Oʻzbekiston Respublikasida oʻrmon xoʻjaligini rivojlantirishni moliyalashtirishni, oʻrmon fondi hududida oʻsimlik va hayvonot dunyosini muhofaza qilish, himoyalash, takroran koʻpaytirish hamda tiklashning moliyaviy taʼminotini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi qoshida Oʻrmon xoʻjaligini rivojlantirish jamgʻarmasi tashkil etilsin.

2. Quyidagilar Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi qoshidagi Oʻrmon xoʻjaligini rivojlantirish jamgʻarmasini moliyalashtirish manbalari etib belgilansin:

oʻrmon fondi yerlarida arizalarni koʻrib chiqqanlik va ruxsatnomalar berganlik uchun olinadigan mablagʻlarning 100 foizi;

oʻrmon fondi yerlarida (davlat qoʻriqxonalaridan tashqari) hayvonot va oʻsimlik dunyosiga yetkazilgan zararni qoplash boʻyicha undirilgan mablagʻlarning 100 foizi;

oʻrmon fondining ruxsat etilgan hududlarida chorva mollarini boqish, oʻrmon fondi uchastkalarida pichan oʻrish, oʻrmon fondi uchastkalarida asalari uyalari va qutilarini joylashtirish, oʻrmon fondi uchastkalarida daraxt va butalarni kesmagan holda oʻtin va shox-shabbalarni yigʻish, davlat oʻrmon fondi uchastkalaridan madaniy-maʼrifiy, tarbiyaviy, sogʻlomlashtirish, rekreatsion va estetik maqsadlarda foydalanish uchun toʻlovlarning 50 foizi;

xayr-ehson qiluvchi yuridik va jismoniy shaxslarning, shu jumladan Oʻzbekiston Respublikasi norezidentlarining mablagʻlari;

Jamgʻarmaning vaqtincha boʻsh mablagʻlarini Oʻzbekiston Respublikasi tijorat banklarida joylashtirishdan olingan daromadlar va qonun hujjatlarida taqiqlanmagan boshqa tushumlar.

3. Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi qoshidagi Oʻrmon xoʻjaligini rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom 1-ilovaga muvofiq tasdiqlansin.

4. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.

5. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash hamda isteʼmol tovarlari masalalari axborot-tahlil departamentiga yuklansin.

1. Mazkur nizom Oʻzbekiston Respublikasining “Oʻsimlik dunyosini muhofaza qilish va undan foydalanish toʻgʻrisida”, “Hayvonot dunyosini muhofaza qilish va undan foydalanish toʻgʻrisida”, “Oʻrmon toʻgʻrisida”, “Muhofaza etiladigan tabiiy hududlar toʻgʻrisida”gi qonunlari, Oʻzbekiston Respublikasi Vazirlar Mahkamasining “Biologik resurslardan foydalanishni tartibga solish va tabiatdan foydalanish sohasida ruxsat berish tartib-taomillaridan oʻtish tartibi toʻgʻrisida” 2014-yil 20-oktabrdagi 290-son qaroriga muvofiq Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi qoshidagi Oʻrmon xoʻjaligini rivojlantirish jamgʻarmasi (keyingi oʻrinlarda Jamgʻarma deb ataladi) mablagʻlarini shakllantirish va ulardan foydalanish tartibini belgilaydi.

2. Jamgʻarma oʻrmon xoʻjaligini rivojlantirish, oʻrmon xoʻjaliklarining moddiy-texnika bazasini mustahkamlash, oʻrmon fondi yerlaridagi oʻsimlik va hayvonot dunyosini muhofaza qilish, himoyalash, takroran koʻpaytirish, tiklashni taʼminlash uchun mablagʻlarni shakllantirish maqsadida tashkil etiladi.

3. Jamgʻarma Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi qoshida yuridik shaxs tashkil etmasdan tashkil qilinadi.

