshi qoʻshilsin:

“boʻlib oʻtmagan tender munosabati bilan yoʻnalish tashuvchining xizmatisiz qoladi. Komissiya yoʻnalishga (yoʻnalishlar paketiga yoki jadvaliga) takroriy tender natijalarigacha boʻlgan davrga kontraktning amalda boʻlishini uzaytiradi yoxud istalgan tashuvchiga ushbu davrda mazkur yoʻnalishga xizmat koʻrsatishni yuklaydi”;

sakkizinchi va toʻqqizinchi xatboshilar tegishli ravishda toʻqqizinchi va oʻninchi xatboshilar deb hisoblansin.

16-band quyidagi tahrirda bayon qilinsin:

“16. Tender takliflari Komissiyaning har bir aʼzosi tomonidan quyidagi tartibda koʻrib chiqiladi va baholanadi:

a) qatnashchi tomonidan yoʻnalishdagi 1 nafar yoʻlovchi km. uchun tavsiya etilayotgan tarif darajasi uchun — Komissiya talab etadigan tashish tarifi oʻrniga darajani pasaytirishning har bir punkti uchun ortib boradigan koeffitsiyentni qoʻllagan holda besh balli tizim boʻyicha;

b) transport vositasining rusumi, ishlab chiqarilgan yili uchun — tabaqalashtirilgan ballar boʻyicha. Bunda transport vositasi rusumi uchun olingan ballarga 1.15 miqdorda oshiruvchi koeffitsiyent qoʻllanadi, agar transport vositasi tender qatnashchisining mulki boʻlsa;

v) tashish uchun tavsiya etilayotgan avtotransport vositalarining umumiy sigʻimi uchun — tabaqalashtirilgan ballar boʻyicha.

Komissiya yoʻnalishda ishlash uchun talab qilinadigan avtomobil rusumini va uning boʻyicha tabaqalashtirilgan ballarni mustaqil ravishda belgilaydi;

g) avtobuslar ish rejimining tavsiya etilayotgan varianti uchun — besh balli tizim boʻyicha;

d) yoʻnalishdagi reyslarning tavsiya etilayotgan soni uchun — besh balli tizim boʻyicha;

e) yoʻnalishlarda ishlashda harakat xavfsizligini taʼminlash boʻyicha tadbirlar rejasi — besh balli tizim boʻyicha. Bunda tashuvchi besh ballni quyidagi majburiy shartlarni bajargan taqdirda oladi:

transport vositalarining har kuni reysdan oldingi texnik nazoratini taʼminlash;

haydovchilarning har kungi tibbiy koʻrikdan oʻtishini taʼminlash;

haydovchilarni Yoʻl harakati qoidalarining 30 soatli dasturi boʻyicha oʻqitish.

Komissiya, yoʻnalishga aniq talablarni hisobga olgan holda, ishtirokchilarning tender takliflarini baholashga qoʻshimcha talablarni tavsiya etishga haqlidir.

Tender takliflarini baholashni oʻtkazish uchun zarur boʻlgan yoʻriqnoma-metodik hujjatlar va ularning shakllari Oʻzbekiston avtomobil va daryo transporti agentligi tomonidan tasdiqlanadi”.

3. Vazirlar Mahkamasining “Oʻzbekiston Avtomobil va daryo transporti agentligi faoliyatini yanada takomillashtirish chora-tadbirlari toʻgʻrisida” 2004-yil 10-martdagi 118-son qarorida (Oʻzbekiston Respublikasi QT, 2004-y., 3-son, 27-modda):

a) 1-bandda:

toʻrtinchi xatboshi quyidagi tahrirda bayon qilinsin:

“avtomobil va daryo transporti xizmatlari bozorida bozor munosabatlarini va raqobat muhitini rivojlantirish uchun qulay shart-sharoitlarni taʼminlash, yoʻlovchilarga xizmat koʻrsatish madaniyati va sifatini oshirish, avtotransport xizmatlari servisini kengaytirish”;

oltinchi xatboshidagi “va daryo” soʻzlari chiqarib tashlansin;

quyidagi mazmundagi xatboshilar qoʻshilsin:

“avtomobil transportida yoʻlovchilar va yuklar tashiydigan avtotransport vositalarida litsenziya kartochkalarining mavjudligini nazorat qilish;

Oʻzbekiston Respublikasining xalqaro shartnomalarida nazarda tutilgan Oʻzbekiston Respublikasi hududida avtomobilda xalqaro tashuvlar shartlariga rioya etilishini nazorat qilish (Oʻzbekiston Respublikasi Davlat chegarasi orqali oʻtkazish punktlaridan tashqari);

haydovchilarning mehnat va dam olish rejimiga rioya etilishini nazorat qilish”;

b) 2 va 3-bandlar quyidagi tahrirda bayon qilinsin:

“2. Quyidagilar:

Oʻzbekiston avtomobil va daryo transporti agentligining tashkiliy tuzilmasi 1-ilovaga muvofiq;

Oʻzbekiston avtomobil va daryo transporti agentligi toʻgʻrisidagi Nizom 2-ilovaga muvofiq tasdiqlansin.

