“Buxoro paxta tozalash zavodi” OAJ xoʻjalik sudiga daʼvo arizasi bilan murojaat etib, “SUXROB AZIZ” fermer xoʻjaligi hisobidan 3556295 soʻm jarima undirib berishni soʻragan.

Birinchi instansiya sudining hal qiluv qarori bilan daʼvo qanoatlantirilgan.

Apellatsiya instansiyasi sudining qarori bilan hal qiluv qarori oʻzgarishsiz qoldirilgan.

Kassatsiya shikoyatida sud qarorlarini bekor qilish soʻralgan.

Sudlov hayʼati shikoyat vajlarini muhokama qilib, ish hujjatlarini oʻrganib chiqib, quyidagilarga koʻra sud qarorlarini oʻzgarishsiz qoldirishni lozim topadi.

Ish hujjatlaridan koʻrinishicha, “Buxoro paxta tozalash zavodi” OAJ va “SUXROB AZIZ” fermer xoʻjaligi oʻrtasida 2009-yil 3-yanvarda davlat ehtiyoji uchun paxta xomashyosi xarid qilish boʻyicha 115-sonli kontraktatsiya shartnomasi tuzilgan. Mazkur shartnomaning 1.2-bandiga asosan xoʻjalik (“SUXROB AZIZ” fermer xoʻjaligi) davlat ehtiyoji uchun tayyorlovchi (“Buxoro paxta tozalash zavodi” OAJ)ga 2009-yil hosilidan jami 131,7 tonna paxta xomashyosi topshirish majburiyatini olgan. Biroq, fermer xoʻjaligi tomonidan shartnoma majburiyati toʻliq bajarilmagan va daʼvogarga 28,3 tonna paxta xomashyosi topshirilmagan.

Oʻzbekiston Respublikasi Fuqarolik kodeksining 236-moddasiga koʻra, majburiyatlar majburiyat shartlariga va qonun hujjatlari talablariga muvofiq lozim darajada bajarilishi kerak.

Mazkur Kodeks 466-moddasining birinchi qismiga koʻra, qishloq xoʻjaligi mahsulotini yetishtiruvchi oʻstirilgan (ishlab chiqarilgan) qishloq xoʻjaligi mahsulotini tayyorlovchiga kontraktatsiya shartnomasida nazarda tutilgan miqdor va assortimentda topshirishi shart.

Oʻzbekiston Respublikasi Fuqarolik kodeksining 333-moddasiga koʻra, qarzdor aybi boʻlgan taqdirda majburiyatini bajarmaganligi yoki lozim darajada bajarmaganligi uchun, agar qonun hujjatlarida yoki shartnomada boshqacha tartib belgilanmagan boʻlsa, javob beradi.

Taraflar oʻrtasida tuzilgan shartnomaning 5.2-bandida xoʻjalik shartnoma shartlariga muvofiq mahsulot yetkazib berishdan asossiz ravishda boʻyin tovlagan taqdirda, tayyorlovchiga topshirilmagan mahsulot qiymatining 25 foizi miqdorida jarima toʻlashi belgilangan.

Fermer xoʻjaligi tomonidan shartnoma majburiyatlari toʻliq bajarilmaganligi uchun birinchi instansiya sudi tomonidan daʼvoni qanoatlantirish haqida toʻgʻri xulosaga kelingan va asosli hal qiluv qarori qabul qilingan.

Shuning uchun apellatsiya instansiyasi sudi hal qiluv qarorini oʻzgarishsiz qoldirgan.

Qayd etilganlarga koʻra, sudlov hayʼati sudning qarorlarini oʻzgarishsiz, kassatsiya shikoyatini esa qanoatlantirmasdan qoldirishni, ishni kassatsiya instansiyasi sudida koʻrish bilan bogʻliq sud xarajatlarini javobgar zimmasiga yuklashni lozim topadi.