Tovar aylanishini hisobga olishni tartibga solish va naqd pulning bank muassasalariga tushishini taʼminlash, emissiyani qisqartirish va naqd pulning bankdan tashqari muomalada boʻlishiga qarshi kurashni kuchaytirish, shuningdek isteʼmol tovarlariga chakana narxlarning asossiz ravishda oʻsishini toʻxtatish maqsadida Vazirlar Mahkamasi qapop qiladi:

1. Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari, Oʻzbekiston Respublikasi Davlat soliq qoʻmitasi, tijorat banklariga ular savdo korxonalari va tashkilotlari roʻyxatdan oʻtkazilishi va ularning schyotlarini ochilishini zarur darajada nazorat qilmayotganligi, natijada chakana narxlarni sunʼiy ravishda koʻtarayotgan savdo-vositachilik tuzilmalari tashkil etilayotganligi koʻrsatib oʻtilsin.

2. Belgilansinki, 1999-yil 1-apreldan boshlab:

ulgurji savdo bilan shugʻullanish huquqiga moddiy-texnika bazasiga ega boʻlgan, tovarlarni chakana savdo korxonalariga berish uchun ularning turkumlari saqlanishi, tanlanishi, navlarga ajratilishi va turkumlanishini taʼminlaydigan yuridik shaxslar ega boʻladilar;

yuridik shaxslar (tovar ishlab chiqaruvchi korxonalar va ularni ulgurji yetkazib beruvchilar) tomonidan tovarlar belgilangan namunadagi kassa apparatlari bilan jihozlangan turgʻun ulgurji yoki chakana savdo shoxobchasiga ega boʻlgan yuridik shaxslarga, shuningdek maxsus isteʼmolchilarga, davlat taʼminoti muassasalariga, davlat taʼminoti muassasalarini taʼminlash boʻyicha ixtisoslashtirilgan savdo firmalariga va tovarlardan oʻz ishlab chiqarish faoliyati uchun foydalanuvchi korxonalarga faqat naqd pulsiz hisob-kitob qilgan holda ulgurji sotiladi;

jismoniy shaxslarga tovarlar ular yuridik shaxs boʻlmasdan tadbirkorlar sifatida roʻyxatdan oʻtkazilgan va turgʻun chakana savdo qilish uchun shart-sharoitlar mavjud boʻlgan taqdirda mayda turkumlar bilan naqd pulsiz hisob-kitob qilgan holda ulgurji sotiladi;

tovarlarni ulgurji savdo korxonalaridan, shuningdek ulgurji-chakana savdo korxonalarining bevosita ulgurji savdo bazalari va omborlaridan chakana sotishga yoʻl qoʻyilmaydi;

ulgurji-chakana savdo korxonalari tovarlarni belgilangan namunadagi kassa apparatlari bilan jihozlangan oʻzlarining turgʻun chakana savdo shoxobchasi orqali sotish huquqiga ega boʻladilar;

mulkchilik shakllaridan qatʼi nazar, chakana savdo korxonalari tovarlarni ulgurji sotish, shu jumladan naqd pulsiz hisob-kitob qilgan holda sotish huquqiga ega emaslar;

isteʼmol tovarlarini ishlab chiqaruvchi korxonalar oʻzlari ishlab chiqargan tovarlarni oʻz doʻkonlari orqali faqat belgilangan namunadagi nazorat-kassa apparatlaridan foydalangan holda chakana, naqd pulsiz hisob-kitob qilgan holda esa mayda ulgurji sotishlari mumkin.

3. Vazirlar Mahkamasining Isteʼmol bozori kompleksi Oʻzbekiston Respublikasi Davlat soliq qoʻmitasi, Moliya vazirligi huzuridagi Monopoliyadan chiqarish va raqobatni rivojlantirish qoʻmitasi, Adliya vazirligi bilan birgalikda:

tovarlarni mayda ulgurji sotish tartibi va normativlarini;

ulgurji bozorlarda yuridik shaxslar va yakka tartibda savdo faoliyati bilan shugʻullanuvchi jismoniy shaxslar tomonidan tovarlarni ulgurji va mayda ulgurji sotish tartibini, bunda tovarlarni mayda ulgurji sotish bilan yakka tartibda shugʻullanuvchi jismoniy shaxslarni roʻyxatdan oʻtkazish, ularga soliq solish, ulgurji va mayda ulgurji operatsiyalardan olinadigan tushumni hisobga olish va topshirish xususiyatlarini nazarda tutgan holda, ikki hafta muddatda ishlab chiqsin va tasdiqlash uchun Vazirlar Mahkamasiga kiritsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda:

chakana va ulgurji savdo bozorlarini oziq-ovqat va nooziq-ovqat tovarlari yoʻnalishlari boʻyicha ajratish;

Oʻzbekiston Respublikasi Davlat soliq qoʻmitasi bilan birgalikda hamma joyda kassa apparatlari oʻrnatishni va ulardan foydalanishni nazarda tutgan holda ulgurji buyum bozorlarida tovarlarni ulgurji va mayda ulgurji sotish bilan shugʻullanuvchi jismoniy va yuridik shaxslarning tovarlari aylanishini hisobga olish uchun shart-sharoitlar yaratish;

vakolatli tijorat banklari bilan birgalikda ulgurji bozorlarda tovarlarni ulgurji va mayda ulgurji sotishdan yuridik va jismoniy shaxslar tomonidan olinadigan naqd pul tushumini qabul qilish punktlari tashkil etish chora-tadbirlarini koʻrsinlar.

5. Mazkur qarorda koʻrsatilgan chora-tadbirlarga rioya etilishi uchun shaxsiy javobgarlik Davlat soliq qoʻmitasi va hududiy soliq organlarining birinchi rahbarlariga yuklansin.

6. Mazkur qarorning bajarilishini nazorat qilish Bosh vazir oʻrinbosari M.Z. Usmonov, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari zimmasiga yuklansin.