Oʻzbekiston Respublikasi Vazirlar Mahkamasi tomonidan taqdim etilgan Oʻzbekiston Respublikasi Davlat budjetining 2011-yil toʻqqiz oyidagi ijrosi yakunlari toʻgʻrisidagi hisobotni koʻrib chiqib, Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Davlat budjetining 2011-yil toʻqqiz oyidagi ijrosi yakunlari toʻgʻrisidagi hisobot tasdiqlansin.

Hisobot davrida Davlat budjeti yalpi ichki mahsulotga nisbatan 0,4 foiz miqdorda profitsit bilan ijro etilganligi maʼlumot uchun qabul qilinsin.

2. Oʻzbekiston Respublikasi Vazirlar Mahkamasi saʼy-harakatlarini Oʻzbekiston Respublikasi 2011-yilgi Davlat budjetining asosiy parametrlari soʻzsiz ijro etilishiga hamda iqtisodiyotning oʻsish surʼatlarini va makroiqtisodiy barqarorlikni taʼminlashga yoʻnaltirsin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining eʼtibori budjet mablagʻlaridan maqsadli va samarali foydalanilishi zarurligiga, budjet mablagʻlarining budjet tashkilotlari tomonidan gʻayriqonuniy ravishda sarflanishining oldini olishga, soliq tushumlari va boshqa majburiy toʻlovlarning tegishli mahalliy budjetlarga toʻliq tushishini taʼminlashga qaratilsin.

4. Ushbu qaror qabul qilingan kundan eʼtiboran kuchga kiradi.