4. Jamgʻarma mablagʻlari quyidagi manbalar hisobiga shakllantiriladi:

a) oʻrmon fondi yerlarida arizalarni koʻrib chiqqanlik va ruxsatnomalar berganlik uchun olinadigan mablagʻlarning 100 foizi;

b) oʻrmon fondi yerlarida (davlat qoʻriqxonalaridan tashqari) hayvonot va oʻsimlik dunyosiga yetkazilgan zararni qoplash boʻyicha undirilgan mablagʻlarning 100 foizi;

v) oʻrmon fondining ruxsat etilgan hududlarida chorva mollarini boqish, oʻrmon fondi uchastkalarida pichan oʻrish, oʻrmon fondi uchastkalarida asalari uyalari va qutilarini joylashtirish, oʻrmon fondi uchastkalarida daraxt va butalarni kesmagan holda oʻtin va shox-shabbalarni yigʻish, davlat oʻrmon fondi uchastkalaridan madaniy-maʼrifiy, tarbiyaviy, sogʻlomlashtirish, rekreatsion va estetik maqsadlarda foydalanish uchun toʻlovlarning 50 foizi;

g) xayr-ehson qiluvchi yuridik va jismoniy shaxslarning, shu jumladan Oʻzbekiston Respublikasi norezidentlarining mablagʻlari;

d) Jamgʻarmaning vaqtincha boʻsh mablagʻlarini Oʻzbekiston Respublikasi tijorat banklarida joylashtirishdan olingan daromadlar va qonun hujjatlarida taqiqlanmagan boshqa tushumlar.

5. Jamgʻarmaga tushgan mablagʻlar Oʻzbekiston Respublikasi Moliya vazirligining axborot tizimidagi gʻaznachilik shaxsiy hisob raqamida jamlanadi.

6. Jamgʻarmaning mablagʻlaridan quyidagilar uchun foydalaniladi:

a) oʻrmon xoʻjaligini, oʻrmon-ovchilik xoʻjaligini, oʻrmon fondi yerlaridagi qoʻriqxonalar va boshqa muhofaza qilinadigan tabiiy hududlarni rivojlantirish maqsadli dasturlarini ishlab chiqish;

b) oʻsimlik yoki hayvonot dunyosiga yetkazilgan zararni bartaraf etish va uning oldini olish tadbirlari;

v) Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi markaziy apparati va uning tizimidagi davlat oʻrmon xoʻjaliklari moddiy-texnika bazasini mustahkamlash va rivojlantirish, shu jumladan:

oʻrmonlarni muhofaza qilish uchun texnika va texnologiyalar, ekologik monitoring tizimlari, asbob-uskunalar va kompyuter dasturlari sotib olish;

oʻrmon muhofazasi avtomobillariga texnik xizmat koʻrsatish, ular uchun ehtiyot qismlar va yonilgʻi-moylash materiallari, aloqa vositalari sotib olish;

g) tarmoqqa oid normativ-huquqiy hujjatlar loyihalarini ishlab chiqish, innovatsiya loyihalarini hamda zamonaviy texnologiyalarni joriy etishni ragʻbatlantirish;

d) oʻrmon urugʻchiligini, seleksiyasini rivojlantirish, maxsus onalik plantatsiyalarini barpo etish, maxsus koʻchatxonalar, issiqxonalar, shuningdek dorivor oʻsimliklar plantatsiyalarini tashkil etishda tajriba uchastkalarida ilgʻor texnologiyalarni sinash;

e) tabiiy pitomniklar, shu jumladan davlat qoʻriqxonalarining qoʻriqlanadigan zonalarida ham tashkil etish, oʻrmon fondi yerlaridagi muhofaza qilinadigan tabiiy hududlarida ularning rejimiga muvofiq parvarishxonalar va serpentariylar barpo etish;

j) ruxsatnomalar blankalarini tayyorlash;

z) oʻrmon xoʻjaligi uchun obyektlarni qurish, texnikaviy qayta jihozlash, rekonstruksiya qilish va taʼmirlash;

i) oʻrmon barpo etish va loyiha-qidiruv ishlarini moliyalashtirish;

k) oʻrmon fondi yerlarida oʻsimlik va hayvonot dunyosi obyektlarining zararkunandalari va kasalliklariga qarshi kurashish uchun preparatlar sotib olish va qoʻshimcha tadbirlarni amalga oshirish;

l) oʻrmon mahsulotlarini qayta ishlash uchun mini-sexlarni tashkil etish, shuningdek asalarichilik, parrandachilik, chorvachilik va baliqchilikni rivojlantirish;

m) oʻrmon, oʻrmon-ovchilik xoʻjaligi, oʻrmon fondi yerlaridagi muhofaza qilinadigan hududlarning alohida oʻrnak koʻrsatgan xodimlarini xodim oylik ish haqining ikki barobaridan koʻp boʻlmagan miqdorda moddiy ragʻbatlantirish;

n) oʻrmon fondi yerlarida (davlat qoʻriqxonalaridan tashqari) hayvonot va oʻsimlik dunyosi toʻgʻrisidagi qonun hujjatlari buzilishini aniqlagan shaxslarga quyidagi miqdorlarda mukofotlar toʻlash:

oʻsimlik dunyosiga yetkazilgan zararni qoplash boʻyicha undirilgan summaning 10 foizi miqdorida;

hayvonot dunyosiga yetkazilgan zararni qoplash boʻyicha undirilgan summaning 30 foizi miqdorida;