3. Oʻzbekiston avtomobil va daryo transporti agentligi markaziy apparati xodimlarining cheklangan umumiy soni 53 nafar, shu jumladan boshqaruv xodimlari soni 43 nafar etib belgilansin.

Oʻzbekiston avtomobil va daryo transporti agentligiga agentlik boshligʻi oʻrinbosarining bir nafar oʻrinbosari hamda shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadigan besh kishidan iborat boʻlgan hayʼati boʻlishiga ruxsat etilsin.

Agentlik boshligʻiga markaziy apparat hamda hududiy boshqarmalar tuzilmasiga xodimlarning tasdiqlangan cheklangan soni va taʼminoti xarajatlari smetasi doirasida oʻzgartirishlar kiritish huquqi berilsin”;

v) 2-ilova oʻz kuchini yoʻqotgan deb hisoblansin;

g) 3-ilova 2-ilova deb hisoblansin;

d) 2-ilovada (Oʻzbekiston avtomobil va daryo transporti agentligi toʻgʻrisida Nizomda);

7-bandda:

toʻrtinchi xatboshi quyidagi tahrirda bayon qilinsin:

“avtomobil va daryo transporti xizmatlari bozorida bozor munosabatlarini va raqobat muhitini rivojlantirish uchun qulay shart-sharoitlarni taʼminlash, yoʻlovchilarga xizmat koʻrsatish madaniyati va sifatini oshirish, avtotransport xizmatlari servisini kengaytirish”

oltinchi xatboshidagi “va daryo” soʻzlari chiqarib tashlansin;

quyidagi mazmundagi xatboshilar qoʻshilsin:

“Oʻzbekiston Respublikasining xalqaro shartnomalarda nazarda tutilgan Oʻzbekiston Respublikasi hududida avtomobilda xalqaro tashuvlar shartlariga rioya etilishini nazorat qilish (Oʻzbekiston Respublikasi Davlat chegarasi orqali oʻtkazish punktlaridan tashqari);

avtomobil transportida yoʻlovchilar va yuklar tashiydigan avtotransport vositalarida litsenziya kartochkalarining mavjudligini nazorat qilish;

haydovchilarning mehnat va dam olish rejimiga rioya etilishini nazorat qilish”;

8-bandda:

“v” kichik bandida:

birinchi xatboshiga “yoʻlovchilarga xizmat koʻrsatish madaniyati va sifatini oshirish, avtotransport xizmatlari servisini kengaytirish” soʻzlari qoʻshilsin;

ikkinchi xatboshi quyidagi tahrirda bayon qilinsin:

“tashuvlar yoʻnalishlarini tender boʻyicha amalga oshirish mexanizmlarini joriy etadi, yoʻlovchilarining sifatli va xavfsiz tashilishini taʼminlash uchun maqbul sharoitlarni nazarda tutadigan shahar, shahar atrofida, shaharlararo va xalqaro yoʻlovchilar tashish yoʻnalishlarida xizmat koʻrsatish huquqiga namunaviy kontraktlarni ishlab chiqadi va tasdiqlaydi, tenderlar tashkilotchilari ishini muvofiqlashtiradi”;

quyidagi mazmundagi toʻrtinchi xatboshi qoʻshilsin:

“avtomobil transportida yoʻlovchilar va yuk tashuvlar qoidalariga hamda Oʻzbekiston Respublikasida avtobuslarda tashuvlar xavfsizligini taʼminlash boʻyicha talablarga rioya etilishi, yoʻlovchilar tashish yoʻnalishlariga xizmat koʻrsatish huquqiga tender kontraktlari shartlarini bajarish, tashuvchilar tomonidan belgilangan grafiklar, jadvallar, tashish tariflariga rioya etilishini tizimli nazorat qilishni tashkil etadi”;

toʻrtinchi xatboshi beshinchi xatboshi deb hisoblansin;

