“Aoks Plus Business” masʼuliyati cheklangan jamiyati xoʻjalik sudiga murojaat etib, AT “Paxtabank”dan 6572150 soʻm jarima, 131443 soʻm davlat boji, 5000 soʻm pochta xarajatlari, jami 6708593 soʻm undirishni soʻragan.

Birinchi instansiya sudining hal qiluv qarori bilan daʼvo qanoatlantirilgan.

Ish apellatsiya instansiyasi sudida koʻrilmagan.

Kassatsiya shikoyatida hal qiluv qarorini bekor qilib, daʼvoni rad etish soʻralgan.

Sudlov hayʼati shikoyat vajlarini muhokama qilib, ishdagi hujjatlarni oʻrganib chiqib, quyidagilarga koʻra hal qiluv qarorini bekor qilib, daʼvoni rad etish haqida yangi qaror qabul qilishni lozim topadi.

Ishdagi hujjatlarga koʻra, “Aoks Plus Business” masʼuliyati cheklangan jamiyati 370693072,38 soʻm debitorlik qarzini undirish maqsadida qarzdor — “Agrar texnologiyalari” MChJ qoʻshma korxonasining AT “Paxtabank”dagi hisob raqamiga taqqoslash dalolatnomasi asosida 2008-yil 29-mayda 1-son toʻlov talabnomasini yuborgan.

“Agrar texnologiyalari” MChJ qoʻshma korxonasining bankdagi hisob raqamiga 2008-yil 3-iyulda kelib tushgan 18,0 mln. soʻm pul mablagʻlari qoʻshma korxona AT “Paxtabank” bilan tuzgan kredit shartnomasiga asosan uning kredit qarzlarini qoplash uchun yoʻnaltirilgan.

“Aoks Plus Business” masʼuliyati cheklangan jamiyati va AT “Paxtabank” oʻrtasida umuman shartnomaviy-huquqiy munosabat yoʻq.

Shunga qaramasdan, “Aoks Plus Business” masʼuliyati cheklangan jamiyati Oʻzbekiston Respublikasi Adliya vazirligi tomonidan 2001-yil 30-iyunda 1044-son bilan roʻyxatga olingan, Oʻzbekiston Respublikasi Markaziy bankining 2001-yil 23-iyundagi 493-son qarori bilan tasdiqlangan “Hisobvaraqlar ochish, mijozlar hisobvaraqlariga mablagʻ oʻtkazish va hisobdan chiqarish, ish haqi va qonunlarda nazarda tutilgan boshqa ehtiyojlar uchun naqd pul berish tartibi boʻyicha belgilangan talablarni buzganlik uchun tijorat banklariga nisbatan jarima jazo choralarini qoʻllash tartibi toʻgʻrisida”gi nizomning 6-bandiga asosan javobgardan bank ustav kapitali eng kam miqdorining 0,1 foizi — 6572150 soʻm jarima undirishni soʻragan.

Ammo, mazkur Nizom qoidalari faqat bank va uning mijozi oʻrtasidagi munosabatlarga taalluqlidir. “Aoks Plus Business” masʼuliyati cheklangan jamiyati esa AT “Paxtabank”ning mijozi emas. Shu sababli, ushbu Nizom talablarini bu holatga tatbiq etib boʻlmaydi.

Birinchi instansiya sudi ishni koʻrishda bunga ahamiyat bermasdan, daʼvoni qanoatlantirish toʻgʻrisida notoʻgʻri xulosaga kelgan.

Qayd etilganlarga koʻra, sudlov hayʼati hal qiluv qarorini bekor qilib, daʼvoni rad etish haqida yangi qaror qabul qilishni lozim topadi.