Oʻzbekiston Respublikasi Qizil kitobiga kiritilgan oʻsimliklar dunyosi obyektlari turlariga yetkazilgan zararni qoplash boʻyicha undirilgan summaning 5 foizi miqdorida;

Oʻzbekiston Respublikasi Qizil kitobiga kiritilgan hayvonot dunyosi obyektlari turlariga yetkazilgan zararni qoplash boʻyicha undirilgan summaning 20 foizi miqdorida;

o) tarmoqqa oid ilmiy ishlar, innovatsiya loyihalari va ilgʻor texnologiyalarni ishlab chiqish va joriy etish, ixtirolar, ilmiy ishlar yaratishni ragʻbatlantirish, tarmoq masalalariga oid metodik koʻrsatmalar va maqolalarni nashr etishga, ilmiy-amaliy konferensiyalarni tashkil etish va oʻtkazish;

p) oʻrmon xoʻjaligi, oʻrmon-ovchilik xoʻjaligi, oʻrmon fondi yerlaridagi muhofaza qilinadigan tabiiy hududlar kadrlarini qayta tayyorlash, ularning malakasini oshirish, shu jumladan xorijiy taʼlim muassasalarida stajirovkalarini tashkil qilish;

r) oʻrmon xoʻjaligi, oʻrmon-ovchilik xoʻjaligini, oʻrmon fondi hududidagi muhofaza qilinadigan tabiiy hududlarni rivojlantirish boʻyicha xalqaro koʻrgazmalar, loyihalar va dasturlarda qatnashish;

s) xorijiy va xalqaro tashkilotlarning rahbarlari va mutaxassislarini Oʻzbekiston Respublikasida boʻlishi davrida qabul qilish va kuzatish hamda konferensiyalar tashkil etish va oʻtkazish.

7. Jamgʻarma mablagʻlaridan qonun hujjatlarida taqiqlanmagan boshqa maqsadlarda faqat Oʻzbekiston Respublikasi Vazirlar Mahkamasining qarorlariga binoan foydalanilishi mumkin.

8. Buyurtmanomalarni koʻrib chiqish, kelib tushishi kutilayotgan moliyaviy mablagʻlarni hisoblash, daromadlar va xarajatlar smetasi loyihasini tuzish uchun 5 nafar aʼzodan iborat Jamgʻarma kengashi tuziladi. Jamgʻarma kengashining shaxsiy tarkibi Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi tomonidan shakllantiriladi hamda Oʻzbekiston Respublikasi Qishloq va suv xoʻjaligi vazirligi tomonidan tasdiqlanadi.

9. Jamgʻarma kengashiga rahbarlik qilish, uning ishlarini tashkil etish va Jamgʻarma mablagʻlaridan maqsadli foydalanilishi yuzasidan doimiy monitoring olib borish Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi boshligʻi tomonidan amalga oshiriladi.

10. Jamgʻarma kengashi:

ushbu Nizomda nazarda tutilgan maqsadlar uchun mablagʻlar ajratilishi yuzasidan buyurtmanomalarni qabul qiladi, koʻrib chiqadi va umumlashtiradi;

qabul qilingan buyurtmanomalar orasidan eng dolzarblari va asoslanganlarini tanlab oladi hamda mablagʻ ajratish toʻgʻrisidagi qaror loyihasini tayyorlaydi;

ushbu nizomning 6-bandiga muvofiq belgilangan yoʻnalishlar doirasida mablagʻlardan foydalanish uchun eng ustuvorlarini tanlaydi;

ajratilgan mablagʻlardan boshqa maqsadlarda foydalanish holatlari aniqlangan taqdirda moliyalashtirishni toʻxtatadi va ajratilgan mablagʻlarni undirish choralarini koʻradi;

mablagʻlarni oluvchilardan mablagʻlardan foydalanilishi va bajarilgan ishlar toʻgʻrisidagi hisobotlarni qabul qiladi va umumlashtiradi;

oʻz faoliyatining boshqa masalalari yuzasidan qarorlar qabul qiladi.

