Ushbu Qonunning maqsadi terrorizmga qarshi kurash sohasidagi munosabatlarni tartibga solishdan iborat.

Ushbu Qonunning asosiy vazifalari shaxs, jamiyat va davlatning terrorizmdan xavfsizligini taʼminlash, davlatning suverenitetini va hududiy yaxlitligini himoya qilish, fuqarolar tinchligi va milliy totuvlikni saqlashdan iborat.

Ushbu Qonunda quyidagi asosiy tushunchalar qoʻllaniladi:

garovga ushlab turilgan shaxs — qoʻlga olingan yoki ushlab turilgan shaxsni ozod etish shartlari sifatida davlat hokimiyati va boshqaruv organlarini, xalqaro tashkilotlarni, shuningdek ayrim shaxslarni biron-bir harakat sodir etishga yoki bunday harakat sodir etishdan tiyilishga majbur qilish maqsadida terrorchilar tomonidan qoʻlga olingan yoki ushlab turilgan jismoniy shaxs;

terrorizm — siyosiy, diniy, mafkuraviy va boshqa maqsadlarga erishish uchun shaxsning hayoti, sogʻligʻiga xavf tugʻdiruvchi, mol-mulk va boshqa moddiy obyektlarning yoʻq qilinishi (shikastlantirilishi) xavfini keltirib chiqaruvchi hamda davlatni, xalqaro tashkilotni, jismoniy yoki yuridik shaxsni biron-bir harakatlar sodir etishga yoki sodir etishdan tiyilishga majbur qilishga, xalqaro munosabatlarni murakkablashtirishga, davlatning suverenitetini, hududiy yaxlitligini buzishga, xavfsizligiga putur yetkazishga, qurolli mojarolar chiqarishni koʻzlab igʻvogarliklar qilishga, aholini qoʻrqitishga, ijtimoiy-siyosiy vaziyatni beqarorlashtirishga qaratilgan, Oʻzbekiston Respublikasining Jinoyat kodeksida javobgarlik nazarda tutilgan zoʻrlik, zoʻrlik ishlatish bilan qoʻrqitish yoki boshqa jinoiy qilmishlar;

terrorchi — terrorchilik faoliyatini amalga oshirishda ishtirok etayotgan shaxs;

terrorchilik guruhi — oldindan til biriktirib terrorchilik harakatini sodir etgan, bunday harakatga tayyorgarlik koʻrgan yoki uni sodir etishga suiqasd qilgan shaxslar guruhi;

terrorchilik tashkiloti — ikki yoki undan ortiq shaxsning yoki terrorchilik guruhlarining terrorchilik faoliyatini amalga oshirish uchun barqaror birlashuvi;

terrorchilikka qarshi operatsiya — terrorchilik harakatiga chek qoʻyish va uning oqibatlarini minimallashtirish, shuningdek jismoniy shaxslarning xavfsizligini taʼminlash hamda terrorchilarni zararsizlantirishga qaratilgan, kelishilgan va oʻzaro bogʻliq maxsus tadbirlar majmui;

terrorchilikka qarshi operatsiya oʻtkaziladigan zona — joyning yoki akvatoriyaning alohida uchastkalari, havo boʻshligʻi, transport vositalari, binolar, imoratlar, inshootlar, xonalar hamda terrorchilikka qarshi operatsiya oʻtkaziladigan doiradagi ularga tutash hududlar;

terrorchilik faoliyati — terrorchilik harakatini uyushtirish, rejalashtirish, tayyorlash va amalga oshirishdan, terrorchilik harakatiga undashdan, terrorchilik tashkilotini tuzishdan, terrorchilarni yollash, tayyorlash va qurollantirishdan, ularni moliyalashtirish va moddiy-texnika jihatidan taʼminlashdan iborat boʻlgan faoliyat;