“d” kichik bandidagi “va daryo” soʻzlari chiqarib tashlansin;

quyidagi mazmundagi “j” va “z” kichik bandlari qoʻshilsin:

“j) davlat bojxona xizmati organlari vakillari bilan oʻzaro hamkorlikda xalqaro avtomobillarda tashuvlarni amalga oshirishda ruxsat berish tizimiga rioya etilishi yuzasidan nazoratni amalga oshiradi;

z) avtomobillarda tashuvlar sohasida Oʻzbekiston Respublikasining maʼmuriy javobgarlik toʻgʻrisidagi Kodeksining 146¹, 165, 176³-moddalarida, 176⁴, 198-moddalarining birinchi qismida nazarda tutilgan maʼmuriy huquqbuzarliklar toʻgʻrisida belgilangan tartibda protokol tuzadi”;

10-bandda:

uchinchi xatboshidagi “rejadan tashqari” soʻzlari “qisqa muddatli” soʻzlari bilan almashtirilsin;

oltinchi xatboshi quyidagi tahrirda bayon qilinsin:

“avtomobil transportida yoʻlovchilar va yuk tashuvlar qoidalariga hamda Oʻzbekiston Respublikasida avtobuslarda tashuvlar xavfsizligini taʼminlash boʻyicha talablarga rioya etilishi yuzasidan nazoratda qatnashish uchun shartnoma asosida mutaxassislarni jalb etish”;

quyidagi mazmundagi yettinchi xatboshi qoʻshilsin:

“yoʻlovchilar tashishni tashkil etish boʻyicha hududiy komissiyalardan, Toshkent shahri va Toshkent viloyati hokimliklarining yoʻlovchilar tashish transportining barcha turlari harakatlarini litsenziyalash va muvofiqlashtirish departamentlaridan hamda shahar yoʻlovchilar tashish transportini boshqarish boʻyicha maxsus vakolatli organlardan yoʻlovchilar tashish yoʻnalishlari ishi masalalari boʻyicha axborotlarni soʻrash va olish”;

yettinchi — oʻn ikkinchi xatboshilar tegishli ravishda toʻqqizinchi — oʻn uchinchi xatboshilar deb hisoblansin.

4. Vazirlar Mahkamasining 2006-yil 31-yanvardagi 11-son qarori (Oʻzbekiston Respublikasi QT, 2006-y., 1-son, 6-modda) bilan tasdiqlangan Toshkent shahrida yoʻlovchilar tashish yoʻnalishlarini joylashtirish uchun ochiq tenderlarni tashkil etish va oʻtkazish toʻgʻrisidagi Nizomning 2-bandiga quyidagi mazmundagi xatboshi qoʻshilsin:

“boʻlib oʻtmagan tender munosabati bilan yoʻnalish tashuvchining xizmatisiz qoladi. Komissiya yoʻnalishga (yoʻnalishlar paketiga yoki jadvaliga) takroriy tender natijalarigacha boʻlgan davrga kontraktning amalda boʻlishini uzaytiradi yoxud istalgan tashuvchiga ushbu davrda mazkur yoʻnalishga xizmat koʻrsatishni yuklaydi”.

5. Vazirlar Mahkamasining 2006-yil 14-iyuldagi 138-son qarori (Oʻzbekiston Respublikasi QT, 2006-y., 7-son, 51-modda) bilan tasdiqlangan Avtomobil transportida yoʻlovchilarni hamda yuklarni shaharda, shahar atrofida, shaharlararo va xalqaro yoʻnalishlar boʻyicha tashish faoliyatini litsenziyalash toʻgʻrisidagi Nizomda:

a) 3-bandda:

ikkinchi xatboshidagi “shaharlararo va” soʻzlari chiqarib tashlansin;

uchinchi xatboshi quyidagi tahrirda bayon qilinsin:

“yoʻlovchilar va yuklarni shaharda, shahar atrofida, shaharlararo tashishlar boʻyicha (Toshkent shahrida, Toshkent viloyati shaharlarida va shaharlari atrofida yoʻlovchilarni tashish bundan mustasno) — Agentlikning hududiy boshqarmalari tomonidan”;

b) 5-bandda:

ikkinchi xatboshida:

“a”, “b” va “v” kichik bandlari chiqarib tashlansin;

“g” — “f” kichik bandlari tegishli ravishda “a” — “s” kichik bandlari deb hisoblansin;

quyidagi mazmundagi xatboshi qoʻshilsin:

