Oʻzbekiston Respublikasi Davlat budjetining 2003-yil birinchi yarim yilligidagi ijrosi toʻgʻrisidagi hisobotni koʻrib chiqib, Oʻzbekiston Respublikasi Oliy Majlisi qaror qiladi:

1. Oʻzbekiston Respublikasi Davlat budjetining 2003-yil birinchi yarim yilligidagi ijrosi toʻgʻrisidagi hisobot tasdiqlansin.

Taʼkidlab oʻtilsinki, 2003-yilning birinchi yarim yilligida Davlat budjetining daromadlari uning xarajatlaridan 17,7 milliard soʻm miqdorida ortiq boʻlishiga erishildi yoki Davlat budjeti yalpi-ichki mahsulotga nisbatan 0,5 foiz miqdorida profitsit bilan ijro etildi.

2. Oʻzbekiston Respublikasi Hukumati (Oʻ. Sultonov):

budjetning birinchi navbatdagi xarajatlarini, aholining ijtimoiy himoyaga muhtoj qatlamlarini muhofaza qilish tadbirlarini, investitsiyalash dasturini va boshqa tadbirlarni ana shu maqsadlar uchun Markaziy bank kreditlarini jalb etmasdan, Davlat budjeti taqchilligi tasdiqlangan miqdorining qatʼiy doirasida toʻliq va oʻz vaqtida moliyalashtirish;

kichik va oʻrta biznesni, xususiy tadbirkorlikni rivojlantirishning qoʻshimcha omillarini yaratish va ishga solish, kichik va oʻrta biznes hamda xususiy tadbirkorlikning yalpi ichki mahsulotni ishlab chiqarishdagi ulushini oshirish, valyuta bozorini yanada erkinlashtirish, qishloqda ishlab chiqarish munosabatlarini takomillashtirish va fermer xoʻjaliklarini rivojlantirish, ishlab chiqarishlarni toʻgʻridan toʻgʻri tashqi va ichki investitsiyalarni jalb etish hisobiga yanada, zamonaviylashtirish va yangilash, ichki bozorni mamlakatimizda ishlab chiqarilgan raqobatbardosh mahsulot bilan toʻldirish yuzasidan aniq chora-tadbirlar koʻrsin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining eʼtibori tegishli mintaqalar boʻyicha budjet daromadlari koʻrsatkichlarining soʻzsiz bajarilishini, mintaqalarning soliq bazasi va moliyaviy salohiyatini kengaytirish yuzasidan amaliy choralar koʻrish va shu asosda mahalliy budjetlarning xarajatlari toʻliq moliyalashtirilishini taʼminlash zarurligiga qaratilsin.