Kadrlarni tayyorlash, qayta tayyorlash va ularning malakasini oshirishni tartibga solish va takomillashtirish, Kadrlar tayyorlash milliy dasturiga muvofiq respublika soliq va bojxona organlari uchun mutaxassislarni maqsadli tayyorlashning uzluksiz tizimini yaratish maqsadida Vazirlar Mahkamasi qaror qiladi:

1. Oʻzbekiston Respublikasi Davlat soliq qoʻmitasining huzurida Oʻzbekiston Respublikasi Davlat soliq qoʻmitasi hamda Davlat bojxona qoʻmitasining oʻquv markazlari bazasida soliq va bojxona kadrlarini tayyorlash va qayta tayyorlash boʻyicha Soliq va bojxona organlari Akademiyasi (keyingi oʻrinlarda Akademiya deb ataladi) tashkil etilsin.

Belgilansinki:

Akademiya harbiylashtirilgan oliy taʼlim muassasasi hisoblanadi;

Akademiyada tinglovchilarni oʻqitish kunduzgi va sirtqi shakllarda amalga oshiriladi;

Akademiyaga soliq va bojxona kollejlarini tamomlaganlar 4 yil muddat bilan bakalavrlar tayyorlash dasturi boʻyicha oʻqitish uchun, oliy oʻquv yurtlarini tamomlaganlar qisqartirilgan bir yillik dastur boʻyicha qayta tayyorlash uchun qabul qilinadi;

Akademiya bazasida soliq va bojxona organlari xodimlari uchun oʻqitish muddati 3 oygacha boʻlgan malaka oshirish kurslari tashkil etiladi;

Akademiya tinglovchilari uchun oʻqish davri soliq va bojxona organlaridagi xizmat stajiga qoʻshiladi, Qurolli Kuchlar saflarida xizmatni oʻtamaganlar uchun esa muddatli harbiy xizmat muddati hisoblanadi;

Akademiyani tamomlaganlarga belgilangan namunadagi diplom va tegishli ravishda bojxona xizmatining leytenanti yoki soliq xizmatining III darajali inspektori maxsus unvonlari beriladi.

Akademiyaning boshliqlar, professor-oʻqituvchilar tarkibiga va tinglovchilariga Oʻzbekiston Respublikasi Davlat bojxona qoʻmitasi xodimlarining tegishli toifalari uchun belgilangan mehnatga haq toʻlash shartlari, imtiyozlar, buyumlar, oziq-ovqatlar bilan taʼminlash normalari va belgilangan boshqa normalar tatbiq etiladi.

2. Akademiya tuzilmasi 1-ilovaga muvofiq tasdiqlansin.

Soliq va bojxona organlari Akademiyasi boshligʻiga Akademiya tuzilmasiga xodimlarning tasdiqlangan soni va ish haqi fondi doirasida oʻzgartirishlar kiritishga ruxsat berilsin.

Akademiyaning boshliqlar va professor-oʻqituvchilar tarkibi shtatdagi xodimlari soni Oʻzbekiston Respublikasi Vazirlar Mahkamasining 2000-yil 13-martdagi 87-son qarori 2-bandiga muvofiq Oʻzbekiston Respublikasi Davlat soliq qoʻmitasi tizimi xodimlarini qisqartirishda boʻshab qolgan xodimlar soni hisobiga, shuningdek Oʻzbekiston Respublikasi Davlat soliq qoʻmitasi va Davlat bojxona qoʻmitasi oʻquv markazlarining shtatdagi xodimlari sonini tegishli ravishda 23 va 20 kishiga qisqartirish hisobiga, xodimlarni 2-ilovaga muvofiq bosqichma-bosqich qabul qilgan holda, 212 kishidan (xizmat koʻrsatuvchi va yordamchi xodimlardan tashqari) iborat etib belgilansin.

Oʻzbekiston Respublikasi Davlat soliq qoʻmitasi Moliya vazirligi va Mehnat vazirligi bilan kelishgan holda, Akademiya xodimlarining shtat jadvalini tasdiqlangan tuzilmaga muvofiq bir oy muddatda ishlab chiqsin va tasdiqlasin.

3. Oʻzbekiston Respublikasi Davlat soliq qoʻmitasi va Davlat bojxona qoʻmitasi, Oliy va oʻrta maxsus taʼlim vazirligi, Oʻzbekiston Respublikasi Mudofaa vazirligi, Adliya vazirligi va Moliya vazirligi bilan birgalikda Akademiya toʻgʻrisidagi Nizomni bir oy muddatda ishlab chiqsinlar va belgilangan tartibda tasdiqlasinlar.