terrorchilik harakati — garovda ushlab turish uchun shaxslarni qoʻlga olish yoki ushlab turish, davlat yoki jamoat arbobining, aholining milliy, etnik, diniy, boshqa guruhlari, chet el davlatlari va xalqaro tashkilotlar vakillarining hayotiga tajovuz qilish, davlat yoki jamoat ahamiyatiga molik obyektlarni bosib olish, shikastlantirish, yoʻq qilish, portlatishlar, oʻt qoʻyishlar, portlatish qurilmalarini, radioaktiv, biologik, portlovchi, kimyoviy, boshqa zaharlovchi moddalarni ishlatish yoki ishlatish bilan qoʻrqitish, yer usti, suv va havo transporti vositalarini qoʻlga olish, olib qochish, shikastlantirish, yoʻq qilish, aholi gavjum joylarda va ommaviy tadbirlar oʻtkazilayotganda vahima koʻtarish va tartibsizliklar keltirib chiqarish, aholi hayotiga, sogʻligʻiga, jismoniy yoki yuridik shaxslar mol-mulkiga avariyalar, texnogen xususiyatli halokatlar sodir etish yoʻli bilan zarar yetkazish yoki xavf tugʻdirish, tahdidni har qanday vositalar va usullar bilan yoyish tarzida terrorchilik tusidagi jinoyatlarni, Oʻzbekiston Respublikasi qonun hujjatlarida va xalqaro huquqning umum eʼtirof etilgan normalarida belgilangan terrorchilik tusidagi boshqa harakatlarni sodir etish;

xalqaro terrorizm — bir davlat hududi doirasidan tashqariga chiqadigan terrorizm.

Terrorizmga qarshi kurash toʻgʻrisidagi qonun hujjatlari ushbu Qonun va boshqa qonun hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasining terrorizmga qarshi kurash toʻgʻrisidagi qonun hujjatlarida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Terrorizmga qarshi kurashning asosiy prinsiplari quyidagilardan iborat:

qonuniylik;

shaxs huquqlari, erkinliklari va qonuniy manfaatlarining ustuvorligi;

terrorizmning oldini olish choralari ustuvorligi;

jazoning muqarrarligi;

terrorizmga qarshi kurash oshkora va nooshkora usullarining uygʻunligi;

jalb etiladigan kuchlar va vositalar tomonidan terrorchilikka qarshi oʻtkaziladigan operatsiyaga rahbarlik qilishda yakkaboshchilik.

Terrorchilik faoliyatining oldini olish davlat organlari, fuqarolarning oʻzini oʻzi boshqarish organlari hamda jamoat birlashmalari, shuningdek korxonalar, muassasalar, tashkilotlar tomonidan siyosiy, ijtimoiy-iqtisodiy, huquqiy va boshqa profilaktik choralar majmuini oʻtkazish orqali amalga oshiriladi.

Quyidagilar taqiqlanadi:

terrorizmni targʻib qilish;

terrorchilik guruhlari va tashkilotlarini tuzish hamda ularning faoliyat koʻrsatishi;

terrorchilik faoliyatiga daxldor yuridik shaxslarni, ularning boʻlinmalari (filiallari) va vakolatxonalarini (shu jumladan chet el va xalqaro tashkilotlarning vakolatxonalarini) akkreditatsiya qilish, roʻyxatdan oʻtkazish va ularning faoliyat koʻrsatishi;

terrorchilik faoliyatiga daxldor chet el fuqarolari hamda fuqaroligi boʻlmagan shaxslarning Oʻzbekiston Respublikasiga kirishi;

tayyorlanayotgan yoki sodir etilgan terrorchilik harakatlariga oid maʼlumotlar va faktlarni yashirish.

Davlat boshqaruv organlari, mahalliy davlat hokimiyati organlari, fuqarolarning oʻzini oʻzi boshqarish organlari, jamoat birlashmalari, korxonalar, muassasalar va tashkilotlar, mansabdor shaxslar, shuningdek fuqarolar terrorizmga qarshi kurashni amalga oshiruvchi davlat organlariga koʻmaklashadilar va zarur yordam beradilar.

Terrorizmga qarshi kurash sohasida Oʻzbekiston Respublikasining chet el davlatlari bilan, ularning huquqni muhofaza qiluvchi organlari, maxsus xizmatlari hamda xalqaro tashkilotlar bilan hamkorligi Oʻzbekiston Respublikasining xalqaro shartnomalariga muvofiq amalga oshiriladi.

