Fuqarolarning davlat pensiya taʼminoti tizimini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda ular tomonidan qabul qilingan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — moliya vaziri R.S. Azimov zimmasiga yuklansin.

1. Vazirlar Mahkamasining 2010-yil 19-fevraldagi 30-son qarori (Oʻzbekiston Respublikasi QT, 2010-y., 2-son, 11-modda) bilan tasdiqlangan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi toʻgʻrisidagi nizomda:

a) 5-bandning oltinchi xatboshiga “respublika budjeti” soʻzlaridan oldin “Oʻzbekiston Respublikasi” soʻzlari qoʻshilsin;

b) 7-bandning beshinchi xatboshi quyidagi tahrirda bayon qilinsin:

“boquvchisini yoʻqotgan taqdirda, shuningdek mehnatda mayib boʻlganlik yoki xodim mehnat majburiyatlarini bajarishi bilan bogʻliq kasb kasalligi oqibatidagi nogironlik tufayli tayinlangan pensiyalarga toʻlangan mablagʻlarni daʼvolar boʻyicha aybdor yuridik va jismoniy shaxslardan belgilangan tartibda undirib olishni tashkil etish”;

v) 8-bandda:

“a” kichik bandning beshinchi xatboshi quyidagi tahrirda bayon qilinsin:

“boquvchisini yoʻqotgan taqdirda, shuningdek mehnatda mayib boʻlganlik yoki xodim mehnat majburiyatlarini bajarishi bilan bogʻliq kasb kasalligi oqibatidagi nogironlik tufayli tayinlangan pensiyalarga sarflangan mablagʻlarni “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq aybdor yuridik va jismoniy shaxslardan regress daʼvolar boʻyicha belgilangan tartibda undirib oladi”;

“g” kichik bandining oltinchi xatboshi quyidagi tahrirda bayon qilinsin:

“OʻZBEKISTON POCNTASI” AJ va tijorat banklarida pensiyalar, ijtimoiy nafaqalar, kompensatsiya toʻlovlari hamda boshqa toʻlovlarning oʻz vaqtida toʻlanishi monitoringini olib boradi”;

g) 10-bandning “b” kichik bandida:

ikkinchi xatboshi quyidagi tahrirda bayon qilinsin:

“boquvchisini yoʻqotgan taqdirda, shuningdek mehnatda mayib boʻlganlik yoki xodim mehnat majburiyatlarini bajarishi bilan bogʻliq kasb kasalligi oqibatidagi nogironlik tufayli tayinlangan pensiyalarni toʻlashga xarajatlarni toʻlash uchun regressiv talablar (daʼvolar) boʻyicha ish beruvchilar va fuqarolardan “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq undiriladigan mablagʻlarning 85 foizi”;

beshinchi xatboshi quyidagi tahrirda bayon qilinsin:

“dehqon xoʻjaliklari aʼzolari tomonidan qonun hujjatlarida belgilangan tartibda toʻlanadigan sugʻurta badallari”;

sakkizinchi xatboshiga “Davlat budjeti” soʻzlaridan oldin “Oʻzbekiston Respublikasi” soʻzlari qoʻshilsin;

d) 34-bandning ikkinchi xatboshi quyidagi tahrirda bayon qilinsin:

boquvchisini yoʻqotgan taqdirda, shuningdek mehnatda mayib boʻlganlik yoki xodim mehnat majburiyatlarini bajarishi bilan bogʻliq kasb kasalligi oqibatidagi nogironlik tufayli tayinlangan pensiyalarni toʻlashga xarajatlarni toʻlash uchun regressiv talablar (daʼvolar) boʻyicha ish beruvchilar va fuqarolardan “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq undiriladigan mablagʻlarning 15 foizi”.

2. Vazirlar Mahkamasining 2011-yil 1-iyuldagi 195-son qarori (Oʻzbekiston Respublikasi QT, 7-son, 60-modda) bilan tasdiqlangan Fuqarolarni tibbiy-mehnat ekspert komissiyalarida tibbiy koʻrikdan oʻtkazish tartibi toʻgʻrisidagi nizom 6-bandining ikkinchi xatboshiga quyidagi mazmundagi jumla qoʻshilsin:

“16 yoshgacha boʻlgan nogiron bolalarni tibbiy-mehnat ekspert komissiyalarida tibbiy koʻrikdan oʻtkazish qoidalari Oʻzbekiston Respublikasi Moliya vazirligi va Sogʻliqni saqlash vazirligi tomonidan belgilanadi”.

3. Vazirlar Mahkamasining 2011-yil 8-sentabrdagi 252-son qarori (Oʻzbekiston Respublikasi QT, 2011-y., 9-son, 75-modda) bilan tasdiqlangan Davlat pensiyalarini tayinlash va toʻlash tartibi toʻgʻrisidagi nizomda:

a) quyidagi mazmundagi 38¹-band qoʻshilsin:

“38¹. Qonun 12-moddasining “a” bandiga muvofiq urush nogironlariga va ularga tenglashtirilgan shaxslarga pensiya tayinlashda pensiya tayinlash uchun zarur boʻlgan talab etiladigan ish staji Qonunning 7-moddasiga muvofiq aniqlanadi”;

b) 80-bandga quyidagi mazmundagi jumla qoʻshilsin:

“Boshqa barcha hollarda hujjatlarning taalluqliligi sud tomonidan belgilanishi shart”;

v) 122-bandning oltinchi xatboshidagi “boquvchisining vafotidan keyin tugʻilgan bolaga” soʻzlari “(shu jumladan boquvchisining vafotidan keyin tugʻilgan bolaga)” soʻzlari bilan almashtirilsin.

