Oʻzbekiston Respublikasi Hukumati va Rossiya Federatsiyasi Hukumati, keyingi oʻrinlarda “Tomonlar” deb ataluvchilar,

ikki mamlakat va ularning xalqlari oʻrtasidagi anʼanaviy doʻstlik va hamkorlik munosabatlarini mustahkamlash va rivojlantirishni istab,

tinchlikni saqlash, inson huquqlarini hurmat qilish, oshkoralik, bagʻrikenglik va madaniyatlar dialogi prinsiplariga amal qilgan holda,

Oʻzbekiston Respublikasi bilan Rossiya Federatsiyasi oʻrtasida strategik sherikchilik toʻgʻrisida 2004-yil 16-iyundagi Shartnoma hamda Oʻzbekiston Respublikasi bilan Rossiya Federatsiyasi oʻrtasida ittifoqchilik munosabatlari toʻgʻrisida 2005-yil 14-noyabrdagi Shartnoma qoidalariga asoslanib,

Oʻzbekiston Respublikasi Hukumati bilan Rossiya Federatsiyasi Hukumati oʻrtasida madaniyat, fan va texnika, taʼlim, sogʻliqni saqlash, axborot, sport va turizm sohalarida hamkorlik qilish toʻgʻrisida 1993-yil 19-martdagi Bitim hamda Oʻzbekiston Respublikasi Hukumati bilan Rossiya Federatsiyasi Hukumati oʻrtasida ilmiy-texnikaviy hamkorlik toʻgʻrisida 1995-yil 27-iyuldagi Bitimni amalga oshirishni davom ettirish maqsadida,

madaniy-gumanitar va ilmiy-texnikaviy sohalarda 2013 — 2015-yillarga moʻljallangan quyidagi Dasturni qabul qildilar.

Mazkur Dastur Tomonlarning madaniy-gumanitar hamkorlik sohasida avvalgi dasturlarni amalga oshirishda orttirgan ijobiy tajribalarini oʻzida mujassam etib, fan va texnika, madaniyat, taʼlim, sport va turizm sohalaridagi hamkorlikni rivojlantirish boʻyicha kelishilgan chora-tadbirlar kompleksining bajarilishini taʼminlash maqsadida ishlab chiqildi.

Mazkur maqsadni amalga oshirish uchun Tomonlar quyidagi vazifalarni bajarishga intiladilar:

madaniy-gumanitar va ilmiy-texnikaviy sohalarda shartnomaviy-huquqiy bazani takomillashtirish;

Tomonlar davlatlarining madaniy va ilmiy yutuqlarini rivojlantirishga qaratilgan madaniy-gumanitar va ilmiy-texnikaviy hamkorlikni yanada mustahkamlashni taʼminlash;

qoʻshma ijodiy jamoalar tuzish, madaniy tadbirlar, sport festivallari va uchrashuvlar oʻtkazish orqali madaniy-gumanitar sohada axborot va tajriba almashishga koʻmaklashish;

muntazam ravishda ilmiy-texnikaviy axborot almashinuvini yoʻlga qoʻyish, ilmiy konferensiyalar, seminarlar, simpoziumlar oʻtkazish, shuningdek olimlar uchun ilmiy-tadqiqot markazlari va laboratoriyalarida amaliyot oʻtashni tashkil qilish orqali ilmiy-texnikaviy sohada axborot va tajriba almashishga koʻmaklashish;

ommaviy axborot vositalari sohasida hamkorlikka koʻmaklashish;

fan, madaniyat, taʼlim, sport, turizm muassasalari va tashkilotlari oʻrtasida, shuningdek jamoat tashkilotlari, ijodiy uyushmalar, assotsiatsiyalar va jamgʻarmalar oʻrtasidagi bevosita aloqalarning rivojlanishiga har tomonlama koʻmaklashish;

Oʻzbekiston va Rossiya xalqlarining madaniy va ijtimoiy hayotidagi muhim sana va voqealarga bagʻishlangan qoʻshma tadbirlar oʻtkazish.

Tomonlar quyidagi yoʻnalishlar boʻyicha dasturiy tadbirlarni amalga oshiradilar:

madaniyat va kinematografiya sohasida hamkorlik qilish, birgalikda festivallar, konsertlar, koʻrgazmalar oʻtkazish, oʻzarolik asosida Tomonlar davlatlari hududlarida oʻtkaziladigan turli madaniy tadbirlarda ishtirok etish uchun Tomonlar davlatlarining ijod arboblari, jamoalari va sanʼat ustalarini yuborish;

taʼlim sohasida hamkorlik, taʼlim muassasalari va tashkilotlari oʻrtasidagi bevosita aloqalarni qoʻllab-quvvatlash, turli tarmoqlarda yuqori malakali kadrlar tayyorlashga koʻmaklashish, mutaxassislar, olimlar va amaliyotchilar bilan almashish;

tegishli kompaniyalar va tashkilotlar oʻrtasidagi kelishuvlar asosida belgilanadigan shartlar va shakllarda, ommaviy axborot vositalari oʻrtasida hamkorlik qilish;

muzey va kutubxona ishi sohasida ikki tomonlama aloqalarni rivojlantirish va mustahkamlash;

davlat toʻplamlari, kolleksiyalari va jamgʻarmalarida saqlanayotgan oʻz xalqlarining tarixiy-madaniy boyliklarini oʻrganish sohasida hamkorlik qilish, madaniy boyliklarni noqonuniy olib oʻtishning oldini olish va unga barham berish boʻyicha birgalikdagi faoliyat;

sport va turizm sohalarida aloqalarni faollashtirish;

