Oʻzbekiston Respublikasi Prezidentining 2016-yil 5-oktabrdagi PF-4848-son “Tadbirkorlik faoliyatining jadal rivojlanishini taʼminlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qoʻshimcha chora-tadbirlar toʻgʻrisida”gi Farmoniga muvofiq tovarlarning kelib chiqishini sertifikatlashni oʻtkazish tartibini takomillashtirish maqsadida Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Moliya vazirligi va Davlat bojxona qoʻmitasi qaror qiladi:

1. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Moliya vazirligi va Davlat bojxona qoʻmitasining 2010-yil 19-iyuldagi EG-01/10-4014, 60, 01-02/8-10-son “Tovarlarning kelib chiqishini sertifikatlashni oʻtkazish tartibi toʻgʻrisidagi nizomni tasdiqlash haqida”gi qaroriga (roʻyxat raqami 2131, 2010-yil 13-avgust) (Oʻzbekiston Respublikasi qonun hujjatlari toʻplami, 2010-y., 33-son, 279-modda) ilovaga muvofiq oʻzgartirish va qoʻshimchalar kiritilsin.

2. Mazkur qaror 2017-yil 1-yanvardan kuchga kiradi.

1. Qarorning Muqaddimasidagi “Oʻzbekiston Respublikasining “Boj tarifi toʻgʻrisida”gi Qonuni (Oʻzbekiston Respublikasi Oliy Majlisining Axborotnomasi, 1997-y., 9-son, 228-modda), Oʻzbekiston Respublikasi Prezidentining 2005-yil 26-iyuldagi PQ-136-sonli “Oʻzbekiston Respublikasi Tashqi iqtisodiy aloqalar, investitsiyalar va savdo vazirligi faoliyatini tashkil etish toʻgʻrisida”gi qarori (Oʻzbekiston Respublikasi qonun hujjatlari toʻplami, 2005-y., 30-31-son, 225-modda)” degan soʻzlar “Oʻzbekiston Respublikasining Bojxona kodeksi, Oʻzbekiston Respublikasi Prezidentining 2015-yil 31-dekabrdagi PQ-2463-son “Oʻzbekiston Respublikasi Tashqi iqtisodiy aloqalar, investitsiyalar va savdo vazirligining tuzilmasini maqbullashtirish va uning faoliyati samaradorligini yanada oshirish chora-tadbirlari toʻgʻrisida”gi qarori” degan soʻzlar bilan almashtirilsin.

2. Nizomda:

a) muqaddima quyidagi tahrirda bayon etilsin:

“Mazkur Nizom Oʻzbekiston Respublikasining Bojxona kodeksi, Oʻzbekiston Respublikasi Prezidentining 2015-yil 31-dekabrdagi PQ-2463-son “Oʻzbekiston Respublikasi Tashqi iqtisodiy aloqalar, investitsiyalar va savdo vazirligining tuzilmasini maqbullashtirish va uning faoliyati samaradorligini yanada oshirish chora-tadbirlari toʻgʻrisida”gi qarori, Oʻzbekiston Respublikasi Vazirlar Mahkamasining 1998-yil 31-martdagi 137-son “Oʻzbekiston Respublikasida tashqi savdo faoliyatini erkinlashtirish boʻyicha qoʻshimcha chora-tadbirlar toʻgʻrisida”gi qaroriga muvofiq Oʻzbekiston Respublikasida tovarlarning kelib chiqishini sertifikatlashni oʻtkazish tartibini belgilaydi.”;

b) 1-bandda:

uchinchi va toʻrtinchi xatboshilar quyidagi tahrirda bayon etilsin:

“vakolatli organ — zimmasiga sertifikat berish funksiyasi yuklatilgan organ. Oʻzbekiston Respublikasida vakolatli organ boʻlib “Oʻzbekekspertiza” AJ va uning boʻlinmalari hisoblanadi;

vakolatli shaxs — vakolatli organning sertifikatni guvohlantirish uchun masʼul boʻlgan mansabdor shaxs;”;

toʻqqizinchi xatboshi quyidagi tahrirda bayon etilsin:

“tovar turkumi — bitta oluvchining manziliga bitta transport hujjati boʻyicha kelayotgan yoki bitta pochta yuk xati bilan joʻnatilayotgan yoxud bojxona chegarasi orqali oʻtayotgan bitta jismoniy shaxsning qoʻl yukida va bagajida olib oʻtilayotgan tovar yoki uning bir qismi;”;

quyidagi mazmundagi xatboshi bilan toʻldirilsin:

“aynan bir xil tovar” — bir ishlab chiqaruvchi tomonidan aynan bir xil texnologik jarayonga asosan ishlab chiqarilgan, tarkibi, nomi (shu jumladan, modeli, savdo belgisi, turi boʻyicha) va TIF TN kodlari boʻyicha bir xil tavsiflangan, aynan bir ariza beruvchi tomonidan sertifikatlash uchun taqdim etilgan tovar.”;

v) 27-bandning uchinchi xatboshisi quyidagi tahrirda bayon etilsin:

“yetkazib beruvchi va xaridor oʻrtasidagi eksport (reeksport) qilinayotgan tovar boʻyicha shartnoma;”;

g) quyidagi mazmundagi 27²-band bilan toʻldirilsin:

“27². 27 va 27¹-bandlarda koʻrsatilgan hujjatlar ariza beruvchi tomonidan vakolatli organga bevosita, pochta aloqa vositasi orqali yoki elektron shaklda axborot tizimi orqali taqdim etiladi. Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.”;

d) 28-band quyidagi tahrirdagi xatboshi bilan toʻldirilsin:

“Ilgari aynan bir xil tovar uchun sertifikat olgan ariza beruvchi murojaat qilgan taqdirda, tovarlarni kelib chiqishini sertifikatlash ariza topshirilgan vaqtdan boshlab bir ish kuni mobaynida amalga oshiriladi, bunda ariza beruvchi arizasida sertifikatlanayotgan mahsulot nomi va miqdoridan soʻng aynan ilgari berilgan sertifikatning raqamini koʻrsatadi.”;

e) 1-ilovadagi “Oʻzbekekspertiza” OAJ” degan soʻzlar “Oʻzbekekspertiza” AJ” degan soʻzlar bilan almashtirilsin;

j) 2 va 3-ilovalar nomlanishidagi “OCNIQ AKSIYADORLIK JAMIYATI “OʼZBEKEKSPERTIZA” va “OTKRITOYE AKSIONERNOYE OBShESTVO “UZBEKEKSPERTIZA” degan soʻzlar tegishincha “OʼZBEKEKSPERTIZA” AKSIYADORLIK JAMIYATI” va “AKSIONERNOYE OBShESTVO “UZBEKEKSPERTIZA” degan soʻzlar bilan almashtirilsin.