Terrorizmga qarshi kurashni amalga oshiruvchi davlat organlari quyidagilardan iborat:

Oʻzbekiston Respublikasi Milliy xavfsizlik xizmati;

Oʻzbekiston Respublikasi Ichki ishlar vazirligi;

Oʻzbekiston Respublikasi Davlat bojxona qoʻmitasi;

Oʻzbekiston Respublikasi Mudofaa vazirligi;

Oʻzbekiston Respublikasi Favqulodda vaziyatlar vazirligi;

Terrorizmga qarshi kurashda ishtirok etayotgan davlat organlarining faoliyatini muvofiqlashtirish hamda terrorchilik faoliyatining oldini olish, uni aniqlash, unga chek qoʻyish va uning oqibatlarini minimallashtirish borasida hamkorlikda harakat qilishlarini taʼminlash Oʻzbekiston Respublikasi Milliy xavfsizlik xizmati tomonidan amalga oshiriladi.

Oʻzbekiston Respublikasi Milliy xavfsizlik xizmati:

terrorchilik faoliyatining oldini olish, uni aniqlash va unga chek qoʻyish yoʻli bilan terrorizmga, shu jumladan xalqaro terrorizmga qarshi kurashni amalga oshiradi;

terrorchilar, terrorchilik guruhlari va terrorchilik tashkilotlari faoliyati toʻgʻrisidagi axborotlarni toʻplaydi hamda tahlil qiladi, ulardan kelib chiqayotgan tahdidning milliy xavfsizlikka qay darajada xavfli ekanligini baholaydi, tegishli vazirliklar, davlat qoʻmitalari va idoralarga zarur axborotlar taqdim etadi;

terrorchilarning Oʻzbekiston Respublikasi hududiga kirishidan Davlat chegarasining himoya qilinishi va qoʻriqlanishini taʼminlaydi;

Oʻzbekiston Respublikasi Davlat chegarasi orqali qurol, oʻq-dorilar, portlovchi, radioaktiv, biologik, shuningdek kimyoviy yoki boshqa zaharlovchi moddalarning, terrorchilik harakatini sodir etish maqsadida ishlatilishi mumkin boʻlgan predmet yoki materiallarning noqonuniy olib oʻtilishi oldini olish, uni aniqlash va unga chek qoʻyish choralarini koʻradi;

chegara oldi mintaqasida va chegara oldi zonasida terrorchilarni, terrorchilik guruhlarini aniqlaydi, zararsizlantiradi, qarshilik koʻrsatilgan taqdirda esa ularni yoʻq qilish choralarini koʻradi;

Oʻzbekiston Respublikasining alohida muhim va kategoriyalangan obyektlarini, shuningdek Oʻzbekiston Respublikasi hududidan tashqarida joylashgan davlat muassasalarini, ushbu muassasalarning xodimlari hamda ularning oila aʼzolarini himoya qilishni taʼminlaydi;

Oʻzbekiston Respublikasi Prezidentining, shuningdek chet el davlatlari, hukumatlari boshliqlari va xalqaro tashkilotlar rahbarlari Oʻzbekiston Respublikasi hududida boʻlgan davrda mazkur davlat (hukumat) boshliqlari va xalqaro tashkilot rahbarlarining xavfsizligi hamda qoʻriqlanishini taʼminlaydi;

xalqaro terrorizmga qarshi kurash sohasida chet el davlatlarining tegishli organlari va xalqaro tashkilotlar bilan hamkorlik qiladi;

terrorchilikka qarshi kurashuvchi boʻlinmalarning terrorchilarni, terrorchilik guruhlarini aniqlash, zararsizlantirish va yoʻq qilish hamda terrorchilik tashkilotlarini tugatish ishlari tashkil etilishini taʼminlaydi;

qonun hujjatlariga muvofiq boshqa vakolatlarni amalga oshiradi.

Oʻzbekiston Respublikasi Ichki ishlar vazirligi:

terrorchilik faoliyatining oldini olish, uni aniqlash, unga chek qoʻyish hamda uning oqibatlarini minimallashtirish yoʻli bilan terrorizmga qarshi kurashni amalga oshiradi;

alohida muhim, kategoriyalangan va boshqa obyektlarning qoʻriqlanishini va xavfsizligini taʼminlaydi;

davlat hokimiyati va boshqaruvning tegishli organlariga terrorchilik faoliyatiga aloqador shaxslar, guruhlar va tashkilotlar toʻgʻrisida axborot taqdim etadi;

qonun hujjatlariga muvofiq boshqa vakolatlarni amalga oshiradi.

