Oʻzbekiston Respublikasining 2005-yilga moʻljallangan Davlat budjetining Oʻzbekiston Respublikasi Hukumati tomonidan taqdim etilib, muhokama qilish mobaynida Oliy Majlis deputatlari bildirgan taklif va mulohazalar hisobga olingan holda maromiga yetkazilgan loyihasini koʻrib chiqib, Oʻzbekiston Respublikasi Oliy Majlisi qaror qiladi:

1. Oʻzbekiston Respublikasining 2005-yilga moʻljallangan Davlat budjeti hamda soliq va budjet siyosatining asosiy yoʻnalishlari maʼqullansin. Davlat budjeti taqchilligining eng yuqori darajasi yalpi ichki mahsulot hajmiga nisbatan 1,0 foizdan iborat boʻlishi maʼlumot uchun qabul qilinsin.

2. Oʻzbekiston Respublikasi Hukumati:

mamlakatning iqtisodiy jihatdan yanada rivojlantirilishini, qatʼiy pul-kredit siyosati oʻtkazilishini, milliy valyutaning mustahkamlanishini, budjet mablagʻlarining belgilangan maqsadda foydalanilishi va qatʼiy iqtisod qilinishini taʼminlasin;

iqtisodiyotning barcha sektorlarida davlat xarajatlarining samaradorligi oshirilishiga va oqilona maqbullashtirilishiga qaratilgan tarkibiy oʻzgarishlarni amalga oshirsin;

budjet xarajatlarining ijtimoiy yoʻnaltirilganligini yanada kuchaytirishni taʼminlasin, bunda Maktab taʼlimini rivojlantirish davlat umummilliy dasturini amalga oshirishga alohida eʼtibor bersin;

iqtisodiyot zimmasidagi soliq yukini izchillik bilan kamaytirish, soliq solish tartibini soddalashtirish, soliq maʼmuriyatchiligi tizimini takomillashtirish ishlarini davom ettirsin, xoʻjalik yurituvchi subyektlarning ishchanlik faolligini oshirishga, korxonalarning iqtisodiy mustaqilligini, eng avvalo olingan daromadlarni tasarruf etish masalalaridagi mustaqilligini kengaytirishga koʻmaklashadigan chora-tadbirlar qabul qilsin, kichik va xususiy tadbirkorlikni rivojlantirishni har tomonlama ragʻbatlantirsin;

Davlat budjetining taqchilligini xususiylashtirishdan, davlat obligatsiyalaridan tushadigan tushumlar hamda pulning qadrsizlanishiga taalluqli boʻlmagan boshqa manbalar hisobidan moliyalashtirsin.

3. Mahalliy davlat hokimiyati organlari budjet daromadlarining tasdiqlangan koʻrsatkichlari bajarilishini, mintaqalarning soliq bazasi va moliyaviy salohiyati kengaytirilishi yuzasidan samarali chora-tadbirlar qabul qilinishini taʼminlasinlar, budjet mablagʻlaridan samarali foydalanilishi ustidan qattiq nazorat oʻrnatsinlar.