Oʻzbekiston Respublikasi Prezidentining “Yoʻl xoʻjaligini boshqarish tizimini yanada takomillashtirish chora-tadbirlari toʻgʻrisida” 2017-yil 14-fevraldagi PF-4954-son Farmoniga va Oʻzbekiston Respublikasi Prezidentining “Oʻzbekiston Respublikasi Avtomobil yoʻllari davlat qoʻmitasi va Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasi faoliyatlarini tashkil etish toʻgʻrisida” 2017-yil 14-fevraldagi PQ-2776-son qaroriga muvofiq, shuningdek avtomobil yoʻllari sohasida davlat boshqaruvini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Avtomobil yoʻllari davlat qoʻmitasi toʻgʻrisidagi Nizom ilovaga muvofiq tasdiqlansin.

2. Oʻzbekiston Respublikasi Ichki ishlar vazirligi, Yer resurslari, geodeziya, kartografiya va davlat kadastri davlat qoʻmitasi yigʻimlar va boshqa toʻlovlar undirilmasdan:

tugatilayotgan va qayta tashkil etilayotgan Oʻzbekiston avtomobil yoʻllari qurish va foydalanish davlat-aksiyadorlik kompaniyasi (“Oʻzavtoyoʻl” DAK) va uning tegishli ravishda idoraviy mansub tashkilotlarining Oʻzbekiston Respublikasi Avtomobil yoʻllari davlat qoʻmitasi va unga idoraviy mansub tashkilotlarga oʻtayotgan mablagʻlari va maxsus texnikasi ichki ishlar organlarida qayta roʻyxatdan oʻtkazilishini;

tugatilayotgan va qayta tashkil etilayotgan koʻchmas mulk obyektlariga huquqlar ularning nomlari oʻzgarishi munosabati bilan Oʻzbekiston Respublikasi Avtomobil yoʻllari davlat qoʻmitasiga qayta roʻyxatdan oʻtkazilishini amalga oshirsinlar.

3. Oʻzbekiston Respublikasi Avtomobil yoʻllari davlat qoʻmitasi vazirliklar va idoralar bilan birgalikda bir oy muddatda idoraviy normativ-huquqiy hujjatlarni ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov zimmasiga yuklansin.

1. Ushbu Nizom Oʻzbekiston Respublikasi Avtomobil yoʻllari davlat qoʻmitasining maqomi, asosiy vazifalari, funksiyalari, huquqlarini va faoliyatining tashkiliy asoslarini belgilaydi.

2. Qoʻmita avtomobil yoʻllari sohasida maxsus vakolatli davlat organi hisoblanadi va oʻz faoliyatida Oʻzbekiston Respublikasi Vazirlar Mahkamasiga hisobot beradi.

3. Qoʻmita oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda ushbu Nizomga amal qiladi.

4. Qoʻmita oʻz vazifalari va funksiyalarini amalga oshirishda davlat va xoʻjalik boshqaruvi organlari, mahalliy ijro etuvchi hokimiyat organlari va boshqa tashkilotlar bilan oʻzaro hamkorlik qiladi.

5. Qoʻmitaning oʻz vakolatlari doirasida qabul qilingan qarorlari davlat va xoʻjalik boshqaruvi organlari, mahalliy davlat hokimiyati organlari, shuningdek, xoʻjalik yurituvchi subyektlar va fuqarolar tomonidan bajarilishi majburiy hisoblanadi.

6. Qoʻmita yuridik shaxs hisoblanadi, dumaloq muhrga va Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan blankalarga, mustaqil balansga, Oʻzbekiston Respublikasi Moliya vazirligining Gʻaznachiligida bank hisob raqamlariga va gʻaznachilik hisob raqamlariga ega.

7. Qoraqalpogʻiston Respublikasi va viloyatlarning avtomobil yoʻllari hududiy bosh boshqarmalari (keyingi oʻrinlarda hududiy organlar deb ataladi), Qoʻmitaning tashkiliy tuzilmasiga kiradigan taʼlim muassasalari va boshqa tashkilotlar (keyingi oʻrinlarda idoraviy mansub tashkilotlar deb ataladi) yuridik shaxslar hisoblanadilar, dumaloq muhrga va Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan blankalarga ega.