Oʻzbekiston Respublikasi Davlat bojxona qoʻmitasi:

Oʻzbekiston Respublikasi Davlat chegarasi orqali oʻtkazish punktlarida giyohvandlik vositalari, psixotrop va portlovchi moddalar, portlatish qurilmalari, qurol-yarogʻlar, qurollar va oʻq-dorilar, yadroviy, biologik, kimyoviy yoki boshqa turdagi yalpi qirgʻin qurollari, terrorchilik harakatlarida ishlatilishi mumkin boʻlgan materiallar va asbob-uskunalarni noqonuniy olib oʻtishga urinishlarning oldini olish, aniqlash va ularga chek qoʻyish choralarini koʻradi;

qonun hujjatlariga muvofiq boshqa vakolatlarni amalga oshiradi.

Oʻzbekiston Respublikasi Mudofaa vazirligi:

Oʻzbekiston Respublikasining havo boʻshligʻi xavfsizligini, mamlakat maʼmuriy, sanoat-iqtisodiy markazlari va hududlari, muhim harbiy va boshqa obyektlarning havodan beriladigan zarbadan himoya qilinishi va qoʻriqlanishini taʼminlaydi;

oʻz tasarrufidagi harbiy obyektlarning qoʻriqlanishi va mudofaa qilinishini amalga oshiradi;

terrorchilikka qarshi operatsiyalarda ishtirok etadi;

qonun hujjatlariga muvofiq boshqa vakolatlarni amalga oshiradi.

Oʻzbekiston Respublikasi Favqulodda vaziyatlar vazirligi:

favqulodda vaziyatlardan aholini himoya qilish, terrorchilar harakat qilayotgan zonada joylashgan alohida muhim, kategoriyalangan va boshqa obyektlar barqaror ishlashini, shuningdek terrorchilik harakatlari oqibatlarini tugatish yuzasidan vazirliklar, davlat qoʻmitalari, idoralar va mahalliy davlat hokimiyati organlarining faoliyatini muvofiqlashtiradi hamda tadbirlar oʻtkazadi;

qonun hujjatlariga muvofiq boshqa vakolatlarni amalga oshiradi.

Terrorchilik harakatiga chek qoʻyish uchun qonun hujjatlariga muvofiq zarur choralar qoʻllaniladi, shu jumladan terrorchilikka qarshi operatsiyalar oʻtkaziladi.

Terrorchilikka qarshi operatsiyaga rahbarlik qilish va uni boshqarish har bir muayyan holatda terrorchilik harakati tahdidi va xavfining koʻlamlarini inobatga olgan holda belgilanadi hamda mudofaa va xavfsizlikni taʼminlovchi tegishli tuzilmalar zimmasiga yuklanadi.

Terrorizm tahdidini zararsizlantirish va tugatish uchun jalb etiladigan tuzilmalar va boʻlinmalarning saʼy-harakatlarini muvofiqlashtirish boʻyicha zaruratga qarab shtablar tuziladi.

Terrorchilik harakatining xususiyatiga qarab jismoniy shaxslar hayoti va sogʻligʻini, moddiy boyliklarni saqlash, garovda ushlab turilgan shaxslarni ozod etish, shuningdek kuch ishlatmasdan terrorchilik harakatiga chek qoʻyish imkoniyatini oʻrganish maqsadida terrorchilar bilan muzokaralar oʻtkazilishi mumkin.

Terrorchilikka qarshi operatsiya oʻtkazish rahbari tomonidan maxsus vakolat berilgan shaxslar terrorchilar bilan muzokaralar olib borishiga ruxsat etiladi.

Terrorchilar bilan muzokaralar olib borilishi ularni sodir etgan jinoiy qilmishlari uchun javobgarlikdan ozod etishning asosi yoki sharti boʻlib xizmat qilishi mumkin emas.

