Oʻzbekiston Respublikasi Oliy Majlisi Senati Kengashining 2005-yil 21-iyuldagi 10-sonli Qarori bilan tasdiqlangan Oʻzbekiston Respublikasi Oliy Majlisi Senatining faoliyatida umumdavlat manfaatlari bilan mintaqaviy manfaatlar mutanosibligini taʼminlashga qaratilgan chora-tadbirlarni amalga oshirish Dasturining 6-bandini bajarish maqsadida Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi Oliy Majlisi Senati qoʻmitalarining xalq deputatlari mahalliy Kengashlari doimiy komissiyalari va ijro etuvchi hokimiyat organlari bilan hamkorligi quyidagi yoʻllar bilan amalga oshiriladi:

xalq deputatlari mahalliy Kengashlari doimiy komissiyalari va ijro etuvchi hokimiyat organlari vakillarini Oʻzbekiston Respublikasi Oliy Majlisi Senati qoʻmitalarining nazorat vakolatlarini amalga oshirish uchun shakllantirilgan ishchi guruhlar tarkibiga kiritish;

Oʻzbekiston Respublikasi qonunlari, Oʻzbekiston Respublikasi Oliy Majlisi Senatining qarorlari va Senat qoʻmitalarining qarorlari ijro etilishini oʻrganish natijalarini xalq deputatlari mahalliy Kengashlarining qoʻshma majlislari – “Birlashgan sessiya”larda koʻrib chiqish;

xalq deputatlari mahalliy Kengashlari faoliyatini takomillashtirishga qaratilgan tavsiyalarni tayyorlash va mintaqalar bilan funksional aloqalarni rivojlantirish boʻyicha takliflar ishlab chiqish;

Oʻzbekiston Respublikasi Oliy Majlisi Senati qoʻmitalarining majlislarida mintaqalarni rivojlantirish masalalarini muhokama qilish, zarur hollarda esa bu masalalarni Oʻzbekiston Respublikasi Oliy Majlisi Senatining yalpi majlislari muhokamasiga kiritish;

xalq deputatlari mahalliy Kengashlarini Oʻzbekiston Respublikasi Oliy Majlisi Senatining yalpi majlislarida koʻriladigan masalalar haqida muntazam xabardor etib turish.

2. Qoraqalpogʻiston Respublikasi Joʻqorgʻi Kengesiga, xalq deputatlari viloyat va Toshkent shahar Kengashlariga mintaqalardagi mavjud dolzarb muammolarni aniqlash va muhokama qilish sohasidagi ishlarni kuchaytirib, bu muammolarni Oʻzbekiston Respublikasi Oliy Majlisi Senati tegishli qoʻmitalari majlislarida koʻrib chiqish haqida takliflar kiritish tavsiya etilsin.

3. Oʻzbekiston Respublikasi Oliy Majlisi Senatining xalq deputatlari mahalliy Kengashlari va ijro etuvchi hokimiyat organlari bilan hamkorligini taʼminlash maqsadida Senat qoʻmitalari tomonidan xalq deputatlari mahalliy Kengashlarining namunaviy reglamenti, xalq deputatlari mahalliy Kengashlarining doimiy komissiyalari toʻgʻrisidagi namunaviy nizom, Oʻzbekiston Respublikasi qonunlari, Senat (Senat Kengashi) va Senat qoʻmitalari qarorlarining davlat hokimiyati va boshqaruv organlari tomonidan ijro etilishini nazorat qilish tartibi toʻgʻrisidagi nizom, Oʻzbekiston Respublikasi Oliy Majlisi Senatining qoʻmitalari tomonidan konferensiyalar, davra suhbatlari va seminarlarni tashkil etish va oʻtkazish tartibi toʻgʻrisidagi nizom, Oʻzbekiston Respublikasi Oliy Majlisi Senati, Senat aʼzosi tomonidan parlament soʻrovini yuborish Tartibi ishlab chiqilganligi maʼlumot uchun qabul qilinsin.