Oʻzbekiston Respublikasi Vazirlar Mahkamasining 1994-yil 29-sentabrdagi 490-son “Xalq taʼlimi xodimlari mehnatiga haq toʻlash shartlarini tartibga solish toʻgʻrisida”gi va 2015-yil 25-martdagi 67-son “Umumtaʼlim muassasalarining chet tillar oʻqituvchilari malakasini va kasb mahoratini oshirishga doir qoʻshimcha chora-tadbirlar toʻgʻrisida”gi qarorlariga asosan buyuraman:

1. Oʻzbekiston Respublikasi Vazirlar Mahkamasi huzuridagi Davlat test markazi direktorining 2013-yil 10-oktabrdagi 01-339-son buyrugʻi (roʻyxat raqami 2520, 2013-yil 31-oktabr) (Oʻzbekiston Respublikasi qonun hujjatlari toʻplami, 2013-y., 44-son, 582-modda) bilan tasdiqlangan Chet tillar oʻqituvchilarining bazaviy lavozim maoshlariga oylik ustama belgilash uchun test sinovlarini oʻtkazish tartibi toʻgʻrisidagi nizomga ilovaga muvofiq oʻzgartirishlar va qoʻshimcha kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. 14-band quyidagi tahrirda bayon etilsin:

“14. Test sinovlariga kechikib kelgan oʻqituvchilar test sinovlariga kiritilmaydi va qaydnomada “kelmadi” deb qayd etiladi. Test sinovlariga uzrli sabablarga koʻra (kasalligi, xizmat safarida boʻlganligi va h.k.) kelmagan oʻqituvchilar uzrli sabab yuz berganligini tasdiqlovchi hujjatni uzrli sabab bartaraf etilgan kundan boshlab bir oy muddat ichida taqdim etgan taqdirda, test sinovlarini topshirish uchun toʻlov undirilmagan holda test sinovlari bosqichlarida qatnashish uchun qayta murojaat qilishlari mumkin.”.

2. 33-banddagi “hamda test sinovidan chetlashtirilgan oʻqituvchi kamida bir yildan keyin” degan soʻzlar “yoki test sinovidan chetlashtirilgan oʻqituvchi” degan soʻzlar bilan almashtirilsin.

3. 34-band quyidagi tahrirda bayon etilsin:

“34. Test sinovlarini qayta topshirish uchun toʻlangan mablagʻlar Davlat test markazining Budjet tashkilotini rivojlantirish jamgʻarmasi mablagʻlari boʻyicha budjetdan tashqari shaxsiy gʻazna hisobvaragʻiga tushiriladi va birinchi navbatda test sinovlarini oʻtkazish bilan bogʻliq xarajatlarni qoplash uchun yoʻnaltiriladi.”.

4. 35-band quyidagi mazmundagi xatboshi bilan toʻldirilsin:

“Oʻzbekiston Respublikasi Vazirlar Mahkamasining 2015-yil 25-martdagi 67-son “Umumtaʼlim muassasalarining chet tillar oʻqituvchilari malakasini va kasb mahoratini oshirishga doir qoʻshimcha chora-tadbirlar toʻgʻrisida”gi qarorining 3-bandiga muvofiq, lavozim maoshiga oylik ustama olish huquqini beruvchi test sinovidan kalendar yil mobaynida qatorasiga ikki marta oʻtmagan umumtaʼlim muassasalarining chet tillar oʻqituvchilari kelgusi oʻquv yilidan boshlab oʻz mablagʻlari hisobidan malaka oshirish kurslaridan oʻtmagunlariga qadar chet tili boʻyicha oʻqituvchilik faoliyatiga qoʻyilmaydilar.”.

5. Mazkur oʻzgartirishlar va qoʻshimcha Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Oʻrta maxsus, kasb-hunar taʼlim markazi, Moliya vazirligi, Iqtisodiyot vazirligi hamda Mehnat va aholini ijtimoiy muhofaza qilish vazirligi bilan kelishilgan.