Agar terrorchilar bilan muzokaralar oʻtkazish natijasida ular terrorchilik harakatini toʻxtatishga rozi emasligi sababli muzokaralardan koʻzlangan maqsadga erishish mumkin boʻlmasa hamda jismoniy shaxslar hayoti va sogʻligʻiga aniq tahdid saqlanib turgan boʻlsa, terrorchilarni zararsizlantirish va yoʻq qilish yuzasidan zarur choralar koʻriladi.

Terrorchilikka qarshi operatsiya oʻtkaziladigan zonaning chegaralari terrorchilikka qarshi operatsiya oʻtkazish rahbarlari tomonidan joyning xususiyati va sharoitlarini, shuningdek terrorchilik harakatining koʻlamlari hamda ijtimoiy xavflilik darajasini hisobga olgan holda belgilanadi.

Terrorchilikka qarshi operatsiya oʻtkaziladigan zonada mazkur operatsiyani oʻtkazayotgan shaxslar quyidagi huquqlarga ega:

zarurat boʻlganda transport vositalari va yoʻlovchilarning koʻcha va yoʻllarda harakatlanishini vaqtinchalik cheklash yoki taqiqlash, transport vositalarini, shu jumladan diplomatiya vakolatxonalarining, konsullik muassasalarining va fuqarolarning transport vositalarini joyning ayrim uchastkalariga va obyektlarga kiritmaslik, fuqarolarni joyning ayrim uchastkalaridan va obyektlardan chiqarib yuborish, shuningdek maxsus ruxsatnomasi boʻlmagan transport vositalarini shatakka olib chiqarib tashlash choralarini koʻrish;

jismoniy shaxslarning shaxsni tasdiqlovchi hujjatlarini tekshirish, bunday hujjatlar boʻlmagan taqdirda esa ularning shaxsini aniqlash uchun ushlab turish;

huquqbuzarliklar sodir etgan yoki terrorchilikka qarshi operatsiya oʻtkazuvchi shaxslarning qonuniy talablariga toʻsqinlik qilishga qaratilgan, shuningdek terrorchilikka qarshi operatsiya oʻtkaziladigan zonaga ruxsatsiz kirish yoki kirishga urinish bilan bogʻliq harakatlar sodir etgan shaxslarni ushlash va tegishli organlarga olib borish;

agar kechiktirish jismoniy shaxslar hayoti va sogʻligʻini, jamiyat va davlat xavfsizligini tahdid ostiga qoʻyishi mumkin boʻlsa, terrorchilik harakatiga chek qoʻyish, uni sodir etganlikda gumon qilinayotgan shaxslarni taʼqib etish uchun korxonalar, muassasalar va tashkilotlar hududiga hamda xonalariga, turar joy va boshqa joylarga, yer uchastkalariga, transport vositalariga sutkaning istalgan vaqtida moneliksiz kirish (oshib tushish);

terrorchilikka qarshi operatsiya oʻtkazilayotgan zonaga kirayotgan (transport bilan kirishda) hamda mazkur zonadan chiqayotgan (transport bilan chiqishda) jismoniy shaxslarni shaxsan koʻrikdan oʻtkazish, ulardagi ashyolarni, transport vositalarini hamda bu vositalarda olib oʻtilayotgan yuklarni, shu jumladan nazorat qilishning texnik va boshqa vositalaridan foydalangan holda koʻrikdan oʻtkazish;

jismoniy yoki yuridik shaxslarga tegishli boʻlgan aloqa vositalaridan, shu jumladan maxsus aloqa vositalaridan, shuningdek transport vositalaridan (chet el davlatlari diplomatiya vakolatxonalari hamda boshqa muassasalarining, xalqaro tashkilotlarning aloqa va transport vositalaridan tashqari) terrorchilik harakatining oldini olish, terrorchilik harakatini sodir etgan yoki sodir etishda gumon qilinayotgan shaxslarni taʼqib qilish va ushlash, hodisa roʻy bergan joyga yetib borish, tez tibbiy yordamga muhtoj boʻlgan shaxslarni davolash muassasalariga olib borish uchun xizmat maqsadlarida foydalanish;

terrorchilarga nisbatan qurol va jangovar texnikaning mavjud turlarini hamda maxsus vositalarini qoʻllash.