11. Jamgʻarma mablagʻlaridan foydalanish har yili Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi tomonidan tasdiqlanadigan daromadlar va xarajatlar smetasi boʻyicha amalga oshiriladi. Daromadlar va xarajatlar smetasi Oʻzbekiston Respublikasi Moliya vazirligi tomonidan roʻyxatdan oʻtkaziladi.

12. Jamgʻarmaning daromadlar va xarajatlar smetasi kelgusi yilda moliyaviy mablagʻlar kelib tushishining kutilayotgan prognozi va u yoki bu tadbirlarni oʻtkazish zarurligidan kelib chiqqan holda tuziladi.

Ushbu Nizom 6-bandining “n” kichik bandida nazarda tutilgan maqsadlar uchun, qonun hujjatlari buzilishlarini aniqlaganlik uchun mukofot qonun buzilishini aniqlagan shaxsning familiyasi, ismi, otasining ismi, STIR, yashash joyi, telefon raqami koʻrsatilgan, pasportining nusxasi, bank hisob raqami ilova qilingan murojaati asosida toʻlanadi.

Qonun hujjatlari buzilishini aniqlagan shaxsning murojaati Jamgʻarma kengashi tomonidan oʻrganib chiqiladi va pul mukofoti ajratish toʻgʻrisidagi qaror bilan rasmiylashtiriladi.

13. Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi markaziy apparatining tarkibiy boʻlinmalari, oʻrmon xoʻjaligi, oʻrmon-ovchilik xoʻjaligi, oʻrmon fondi yerlaridagi muhofaza qilinadigan tabiiy hududlar mablagʻ ajratishni daromadlar va xarajatlar smetasiga kiritish uchun buyurtmanoma taqdim etadilar.

Buyurtmanomada tadbirlar, ularni amalga oshirish zaruriyatining asoslari, zarur mablagʻlar miqdori, shuningdek ularni bajarish uchun boshqa mablagʻlarning yoʻqligi koʻrsatiladi.

Buyurtmanomalar kelgusi moliya yili uchun 1-iyungacha Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasiga taqdim etiladi.

Buyurtmanoma yozma shaklda, elektron pochta yoki boshqa aloqa vositalaridan foydalangan holda taqdim etiladi.

Buyurtmanomada quyidagilar koʻrsatilgan boʻlishi kerak:

tashkilotning toʻliq nomi va aniq rekvizitlari;

mavjud muammolar va ularning (toʻliq yoki qisman va belgilangan muddatlarda) hal qilish imkoniyati, mablagʻlardan foydalanish maqsadlari, shuningdek kutilayotgan natijalar koʻrsatilgan tushuntirish xati;

soʻralayotgan mablagʻlarning hisob-kitobi;

oʻsimlik va hayvonot dunyosiga yetkazilgan zararni qoplash boʻyicha — qonun hujjatlarining buzilganligi toʻgʻrisidagi dalolatnoma nusxasi.

Zarurat boʻlganda buyurtmanomaga uni asoslovchi tegishli hujjatlar ham ilova qilinadi.

14. Taqdim etilgan buyurtmanomalar har yili 1-iyulgacha boʻlgan muddatda Jamgʻarma kengashi tomonidan koʻrib chiqiladi va mablagʻlardan foydalanishning ustuvor yoʻnalishlari belgilanadi hamda uning asosida mablagʻlar ajratish toʻgʻrisida qaror qabul qilinadi.

15. Daromadlar va xarajatlar smetalari belgilangan tartibda Oʻzbekiston Respublikasi Moliya vazirligida tuziladi, tasdiqlanadi va roʻyxatdan oʻtkaziladi.

16. Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasining boshligʻi Jamgʻarma mablagʻlarining tasdiqlangan smetaga muvofiq tasarruf etuvchisi hisoblanadi.

17. Jamgʻarmaning hisobot yilida foydalanilmagan mablagʻlari olib qoʻyilmaydi va keyinchalik ushbu nizomda nazarda tutilgan tartibda foydalanish uchun Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasining gʻaznachilik shaxsiy hisob raqamida saqlanadi.