4. Oʻzbekiston Respublikasi Davlat soliq qoʻmitasi, Davlat bojxona qoʻmitasi Oliy va oʻrta maxsus taʼlim vazirligi bilan birgalikda:

Akademiyada soliq va bojxona kadrlarini tayyorlash va qayta tayyorlash boʻyicha mashgʻulotlarning 2001-yil 1-sentabrdan boshlanishini taʼminlasinlar;

Akademiyadagi taʼlim yoʻnalishlari boʻyicha oʻquv rejalarini, dasturlarini hamda oʻquv-uslubiy hujjatlarni ishlab chiqsinlar va belgilangan tartibda tasdiqlasinlar;

2001/2002 oʻquv yili boshlangungacha, oʻquv jarayonini tashkil etish va taʼlim sifatini taʼminlash xususiyatlarini hisobga olgan holda, oʻqituvchi kadrlarni tanlov asosida tanlash tizimini ishlab chiqsinlar va shu asosda Akademiyaning professor-oʻqituvchilar tarkibini yuqori malakali mutaxassislar bilan toʻldirsinlar;

Davlat test markazi bilan kelishgan holda, Akademiyaga tinglovchilarni tanlash va qabul qilish tartibi toʻgʻrisidagi Nizomni ikki oy muddatda ishlab chiqsinlar va tasdiqlasinlar.

5. Soliq va bojxona organlari Akademiyasi, Oʻzbekiston Respublikasi Oliy va oʻrta maxsus taʼlim vazirligi, Davlat soliq qoʻmitasi, Davlat bojxona qoʻmitasi 2001/2002 oʻquv yilida “Soliqlar va soliqqa tortish” hamda “Bojxona ishi” fakultetlariga quyidagi dasturlar boʻyicha tinglovchilar qabul qilinishini taʼminlasinlar:

bakalavrlar tayyorlash toʻliq dasturi boʻyicha har biri 25 kishidan iborat ikkitadan guruh;

bir yillik qayta tayyorlash dasturi boʻyicha har biri 25 kishidan iborat bittadan guruh.

6. Oʻzbekiston Respublikasi Davlat soliq qoʻmitasi, Davlat bojxona qoʻmitasi Moliya vazirligi bilan birgalikda Akademiyani oziq-ovqat, ashyoviy mulklar, mebellar va kazarma jihozlari, oziq-ovqat xizmati anjomlari va avtotransport vositalari bilan taʼminlashning belgilangan normalarini bir oy muddatda tasdiqlasinlar.

7. Akademiya Toshkent shahar, Sobir Yusupov koʻchasi, 3-uy va Muqimiy koʻchasi, 166-uydagi Toshkent soliq kolleji va Davlat soliq qoʻmitasining oʻquv markazi binolariga joylashtirilsin.

Oʻzbekiston Respublikasi Davlat mulki qoʻmitasi, Toshkent shahar hokimligi ikki oy muddatda:

Xususiy tadbirkorlik va kichik biznesni qoʻllab-quvvatlash fondi (“Biznes fond”) va “Madad” sugʻurta agentligining Sobir Yusupov koʻchasi, 1-uyda joylashgan binosini hamda “Oʻzbeksavdo” aksiyadorlik kompaniyasi oʻquv markazining Sobir Yusupov koʻchasi, 3-uyda joylashgan binosini (tutash hududlari bilan) qoldiq balans qiymati boʻyicha Akademiya balansiga bersinlar. Berilayotgan binolar uchun toʻlov Oʻzbekiston Respublikasi Davlat soliq qoʻmitasi va Davlat bojxona qoʻmitasi maxsus fondlari mablagʻlari hisobiga amalga oshirilsin;

berilayotgan bino va inshootlar joylashgan yer uchastkalarini toʻlovsiz ajratsinlar;

Xususiy tadbirkorlik va kichik biznesni qoʻllab-quvvatlash fondi (“Biznes fond”)ni hamda “Madad” sugʻurta agentligini joylashtirishni taʼminlasinlar.

8. Oʻzbekiston Respublikasi Moliya vazirligi:

Oʻzbekiston Respublikasi Davlat soliq qoʻmitasi va Davlat bojxona qoʻmitasi xarajatlar smetalariga va shtat jadvallariga tegishli oʻzgartirishlar kiritsin;

2001-yildan boshlab soliq va bojxona organlari Akademiyasini taʼminlash uchun belgilangan tartibda zarur mablagʻlar ajratishni nazarda tutsin.

9. Oʻzbekiston Respublikasi Makroiqtisodiyot va statistika vazirligi, Moliya vazirligi Davlat soliq qoʻmitasi hamda Davlat bojxona qoʻmitasi bilan birgalikda Akademiya uchun oshxona, yordamchi transformator stansiyasi va nazorat-oʻtkazish punkti qurilishini, uning bino va inshootlarini rekonstruksiya qilishni 2001-yil investitsiya dasturiga kiritsinlar.

10. "Oʻzbekyengilsanoat", “Oʻzgoʻshtsutsanoat” davlat uyushmalari, “Oʻzdonmahsulot” davlat korporatsiyasi va “Oʻzmevasabzavotuzumsanoat-xolding” kompaniyasi, “Oʻzdavzaxira” bosh boshqarmasi Akademiya oʻquvchilarini formali kiyim-bosh va oziq-ovqatlar bilan taʼminlashga koʻmaklashsinlar.

11. Oʻzbekiston Respublikasi Vazirlar Mahkamasining 1994-yil 2-maydagi 175-son farmoyishi oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi Oʻ.T.Komilov va Oʻzbekiston Respublikasi Bosh vazirining oʻrinbosari H.S.Karomatov zimmasiga yuklansin.