Oʻzbekiston Respublikasi Tashqi ishlar vazirligi va Jazoir Xalq Demokratik Respublikasi Tashqi ishlar vazirligi (keyingi oʻrinlarda “Tomonlar” deb ataluvchilar),

ikki mamlakat oʻrtasida siyosiy, iqtisodiy va madaniy hamkorlikni ragʻbatlantirish hamda ularning xalqlari oʻrtasida doʻstona aloqalarni rivojlantirish va mustahkamlash istagida,

oʻzaro manfaatli boʻlgan ikki tomonlama hamkorlik masalalari va xalqaro muammolar boʻyicha muntazam fikr almashinuvning zaruriyatini inobatga olgan holda,

Birlashgan Millatlar Tashkiloti Nizomi qoidalari va xalqaro huquqiy hujjatlarga muvofiq oʻzaro manfaatli hamkorlik masalalari boʻyicha qaror qabul qilishga koʻmaklashish istagida,

quyidagilar toʻgʻrisida kelishib oldilar:

Tomonlar Tashqi ishlar vazirliklari darajasida oʻzbek-jazoir aloqalari masalalari hamda dolzarb xalqaro muammolar boʻyicha muntazam maslahatlashuvlar oʻtkazish orqali ikki tomonlama muloqotni qoʻllab-quvvatlaydilar hamda delegatsiya va ekspertlar bilan almashadilar.

Tomonlarning oʻzaro roziligi asosida muayyan masalalarni koʻrib chiqish maqsadida ekspertlar va ishchi guruhlari tashkil qilinishi mumkin.

Delegatsiya darajasi, maslahatlashuvlarning kun tartibi, vaqti va oʻtkazilish joyi diplomatik kanal orqali kelishiladi.

Tomonlar mintaqa va dunyoda barqarorlik hamda xavfsizlikni taʼminlash bilan bogʻliq masalalar muhokamasiga alohida eʼtibor qaratadilar.

Tomonlar ikki tomonlama hamkorlikning oʻzaro manfaatli boʻlgan sohalarini kengaytirish va chuqurlashtirishni ragʻbatlantiradilar.

Tomonlar oʻz vakolatlari doirasida har ikki mamlakatning davlat boshqaruvi organlari va institutlari, shuningdek jamoat va ilmiy tashkilotlari oʻrtasida bevosita aloqalarning oʻrnatilishi hamda rivojlanishiga koʻmaklashadilar.

Xalqaro konferensiya va uchrashuvlardagi Tomonlar vakillari, shuningdek Oʻzbekiston va Jazoirning uchinchi mamlakatlardagi, Birlashgan Millatlar Tashkiloti hamda boshqa xalqaro tashkilotlardagi diplomatik missiyalari oʻzaro manfaatli boʻlgan masalalar boʻyicha amaliy hamkorlik ruhida maslahatlashuvlar oʻtkazadilar.

Ushbu Protokolni talqin qilish va qoʻllashda yuzaga keladigan barcha nizo va kelishmovchiliklar Tomonlar oʻrtasida oʻzaro maslahatlashuv va muzokaralar orqali hal qilinadi.

Ushbu Protokolga Tomonlarning oʻzaro roziligi asosida oʻzgartirish va qoʻshimchalar kiritilishi mumkin.

Ushbu Protokol imzolangan sanadan kuchga kiradi va besh (5) yil muddat davomida amal qiladi. Tomonlardan biri ikkinchi Tomonni ushbu Protokolni bekor qilish niyati toʻgʻrisida diplomatik kanallar orqali bekor qilish sanasidan uch (3) oy oldin yozma xabardor qilmaguniga qadar ushbu Protokol shu kabi muddatlarga uzaytirilaveradi.

Toshkent shahrida 2016-yilning 20-oktabrida ikki asl nusxada, har biri oʻzbek, arab va ingliz tillarida tuzildi, bunda barcha matnlar teng autentikdir. Talqin qilishda kelishmovchiliklar yuzaga kelgan taqdirda, ingliz tilidagi matn ustuvor hisoblanadi.