8. Hududiy organlar oʻz faoliyatini nizomlarga, idoraviy mansub tashkilotlar esa — Qoʻmita raisi tomonidan tasdiqlanadigan ustavlarga muvofiq amalga oshiradi.

9. Qoʻmitaning markaziy apparati, uning hududiy bosh boshqarmalari, tuman yoʻllardan foydalanish korxonalari, yoʻllardan muntazam foydalanish korxonalari va koʻpriklardan foydalanish korxonalarining taʼminoti Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasining mablagʻlari hisobiga amalga oshiriladi.

10. Quyidagilar Qoʻmitaning asosiy vazifalari hisoblanadi:

avtomobil yoʻllari sohasida yagona texnika siyosatini olib borish;

avtomobil yoʻllarini rivojlantirish davlat dasturlarini ishlab chiqish va amalga oshirish;

avtomobil yoʻllari tarmoqlarini rivojlantirish va takomillashtirish istiqbollarini belgilash;

avtomobil yoʻllarining xalqaro tranzit yoʻlaklarini shakllantirish;

zamonaviy transport oqimi sharoitlarida avtomobil yoʻllaridan foydalanuvchilarning manfaatlarini hisobga olib, avtomobil yoʻllarini moliyalashtirish, loyihalashtirish, qurish, taʼmirlash va ulardan foydalanish masalalari kompleks hal etilishini taʼminlash hamda buyurtmachi xizmatining samarali faoliyatini tashkil etish;

avtomobil yoʻllarini qurish, rekonstruksiya qilish, taʼmirlash va saqlash sifati ustidan nazoratni amalga oshirish;

xoʻjaliklararo qishloq avtomobil yoʻllarining, shaharlar, shahar posyolkalari, qishloqlar va ovullar koʻchalarining mavjud tarmogʻi saqlanishini taʼminlash ishlarini muvofiqlashtirish, ularning yuqori transport-foydalanish darajasida boʻlishini taʼminlash;

ilmiy-tadqiqot ishlarini tashkil etish, avtomobil yoʻllarini loyihalashtirish, qurish, rekonstruksiya qilish, taʼmirlash va saqlash sohasida innovatsion texnologiyalar va zamonaviy standartlarni joriy etish;

avtomobil yoʻllari sohasida kadrlarni tayyorlash, qayta tayyorlash va ularning malakasini oshirishni, shu jumladan chet ellarda oʻquv-amaliyot kurslari va seminarlar tashkil etish.

11. Yuklangan vazifalarga muvofiq Qoʻmita quyidagi funksiyalarni amalga oshiradi:

a) avtomobil yoʻllari sohasida yagona texnika siyosatini olib borish sohasida:

yoʻl xoʻjaligi sohasidagi zamonaviy texnologiyalarni va yetakchi xorijiy mamlakatlarning tajribasini hisobga olgan holda avtomobil yoʻllarini loyihalashtirish, qurish, rekonstruksiya qilish, taʼmirlash va saqlash sohasida texnik jihatdan tartibga solish borasidagi normativ hujjatlarni takomillashtirishga doir takliflar kiritish va takomillashtirishda ishtirok etish;

avtomobil yoʻllarini loyihalashtirish, qurish, rekonstruksiya qilish, taʼmirlash va saqlash, shuningdek yoʻl-qurilish materiallari, buyumlar va konstruksiyalarni ishlab chiqish borasida texnik jihatdan tartibga solish sohasidagi normativ hujjatlar talablariga rioya etilishini taʼminlash;

avtomobil yoʻllari qurish, rekonstruksiya qilish, taʼmirlash va saqlashda uchastkalarda harakat xavfsizligini taʼminlashga yoʻnaltirilgan tadbirlarni amalga oshirish;

yoʻl harakati xavfsizligini taʼminlash maqsadida avtotransport vositalari harakatini vaqtincha cheklash yoki toʻxtatishni joriy etish boʻyicha takliflar kiritish;

