Oʻzbekiston Respublikasi Vazirlar Mahkamasining 1996-yil 30-iyuldagi “Uy-joy-kommunal xizmatlarning oʻz xarajatlarini oʻzi qoplashiga bosqichma-bosqich oʻtish munosabati bilan normativ hujjatlarni tasdiqlash toʻgʻrisida”gi 271-sonli hamda 2014-yil 15-iyuldagi “Isteʼmolchilarga suv taʼminoti va oqova suvini chiqarish xizmatlari koʻrsatish qoidalari toʻgʻrisida”gi 194-sonli (Oʻzbekiston Respublikasi qonun hujjatlari toʻplami, 2014-y., 30-son, 368-modda) qarorlariga asosan hamda Oʻzbekiston Respublikasi Moliya vazirligi, Iqtisodiyot vazirligi va “Oʻzkommunxizmat” agentligining 2011-yil 19-yanvardagi 1, 2 va 01-88-con qarori bilan tasdiqlangan Kommunal xizmatlarga tariflarni shakllantirish va rentabellikning cheklangan darajasini joriy etish boʻyicha nizom (roʻyxat raqami 2198, 2011-yil 19-fevral), (Oʻzbekiston Respublikasi qonun hujjatlari toʻplami, 2011-y., 7-8-son, 76-modda) ijrosini taʼminlash hamda viloyatdagi suv hisoblagichlari bilan taʼminlanmagan aholi isteʼmolchilarini ichimlik suvi isteʼmol meʼyorlarini belgilash maqsadida qaror qilaman:

1. Oʻzbekiston Respublikasi Vazirlar Mahkamasining 2016-yil 21-yanvardagi 05/5-19-son topshirigʻi rahbarlik va ijro uchun qabul qilinsin.

2. Viloyatdagi suv hisoblagichlari bilan taʼminlanmagan aholi isteʼmolchilarini KMK 2.04.02-97 qoidalari asosida xoʻjalik-maishiy ichimlik suvi isteʼmol meʼyorlariga asoslanib, bir kishi uchun sarflanayotgan ichimlik suvi meʼyorlarini aniqlash boʻyicha viloyat “Suvoqova” unitar korxonasi tomonidan tuzilgan dalolatnomalar asosida:

shahar hududidagi hovli uy-joylardagi bir kishi uchun oylik ichimlik suvini umumiy sarflash meʼyori 25 m³;

tuman hududidagi hovli uy-joylardagi bir kishi uchun oylik ichimlik suvini umumiy sarflash meʼyori 15 m³;

koʻp qavatli uy-joylardagi bir kishi uchun oylik ichimlik suvining umumiy sarflash meʼyori 10,6 m³;

hxududlardagi mavjud koʻcha joʻmraklaridan foydalanish uchun oylik ichimlik suvining umumiy sarflash meʼyori 4,2 m³ etib belgilansin.

3. Viloyat “Suvoqova” davlat unitar korxonasi (Yuldashev) shahar va tuman hokimliklari bilan birgalikda viloyat aholisi uchun xoʻjalik-maishiy ichimlik suvi isteʼmol meʼyorlari oʻzgaruvchan miqdor boʻlib, ijtimoiy iqtisodiy vaziyatga, demografik tusdagi oʻzgarishlarga bogʻliq boʻlganligi uchun yilda bir marotaba oʻrganib, viloyat hokimligiga taklif kiritsin.

4. Viloyat Moliya boshqarmasi (Ortiqov), viloyat “Suvoqova” davlat unitar korxonasi (Yuldashev), shahar va tuman hokimliklari bilan birgalikda viloyatdagi ichimlik suvi taʼminoti mavjud hamda suv hisoblagichlari bilan taʼminlanmagan sogʻliqni saqlash, xalq taʼlimi, oʻrta maxsus kasb-hunar taʼlimi, akademik litseylar va oliygohlar boʻyicha amaldagi KMK 2.04.02-97 qoidalari asosida ichimlik suvi isteʼmol meʼyorlarini oʻrganib, asosiy xarajatlarda moliyalashtirish choralarini koʻrib borsinlar.

5. Viloyat Davlat sanitariya-epidemiologiya nazorati markazi (Yakubov) viloyatdagi ichimlik suvi manbalaridan laboratoriya tahlillarini doimiy olib borsin.

6. Mazkur isteʼmol meʼyorlari 2016-yilning 1-aprel kunidan boshlab, shahar va tumanlarda suv hisoblagichi mavjud boʻlmagan aholi isteʼmolchilar uchun qoʻllanilsin.

7. Mazkur qaror bilan viloyat hokimining 2006-yil 16-fevraldagi “Ichimlik suvi meʼyorlarini tasdiqlash haqida”gi 24-f-sonli farmoyishi oʻz kuchini yoʻqotgan deb hisoblansin.

8. “Fargʻona haqiqati” va “Ferganskaya pravda” gazetalari tahririyati (Sobirov) va viloyat kompyuterlashtirish markazi davlat unitar korxonasi (Maxmudov) mazkur qarorni rasmiy eʼlon qilsinlar hamda viloyat hokimligining rasmiy veb-saytiga joylashtirsinlar.

9. Mazkur qarorning ijrosini nazorat qilish viloyat hokimining oʻrinbosari S. Zokirov zimmasiga yuklatilsin.