Savdo-sanoat palatasi Qashqadaryo viloyat hududiy boshqarmasi “Sanoatqurilishresurs” MChJ manfaatida xoʻjalik sudiga daʼvo arizasi bilan murojaat etib, Qashqadaryo viloyat hokimligi Injiniring kompaniyasidan 118750000 soʻm undirishni soʻragan.

Birinchi instansiya sudining hal qiluv qarori bilan daʼvo talabi rad etilgan.

Apellatsiya instansiyasi sudining qarori bilan hal qiluv qarori oʻzgarishsiz qoldirilgan.

Kassatsiya shikoyatida sud qarorlarini bekor qilib, daʼvo talabini qanoatlantirish toʻgʻrisidagi yangi qaror qabul qilish soʻralgan.

Sudlov hayʼati kassatsiya shikoyatida keltirilgan vajlarni ish hujjatlari bilan birgalikda muhokama qilib, quyidagi asoslarga koʻra sud qarorlarini oʻzgarishsiz qoldirishni lozim topadi.

Ish hujjatlaridan koʻrinishicha, “Qashqadaryosanoatqurilishmaterial” unitar korxonasi va Qashqadaryo viloyat hokimligi Injiniring kompaniyasi oʻrtasida 2007-yil 20-oktabrda hamda 2007-yil 24-sentabrda raqamsiz “qarzdan boshqa shaxs foydasiga voz kechish” shartnomalari tuzilgan. Shartnoma shartlariga koʻra, “Qashqadaryosanoatqurilishmaterial” unitar korxonasi oʻzining Qashqadaryo viloyat hokimligi Injiniring kompaniyasidan boʻlgan 118750000 soʻm debitorlik qarzini talab qilish huquqini “Sanoatqurilishresurs” MChJga oʻtkazgan.

Oʻzbekiston Respublikasi Oliy xoʻjalik sudi Plenumi 2003-yil 28-fevraldagi 110-sonli qarorining 4-bandiga koʻra, agar talabdan boshqa shaxs foydasiga voz kechish shartnomasida voz kechilayotgan huquqni keltirib chiqaruvchi bitim aniq koʻrsatilmagan boʻlsa, talabdan boshqa shaxs foydasiga voz kechish shartnomasi tuzilmagan deb hisoblanishi lozimligi belgilangan boʻlib, taraflar oʻrtasida tuzilgan “qarzdan boshqa shaxs foydasiga voz kechish” shartnomasida voz kechilayotgan huquqni keltirib chiqaruvchi bitim koʻrsatilmagan.

Shunga koʻra, birinchi instansiya sudi tomonidan daʼvo talabi rad etilib toʻgʻri xulosaga kelingan.

Yuqoridagilarni inobatga olib, sudlov hayʼati sud qarorlarini oʻzgarishsiz qoldirib, ishni kassatsiya tartibida koʻrish bilan bogʻliq pochta xarajati Savdo-sanoat palatasi Qashqadaryo viloyat hududiy boshqarmasi tomonidan oldindan toʻlanganligini inobatga olishni lozim topadi.