safarbarlik tayyorgarligini, shuningdek idoraviy mansub tashkilotlarning safarbarlik tayyorgarligi boʻyicha ular faoliyatini nazorat qilish va muvofiqlashtirish;

umumiy foydalanishdagi avtomobil yoʻllari davlat kadastrini yuritish;

avtomobil yoʻllari, shaharlar va boshqa aholi punktlari koʻchalarining hisobini yuritish, umumiy foydalanishdagi avtomobil yoʻllari bundan mustasno;

b) avtomobil yoʻllarini rivojlantirish davlat dasturlarini ishlab chiqish va amalga oshirish sohasida:

avtomobil yoʻllari va sunʼiy inshootlarning texnik holatini har yili koʻzdan kechirish, tekshirish;

avtomobil yoʻllarining texnik holatiga qarab avtomobil yoʻllarini qurish, rekonstruksiya qilish va taʼmirlashning har yilgi dasturlarini shakllantirish va amalga oshirish;

xoʻjaliklararo qishloq avtomobil yoʻllarini, shaharlar, shahar posyolkalari, qishloqlar va ovullar koʻchalarini taʼmirlashning har yilgi dasturlarini shakllantirish va amalga oshirish ishlarini muvofiqlashtirish;

v) avtomobil yoʻllari tarmoqlarini rivojlantirish va takomillashtirish istiqbollarini belgilash sohasida:

Oʻzbekiston Respublikasining avtomobil yoʻllari roʻyxatini shakllantirish yuzasidan takliflarni ishlab chiqish va ularni Oʻzbekiston Respublikasi Vazirlar Mahkamasiga kiritish;

iqtisodiyot va aholining ehtiyojlaridan hamda davlatning strategik vazifalarini hal etishdan kelib chiqib respublika avtomobil yoʻllari tarmogʻini ilmiy asoslangan istiqbolli rejalashtirish, takomillashtirish va rivojlantirish;

mamlakat mintaqalarini bogʻlovchi va kecha-kunduz, uzluksiz va xavfsiz avtomobil transport aloqasini taʼminlaydigan transport kommunikatsiyalarini rivojlantirish;

respublika avtomobil yoʻllari tarmogʻini takomillashtirish va rivojlantirish;

g) avtomobil yoʻllarining xalqaro tranzit yoʻlaklarini shakllantirish sohasida:

avtomobil yoʻllari masalalari boʻyicha xalqaro yoʻl va transport tashkilotlari bilan belgilangan tartibda oʻzaro hamkorlik qilish va ularda Oʻzbekiston Respublikasi manfaatlarini ifodalash, Oʻzbekiston Respublikasining avtomobil yoʻllari va transport sohasida xalqaro shartnomalarda ishtirok etishini taʼminlash;

avtomobil yoʻllari va transport sohasida xalqaro hamkorlik qilish, xalqaro yoʻl va transport tashkilotlari, xorijiy davlatlarning vakolatli organlari, shuningdek xorijiy kompaniyalar bilan samarali oʻzaro hamkorlik mexanizmlarini takomillashtirish borasida takliflarni ishlab chiqishda ishtirok etish;

Qoʻmita vakolatiga kiradigan masalalar boʻyicha boshqa davlatlarning avtomobil yoʻllari va transport boʻyicha vakolatli organlari bilan oʻzaro hamkorlik qilish;

maxsus ruxsatnoma bergan holda, shu jumladan xalqaro tashishlarni amalga oshirayotgan yirik oʻlchamli va ogʻir yuk koʻtaradigan avtotransport vositalarining avtomobil yoʻllari boʻyicha harakati yoʻnalishlarini belgilash;

xalqaro transport yoʻnalishlaridan foydalanishda xalqaro tashkilotlar va mintaqaviy integratsiyaviy tuzilmalar bilan hamkorlikni kengaytirish va chuqurlashtirish;

d) zamonaviy transport oqimi sharoitlarida avtomobil yoʻllaridan foydalanuvchilarning manfaatlarini hisobga olib, avtomobil yoʻllarini moliyalashtirish, loyihalashtirish, qurish, taʼmirlash va ulardan foydalanish masalalari kompleks hal etilishini taʼminlash hamda buyurtmachi xizmatining samarali faoliyatini tashkil etish sohasida:

