Loyihalash ishlarini tashkil etishning ilgʻor xalqaro tajribaga asoslangan progressiv metodlarini, qurilishning zamonaviy standartlarini joriy etishni yanada chuqurlashtirish hamda qurilish qiymatini aniqlashning bozor usullariga oʻtishni jadallashtirishni taʼminlash, shuningdek markazlashtirilgan investitsiyalar hisobiga moliyalashtiriladigan investitsiya loyihalarini amalga oshirishda mablagʻlardan foydalanish samaradorligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining 2015-yil 27-martdagi 186-f-son farmoyishi bilan tashkil etilgan Ishchi guruh tomonidan ishlab chiqilgan Markazlashtirilgan investitsiyalar hisobiga moliyalashtiriladigan obyektlar boʻyicha loyiha-qidiruv va qurilish-montaj ishlarining amalga oshirishda xarajatlarni qisqartirish va tarkibini optimallashtirishga doir kompleks tadbirlar 1-ilovaga* muvofiq maʼqullansin.

2. Quyidagilar:

Obyektlarning loyiha-qidiruv va qurilish-montaj ishlari boʻyicha murakkablik toifalari klassifikatori 2-ilovaga* muvofiq;

2016 — 2020-yillarda yangi shaharsozlik normalari va qoidalarini ishlab chiqish, ularni qayta ishlash va yangilash tadbirlari rejasi 3-ilovaga* muvofiq;

Shaharsozlik hujjatlarining ekspertizasini tashkil etish va oʻtkazish tartibi toʻgʻrisidagi nizom 4-ilovaga* muvofiq;

Qoraqalpogʻiston Respublikasi Vazirlar Kengashi, viloyatlar, Toshkent shahri hokimliklari, vazirliklar va idoralar huzuridagi Markazlashtirilgan investitsiyalar hisobiga moliyalashtiriladigan obyektlarni qurish, rekonstruksiya qilish, mukammal va joriy taʼmirlash boʻyicha buyurtmachi xizmati toʻgʻrisida nizom 5-ilovaga* muvofiq;

Qoraqalpogʻiston Respublikasi Vazirlar Kengashi, viloyatlar, Toshkent shahri hokimliklari, vazirliklar va idoralar huzuridagi Markazlashtirilgan investitsiyalar hisobiga moliyalashtiriladigan obyektlarni qurish, rekonstruksiya qilish, mukammal va joriy taʼmirlash boʻyicha buyurtmachi xizmatining namunaviy tuzilmasi 5a-ilovaga* muvofiq tasdiqlansin.

3. Oʻzbekiston Respublikasi Xalq taʼlimi vazirligi, Madaniyat va sport ishlari vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi va “Oʻzkommunxizmat” agentligi 2016-yil 1-iyulgacha boʻlgan muddatda ushbu qaror bilan tasdiqlangan Markazlashtirilgan investitsiyalar hisobiga moliyalashtiriladigan obyektlarni qurish, rekonstruksiya qilish, mukammal va joriy taʼmirlash boʻyicha buyurtmachi xizmati toʻgʻrisida nizomga hamda namunaviy tuzilmaga muvofiq markazlashtirilgan investitsiyalar hisobiga moliyalashtiriladigan obyektlarni qurish, rekonstruksiya qilish, mukammal va joriy taʼmirlash boʻyicha buyurtmachi xizmatlarini (keyingi oʻrinlarda buyurtmachi xizmati deb ataladi) tashkil etsinlar.

Qoraqalpogʻiston Respublikasi Vazirlar Kengashi, viloyatlar, Toshkent shahri hokimliklari, Oʻzbekiston Respublikasi Oliy va oʻrta maxsus taʼlim vazirligi hamda Sogʻliqni saqlash vazirligi 2017-yil 1-yanvargacha boʻlgan muddatda amaldagi buyurtmachi xizmatlarining tuzilmalari ushbu qaror talablariga muvofiqlashtirilishini taʼminlasinlar.

Oʻzbekiston Respublikasi Moliya vazirligi 2017-yil 1-yanvardan boshlab Qoraqalpogʻiston Respublikasi Vazirlar Kengashi, viloyatlar, Toshkent shahri hokimliklari, vazirliklar va idoralar huzuridagi buyurtmachi xizmatining shtatlar jadvali va taʼminoti xarajatlari smetasi belgilangan tartibda albatta roʻyxatdan oʻtkazilishini taʼminlasin.

4. 2016-yil 1-oktabrdan boshlab quyidagi tartib belgilansin, unga koʻra markazlashtirilgan investitsiyalar hisobiga moliyalashtiriladigan obyektlarni qurish, rekonstruksiya qilish, mukammal va joriy taʼmirlashda:

tanlov komissiyalarining qurilish-montaj ishlarini amalga oshirish yuzasidan tanlov savdolari oʻtkazish natijalariga koʻra qabul qilingan qarorlari Davlat raqobat qoʻmitasi bilan kelishilgandan keyin Oʻzbekiston Respublikasi “Davarxitektqurilish” qoʻmitasi tomonidan tasdiqlanadi;

ularning boshlangʻich qiymatini shakllantirish pudrat tashkilotlarining boshqa xarajatlari darajasini aniqlashning takomillashtirilgan mexanizmini joriy etish yoʻli bilan amalga oshiriladi;

loyiha-qidiruv ishlarining qiymatini aniqlash, qurilish-montaj ishlarining obyektlarning loyiha-qidiruv va qurilish-montaj ishlari boʻyicha murakkabligini, loyihalash muddatlari hisobga olingan qiymatidan kelib chiqqan holda amalga oshiriladi.

