Oʻzbekiston Respublikasi Prezidentining 2011-yil 23-avgustdagi PQ-1602-son “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qarori hamda Vazirlar Mahkamasining 2014-yil 10-martdagi 57-sonli qarori bilan tasdiqlangan Nodavlat notijorat tashkilotlarini davlat roʻyxatidan oʻtkazish tartibi toʻgʻrisidagi nizomga asosan buyuraman:

1. Nodavlat notijorat tashkilotlari tadbirlarini kelishish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq davlat roʻyxatidan oʻtkazilsin va bu haqda Idoraviy normativ-huquqiy hujjatlarni davlat roʻyxatidan oʻtkazish boshqarmasi (B. Boliyev) Idoraviy normativ-huquqiy hujjatlarning davlat reyestriga tegishli yozuv kiritsin.

3. Jamoat, nodavlat notijorat va diniy tashkilotlar boshqarmasi (X. Meliyev) hamda Qonun hujjatlarini turkumlash va huquqiy axborot boshqarmasi (J. Achilov) mazkur idoraviy normativ-huquqiy hujjatni barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Jamoat, nodavlat notijorat va diniy tashkilotlar boshqarmasi (X. Meliyev) tegishli vazirlik va idoralar, nodavlat notijorat tashkilotlari vakillari ishtirokida bir oylik muddatda Nodavlat notijorat tashkilotlari tadbirlarini kelishish tartibi toʻgʻrisidagi nizomni tushuntirish boʻyicha seminar oʻtkazsin.

5. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2011-yil 23-avgustdagi PQ-1602-son “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi, 2013-yil 12-dekabrdagi PQ-2085-son “Fuqarolik jamiyati institutlarini rivojlantirishga koʻmaklashish borasidagi qoʻshimcha chora-tadbirlar toʻgʻrisida”gi qarorlari hamda Vazirlar Mahkamasining 2014-yil 10-martdagi 57-son qarori bilan tasdiqlangan Nodavlat notijorat tashkilotlarini davlat roʻyxatidan oʻtkazish tartibi toʻgʻrisidagi nizomga muvofiq, nodavlat notijorat tashkilotlari (bundan buyon matnda NNT deb yuritiladi), shu jumladan ularning alohida boʻlinmalari (vakolatxonalari va filiallari), shuningdek xalqaro va xorijiy NNTning vakolatxonalari va filiallari, diniy tashkilotlar tomonidan tadbirlar oʻtkazilishini, xalqaro va xorijiy NNTlarning vakolatxonalari va filiallari tomonidan bosma, audiovizual hamda boshqa materiallar tayyorlanishi va tarqatilishini adliya organlari bilan kelishish tartibini belgilaydi.

1. Oʻzbekiston Respublikasi yoki xorijiy davlat hududida bevosita NNT tomonidan tashkillashtirilgan, oʻz ustavida (nizomida) belgilangan maqsadlarga erishish uchun konferensiya, seminar, trening, yigʻilish, aksiya, davra suhbati, uchrashuv, simpozium va boshqa shakllarda shaxslarni toʻplash tadbir deb eʼtirof etiladi.

2. Mazkur Nizom diniy tashkilotlar tomonidan oʻtkaziladigan ibodat, diniy rasm-rusmlar va marosim tarzidagi tadbirlarga nisbatan tatbiq etilmaydi.

3. Quyidagi tadbirlarni adliya organlari bilan kelishish talab etilmaydi:

NNTning ustaviga (nizomiga) muvofiq uning rahbar organlari yigʻilishlari, basharti ularda uchinchi shaxslarning (Oʻzbekiston Respublikasida roʻyxatdan oʻtgan ommaviy axborot vositalari vakillaridan tashqari) ishtirok etishi nazarda tutilmaganda;

NNTning normativ-huquqiy hujjatlarda, davlat dasturlari va milliy rejalarda hamda Oʻzbekiston Respublikasi Oliy Majlisining palatalari, Oʻzbekiston Respublikasi Prezidentining devoni, Vazirlar Mahkamasi, mahalliy davlat hokimiyati organlarining hujjatlarida oʻtkazilishi nazarda tutilgan tadbirlari;

Oʻzbekiston Respublikasi Madaniyat va sport ishlari vazirligi hamda uning hududiy boshqarmalari tomonidan tasdiqlangan yoki ular bilan kelishilgan rejalarga muvofiq oʻtkaziladigan ommaviy jismoniy-tarbiya va sport tadbirlari;

NNTning Vazirlar Mahkamasining 2014-yil 29-iyuldagi 205-son qarori bilan tasdiqlangan Ommaviy tadbirlarni oʻtkazish qoidalariga muvofiq oʻtkaziladigan ommaviy tadbirlari (vakolatli organ tomonidan berilgan ruxsatnoma nusxasi taqdim etiladi);

boshqa tashkilotlar tomonidan oʻtkaziladigan tadbirlarda NNT vakilining ishtirok etishi.

