Oʻzbekiston Respublikasi Vazirlar Mahkamasi tomonidan taqdim etilgan Oʻzbekiston Respublikasi Davlat budjetining 2010-yil birinchi choragidagi ijrosi toʻgʻrisidagi hisobotni koʻrib chiqib, Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Davlat budjetining 2010-yil birinchi choragidagi ijrosi toʻgʻrisidagi hisobot tasdiqlansin.

Taʼkidlab oʻtilsinki, 2010-yil birinchi choragida Davlat budjeti daromadlari uning xarajatlaridan 21,2 mlrd coʻm miqdorida ortiq boʻlishiga erishildi yoki Davlat budjeti yalpi ichki mahsulotga nisbatan 0,2 foiz miqdorida profitsit bilan ijro etildi.

2. Oʻzbekiston Respublikasi Vazirlar Mahkamasi iqtisodiyotning yuqori va barqaror oʻsish surʼatlarini, samaradorligini va makroiqtisodiy mutanosibligini taʼminlash maqsadida samarali investitsiya siyosati oʻtkazilishini va yetakchi tarmoqlarni modernizatsiya qilish, texnik va texnologik jihatdan yangilash boʻyicha strategik ahamiyatga ega loyihalar amalga oshirilishini, raqobat muhiti izchil rivojlantirilishini, iqtisodiy nochor korxonalarning moliyaviy sogʻlomlashtirilishini, soliq tushumlari mexanizmi takomillashtirilishini, budjet mablagʻlaridan maqsadli foydalanilishini va budjet intizomiga rioya qilinishi ustidan nazorat kuchaytirilishini, shuningdek ish haqi, stipendiyalar, nafaqalar hamda aholiga boshqa ijtimoiy toʻlovlar toʻlash uchun budjet xarajatlari toʻliq va oʻz vaqtida moliyalashtirilishini, “Barkamol avlod yili” Davlat dasturining hamda 2010-yilda Ish oʻrinlari tashkil etish va aholi bandligini taʼminlash dasturining amalga oshirilishiga doir tadbirlar oʻtkazilishini taʼminlasin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining eʼtibori 2009 — 2012-yillarga moʻljallangan Inqirozga qarshi choralar dasturining soʻzsiz bajarilishiga, iqtisodiyotning barqaror surʼatlarda oʻsishini taʼminlashga hamda shu asosda tegishli mintaqalar boʻyicha soliqlar va boshqa majburiy toʻlovlarning toʻliq tushishiga erishishga qaratilsin.

4. Ushbu qaror qabul qilingan kundan eʼtiboran kuchga kiradi.