5. Oʻzbekiston Respublikasi “Davarxitektqurilish” qoʻmitasi, Iqtisodiyot vazirligi, Moliya vazirligi, boshqa vazirliklar va idoralar:

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda 2016-yil 1-iyulgacha boʻlgan muddatda “Oʻzbekiston Respublikasi hududida qurilish-montaj ishlarini amalga oshirishda qoʻllaniladigan moddiy-texnika resurslarining joriy narxlari katalogi” (keyingi oʻrinlarda Katalog deb ataladi) axborot tizimi joriy etilishini taʼminlasinlar, Katalog Oʻzbekiston Respublikasi “Davarxitektqurilish” qoʻmitasining rasmiy veb-saytida joylashtiriladi, uni tarqatish shartnoma asosida amalga oshiriladi;

buyurtmachilar tomonidan markazlashtirilgan investitsiyalar hisobiga barpo etiladigan namunaviy obyektlarning boshlangʻich qiymatini hisoblab chiqish uchun, respublika hududlari boʻyicha quvvatlar bir birligini (1 kv m., oʻquvchi oʻrni, koyka va faoliyat sohasidan kelib chiqqan holda boshqalar) qurishning preyskurant qiymatlari toʻplamlarini har yili 1-aprelgacha belgilangan tartibda tasdiqlash uchun Vazirlar Mahkamasiga kiritilishini taʼminlasinlar.

6. Belgilab qoʻyilsinki, markazlashtirilgan investitsiyalar hisobiga moliyalashtiriladigan obyektlarni qurish, rekonstruksiya qilish, mukammal va joriy taʼmirlashning boshlangʻich qiymatini hisoblab chiqishda qoʻllaniladigan materiallar, buyumlar va konstruksiyalarning narxini aniqlash Katalog va boshqa axborot manbalari asosida amalga oshiriladi.

7. Oʻzbekiston Respublikasi Davlat raqobat qoʻmitasi va “Davarxitektqurilish” qoʻmitasining, shuningdek loyiha-qidiruv tashkilotlari (keyingi oʻrinlarda loyihalash tashkilotlari deb ataladi) aksiyadorlari (qatnashchilari) umumiy yigʻilishlarining:

“Oʻzpoʻlatqurilmaloyiha” MChJni belgilangan tartibda “Oʻzogʻirsanoatloyiha” AKga birlashtirish toʻgʻrisida.

loyihalash tashkilotlarida davlat nomidan aksiyador (qatnashchi) funksiyalarini amalga oshiruvchi hamda “ToshuyjoyLITI” AJ, “Issiqlikelektrloyiha” AJ va “Energotarmoqloyiha” AJdagi muassislar ulushlarini ularga sotadigan vazirliklar va idoralar roʻyxatini 6-ilovaga* muvofiq tasdiqlash toʻgʻrisidagi takliflariga rozilik berilsin.

8. Oʻzbekiston Respublikasi Davlat raqobat qoʻmitasi “Davarxitektqurilish” qoʻmitasi, shuningdek loyihalash tashkilotlarining ustav fondlaridagi aksiyalarning davlat paketlari boʻyicha muassis boʻlgan vazirliklar va idoralar bilan birgalikda loyihalash tashkilotlarining moliyaviy-xoʻjalik faoliyati holatiga, ularning yuqori malakali rahbar va muhandis-texnik kadrlar bilan butlanganligi darajasiga alohida eʼtibor bersin.

9. Vazirliklar va idoralar oʻz sohasidagi texnik jihatdan tartibga solishga oid normativ hujjatlarni xatlovdan oʻtkazsinlar va tizimli asosda ularning rejalashtirish talablari, muhandislik taʼminoti va faoliyat yoʻnalishlari boʻyicha texnologik asbob-uskunalari bilan jihozlanishiga oid qismi ishlab chiqilishini, yangilanishini va qayta ishlanishini izchil amalga oshirsinlar.

10. Oʻzbekiston Respublikasi “Davarxitektqurilish” qoʻmitasi:

ushbu qaror bilan tasdiqlangan Obyektlarning loyiha-qidiruv va qurilish-montaj ishlari boʻyicha murakkabligi toifalari klassifikatori asosida loyihalash tashkilotlarining litsenziya bitimlariga belgilangan tartibda tegishli oʻzgartirishlar kiritsin;

manfaatdor vazirliklar va idoralar bilan birgalikda uch oy muddatda qonun hujjatlariga ushbu qarordan kelib chiquvchi oʻzgartirishlar va qoʻshimchalar toʻgʻrisida takliflar kiritsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.