Oʻzbekiston Respublikasining “Aholini ish bilan taminlash toʻgʻrisida”gi Qonunining 17-moddasi (Oʻzbekiston Respublikasi Oliy Majlisining Axborotnomasi, 1998-y., 5-6-son, 97-modda), “Oʻzbekiston Respublikasida nogironlarni ijtimoiy himoya qilish toʻgʻrisida”gi Qonunining 25-moddasi (Oʻzbekiston Respublikasi Oliy Majlisining Axborotnomasi, 1998-y., 5-6-son, 97-modda) Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan tasdiqlangan Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisidagi Nizomga (Oʻzbekiston Respublikasi qonun hujjatlari toʻplami, 2008-y., 34-son, 333-modda) asosan ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun hamda Samarqand shahar Bandlikka koʻmaklashish va aholini ijtimoiy muhofaza qilish markazining 2015-yil 26-avgustdagi 795-sonli xatini koʻrib chiqib, shahar hududida joylashgan korxonalarda 2016-yil uchun ish oʻrinlarining eng kam miqdorini belgilash yuzasidan berilgan takliflarni inobatga olib qaror qilaman:

1. Aholining ijtimoiy muxofazaga muxtoj, mustaqil ravishda ish topishda maʼlum qiyinchiliklarga duch kelayotgan, mehnat bozorida teng sharoitlarda raqobatlashishga qodir boʻlmagan aholi qatlamlari uchun moʻljallangan ish joylarining eng kam miqdori shaharda joylashgan va faoliyat koʻrsatayotgan korxona, tashkilot va muassasalarning mulkchilik shaklidan qatʼi nazar, ishchi xodimlarning roʻyxati boʻyicha oʻrtacha yigirma nafardan koʻpni tashkil etadigan korxona, tashkilot va muassasalarda shu sonning 7 foizidan koʻp boʻlmagan miqdorda, shundan 3 foiz miqdorida nogironlar uchun belgilansin va band qilib qoʻyilsin.

2. Korxona, tashkilot va muassasalar rahbarlariga quyida taʼkidlab oʻtilgan fuqarolar uchun ish joylari amaldagi qonunchilikda belgilangan talablarga muvofiq boʻlishini nazarda tutgan holda, shu jumladan:

yolgʻiz ota, yolgʻiz ona, 14 yoshgacha va nogiron bolalari bor, koʻp bolali ota-onalar uchun;

oʻrta maxsus, kasb-hunar taʼlimi muassasalarini tamomlagan yoshlarga, shuningdek oliy oʻquv yurtlarining davlat grantlari asosida taʼlim olgan bitiruvchilariga;

Oʻzbekiston Respublikasi Qurolli Kuchlaridan muddatli harbiy xizmatdan boʻshatilganlarga;

nogironlar uchun;

bandlikka koʻmaklashish va axolini ijtimoiy muxofaza qilish markazida ish qidiruvchi sifatida hisobda turgan pensiya yoshiga yaqinlashib qolgan shaxslar uchun;

jazoni ijro etish muassasalaridan ozod qilingan yoki sud qaroriga koʻra tibbiy yoʻsindagi majburlov choralariga tortilgan shaxslarga;

safarbarlik chaqiruvi zaxirasiga kiritilgan shaxslar, kichik yoshli bolalari boʻlgan ishlamayotgan ayollar, atrofdagilar uchun xavfli boʻlmagan ijtimoiy ahamiyatli kasalliklar bilan ogʻriyotgan shaxslar uchun ish oʻrinlarini yaratish koʻzda tutilsin.

3. Korxona, tashkilot va muassasalar rahbarlari ijtimoiy muhofazaga muhtoj va ish topishda kiynalayotgan shaxslar uchun ish joylarining koʻrsatib oʻtilgan miqdorini Vazirlar Mahkamasining 2008-yil 20-avgustdagi 186-sonli qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisidagi Nizom”ga muvofiq belgilangan muddatlarda va tartibda yaratilishini (ajratilishini yoki band etib qoʻyilishini) hamda ish joylari sanitariya-gigiyena normalariga va xodim oʻz majburiyatlarini bemalol bajarishini taʼminlaydigan mehnat sharoitlariga muvofiq boʻlishini taʼminlasinlar.

4. Oʻzbekiston Respublikasi Vazirlar Maxkamasining 2008-yil 20-avgustdagi 186-sonli “Ijtimoiy muhofazaga muhtoj ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi qarori bilan tasdiqlangan Nizomning 15-bandiga muvofiq mazkur qarorning ijrosini taʼminlamagan korxona va tashkilotlarga belgilangan tartibda jarimalar qoʻllaniladi.

5. Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish toʻgʻrisidagi Nizom”ga asosan ijtimoiy muhofazaga muhtoj va ish qidirishda qiynalayotgan shaxslar uchun band qilib qoʻyiladigan ish oʻrinlarini shahar hokimi tomonidan belgilangan miqdordan ortiqcha tashkil etgan tashkilotlar ushbu ish oʻrinlarini tashkil etishga sarflangan mablagʻlarining bir qismini tuman Bandlikka koʻmaklashish va aholini ijtimoiy muhofaza qilish markazi bilan tuzilgan shartnoma asosida Bandlikka koʻmaklashish va aholini ijtimoiy muhofaza qilish jamgʻarmasi mablagʻlari hisobidan qoplash huquqiga ega ekanliklari inobatga olinsin.

6. Belgilab qoʻyilsinki, nogironlar uchun belgilab qoʻyilgan ish oʻrinlarining belgilangan sonidan ortiqcha nogironlar uchun ish oʻrinlari tashkil etgan tashkilotlar qonun hujjatlarida belgilangan tartibda imtiyoz olish huquqiga egadirlar.

7. Shahar Bandlikka koʻmaklashish va aholini ijtimoiy muhofaza qilish markazi direktori (N. Vafoqulova)ga bir hafta muddat ichida shahar hokimining mazkur qarori nusxasini korxona, tashkilot va muassasalar rahbarlariga yetkazilishini taʼminlash topshirilsin.

8. Samarqand shahar hokimining 2014-yil 30-sentabrdagi 1650-Q-sonli “Ijtimoiy muhofazaga muhtoj va ish topishda qiynaladigan shaxslarni ishga joylashtirish uchun ish oʻrinlarini band qilib qoʻyish toʻgʻrisida”gi qarori 2015-yil 31-dekabrdan oʻz kuchini yoʻqotgan deb hisoblansin.

9. Ushbu qarorning ijrosini nazorat qilish shahar hokimining oʻrinbosari U. Nazarov hamda shahar Bandlikka koʻmaklashish va aholini ijtimoiy muhofaza qilish markazi direktori N. Vafoqulova zimmalariga yuklansin.

10. Mazkur qaror rasmiy eʼlon qilingan kundan eʼtiboran kuchga kiradi.