“Elektron tijorat toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida” 2015-yil 22-maydagi OʻRQ-385-son Oʻzbekiston Respublikasi Qonunini amalga oshirish, zamonaviy axborot-kommunikatsiya texnologiyalaridan keng foydalangan holda elektron tijoratni yanada rivojlantirish maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi elektron tijorat sohasida maxsus vakolatli davlat organi etib belgilansin.

2. Oʻzbekiston Respublikasi Iqtisodiyot vazirligi:

“Elektron tijorat toʻgʻrisida”gi Oʻzbekiston Respublikasi Qonuniga va ushbu qarorga muvofiq elektron tijorat sohasida maxsus vakolatli davlat organiga yuklangan vakolatlarning samarali amalga oshirilishini taʼminlasin;

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Markaziy bank, Axborot texnologiyalari va kommunikatsiyalarini rivojlantirish vazirligi hamda boshqa manfaatdor vazirliklar va idoralar bilan birgalikda ikki oy muddatda Oʻzbekiston Respublikasida elektron tijorat tizimini yanada rivojlantirish konsepsiyasini ishlab chiqsin va belgilangan tartibda Vazirlar Mahkamasiga kiritsin.

3. Shunday tartib oʻrnatilsinki, unga muvofiq eksport qiluvchilar toʻliq toʻlov ularning Oʻzbekiston Respublikasi banklaridagi hisob raqamlariga tushgandan va ushbu axborot Tashqi savdo operatsiyalarining yagona elektron axborot tizimiga kiritilgandan soʻng eksport kontraktlarini rasmiylashtirmasdan Internet tarmogʻidagi on-layn doʻkonlar orqali tovarlar, ishlar va xizmatlar eksportini amalga oshirish huquqiga ega boʻladilar, qonun hujjatlarida nazarda tutilgan holatlar bundan mustasno.

Bunda 1000 (bir ming) AQSH dollarigacha teng qiymatli tovarlar bojxona yuk deklaratsiyasi rasmiylashtirilmasdan va pochta aloqasi xizmatlari koʻrsatish qoidalariga muvofiq Internet tarmogʻida on-layn doʻkonlar orqali eksport qilinishi mumkin.

4. Oʻzbekiston Milliy axborot agentligiga va milliy teleradiokompaniyasiga boshqa ommaviy axborot vositalarini, shu jumladan elektron ommaviy axborot vositalarini jalb etgan holda “Elektron tijorat toʻgʻrisida”gi Oʻzbekiston Respublikasi Qonunining (2015-yil 22-maydagi OʻRQ-385-son Oʻzbekiston Respublikasi Qonuni tahriridagi) mazmuni va mohiyatini keng yoritish tavsiya qilinsin.

5. Oʻzbekiston Respublikasi Hukumatining ilovaga muvofiq ayrim qarorlariga qoʻshimchalar va oʻzgartirish kiritilsin.

6. Oʻzbekiston Respublikasi Iqtisodiyot vazirligi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Iqtisodiyot vaziri G.K. Saidova zimmasiga yuklansin.

1. Vazirlar Mahkamasining 2003-yil 22-yanvardagi 37-son qarori (Oʻzbekiston Respublikasi QT, 2003-y., 1-son, 10-modda) bilan tasdiqlangan Oʻzbekiston Respublikasi Iqtisodiyot vazirligi toʻgʻrisidagi nizomda:

a) 9-bandga quyidagi mazmundagi xatboshi qoʻshilsin:

“maxsus vakolatli davlat organi sifatida elektron tijorat sohasida davlat tomonidan boshqarishni amalga oshirish”;

b) 10-bandda:

quyidagi mazmundagi yigirma toʻqqizinchi — oʻttiz toʻrtinchi xatboshilar qoʻshilsin:

“elektron tijorat sohasida davlat dasturlarini shakllantirish va amalga oshirishda ishtirok etadi;

boshqa manfaatdor davlat organlari va boshqa tashkilotlar bilan birgalikda oʻz vakolatlari doirasida elektron tijorat sohasidagi standartlar, normalar va qoidalarni ishlab chiqadi va tasdiqlaydi;

elektron tijoratni rivojlantirish uchun shart-sharoitlar yaratish yuzasidan takliflar ishlab chiqadi;

elektron tijorat toʻgʻrisidagi qonun hujjatlarini takomillashtirishda va uning ijrosini taʼminlashda ishtirok etadi;

elektron tijorat qatnashchilarining huquqlari va qonuniy manfaatlarini himoya qilish chora-tadbirlarini koʻradi;

elektron tijorat sohasida tadqiqotlarni va monitoringni tashkil etadi”;

yigirma toʻqqizinchi xatboshi oʻttiz beshinchi xatboshi deb hisoblansin.

2. Vazirlar Mahkamasining 2003-yil 30-sentabrdagi 416-son qarori (Oʻzbekiston Respublikasi QT, 2003-y., 9-son, 92-modda) bilan tasdiqlangan Tashqi savdo operatsiyalari ustidan monitoring olib borish tartibi toʻgʻrisidagi nizomda:

a) 8-bandning uchinchi xatboshiga “ushbu Nizomning 12¹-bandida nazarda tutilgan holatlar bundan mustasno” soʻzlari qoʻshilsin;

b) 10-bandga “ushbu Nizomning 12¹-bandida nazarda tutilgan holatlar bundan mustasno” soʻzlari qoʻshilsin;

v) quyidagi mazmundagi 12¹-band qoʻshilsin:

“12¹. Eksport qiluvchilar toʻliq toʻlov ularning Oʻzbekiston Respublikasi banklaridagi hisob raqamlariga tushgandan va ushbu axborot TSOYAEATga kiritilgandan soʻng eksport kontraktlarini rasmiylashtirmasdan Internet tarmogʻidagi on-layn doʻkonlar orqali tovarlar, ishlar va xizmatlar eksportini amalga oshirish huquqiga egadirlar, qonun hujjatlarida nazarda tutilgan holatlar bundan mustasno.

Bunda 1000 (bir ming) AQSH dollarigacha teng qiymatli tovarlar bojxona yuk deklaratsiyasi rasmiylashtirilmasdan va pochta aloqasi xizmatlari koʻrsatish qoidalariga muvofiq Internet tarmogʻidagi onlayn doʻkonlar orqali eksport qilinishi mumkin”.