avtomobil yoʻllarini, shaharlar va boshqa aholi punktlari koʻchalarini qurish, rekonstruksiya qilish va taʼmirlash ishlariga, shu jumladan investitsiya loyihalari va mukammal taʼmirlash obyektlarini texnik-iqtisodiy asoslashni (texnik-iqtisodiy hisob-kitobni), avtomobil yoʻllarini mukammal taʼmirlash obyektlarining ish hujjatlarini va avtomobil yoʻllarini jihozlash boʻyicha tanlov hujjatlari ekspertizadan oʻtkazish boʻyicha buyurtmachi funksiyalarini amalga oshirish;

idoraviy mansub tashkilotlarning muassisi funksiyasini amalga oshirish, ular faoliyati monitoringini olib borish va iqtisodiy tahlil qilish, shuningdek idoraviy mansub tashkilotlarda moliya-xoʻjalik faoliyatini va mol-mulkdan foydalanilishini tekshirish;

qulay va xavfsiz harakatni taʼminlash uchun avtomobil yoʻllaridan foydalanish, avtomobil yoʻllaridan foydalanishda yoʻl harakati xavfsizligi va favqulodda vaziyatlar organlari bilan oʻzaro hamkorlik qilish;

yoʻl qurilishining yirik loyihalarini moliyalashtirishga xalqaro moliya institutlarini jalb etish;

fuqarolarni qabul qilishni tashkil etish, jismoniy va yuridik shaxslarning ogʻzaki va yozma murojaatlari oʻz vaqtida va toʻliq koʻrib chiqilishini taʼminlash, ular boʻyicha qarorlar qabul qilish va ariza beruvchilarga qonun hujjatlarida belgilangan muddatda javoblar yuborish;

e) avtomobil yoʻllarini qurish, rekonstruksiya qilish, taʼmirlash va saqlash sifati ustidan nazoratni amalga oshirish sohasida:

avtomobil yoʻllarini loyihalashtirish, qurish, rekonstruksiya qilish, taʼmirlash va ulardan foydalanish sohasida sifat nazoratini amalga oshirish;

avtomobil yoʻllarini loyihalashtirish, qurish, rekonstruksiya qilish, taʼmirlash va saqlash ustidan texnik kuzatish;

avtomobil yoʻllarini qurish, rekonstruksiya qilish va taʼmirlashda qoʻllanadigan yoʻl-qurilish materiallari, buyumlar va konstruksiyalarning sifati ustidan nazorat qilish;

j) ilmiy-tadqiqot ishlarini tashkil etish, avtomobil yoʻllarini loyihalashtirish, qurish, rekonstruksiya qilish, taʼmirlash va saqlash sohasida innovatsion texnologiyalar va zamonaviy standartlarni joriy etish sohasida:

xoʻjaliklararo qishloq avtomobil yoʻllari, shaharlar, shahar posyolkalari, qishloqlar va ovullar koʻchalarining mavjud tarmogʻini taʼmirlash va saqlash boʻyicha mahalliy ijro etuvchi hokimiyat organlari ishini muvofiqlashtirish;

xoʻjaliklararo qishloq avtomobil yoʻllari, shaharlar, shahar posyolkalari, qishloqlar va ovullar koʻchalari tarmogʻini rivojlantirish va takomillashtirish yuzasidan shaharlar va tumanlarning bosh rejalarini ishlab chiqishda ishtirok etish;

z) ilmiy-tadqiqot ishlarini tashkil etish, avtomobil yoʻllarini loyihalashtirish, qurish, rekonstruksiya qilish, taʼmirlash va saqlash sohasida innovatsion texnologiyalar va zamonaviy standartlarni joriy etish sohasida;

avtomobil yoʻllari sohasida texnik jihatdan tartibga solish borasidagi normativ hujjatlarni ishlab chiqish, takomillashtirish va oʻz vakolatlari doirasida qabul qilish;

avtomobil yoʻllari sohasidagi normativ-huquqiy hujjatlar loyihalarini ishlab chiqish va belgilangan tartibda Vazirlar Mahkamasiga kiritish;