Terrorchilikka qarshi operatsiya oʻtkazilayotgan zonada ommaviy axborot vositalari vakillarining faoliyati joylardagi terrorchilikka qarshi operatsiya oʻtkazish rahbarlari bilan hamkorlikda amalga oshiriladi.

Quyidagi axborotlar tarqatilishiga yoʻl qoʻyilmaydi:

terrorchilikka qarshi operatsiya oʻtkazishning maxsus texnikaviy usullarini hamda taktikasini ochib beradigan;

terrorchilikka qarshi operatsiya oʻtkazilishini qiyinlashtirib qoʻyadigan, jismoniy shaxslar hayoti va sogʻligʻiga xavfni keltirib chiqaradigan;

terrorchilikni targʻib qilishga yoki oqlashga koʻmaklashadigan;

terrorchilikka qarshi operatsiya oʻtkazilayotganda boʻlinmalarning xodimlari toʻgʻrisidagi, shuningdek uni oʻtkazishga koʻmaklashayotgan shaxslar toʻgʻrisidagi.

Terrorchilik harakatiga chek qoʻyilgan (tugatilgan) hamda terrorchilikka qarshi operatsiya oʻtkaziladigan zonadagi jismoniy shaxslar hayoti va sogʻligʻiga boʻlgan xavf bartaraf etilgan taqdirda terrorchilikka qarshi operatsiya tugallangan hisoblanadi.

Terrorchilik harakati oqibatida yetkazilgan zararni qoplash qonun hujjatlarida belgilangan tartibda amalga oshiriladi.

Terrorchilikka qarshi operatsiya oʻtkazish natijasida shaxsga yoxud jismoniy yoki yuridik shaxslarning mol-mulkiga yetkazilgan zarar qonun hujjatlarida belgilangan tartibda qoplanadi.

Shaxsga uning terrorchilik harakatidagi ishtirokiga chek qoʻyilishi munosabati bilan yetkazilgan zarar qoplanmaydi.

Terrorchilik harakati oqibatida jabrlangan shaxslarning ijtimoiy reabilitatsiyasi ularni normal hayotiy faoliyatga qaytarish maqsadida oʻtkaziladi hamda mazkur shaxslarga huquqiy yordam berishdan, ularning ruhiy, tibbiy, kasbiy reabilitatsiyasidan, ularni ishga joylashtirishdan, zarur hollarda ularga obod turar joy va qonun hujjatlarida nazarda tutilgan boshqa yordam berishdan iborat boʻladi.

Terrorchilik harakati oqibatida jabrlangan shaxslarning ijtimoiy reabilitatsiyasini amalga oshirish tartibi Oʻzbekiston Respublikasi Vazirlar Mahkamasi tomonidan belgilanadi.

Terrorizmga qarshi kurashda ishtirok etayotgan shaxslar davlat himoyasidadir.

Quyidagilar huquqiy va ijtimoiy himoyalanishi lozim:

terrorizmga qarshi kurashda bevosita ishtirok etayotgan harbiy xizmatchilar, davlat organlarining xodimlari va mutaxassislari;

terrorchilik faoliyatining oldini olishda, uni aniqlashda, unga chek qoʻyishda, uni tergov qilishda hamda uning oqibatlarini minimallashtirishda terrorizmga qarshi kurashni amalga oshirayotgan davlat organlariga doimiy yoki vaqtincha koʻmaklashayotgan shaxslar;

ushbu qismning ikkinchi va uchinchi xatboshilarida koʻrsatib oʻtilgan shaxslarning oila aʼzolari, agar ularning himoyalanishini taʼminlash zarurati mazkur shaxslarning terrorizmga qarshi kurashdagi ishtirokiga bogʻliq boʻlsa.

Terrorizmga qarshi kurashda bevosita ishtirok etayotgan, terrorizmga qarshi kurashga koʻmaklashayotgan shaxslarga, shuningdek ularning oila aʼzolariga, basharti ularning hayoti va sogʻligʻiga tahdid yuzaga kelgan taqdirda, iltimoslariga koʻra ularning tashqi qiyofasi, familiyasi, ismi va otasining ismi, shuningdek ish va yashash joylari terrorizmga qarshi kurash organlari taʼminotiga ajratiladigan mablagʻlar hisobidan oʻzgartirilishi mumkin.

