Adliya organlari va muassasalarining budjetdan tashqari jamgʻarmalari mablagʻlaridan samarali foydalanilishini taʼminlash maqsadida Vazirlar Mahkamasi qaror qiladi:

1. 2017-yil 1-yanvardan boshlab:

a) notarial harakatlarni sodir etganlik uchun undiriladigan davlat boji summalarining quyidagicha taqsimlanishi belgilab qoʻyilsin:

78 foizi — tumanlar va shaharlar budjetlari daromadiga;

12 foizi — budjetdan tashqari Adliya organlari va muassasalarini rivojlantirish jamgʻarmasini shakllantirishga;

10 foizi — mablagʻlarni adliya organlarining shaxsiy hisob raqamlarida jamlash yoʻli bilan davlat notarial idoralarini va notarial arxivlarni moliyalashtirishga Bunda, mazkur mablagʻlar Oʻzbekiston Respublikasi adliya vaziri tomonidan Oʻzbekiston Respublikasi Moliya vazirligi bilan kelishilgan holda budjetdan tashqari Adliya organlari va muassasalarini rivojlantirish jamgʻarmasining daromad va xarajatlari oʻrtasidagi salbiy tafovutni qoplash uchun ham yoʻnaltirilishi mumkin.

b) undiriladigan gerb yigʻimidan tumanlar va shaharlar budjetlari daromadiga ajratmalar:

gerbli (maxsus) blankalarda ishonchnomalar va bitimlarni notarial tasdiqlaganlik uchun — 50 foiz miqdorida;

fuqarolik holati dalolatnomalarini yozish organlari tomonidan gerbli guvohnomalar berganlik uchun — 15 foiz miqdorida.

2. Oʻzbekiston Respublikasi Adliya vazirligi notarial harakatlarni sodir etganlik uchun tushgan davlat boji va gerb yigʻimi summasidan adliya organlari va muassasalarining budjetdan tashqari hisob raqamida jamlangan mablagʻlar qoldigʻi qismidan kamida 70 milliard soʻmni 2016-yil 26-dekabrgacha boʻlgan muddatda Oʻzbekiston Respublikasining respublika budjetiga oʻtkazilishini taʼminlasin.

3. Oʻzbekiston Respublikasi Hukumatining ilovaga muvofiq ayrim qarorlariga 2017-yil 1-yanvardan boshlab oʻzgartirishlar kiritilsin.

4. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Vazirlar Mahkamasining 2006-yil 7-martdagi 38-son qarori (Oʻzbekiston Respublikasi QT, 2006-y., 3-son, 17-modda) bilan tasdiqlangan Avtomototransport vositalari bilan bogʻliq bitimlarni rasmiylashtirish tartibi toʻgʻrisidagi nizomning 9-bandida:

a) ikkinchi xatboshi quyidagi mazmundagi ikkinchi, uchinchi va toʻrtinchi xatboshilar bilan almashtirilsin:

“Gerb yigʻimidan tushadigan mablagʻlar quyidagi tartibda taqsimlanadi:

50 foizi — tumanlar va shaharlar budjetlari daromadiga;

50 foizi –Oʻzbekiston Respublikasi Adliya vazirligining gʻaznachilik hisob raqamlariga oʻtkaziladi va gerbli blankalar tayyorlashga hamda boshqa shaxsga berish taqiqlangan va xatlab qoʻyilgan avtomototransport vositalari toʻgʻrisidagi elektron maʼlumotlar bankini yaratishga, shuningdek adliya organlari va muassasalarining moddiy-texnika bazasini mustahkamlash va xodimlarini moddiy ragʻbatlantirish tadbirlariga maqsadli tartibda sarflanadi”;

b) uchinchi xatboshi beshinchi xatboshi deb hisoblansin.

2. Vazirlar Mahkamasining “Oʻzbekiston Respublikasi Prezidentining “Oʻzbekiston Respublikasida notariat institutini yanada takomillashtirish choralari toʻgʻrisida” 2010-yil 5-maydagi PF-4216-son Farmonini amalga oshirish chora-tadbirlari haqida” 2010-yil 2-iyundagi 104-son qarorida (Oʻzbekiston Respublikasi QT, 2010-y., 6-son, 25-modda):

a) 2-bandda:

ikkinchi xatboshidagi “73” raqami “78” raqami bilan almashtirilsin;

toʻrtinchi xatboshidagi “15” raqami “10” raqami bilan almashtirilsin;

b) 6-bandning beshinchi xatboshi quyidagi tahrirda bayon qilinsin:

“gerb yigʻimidan tushadigan mablagʻlarning bir qismi”.

3. Vazirlar Mahkamasining “Gerbli guvohnomalar shakllarini va ularni berganlik uchun gerb yigʻimi miqdorini tasdiqlash toʻgʻrisida” 2012-yil 25-apreldagi 119-son qarorining (Oʻzbekiston Respublikasi QT, 2012-y., 4-son, 29-modda) 6-bandi quyidagi tahrirda bayon qilinsin:

“6. Belgilansinki, gerb yigʻimidan tushadigan mablagʻlar quyidagi tartibda taqsimlanadi:

15 foizi — tumanlar va shaharlar budjetlari daromadiga;

85 foizi –Oʻzbekiston Respublikasi Adliya vazirligining gʻaznachilik hisob raqamlariga oʻtkaziladi va gerbli guvohnomalar va fuqarolik holati yozuvlari blankalarini tayyorlash bilan bogʻliq xarajatlarni qoplashga, shuningdek adliya organlari va muassasalarining moddiy-texnika bazasini mustahkamlash va xodimlarini moddiy ragʻbatlantirish tadbirlariga yoʻnaltiriladi”.