Qoʻmita faoliyatiga tegishlilik yuzasidan tarmoqlarni rivojlantirish boʻyicha normativ-huquqiy hujjatlar va dasturlar, shuningdek boshqa hujjatlar loyihalarini koʻrib chiqish va kelishish;

avtomobil yoʻllarini loyihalashtirish, qurish, rekonstruksiya qilish, taʼmirlash va saqlash sohasida ilmiy-tadqiqot ishlarini tashkil etish va olib borish;

avtomobil yoʻllarini loyihalashtirish, qurish, rekonstruksiya qilish, taʼmirlash va saqlash sohasida zamonaviy texnologiyalarni va yangi materiallarni joriy etish boʻyicha tajriba ishlari olib borish;

i) avtomobil yoʻllari sohasida kadrlarni tayyorlash, qayta tayyorlash va ularning malakasini oshirishni, shu jumladan chet ellarda oʻquv-amaliyot kurslari va seminarlar tashkil etish sohasida:

tarmoqda kadrlar tayyorlash, qayta tayyorlash va ularning malakasini oshirish boʻyicha bazaviy taʼlim dasturlarini kelishish;

yoʻl qurilishini prognozlashtirish, muvofiqlashtirish va amalga oshirishning zamonaviy usullari talablariga muvofiq avtomobil yoʻllari sohasida malakali kadrlar tayyorlanishini taʼminlash;

oʻquvchilarning olingan nazariy bilimlarini ishlab chiqarish amaliyotida mustahkamlash maqsadida taʼlim muassasalarining idoraviy mansub tashkilotlar bilan oʻzaro hamkorligini taʼminlash;

avtomobil yoʻllari sohasida kadrlar tayyorlash va ularni qayta tayyorlashni, shu jumladan xorijiy taʼlim muassasalarida tajriba orttirishini taʼminlash.

12. Qoʻmita oʻziga yuklangan vazifalar va funksiyalarni bevosita, shuningdek hududiy organlar va idoraviy mansub tashkilotlar orqali bajaradi.

13. Qoʻmita oʻziga yuklangan vazifalar va funksiyalarni bajarish uchun quyidagi huquqlarga ega:

Qoʻmita vakolatiga tegishli masalalar boʻyicha davlat va xoʻjalik boshqaruvi organlaridan, mahalliy ijro etuvchi hokimiyat organlaridan va boshqa tashkilotlardan hujjatlar, statistik maʼlumotlar, hisobotlar, tahliliy materiallar, xulosalar va boshqa axborotni soʻrash va olish;

davlat va xoʻjalik boshqaruvi organlari, mahalliy ijro etuvchi hokimiyat organlari, boshqa tashkilotlar va fuqarolarga avtomobil yoʻllari sohasidagi qonun buzilishlarini bartaraf etish toʻgʻrisida koʻrib chiqilishi majburiy boʻlgan taqdimnomalar yuborish;

oʻz vakolatlari doirasida konferensiyalar, seminarlar, simpoziumlar, koʻrgazmalar, yarmarkalar va boshqa tadbirlarni oʻtkazish, shuningdek boshqa tashkilotlar tomonidan oʻtkaziladigan shunga oʻxshash tadbirlarda ishtirok etish;

Qoʻmita, hududiy organlar va idoraviy mansub tashkilotlarning mutaxassislarini belgilangan tartibda xorijiy mamlakatlarga yuborish;

avtomobil yoʻllari sohasidagi yetakchi xorijiy mutaxassislarni Qoʻmitaning markaziy apparatida va idoraviy mansub tashkilotlarda shartnoma asosida ishlash uchun belgilangan tartibda jalb etish;

avtomobil yoʻllarini bosqichma-bosqich rivojlantirish tartib-taomillarini amalga oshirish;

muvofiqlashtiruvchi, ilmiy-texnik, idoralararo ekspert komissiyalari va kengashlar tashkil etish, avtomobil yoʻllari sohasidagi muammoli masalalar boʻyicha maxsus yigʻilishlar chaqirish, shuningdek maslahatlashish, ushbu muammolarni oʻrganish va hal etish uchun mahalliy va xorijiy olimlar hamda mutaxassislar va ekspertlarni jalb etish;