Terrorizmga qarshi kurashda ishtirok etgan shaxs terrorchilikka qarshi operatsiya oʻtkazishda halok boʻlgan taqdirda halok boʻlgan shaxsning oila aʼzolariga hamda uning qaramogʻidagi shaxslarga qonun hujjatlariga muvofiq bir yoʻla beriladigan nafaqa toʻlanadi hamda boquvchisini yoʻqotganlik pensiyasi tayinlanadi.

Terrorizmga qarshi kurashda ishtirok etgan shaxs terrorchilikka qarshi operatsiya oʻtkazishda mayib boʻlgan va bu uning mehnat layoqatini yoʻqotishiga hamda nogironlikka olib kelgan taqdirda unga bir yoʻla beriladigan nafaqa toʻlanadi hamda qonun hujjatlariga muvofiq nogironlik pensiyasi tayinlanadi.

Terrorizmga qarshi kurashda ishtirok etgan shaxs terrorchilikka qarshi operatsiya oʻtkazishda yarador boʻlgan taqdirda bu uning mehnat layoqatini yoʻqotishiga olib kelmasa, unga qonun hujjatlariga muvofiq bir yoʻla beriladigan nafaqa toʻlanadi.

Terrorizmga qarshi kurashni bevosita amalga oshirayotgan boʻlinmalarda xizmatni oʻtayotgan harbiy xizmatchilarga hamda davlat organlarining xodimlariga pensiya tayinlashda xizmatning bir kuni ikki kunga, terrorchilikka qarshi operatsiya oʻtkazishda ishtirok etgan davrda xizmatning bir kuni uch kunga hisoblanadi.

Terrorchilikka qarshi operatsiya oʻtkazishda ishtirok etishga jalb qilingan mutaxassislar va boshqa shaxslarga pensiya tayinlashda mazkur operatsiyada ishtirok etishning har bir kuni uch kunga hisoblanadi.

Koʻp yil ishlaganlikni imtiyozli hisoblash tartibi qonun hujjatlari bilan belgilanadi.

Terrorchilik faoliyatida ishtirok etayotgan shaxslar qonun hujjatlariga muvofiq javobgar boʻladi.

Shaxs terrorchilik faoliyatida ishtirok etishdan oʻz ixtiyori bilan qaytgan, bu haqda tegishli davlat organlariga xabar bergan hamda ogʻir oqibatlar yuzaga kelishining va terrorchilar maqsadlari amalga oshirilishining oldini olishga faol koʻmaklashgan taqdirda, qonun hujjatlariga muvofiq javobgarlikdan ozod etilishi mumkin.

Tashkilot sudning qarori asosida terrorchilik tashkiloti deb topiladi va tugatiladi.

Terrorchilik tashkiloti deb topilgan tashkilot tugatilganda unga tegishli mol-mulk musodara etiladi hamda davlat mulkiga oʻtkaziladi.

Oʻzbekiston Respublikasidan tashqarida roʻyxatga olingan xalqaro tashkilot (uning boʻlinmasi, filiali, vakolatxonasi) Oʻzbekiston Respublikasining sudi tomonidan terrorchilik tashkiloti deb topilgan taqdirda Oʻzbekiston Respublikasi hududida mazkur tashkilot (uning boʻlinmasi, filiali, vakolatxonasi) faoliyati taqiqlanadi va bu tashkilot (uning boʻlinmasi, filiali, vakolatxonasi) tugatiladi, unga (uning boʻlinmasiga, filialiga, vakolatxonasiga) tegishli, Oʻzbekiston Respublikasi hududida boʻlgan mol-mulk musodara etiladi va davlat mulkiga oʻtkaziladi.

Terrorchilikka qarshi operatsiyada ishtirok etayotgan harbiy xizmatchilar, mutaxassislar va boshqa shaxslar bunday operatsiya oʻtkazilayotganda majburan zarar yetkazganlik uchun javobgarlikdan ozod etiladi.

Terrorizmga qarshi kurash toʻgʻrisidagi qonun hujjatlarining buzilishida aybdor shaxslar belgilangan tartibda javobgar boʻladilar.