4. Vazirlar Mahkamasining 2014-yil 23-dekabrdagi 357-son qarori (Oʻzbekiston Respublikasi Qonun hujjatlari toʻplami, 2014-y., 52-son, 622-modda) bilan tasdiqlangan “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq pensiyalarni toʻlashga xarajatlarni qoplash tartibi toʻgʻrisidagi nizomda:

a) 10-band quyidagi tahrirda bayon qilinsin:

“10. Tashkilotlar xodim Qonunning 7-moddasida nazarda tutilgan pensiya yoshiga yetguniga qadar Qonunning 12-moddasi “b” kichik bandiga muvofiq tayinlangan, biroq ushbu nizomning 11-bandiga muvofiq belgilanadigan uning eng kam miqdoridan kam boʻlmagan pensiyalarni toʻlashga oʻtgan yil uchun Pensiya jamgʻarmasining amaldagi xarajatlarini har yili 1-fevralgacha toʻliq qoplaydilar.

Koʻrsatib oʻtilgan xarajatlarni qoplash tashkilot soliq hisobiga qoʻyilgan joydagi davlat soliq xizmati organlarining xizmat koʻrsatuvchi banklarida ochilgan Pensiya jamgʻarmasining tegishli daromadlar tranzit hisob raqamlariga oʻtkaziladi”;

b) 12 va 13-bandlar quyidagi tahrirda bayon qilinsin:

“12. Pensiya jamgʻarmasining pensioner hisobda turgan joydagi tuman (shahar) boʻlimlari har yili 15-yanvarga qadar Qonunning 12-moddasi “b” bandiga muvofiq imtiyozli shartlarda yoshga doir pensiya oluvchilar — 60 yoshgacha erkaklar va 55 yoshgacha ayollar roʻyxatini oldingi yil uchun amalga oshirilgan xarajatlar miqdorini va tashkilotlar nomini va soliq toʻlovchining identifikatsiya raqamini koʻrsatgan holda tashkilot boshqa mintaqada joylashgan taqdirda — Pensiya jamgʻarmasining tashkilot soliq hisobiga qoʻyilgan joydagi hududiy boshqarmasiga va tuman (shahar) boʻlimiga yetkazadilar.

Pensiya jamgʻarmasining tashkilot soliq hisobiga qoʻyilgan joydagi hududiy boshqarmasi va tuman (shahar) boʻlimi koʻrsatib oʻtilgan pensiyalarni toʻlashga oldingi yil uchun Pensiya jamgʻarmasining amaldagi xarajatlari toʻgʻrisidagi maʼlumotlarning, shu jumladan Pensiya jamgʻarmasining pensionerlarni hisobga olish joyidagi hududiy boshqarmalaridan va tuman (shahar) boʻlimlaridan olingan maʼlumotlarni hisobga olgan holda umumiy toʻplamini chiqaradi va 20-yanvargacha uni tegishli tashkilotga yetkazadi.

Tashkilot tegishli maʼlumotlar olingan kundan boshlab oʻn kun muddatda koʻrsatib oʻtilgan pensiyalarni toʻlashga oldingi yil uchun Pensiya jamgʻarmasining amaldagi xarajatlarini solishtirib chiqishi shart.

13. Pensiya jamgʻarmasining tashkilot soliq hisobiga qoʻyilgan joydagi hududiy boshqarmasi va tuman (shahar) boʻlimi har yili 1-fevralgacha har bir tashkilot boʻyicha (soliq toʻlovchining identifikatsiya raqami koʻrsatilgan holda) xodim Qonunning 7-moddasida nazarda tutilgan pensiya yoshiga yetkuniga qadar Qonunning 12-moddasi “b” bandiga muvofiq tayinlangan pensiyalarni toʻlash uchun oldingi yil uchun Pensiya jamgʻarmasining amaldagi xarajatlari toʻgʻrisidagi maʼlumotlarning umumiy toʻplamini ushbu tashkilotlardan undirish uchun tashkilot soliq hisobiga qoʻyilgan joyidagi davlat soliq xizmati organiga yetkazadi.

Pensiya jamgʻarmasining tashkilot soliq hisobiga qoʻyilgan joydagi hududiy boshqarmalari va tuman (shahar) boʻlimlari qonun hujjatlariga muvofiq ushbu Nizomning 10-bandida koʻrsatilgan mablagʻlarni, ular tashkilotlar tomonidan oʻz vaqtida toʻlanmagan taqdirda, regress daʼvolar boʻyicha tashkilotlardan undirib olishi mumkin”;

v) 19-bandga quyidagi mazmundagi xatboshi qoʻshilsin:

“Oʻzbekiston Respublikasi Mehnat vazirligi mehnat shart-sharoitlari va asbob-uskunalarning jarohat yetkazish xavfi boʻyicha ish oʻrinlarini attestatsiyadan oʻtkazish natijalarining davlat ekspertizasi asosida tegishli tashkilotlar hisobi yuritilishini taʼminlaydi va shu jumladan axborot-kommunikatsiya texnologiyalaridan foydalanilgan holda axborot ayirboshlash boʻyicha Pensiya jamgʻarmasi bilan oʻzaro hamkorlik qiladi”;

g) quyidagi mazmundagi 19¹-band qoʻshilsin:

“19¹. Tugatilayotgan tashkilotning mol-mulki yetishmaganligi tufayli qondirilmagan qarzdorligi summasi umidsiz soliq qarzdorligini hisobdan chiqarish uchun nazarda tutilgan tartibda hisobdan chiqarilishi kerak.

Bunda ushbu tashkilot boʻyicha xarajatlarni qoplash summasini bundan keyin hisoblash umidsiz qarzdorlik hisobdan chiqarilgan sanadan boshlab toʻxtatiladi”.