Oʻzbekiston Respublikasi Vazirlar Mahkamasi tomonidan taqdim etilgan Oʻzbekiston Respublikasi Davlat budjetining 2013-yil birinchi choragidagi ijrosi toʻgʻrisidagi hisobotni koʻrib chiqib, Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Davlat budjetining 2013-yil birinchi choragidagi ijrosi toʻgʻrisidagi hisobot tasdiqlansin.

Taʼkidlab oʻtilsinki, 2013-yil birinchi choragida Davlat budjeti daromadlari uning xarajatlaridan 86,7 mlrd coʻm miqdorida ortiq boʻlishiga erishildi yoki Davlat budjeti yalpi ichki mahsulotga nisbatan 0,4 foiz miqdorida profitsit bilan ijro etildi.

2. Oʻzbekiston Respublikasi Vazirlar Mahkamasi:

makroiqtisodiy barqarorlik yanada mustahkamlanishini, iqtisodiyotning yuqori surʼatlarda oʻsishi va uning raqobatbardoshliligi oshirilishini taʼminlash;

ishlab chiqarishni modernizatsiya qilishga, texnik va texnologik jihatdan yangilashga qaratilgan strategik ahamiyatga molik investitsiya loyihalarini amalga oshirish;

ishlab chiqarish, eksport tuzilmasi diversifikatsiya qilinishini taʼminlash, shuningdek iqtisodiyotni va uning yetakchi tarmoqlarini yangilash;

faol investitsiya siyosatini oʻtkazish va chet el investitsiyalarini jalb qilish, qulay ishbilarmonlik muhitini yaratish;

yoʻl-transport va kommunikatsiya infratuzilmasini jadal rivojlantirish;

bank tizimining resurslar bazasini koʻpaytirish va banklarning investitsiyaviy faolligini kuchaytirish;

ijtimoiy soha hamda aholini ijtimoiy qoʻllab-quvvatlash uchun xarajatlarni toʻliq va oʻz vaqtida moliyalashtirish;

soliq tushumlari mexanizmini yanada maqbullashtirish va takomillashtirish, budjet mablagʻlaridan maqsadli va samarali foydalanilishi hamda budjet intizomiga rioya etilishi ustidan nazoratni kuchaytirish;

“Obod turmush yili” Davlat dasturini amalga oshirish;

kichik biznes va xususiy tadbirkorlikni rivojlantirish, kasanachilikning turli shakllarini kengaytirish va oilaviy tadbirkorlikni rivojlantirish, shuningdek kasb-hunar kollejlari va akademik litseylar bitiruvchilarini ishga joylashtirish hisobiga 2013-yilda Ish oʻrinlari tashkil etish va aholi bandligini taʼminlash dasturini bajarish boʻyicha zarur chora-tadbirlarni koʻrsin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining eʼtibori budjet mablagʻlaridan maqsadli va samarali foydalanilishini taʼminlashga, shuningdek budjet intizomiga rioya etilishi ustidan nazoratni kuchaytirishga, soliq bazasini va mintaqalarning moliyaviy salohiyatini kengaytirish boʻyicha taʼsirchan chora-tadbirlar koʻrish hamda shu asosda mahalliy budjetlar xarajatlarining toʻliq moliyalashtirilishini taʼminlashga qaratilsin.

4. Ushbu qaror qabul qilingan kundan eʼtiboran kuchga kiradi.