“Qishloqxoʻjalikkimyo” Jizzax viloyat hududiy aksiyadorlik jamiyati xoʻjalik sudiga murojaat qilib, DT “Xalq banki” Zafarobod filialidan 35962800 soʻm asosiy qarz, 4316200 soʻm foiz, jami 40284900 soʻm undirishni soʻragan.

2008-yil 4-iyundagi sud ajrimi bilan DT “Xalq banki” Jizzax viloyat filiali ishga javobgar sifatida jalb etilgan.

Birinchi instansiya sudining 2008-yil 20-iyundagi hal qiluv qarori bilan daʼvo rad etilgan.

Ish apellatsiya instansiyasi sudida koʻrilmagan.

Kassatsiya protestida hal qiluv qarorini bekor qilib, yangi qaror qabul qilish soʻralgan.

Sudlov hayʼati prokurorning hal qiluv qarorini bekor qilib, ishni yangidan koʻrish uchun yuborish haqidagi fikrini eshitib, protest vajlarini muhokama qilib, ish hujjatlarini oʻrganib chiqib, quyidagilarga koʻra hal qiluv qarorini bekor qilishni hamda ishni yangidan koʻrish uchun yuborishni lozim topadi.

Birinchi instansiya sudi tomonidan nizoni hal etishda protsessual huquq normalarining buzilishiga yoʻl qoʻyilgan.

Oʻzbekiston Respublikasi Fuqarolik kodeksi 47-moddasining uchinchi qismiga binoan vakolatxona va filiallar yuridik shaxs hisoblanmaydi. Ular oʻzlarini tashkil etgan yuridik shaxs tomonidan mol-mulk bilan taʼminlanadilar hamda u tasdiqlagan nizomlar asosida ish olib boradilar. Vakolatxona va filiallarning rahbarlari yuridik shaxs tomonidan tayinlanadi hamda uning ishonchnomasi asosida ish olib boradi.

Sud nizoni hal qilishda Oʻzbekiston Respublikasi Xoʻjalik protsessual kodeksining 38-moddasiga binoan DT “Xalq banki”ni javobgar sifatida ishga jalb qilib, ishni mazmunan koʻrib chiqishi zarur edi.

Daʼvo yuridik shaxsning oʻziga emas, balki uning alohida boʻlinmasiga nisbatan taqdim etilgan boʻlsa, u holda yuridik shaxsning oʻzini ishda ishtirok etishga jalb qilish sud tomonidan Xoʻjalik protsessual kodeksining 38-moddasiga muvofiq hal etiladi. Bu haqda Oʻzbekiston Respublikasi Oliy xoʻjalik sudi Plenumining “Birinchi instansiya sudida ishlarni koʻrishda Oʻzbekiston Respublikasi Xoʻjalik protsessual kodeksining qoʻllanilishi toʻgʻrisida” 2007-yil 15-iyundagi 162-son qarorining 9-bandida tushuntirish berilgan.

Oʻzbekiston Respublikasi Xoʻjalik protsessual kodeksi 188-moddasining birinchi qismiga koʻra, moddiy yoki protsessual huquq normalarining buzilishi yoxud notoʻgʻri qoʻllanilishi xoʻjalik sudining hal qiluv qarorini yoki qarorini oʻzgartirish yoxud bekor qilish uchun asos boʻladi.

Bundan tashqari, daʼvo arizasida soʻralayotgan summada tafovut mavjud boʻlib, sud unga aniqlik kiritmagan.

Qayd etilganlarga koʻra, sudlov hayʼati birinchi instansiya sudining hal qiluv qarorini bekor qilishni, ishni yangidan koʻrish uchun yuborishni lozim topadi.

Ishni yangidan koʻrishda birinchi instansiya sudi Oʻzbekiston Respublikasi DT “Xalq banki”ni ishga javobgar sifatida jalb qilish masalasini hal etib, daʼvo talabini aniqlab, uni muhokama etib, taraflarning vajlariga va ishdagi dalillarga huquqiy baho berib, sud xarajatlarini undirish masalasini hal etib, qonuniy va asoslantirilgan sud hujjati qabul qilishi lozim.