“Litsenziat litsenziyalovchi organga murojaat qilganda bir ariza boʻyicha ushbu litsenziyalovchi organ tomonidan beriladigan litsenziya turlarining bir necha qismini olish huquqiga ega”;

v) 7-bandda:

quyidagi mazmundagi ikkinchi xatboshi qoʻshilsin:

“Litsenziya kartochkasi — litsenziya talablari va shartlariga majburiy tarzda rioya qilingan holda yoʻlovchilar va yuklarni tashishda foydalaniladigan har bir avtotransport vositasiga litsenziyalanadigan faoliyat turini amalga oshirish uchun beriladigan ruxsatnoma (litsenziya)”;

ikkinchi va uchinchi xatboshilar tegishli ravishda uchinchi va toʻrtinchi xatboshilar deb hisoblansin;

toʻrtinchi xatboshi quyidagi tahrirda bayon qilinsin:

“Tijorat tashuvlarida litsenziya kartochkalari bilan taʼminlanmagan avtomobil transporti vositasidan foydalanish noqonuniy hisoblanadi va qonun hujjatlarida nazarda tutilgan huquqiy taʼsir choralarini qoʻllashga olib keladi”;

g) 8-bandning toʻrtinchi xatboshi quyidagi tahrirda bayon qilinsin:

“ushbu Nizomning 23-bandida nazarda tutilgan holatlarda, shuningdek avtotransport vositasining davlat raqami belgisi oʻzgarganda, avtotransport vositasining yuk koʻtarish yoki yoʻlovchi sigʻimi koʻpayganda (kamayganda), bir avtotransport vositasi shu klassdagi boshqa avtotransport vositasiga almashtirilganda ushbu avtotransport vositasiga mavjud litsenziya kartochkalari asosida litsenziya talabgorining litsenziya kartochkalarini qayta rasmiylashtirish boʻyicha arizasiga koʻra — qayta rasmiylashtirilgan litsenziya kartochkalari beriladi”;

d) 9-bandning “j” kichik bandiga “yoʻlovchilarni” soʻzidan keyin “yoʻlovchilar huquqlariga, harakatlanishning belgilangan jadvallariga, transportda yurish tariflariga rioya etgan, yoʻlovchilarning belgilangan toifalarini tekin va imtiyozli tarzda tashishni taʼminlagan, qoida buzish, antisanitariya hollariga xizmat koʻrsatishning sifatining past boʻlishiga yoʻl qoʻymagan holda” soʻzlari qoʻshilsin;

e) 10-bandning “b” kichik bandi oʻz kuchini yoʻqotgan deb hisoblansin;

j) 12 va 13-bandlardagi “litsenziya” soʻzi “litsenziya/litsenziya kartochkasi” soʻzlari bilan almashtirilsin;

z) 15-banddagi “litsenziya blankalarining” soʻzlari “litsenziya va litsenziya kartochkasi blankalarining” soʻzlari bilan almashtirilsin;

i) 17-bandning birinchi xatboshi quyidagi tahrirda bayon qilinsin:

“17. Litsenziya berishga qaror qilinganligi toʻgʻrisidagi bildirishnoma litsenziya bitimi ilova qilingan va bank hisob raqamining rekvizitlari, davlat bojini toʻlash muddati koʻrsatilgan holda yozma yoki elektron shaklda litsenziya talabgoriga yuboriladi (topshiriladi)”;

k) 23-bandning birinchi xatboshidagi “taʼsis hujjatlariga kiritilgan roʻyxatdan oʻtkazilgan oʻzgartirish va qoʻshimchalarning notarial tasdiqlangan nusxalari” soʻzlari chiqarib tashlansin;

l) VII boʻlim nomidagi “litsenziyaning” soʻzi “litsenziyaning/litsenziya kartochkasining” soʻzlari bilan almashtirilsin;

m) 28-bandda:

birinchi — uchinchi xatboshilardagi va beshinchi xatboshidagi “litsenziyaning” soʻzi “litsenziyaning/litsenziya kartochkasining” soʻzlari bilan almashtirilsin;

toʻrtinchi xatboshida:

“litsenziyaning” soʻzi “litsenziyaning/litsenziya kartochkasining” soʻzlari bilan almashtirilsin;

“besh” soʻzi “uch” soʻzi bilan almashtirilsin;

quyidagi mazmundagi oltinchi xatboshi qoʻshilsin:

“Litsenziyaning/litsenziya kartochkasining” amal qilishini toʻxtatishda litsenziyalovchi organ litsenziatdan litsenziya talablari va shartlari buzilishiga yoʻl qoʻyilgan avtotransport vositasiga berilgan litsenziya kartochkasini olib qoʻyadi”;

n) 29-bandda:

birinchi — uchinchi xatboshilardagi, yettinchi, sakkizinchi, oʻninchi — oʻn uchinchi xatboshilardagi “litsenziyaning” soʻzi “litsenziyaning/litsenziya kartochkasining” soʻzlari bilan almashtirilsin;

toʻqqizinchi xatboshi quyidagi tahrirda bayon qilinsin:

“litsenziya talablari va shartlari muntazam yoki bir marta qoʻpol tarzda buzilganda”;

o) quyidagi mazmundagi 29¹-band qoʻshilsin:

“29¹. Quyidagilar litsenziat tomonidan litsenziya talablari va shartlarining qoʻpol tarzda buzilishi hisoblanadi:

litsenziatning shtatida Agentlik tomonidan belgilangan tartibda tegishli lavozimni egallash uchun attestatsiyadan oʻtgan, yoʻl harakati xavfsizligini taʼminlash uchun masʼul boʻlgan mansabdor shaxslarning boʻlmasligi;

litsenziat tomonidan ishlatish uchun belgilangan tartibda ruxsat etilmagan va yoʻlga chiqishdan oldin texnik koʻrikdan oʻtmagan avtotransport vositalaridan foydalanilishi;

davriy tibbiy koʻrikdan va yoʻlga chiqishdan oldin tibbiy koʻrikdan oʻtmagan haydovchilarning ishlashiga yoʻl qoʻyilishi;

litsenziya kartochkalari bilan taʼminlanmagan avtotransport vositalariga yoʻl varaqalarining berilishi”;

p) 30-bandda:

birinchi va ikkinchi xatboshilar quyidagi tahrirda bayon qilinsin:

“Litsenziyani/litsenziya kartochkasini bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 24-moddasida nazarda tutilgan tartibda va holatlarda amalga oshiriladi.

Litsenziyalovchi organning litsenziyani/litsenziya kartochkasini bekor qilish toʻgʻrisidagi qarori litsenziatga yozma (elektron) shaklda, asoslangan holda qaror qabul qilingan kunidan boshlab uch kundan kechikmay yetkaziladi. Sudning litsenziyani/litsenziya kartochkasini bekor qilish toʻgʻrisidagi qarori litsenziatga va litsenziyalovchi organga qonun hujjatlarida belgilangan muddatlarda yetkaziladi”;

toʻrtinchi xatboshidagi “litsenziyaning” soʻzi “litsenziyaning/litsenziya kartochkasining” soʻzlari bilan almashtirilsin;

r) 31-bandda:

toʻrtinchi va beshinchi xatboshilar quyidagi mazmundagi uchta xatboshilar sifatida bayon qilinsin:

“litsenziya va litsenziya kartochkasining berilgan sanasi va tartib raqami;

litsenziya va litsenziya kartochkasining amal qilish muddati;

avtotransport vositasining rusumi va davlat roʻyxatidan oʻtkazilgan raqami”;

oltinchi — oʻninchi xatboshilar yettinchi — oʻn birinchi xatboshilar deb hisoblansin;

s) 33-bandga quyidagi mazmundagi xatboshi qoʻshilsin:

“Avtotransport vositasining yuk koʻtarish yoki yoʻlovchi sigʻimi koʻpayishi munosabati bilan litsenziya kartochkasini qayta rasmiylashtirishda davlat boji undirilmaydi”.

6. Vazirlar Mahkamasining 2010-yil 2-apreldagi 62-son qarori (Oʻzbekiston Respublikasi QT, 2010-y., 4-son, 14-modda) bilan tasdiqlangan Vazirliklar, davlat qoʻmitalari va idoralarning budjetdan tashqari jamgʻarmalariga yoʻnaltirilayotgan davlat bojlari, yigʻimlar va soliq boʻlmagan toʻlovlardan, maʼmuriy va moliyaviy jazolardan ajratmalar miqdorlarining 23-pozitsiyasi quyidagi tahrirda bayon qilinsin:

7. Vazirlar Mahkamasining “Oʻzbekiston Avtomobil va daryo transporti agentligi faoliyatini takomillashtirishga doir qoʻshimcha chora-tadbirlar toʻgʻrisida” 2016-yil 5-yanvardagi 2-son qarori (Oʻzbekiston Respublikasi qonun hujjatlari toʻplami, 2016-y., 1-son, 4-modda) oʻz kuchini yoʻqotgan deb hisoblansin.