avtomobil yoʻllaridan foydalanuvchilardan avtomobil yoʻllari sohasidagi qonun hujjatlariga rioya qilinishini talab etish;

avtomobil yoʻllarini loyihalashtirish, qurish, rekonstruksiya qilish va ulardan foydalanish sohasidagi faoliyatni amalga oshirayotgan tashkilotlardan shaharsozlik normalari va qoidalariga, shuningdek avtomobil yoʻllari sohasidagi qonun hujjatlariga rioya etishni talab qilish;

Oʻzbekiston Respublikasining xalqaro hujjatlari loyihalarini ishlab chiqishda belgilangan tartibda ishtirok etish, avtomobil yoʻllari sohasida xalqaro shartnomalar tuzish;

avtomobil yoʻllari sohasida xorijiy davlatlar, xalqaro va xorijiy tashkilotlarning vakillari bilan belgilangan tartibda muzokaralar olib borish;

Qoʻmitaning tashkiliy tuzilmasiga kiradigan tashkilotlar oʻrtasida tovarlarni sotish, xarid qilish va yetkazib berish hamda xizmatlar koʻrsatishni tanlovlar va tender savdolari oʻtkazmasdan amalga oshirish;

yuridik shaxs huquqlari bilan avtomobil yoʻllarini qurish, taʼmirlash va ulardan foydalanish bilan shugʻullanuvchi unitar korxona shaklida qoʻshimcha mustaqil korxonalar va boshqa korxonalarni tashkil etish, shuningdek Vazirlar Mahkamasi bilan kelishgan holda Qoʻmita tuzilmasidagi korxonalarni birlashtirish va tugatish.

14. Qoʻmita oʻz vakolatlari doirasida davlat boshqaruvi organlari, mahalliy davlat hokimiyati organlari, boshqa tashkilotlar, mansabdor shaxslar va fuqarolar uchun majburiy hisoblangan normativ-huquqiy hujjatlar qabul qilishga haqli.

Qoʻmita, zarur hollarda, boshqa vazirliklar, davlat qoʻmitalari va idoralar bilan qoʻshma qarorlar va boshqa hujjatlar chiqarishga haqlidir.

15. Qoʻmita:

avtomobil yoʻllarining soz holatini, ularda transport vositalarining uzluksiz va xavfsiz yurishini taʼminlashga;

avtomobil yoʻllari sifatli va oʻz vaqtida qurilishi, rekonstruksiya qilinishi, taʼmirlanishi va saqlanishini taʼminlashga;

avtomobil yoʻllaridagi nosozliklar tufayli yetkazilgan zararni avtomobil yoʻllaridan foydalanuvchilarga belgilangan tartibda qoplashga;

Qoʻmitaning idoraviy mansub tashkilotlari tomonidan moliyaviy mablagʻlar, energiya resurslari, ishlab chiqarish quvvatlari va yoʻl-qurilish texnikasidan samarali foydalanilishini tashkil etishga majburdir.

16. Qoʻmita oʻziga yuklangan vazifa va funksiyalar samarali bajarilishi uchun javob beradi.

17. Qoʻmitaga Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan rais boshchilik qiladi.

18. Raisning Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan toʻrt nafar oʻrinbosari, shu jumladan birinchi oʻrinbosari, raisning oʻrinbosari — bosh muhandis, raisning oʻrinbosari va raisning oʻrinbosari — “Transyoʻlqurilish” DUK direktori boʻladi.