Tomonlar davlatlarining madaniy-gumanitar sohada sherikchilikda faoliyat koʻrsatayotgan jamoat tashkilotlari, jamgʻarmalar va assotsiatsiyalar oʻrtasidagi aloqalarni mustahkamlash.

ikki tomonlama ilmiy-texnikaviy hamkorlik tizimini rivojlantirish va takomillashtirish, ilm-fan sohasida boshqaruv idoralari, fanlar akademiyalari, davlat ilmiy jamgʻarmalari va ilmiy tadqiqot olib borayotgan davlat muassasalari oʻrtasidagi aloqalarni mustahkamlash, birgalikda ilmiy loyihalar va dasturlar ishlab chiqish va amalga oshirish;

oʻzaro ahamiyatga molik boʻlgan dolzarb ilmiy va texnikaviy muammolarni echish maqsadida ustuvor va istiqbolli ilmiy yoʻnalishlar boʻyicha birgalikda fundamental va amaliy tadqiqotlar olib borish;

yangi texnologiyalarni ishlab chiqish va joriy qilishda, ilmiy-texnikaviy tadqiqotlar natijalarini sanoatda oʻzlashtirishda hamkorlikni kengaytirish va faollashtirish;

ilmiy kadrlar tayyorlashda hamkorlik qilish.

Mazkur Dastur doirasida hamkorlikning moliyaviy shartlari quyidagi prinsiplarga asoslanadi.

Delegatsiyalar, badiiy jamoalar, ijrochilar bilan almashishda:

basharti tegishli kelishuvlarda boshqacha tarzda nazarda tutilmagan boʻlsa, yuboruvchi Tomon oʻz delegatsiyalari, jamoalari va ijrochilarining xalqaro transport harakatlarini hamda rekvizitlarni yoʻnalish boʻyicha tashish, oʻz hududidagi bojxona va aeroport yigʻimlari, ijrochilarga gonorarlar berish va tibbiy sugʻurta bilan bogʻliq boʻlgan xarajatlarni qoplaydi;

basharti tegishli kelishuvlarda boshqacha tarzda nazarda tutilmagan boʻlsa, qabul qiluvchi Tomon yashash va ovqatlanish, mamlakat ichidagi transport xarajatlarini hamda zaruriy texnika bilan jihozlangan zallarni ijaraga olish, yordamchi va texnik xodimlarning xizmatlari, barcha turdagi reklamalar, tarjimonlar xizmati, oʻz hududidagi bojxona va aeroport yigʻimlari, madaniy dastur va tezkor tibbiy yordam bilan bogʻliq boʻlgan xarajatlarni qoplaydi.

Koʻrgazmalarni tashkil qilish va oʻtkazish boʻyicha shartlar va Tomonlarning oʻzaro majburiyatlari (muddatlar, eksponatlarni tashish boʻyicha transport xarajatlari, kuzatuvchi shaxslarning yoʻl xarajatlari, bojxona va omborxona xarajatlari, sugʻurta, xavfsizlikni taʼminlash va boshqalar) har bir alohida holatda manfaatdor tashkilotlar oʻrtasida kelishib olinadi va maxsus bayonnomalarda qayd qilinadi.

Bir Tomon davlati fuqarolari uchun boshqa Tomon taʼlim va ilmiy muassasalarida kasbiy amaliyotlar va malaka oshirish kurslarini tashkil qilish shartlari har bir alohida holatda manfaatdor tashkilotlar oʻrtasida kelishib olinadi.

Delegatsiyalar, alohida shaxslarning tashriflari va yuqorida nazarda tutilmagan boshqa tadbirlarni oʻtkazishga oid moliyaviy masalalar Tomonlarning oʻzaro manfaatlarini hisobga olgan holda, ikki tomonlama maslahatlashuvlar doirasida bevosita manfaatdor tashkilotlar oʻrtasida kelishib olinadi.

Tomonlar oʻrtasidagi kelishuvga koʻra mazkur Dasturga qoʻshimchalar va oʻzgartishlar kiritilishi mumkin boʻlib, ular alohida bayonnomalar bilan rasmiylashtiriladi.

Tomonlar mazkur Dasturni amalga oshirish maqsadida Tomonlar davlatlarining manfaatdor vazirliklari, idoralari va tashkilotlari bilan birgalikda tegishli Tadbirlar rejasini ishlab chiqadilar.

Tomonlar, shuningdek Tomonlar davlatlarining manfaatdor vazirliklari va idoralari zarur hollarda mazkur Dasturning muayyan tadbirlarini bajarishga moʻljallangan alohida bitimlar va bayonnomalar tuzishlari mumkin.

Mazkur Dastur imzolangan sanadan boshlab 2015-yilning 31-dekabriga qadar qoʻllaniladi.

Mazkur Dastur xalqaro shartnoma hisoblanmaydi, Tomonlar uchun xalqaro huquq boʻyicha tartibga solinadigan huquq va majburiyatlar tugʻdirmaydi.

Moskva shahrida 2013-yil 15-aprelda har biri oʻzbek va rus tillarida boʻlgan ikki nusxada imzolandi.