Oʻzbekiston Respublikasi Prezidentining “Meva-sabzavot, uzum va poliz mahsulotlarini eksport qilishni ragʻbatlantirishga doir qoʻshimcha chora-tadbirlar toʻgʻrisida” 2016-yil 19-sentabrdagi PQ-2603-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari, moliya vaziri R.S. Azimov zimmasiga yuklansin.

1. Vazirlar Mahkamasining 2000-yil 29-iyundagi 245-son qarori (Oʻzbekiston Respublikasi QT, 2000-y., 6-son, 33-modda) bilan tasdiqlangan Xoʻjalik yurituvchi subyektlar tomonidan xorijiy valyutadagi tushumni majburiy sotish tartibiga 1-ilova matni quyidagi tahrirda bayon qilinsin:

2. Vazirlar Mahkamasining 2005-yil 9-avgustdagi 189-son qarori (Oʻzbekiston Respublikasi QT, 2005-y., 8-son, 40-modda) bilan tasdiqlangan Oʻzbekiston Respublikasining xoʻjalik yurituvchi subyektlari tomonidan xorijiy mamlakatlardagi ular tashkil etgan savdo uylari, vakolatxonalar, korxonalar orqali, shuningdek Oʻzbekiston Respublikasi Savdo-sanoat palatasining xorijiy mamlakatlardagi savdo-investitsiya uylari orqali olib chiqilayotgan tovarlarni bojxonada rasmiylashtirish tartibi toʻgʻrisidagi nizomda:

a) 5-bandga quyidagi mazmundagi ikkinchi xatboshi qoʻshilsin:

“Bunda tushum tushishi yoki qaytarib olib kelish muddati toʻgʻridan-toʻgʻri eksport kontraktlari, shuningdek fermer va dehqon xoʻjaliklari, agrofirmalar va qayta ishlovchi korxonalar bilan tuzilgan vositachilik shartnomalari, tasdiqlangan bank akkreditivi ochish, yoxud chet elda ochilgan qoʻshma korxonalar va “Oʻzagroeksport” aksiyadorlik jamiyati ixtisoslashtirilgan tashqi savdo kompaniyasining savdo uylari nomiga birinchi darajali xorijiy bankning kafolatini rasmiylashtirish asosida “Oʻzagroeksport” aksiyadorlik jamiyati ixtisoslashtirilgan tashqi savdo kompaniyasining vositachilik shartnomalari boʻyicha yangi, quritilgan va qayta ishlangan meva-sabzavot mahsulotlari, uzum va poliz mahsulotlari amalda eksport qilingan kundan boshlab 60 kundan ortiq boʻlmasligi kerak”;

ikkinchi — yettinchi xatboshilar tegishli ravishda uchinchi — sakkizinchi xatboshilar deb hisoblansin;

b) 6-bandga quyidagi mazmundagi xatboshi qoʻshilsin:

“Oʻzagroeksport” aksiyadorlik jamiyati ixtisoslashtirilgan tashqi savdo kompaniyasi tomonidan ustav fondida “Oʻzagroeksport” aksiyadorlik jamiyati ixtisoslashtirilgan tashqi savdo kompaniyasining ulushi kamida 51 foizni tashkil etadigan chet elda ochilgan qoʻshma korxonalar va “Oʻzagroeksport” aksiyadorlik jamiyati ixtisoslashtirilgan tashqi savdo kompaniyasi savdo uylarining manziliga eksport qilinganda yetkazib berilishi mumkin”.

3. Vazirlar Mahkamasining 2016-yil 15-iyundagi 207-son qarori (Oʻzbekiston Respublikasi QT, 2016-y., 6-son, 56-modda) bilan tasdiqlangan Yangi va qayta ishlangan meva-sabzavot mahsulotlarini eksport qilish tartibi toʻgʻrisidagi Nizomda:

a) 7-band quyidagi tahrirda bayon qilinsin:

“7. Meva-sabzavot mahsulotlari yuklab joʻnatilgan meva-sabzavot mahsulotlari qiymatining kamida 30 foizini oldindan toʻlash shartlarida eksport qilinadi, qolgan qismiga esa tasdiqlangan bank akkreditivi ochiladi, yoxud birinchi darajali xorijiy bankning kafolati rasmiylashtiriladi.

“Oʻzagroeksport” aksiyadorlik jamiyati:

“Oʻzagroeksport” aksiyadorlik jamiyatining chet elda ochilgan qoʻshma korxonalari va savdo uylari;

Oʻzbekiston Respublikasi Vazirlar Mahkamasining qarori bilan tasdiqlanadigan roʻyxat boʻyicha ishonchli va uzoq muddatli sheriklar hisoblangan yetakchi xorijiy import qiluvchi tashkilotlar manziliga meva-sabzavot mahsulotlarini oldindan haq toʻlanmasdan, tasdiqlangan bank akkreditivi ochmasdan, yoxud birinchi darajali xorijiy bankning kafolatini rasmiylashtirmasdan eksport qilish huquqiga egadir”;

b) 13-bandning birinchi xatboshidagi “50” raqami “25” raqamiga almashtirilsin;

v) 14-bandda:

uchinchi xatboshidagi “50” raqami “75” raqamiga almashtirilsin;

toʻrtinchi xatboshidagi “50” raqami “25” raqamiga almashtirilsin.