19. Rais:

Qoʻmita faoliyatiga umumiy rahbarlik qiladi hamda Qoʻmitaga yuklangan vazifalar va funksiyalar samarali bajarilishi uchun shaxsan javob beradi;

Qoʻmita markaziy apparatining shtat jadvalini tasdiqlaydi;

Qoʻmitaning markaziy apparati hamda Qoraqalpogʻiston Respublikasi va viloyatlar avtomobil yoʻllari hududiy bosh boshqarmalari taʼminoti boʻyicha xarajatlar smetasini tasdiqlaydi;

markaziy apparat boʻlinmalarining tuzilmasi va nizomlarini, Qoʻmitaning hududiy organlari nizomlarini va idoraviy mansub tashkilotlarining ustavlarini belgilangan tartibda tasdiqlaydi;

markaziy apparat tuzilmasiga, Qoʻmitaning hududiy organlari va idoraviy mansub tashkilotlari apparati tuzilmasiga boshqaruv xodimlarining belgilangan cheklangan umumiy soni doirasida oʻzgartirishlar kiritadi;

markaziy apparat xodimlarini, Qoʻmitaning hududiy organlari va idoraviy mansub tashkilotlari rahbarlarini belgilangan tartibda lavozimga tayinlaydi va lavozimdan ozod qiladi;

Qoʻmita vakolatiga kiruvchi masalalar boʻyicha qarorlar qabul qiladi, raisning birinchi oʻrinbosari va oʻrinbosarlari, Qoʻmita markaziy apparatining boshqa mansabdor shaxslari vakolatlari, vazifalari va javobgarligi darajasini belgilaydi;

markaziy apparat, Qoʻmitaning hududiy organlari va idoraviy mansub tashkilotlari xodimlari bajarishi majburiy boʻlgan buyruqlar va farmoyishlar chiqaradi, koʻrsatmalar beradi;

markaziy apparat, Qoʻmitaning hududiy organlari va idoraviy mansub tashkilotlari mol-mulkini qonun hujjatlariga belgilangan tartibda tasarruf etadi;

idoraviy mansub tashkilotlar tomonidan qonun hujjatlari buzilgan holda qabul qilingan qarorlarni (koʻrsatmalarni) bekor qiladi;

alohida oʻrnak koʻrsatgan xodimlarni belgilangan tartibda davlat mukofotlariga taqdim etadi.

Rais qonun hujjatlariga muvofiq boshqa vakolatlarni ham amalga oshiradi.

20. Qoʻmitada rais (hayʼat raisi), uning birinchi oʻrinbosari va oʻrinbosarlari (lavozim boʻyicha), shuningdek Qoʻmita markaziy apparati boʻlinmalari rahbarlaridan iborat tarkibda Qoʻmita faoliyatining asosiy yoʻnalishlarini muvofiqlashtiruvchi hayʼat tashkil etiladi.

Hayʼat aʼzolarining soni va shaxsiy tarkibi Qoʻmita raisining taqdimnomasi boʻyicha Vazirlar Mahkamasi tomonidan tasdiqlanadi.

Hayʼat:

ushbu Nizomda belgilangan Qoʻmita faoliyatining asosiy yoʻnalishlarini tayyorlash va amalga oshirish;

Qoʻmita nomenklaturasiga kiradigan lavozimlarga kadrlar tanlash, ularni joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining hujjatlarida, Hukumat qarorlarida belgilangan vazifalarni oʻz vaqtida va sifatli amalga oshirishni taʼminlash uchun ijro intizomini mustahkamlash hamda Qoʻmita rahbarlari va xodimlarining shaxsiy masʼuliyatini oshirish bilan bogʻliq masalalarni koʻrib chiqadi.

Hayʼat Qoʻmita vakolatiga taalluqli boshqa masalalarni ham koʻrib chiqish huquqiga ega.

Hayʼat majlisiga Qoʻmita vakolatiga kiradigan masalalar boʻyicha davlat va xoʻjalik boshqaruvi boshqa organlari, boshqa tashkilotlar rahbarlari taklif etilishi mumkin;

Hayʼat uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi;

Hayʼat qarorlari Qoʻmitaning qarorlari va raisning buyruqlari bilan amalga oshiriladi. Rais va Hayʼat aʼzolari oʻrtasida kelishmovchiliklar paydo boʻlgan taqdirda rais paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Oʻzbekiston Respublikasi Vazirlar Mahkamasiga xabar qilishlari mumkin.

Hayʼat faoliyati tartibi uning hayʼat tasdiqlaydigan reglamentida belgilanadi.

