“Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida” 2016-yil 25-apreldagi OʻRQ-405-sonli Oʻzbekiston Respublikasi Qonunining 6-moddasiga muvofiq hamda yer qaʼridan oqilona foydalanishni yanada taʼminlash maqsadida:

1. Oʻzbekiston Respublikasi Prezidentining ayrim qarorlariga ilovaga muvofiq oʻzgartish va qoʻshimchalar kiritilsin.

2. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari, moliya vaziri R. Azimov va Oʻzbekiston Respublikasi Bosh vazirining oʻrinbosari Gʻ. Ibragimov zimmasiga yuklansin.

1. Oʻzbekiston Respublikasi Prezidentining 2007-yil 7-iyundagi PQ-649-sonli qarori bilan tasdiqlangan yer qaʼri uchastkalaridan foydalanish huquqini berish tartibi va shartlari toʻgʻrisidagi Nizomning:

a) 1-bandi sakkizinchi xatboshidagi, 6-paragraf nomidagi, 23, 24, 38, 43-bandlaridagi, 47-bandning toʻrtinchi xatboshidagi “alohida” degan soʻz chiqarib tashlansin;

b) 5-bandning ikkinchi xatboshi quyidagi tahrirda bayon etilsin:

“Yer qaʼrini geologik oʻrganish uchun belgilangan tartibda tasdiqlangan loyiha-smeta hujjatlari mineral-xomashyo bazasini rivojlantirish va qayta ishlab chiqarish davlat dasturlari doirasida Davlat budjeti mablagʻlari hamda tashkilotlarning shaxsiy mablagʻlari hisobidan uni geologik oʻrganishda yer qaʼri uchastkalaridan foydalanish huquqi paydo boʻlishi uchun asos hisoblanadi”;

v) 49-bandning birinchi xatboshi quyidagi tahrirda berilsin:

“Yer qaʼrini geologik jihatdan oʻrganish boʻyicha ishlarni moliyalashtirgan yuridik va jismoniy shaxslar oʻzlari razvedka qilgan konda foydali qazilmalarning zaxiralari belgilangan tartibda tasdiqlangan sanadan boshlab bir yil mobaynida foydali qazilmalarni kavlab olish uchun litsenziya olish yuzasidan mutlaq huquqqa egadirlar.”

g) quyidagi mazmundagi 49¹-band bilan toʻldirilsin:

“49¹.Yer qaʼrini geologik oʻrganish boʻyicha ishlarni moliyalashtirgan yuridik va jismoniy shaxslarga mutlaq huquq berilgan muddat tugaganidan soʻng ular tomonidan razvedka qilingan konda foydali qazilmalarni kavlab olish uchun litsenziya olishga ochiq savdolarda ularning ustuvor huquqi saqlanib qoladi”.

d) 72-band quyidagi mazmundagi xatboshi bilan toʻldirilsin:

“Ochiq savdolarning ishtirokchisi tomonidan moliyalashtirish manbalari koʻrsatilgan holda yer qaʼrini geologik oʻrganish boʻyicha ishlarni moliyalashtirganini tasdiqlaydigan hujjatlar taqdim etilganda, boshqa teng shart-sharoitlarda u ochiq savdolar gʻolibi deb eʼtirof etiladi”.

2. Oʻzbekiston Respublikasi Prezidentining 2011-yil 2-maydagi PQ-1524-sonli qarori bilan tasdiqlangan noruda foydali qazilmalarni oʻz ichiga olgan yer qaʼri uchastkalaridan foydalanish huquqi uchun litsenziyalar berish tartibi toʻgʻrisidagi nizomning:

a) 6-bandi quyidagi mazmundagi xatboshi bilan toʻldirilsin:

“Yer qaʼrini geologik jihatdan oʻrganish uchun belgilangan tartibda tasdiqlangan loyiha-smeta hujjatlari mineral-xomashyo bazasini rivojlantirish va qayta ishlab chiqarish davlat dasturlari doirasida Davlat budjeti mablagʻlari hamda tashkilotlarning shaxsiy mablagʻlari hisobidan uni geologik oʻrganishda yer qaʼri uchastkalaridan foydalanish huquqi paydo boʻlishi uchun asos hisoblanadi”;

b) 32-bandning birinchi xatboshi quyidagi tahrirda berilsin:

“Yer qaʼrini geologik jihatdan oʻrganish boʻyicha ishlarni moliyalashtirgan yer qaʼridan foydalanuvchilar oʻzlari razvedka qilgan konda foydali qazilmalarning zaxiralari belgilangan tartibda tasdiqlangan sanadan boshlab bir yil mobaynida noruda foydali qazilmalarni kavlab olish uchun litsenziya olish yuzasidan mutlaq huquqqa egadirlar.”

v) quyidagi mazmundagi 32¹-band bilan toʻldirilsin:

“32¹. Yer qaʼrini geologik jihatdan oʻrganish boʻyicha ishlarni moliyalashtirgan talabgorlarga mutlaq huquq berilgan muddat tugaganidan soʻng ular tomonidan razvedka qilingan konda foydali qazilmalarni kavlab olish uchun litsenziya olishga ochiq savdolarda ularning ustuvor huquqi saqlanib qoladi”.

g) 54-band quyidagi mazmundagi xatboshi bilan toʻldirilsin:

“Talabgor tomonidan moliyalashtirish manbalari koʻrsatilgan holda yer qaʼrini geologik jihatdan oʻrganish boʻyicha ishlarni moliyalashtirganini tasdiqlaydigan hujjatlar taqdim etilganda moliyaviy taklif summasiga yer qaʼrini geologik oʻrganish boʻyicha ishlarni moliyalashtirishga sarflangan tegishli summa qoʻshiladi. Bunda yer qaʼrini geologik oʻrganish boʻyicha ishlarni moliyalashtirish xarajatlarining qoʻshilgan summasi moliyaviy taklif sifatida Davlat budjetiga toʻlanmaydi.

3. Oʻzbekiston Respublikasi Prezidentining 2012-yil 30-oktabrdagi PQ-1843-sonli qarori bilan tasdiqlangan soliq toʻlovchilarning majburiyatlari paydo boʻlishi (tugatilishi) toʻgʻrisida maʼlumotlarni davlat soliq xizmati organlariga taqdim etadigan idora va tashkilotlar Roʻyxati 33-pozitsiyasida, “Taqdim etiladigan maʼlumotlarning nomi ustunining 6-bandidagi “alohida” soʻzi chiqarib tashlansin.