18. Jamgʻarma mablagʻlaridan oqilona va maqsadli foydalanilishini nazorat qilish qonun hujjatlarida belgilangan tartibda amalga oshiriladi.

19. Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasining boshligʻi, bosh buxgalteri buxgalteriya hisobining toʻgʻri yuritilishi, Jamgʻarmaga mablagʻlar tushishi va ulardan foydalanilishi toʻgʻrisidagi hisobotlarni tuzish va taqdim etish yuzasidan javob beradi.

20. Oʻrmon xoʻjaliklari, oʻrmon-ov xoʻjaliklari, yuridik shaxs maqomiga ega boʻlgan muhofaza qilinadigan tabiiy hududlar va boshqa Jamgʻarma mablagʻlarining boshqa oluvchilari olingan mablagʻlardan foydalanganlik toʻgʻrisida qonun hujjatlarida belgilangan tartibda Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasiga hisobot taqdim etadilar.

21. Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi Jamgʻarma daromadlari va xarajatlari toʻgʻrisida har chorakda, hisobot davri tugagandan soʻng 25 kundan kechiktirmay, yillik hisobotlarni esa — hisobot yildan keyingi yilning 20-fevralidan kechiktirmay Oʻzbekiston Respublikasi Moliya vazirligiga taqdim etadi.

22. Ushbu Nizom talablarining buzilishida aybdor boʻlgan shaxslar qonun hujjatlarida belgilangan tartibda javob beradilar.

1. Vazirlar Mahkamasining “Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi tuzilmasini takomillashtirish toʻgʻrisida” 2005-yil 10-avgustdagi 191-son qarori (Oʻzbekiston Respublikasi qonun hujjatlari toʻplami, 2005-y., 32-33-son, 247-modda) 1-bandining toʻrtinchi xatboshi quyidagi tahrirda bayon qilinsin:

“Oʻrmon xoʻjaligi bosh boshqarmasi markaziy apparati xodimlarining umumiy cheklangan soni Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasi tizimining umumiy belgilangan soni doirasida 41 nafar, shu jumladan boshqaruv xodimlari 31 nafar etib belgilansin”.

2. Vazirlar Mahkamasining 2014-yil 20-oktabrdagi 290-son qarori (Oʻzbekiston Respublikasi QT, 2014-y., 10-son, 108-modda) bilan tasdiqlangan Hayvonot va oʻsimlik dunyosi obyektlaridan foydalanganlik uchun toʻlov sifatida tushgan mablagʻlarni, jarima summalari va tabiatni muhofaza qilish toʻgʻrisidagi qonun hujjatlarini buzganlardan yetkazilgan zarar uchun undirilgan summalarni taqsimlash tartibi toʻgʻrisidagi nizomning 2-bandidagi va 5-bandning beshinchi xatboshidagi “hisob raqamiga” soʻzlari “gʻaznachilik shaxsiy hisob raqamiga” soʻzlari bilan almashtirilsin.

3. Vazirlar Mahkamasining 2015-yil 30-sentabrdagi 278-son qarori (Oʻzbekiston Respublikasi QT, 2015-y., 9-son, 86-modda) bilan tasdiqlangan Oʻrmondan foydalanganlik uchun toʻlovlar miqdorini va ularni undirishni tartibga solish toʻgʻrisida nizomning 6-bandi quyidagi tahrirda bayon qilinsin:

“6. Ushbu Nnizomning 4-bandida koʻrsatilgan oʻrmondan foydalanish turlari uchun toʻlovlar summasining 50 foizi Oʻzbekiston Respublikasi Qishloq va suv xoʻjaligi vazirligi huzuridagi Oʻrmon xoʻjaligi bosh boshqarmasining Oʻrmon xoʻjaligini rivojlantirish jamgʻarmasiga, qolgan 50 foizi oʻrmondan doimiy foydalanuvchilarning hisob raqamiga tushadi va oʻrmondan doimiy foydalanuvchilarning daromadi hisoblanadi. Agar oʻrmondan doimiy foydalanuvchilar budjet tashkilotlari boʻlgan taqdirda, oʻrmondan foydalanishning koʻrsatib oʻtilgan turlari uchun toʻlovlar summasining 50 foizi ularning budjet tashkilotlarini rivojlantirish jamgʻarmalariga tushadi”.