Oʻzbekiston Respublikasi Oliy Majlisi Senati 2006-yil 25-fevralda qabul qilgan № 149-I-sonli Qarorning 3-bandini hamda Oʻzbekiston Respublikasi Prezidenti Islom Karimovning 2005-yilda mamlakatni ijtimoiy-iqtisodiy rivojlantirish yakunlari va 2006-yilda iqtisodiy islohotlarni chuqurlashtirishning eng muhim ustuvor yoʻnalishlariga bagʻishlangan Oʻzbekiston Respublikasi Vazirlar Mahkamasining 2006-yil 10-fevralda boʻlib oʻtgan yigʻilishidagi va Oʻzbekiston Respublikasi Oliy Majlisi Senatining 2006-yil 24-fevralda oʻtkazilgan beshinchi yalpi majlisidagi “Mamlakatimiz taraqqiyotining qonuniy asoslarini mustahkamlash – faoliyatimiz mezoni boʻlishi darkor” maʼruzalarining asosiy qoidalarini amalga oshirishga qaratilgan chora-tadbirlarni bajarishga oid Oʻzbekiston Respublikasi Oliy Majlisi Senatining Harakat dasturi 8.5-bandini ijro etish maqsadida, Oʻzbekiston Respublikasi Oliy Majlisi Senatining Agrar, suv xoʻjaligi masalalari va ekologiya qoʻmitasining 2005-yil va 2006-yilning birinchi yarmidagi faoliyati toʻgʻrisidagi hisobotini tinglab,

Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi Oliy Majlisi Senatining Agrar, suv xoʻjaligi masalalari va ekologiya qoʻmitasining 2005-yil va 2006-yilning birinchi yarmidagi faoliyati toʻgʻrisidagi hisoboti maʼlumot uchun qabul qilinsin.

2. Oʻzbekiston Respublikasi Prezidenti Islom Karimovning 2005-yilda mamlakatni ijtimoiy-iqtisodiy rivojlantirish yakunlari va 2006-yilda iqtisodiy islohotlarni chuqurlashtirishning eng muhim ustuvor yoʻnalishlariga bagʻishlangan Oʻzbekiston Respublikasi Vazirlar Mahkamasining 2006-yil 10-fevralda boʻlib oʻtgan yigʻilishidagi hamda Oʻzbekiston Respublikasi Oliy Majlisi Senatining 2006-yil 24-fevralda oʻtkazilgan beshinchi yalpi majlisidagi “Mamlakatimiz taraqqiyotining qonuniy asoslarini mustahkamlash – faoliyatimiz mezoni boʻlishi darkor” maʼruzalaridan kelib chiqadigan vazifalarni bajarish Oʻzbekiston Respublikasi Oliy Majlisi Senatining Agrar, suv xoʻjaligi masalalari va ekologiya qoʻmitasi faoliyatining ustuvor yoʻnalishlari qilib belgilansin.

Qoʻmitada mazkur vazifalarni amalga oshirish maqsadida:

mamlakatimizda, ayniqsa mintaqalarda ijtimoiy-iqtisodiy sohalarda amalga oshirilayotgan oʻzgarishlarning samarasini oshirish, shuningdek yurtimizdagi mavjud muammolar, jumladan, ishsizlik muammosini muhokama qilishda faolroq tashabbus koʻrsatilsin;

agrar siyosat, ekologiya va tabiatdan foydalanish sohasida qonunchilik bazasi takomillashtirilsin, bunda fermerlikni yanada rivojlantirishga, qishloq xoʻjaligini modernizatsiyalashni chuqurlashtirish va kengaytirishga, ushbu sohaga chet el investitsiyalarini bundan buyon ham jalb etish uchun zarur shart-sharoitlarni yaratishga alohida eʼtibor berilsin;

nazorat-tahlil faoliyatining samaradorligi va parlament nazoratining taʼsirchanligi oshirilsin;

qonunlar, shuningdek Qoʻmita qabul qilgan qarorlarning ijrosini monitoring qilishni kuchaytirib, davlat organlari va boshqa idoralar rahbarlarining Qoʻmita qarorlari bajarilishi uchun javobgarligini oshirish masalalariga koʻproq eʼtibor berilsin;

amalga oshiriladigan tadbirlarga puxta tayyorgarlik koʻrilsin, ularda ishtirok etish uchun muhokama qilinadigan masalalar yuzasidan amaliy takliflar berishga qodir boʻlgan olim va mutaxassislar, shuningdek keng jamoatchilik kengroq jalb etilsin;

ijtimoiy-iqtisodiy sohada amalga oshirilayotgan islohotlarning eng muhim natijalarini keng jamoatchilik orasida yanada chuqurroq tushuntirish maqsadida Qoʻmita aʼzolarining, ayniqsa joylarda ishlayotgan senatorlarning faoliyati kuchaytirilsin;

parlament quyi palatasining tegishli qoʻmitasi bilan munosabatlari takomillashtirilsin, oʻzaro hamkorligi kuchaytirilsin.

3. Ushbu qarorning ijrosini nazorat qilish Oʻzbekiston Respublikasi Oliy Majlisi Senatining Agrar, suv xoʻjaligi masalalari va ekologiya qoʻmitasi raisi Gʻ.Q. Aliyev zimmasiga yuklatilsin.