21. Qoʻmita va uning hududiy organlari ekspert va texnik kengashlar va boshqa maslahat organlari tashkil etishga haqlidir, ular toʻgʻrisidagi nizomlar tegishli ravishda Qoʻmita raisi va hududiy organ rahbari tomonidan tasdiqlanadi.

22. Hududiy organlar, “Mintaqaviy yoʻllar boʻyicha buyurtmachi xizmati” DUK rahbarlari, raisning maslahatchisi, bosh boshqarma boshligʻi, Qoʻmita markaziy apparati boshqarmalari boshliqlari Vazirlar Mahkamasining Hududlarni kompleks rivojlantirish, kommunal soha, transport, kapital qurilish, qurilish industriyasi masalalari kompleksi rahbari bilan kelishgan holda Qoʻmita raisi tomonidan lavozimga tayinlanadilar.

23. Roʻyxati Vazirlar Mahkamasining Hududlarni kompleks rivojlantirish, kommunal soha, transport, kapital qurilish, qurilish industriyasi masalalari kompleksi rahbari tomonidan tasdiqlanadigan Qoʻmita huzuridagi respublika tashkilotlarining birinchi rahbarlari Vazirlar Mahkamasining Hududlarni kompleks rivojlantirish, kommunal soha, transport, kapital qurilish, qurilish industriyasi masalalari kompleksi rahbari bilan kelishgan holda Qoʻmita raisi tomonidan lavozimga tayinlanadilar.

24. Asosiy vositalarni hududiy organlarga va idoraviy mansub tashkilotlarga biriktirish, shuningdek asosiy vositalarni qoʻmitaning hududiy organlari va idoraviy mansub tashkilotlari oʻrtasida bir-biriga berish Vazirlar Mahkamasining Hududlarni kompleks rivojlantirish, kommunal soha, transport, kapital qurilish, qurilish industriyasi masalalari kompleksi rahbari bilan kelishgan holda Qoʻmita raisining buyrugʻi bilan amalga oshiriladi.

25. Umumiy foydalanishdagi avtomobil yoʻllari Qoʻmitaning hududiy organlari yuritishida boʻladi, ularni tegishli foydalanuvchi tashkilotlarga biriktirish Vazirlar Mahkamasining Hududlarni kompleks rivojlantirish, kommunal soha, transport, kapital qurilish, qurilish industriyasi masalalari kompleksi rahbari bilan kelishgan holda Qoʻmita raisining buyruqlari bilan amalga oshiriladi.

26. Markaziy apparat, Qoʻmitaning hududiy organlari va idoraviy mansub tashkilotlari xodimlarining ish haqi qonun hujjatlarida nazarda tutilgan lavozim maoshi, qoʻshimcha haq va ustamalar, mukofotlar va ragʻbatlantiruvchi toʻlovlardan iborat.

Xodimlarni moddiy ragʻbatlantirish, bir martalik mukofot, moddiy ragʻbatlantirish, mehnat natijalari bilan bogʻliq boʻlmagan ijtimoiy va kompensatsiya toʻlovlari jamoa shartnomasiga muvofiq amalga oshiriladi.

27. Qoʻmita markaziy apparati, uning hududiy organlari, tuman yoʻllardan foydalanish korxonalari, yoʻllardan muntazam foydalanish korxonalari va koʻpriklardan foydalanish korxonalari xodimlari mehnatiga haq toʻlash va ularni moddiy ragʻbatlantirish kasaba uyushmasi organi va Oʻzbekiston Respublikasi Mehnat vazirligi bilan kelishgan holda Vazirlar Mahkamasi huzuridagi Respublika yoʻl jamgʻarmasining boshqaruv Kengashi tomonidan tasdiqlanadigan Nizomga muvofiq amalga oshiriladi.

28. Boshqa idoraviy mansub tashkilotlar xodimlari mehnatiga haq toʻlash va ularni moddiy ragʻbatlantirish oʻz mablagʻlari va qonun hujjatlarida taqiqlanmagan boshqa manbalar hisobiga amalga oshiriladi.

29. Qoʻmitani qayta tashkil etish va tugatish qonun hujjatlarida belgilangan tartibda amalga oshiriladi.