Kelishish talab etilmaydigan tadbirlar haqida adliya organiga tadbir oʻtkazilishidan kamida besh kun oldin yozma ravishda xabar beriladi.

4. Quyidagilar:

xalqaro, respublika, viloyatlararo NNT, xalqaro va xorijiy NNTlarning vakolatxona va filiallari tomonidan oʻtkaziladigan tadbirlar — Oʻzbekiston Respublikasi Adliya vazirligi bilan;

viloyat, tuman, shahar, shaharcha, qishloq va ovul hududlarida faoliyat olib boradigan NNT tomonidan oʻtkaziladigan tadbirlar — NNT roʻyxatdan oʻtgan hududiy adliya organlari bilan kelishiladi.

5. Oʻzbekiston Respublikasi Prezidentining 2011-yil 23-avgustdagi PQ-1602-son qarori bilan tasdiqlangan Oʻzbekiston Respublikasi Adliya vazirligi toʻgʻrisidagi nizomga muvofiq, xalqaro va xorijiy NNTlarning vakolatxonalari va filiallari tomonidan bosma, audiovizual va boshqa materiallar tayyorlanishi va tarqatilishi Oʻzbekiston Respublikasi Adliya vazirligi bilan kelishiladi.

6. NNT oʻz ixtiyoriga koʻra har bir alohida tadbirni yoki tadbirlar rejasini (roʻyxatini) kelishish uchun adliya organiga murojaat qiladi.

Tadbirlar rejasi (roʻyxati) yillik, choraklik yoki oylik boʻlishi mumkin.

7. Tadbir yoki tadbirlar rejasini (roʻyxatini) kelishish uchun NNT tadbir oʻtkazilishi moʻljallangan sanadan kamida yigirma kun oldin, xorijiy fuqarolarning Oʻzbekiston Respublikasiga, shu jumladan NNTga tashrifini tashkil etishda esa tashrifdan kamida bir oy oldin tegishli adliya organiga yozma ravishda murojaat etishi lozim.

8. Tadbir yoki tadbirlar rejasini (roʻyxatini) kelishish haqidagi murojaatda quyidagi maʼlumotlar koʻrsatilishi yoki unga ilova qilinishi zarur:

tadbirning nomi, mazmuni (kun tartibi), maqsadi va shakli;

tadbirda ishtirok etishi rejalashtirilgan shaxslar haqida maʼlumot;

tadbir oʻtkaziladigan joy va aniq sana, shu jumladan tadbirning boshlanish va tamom boʻlish vaqti;

tadbirni moliyalashtirish manbalari;

tarqatma, bosma, audiovizual va boshqa materiallarning (mavjud boʻlsa) nusxalari (namunalari);

murojaat qilingan sana, vakolatli shaxsning imzosi.

9. Tadbirlarning yillik, choraklik yoki oylik rejasini (roʻyxatini) taqdim etish muddati unda nazarda tutilgan birinchi tadbir oʻtkaziladigan sanaga qarab aniqlanadi. Bunda tadbirlar rejasida (roʻyxatida) nazarda tutilgan har bir alohida tadbir boʻyicha mazkur Nizomning 8-bandi uchinchi va oltinchi xatboshilarida koʻrsatilgan hujjatlar tegishli tadbir oʻtkazilishidan kamida yigirma kun oldin taqdim etiladi.

10. Tadbirda xorijiy davlat fuqarosi (fuqarolari) ishtirok etishi rejalashtirilayotgan boʻlsa, mazkur Nizomning 8-bandida koʻrsatilgan hujjatlarga qoʻshimcha tarzda xorijiy davlat fuqarosining familiyasi, ismi, otasining ismi, fuqaroligi, tugʻilgan joyi va sanasi hamda ish joyi koʻrsatilgan maʼlumotnoma, pasportining nusxasi hamda uning kelib-ketish dasturi taqdim etilishi kerak.

11. Xalqaro va xorijiy NNTning vakolatxonalari va filiallari tomonidan bosma, audiovizual va boshqa materiallar tayyorlanayotganda ularning loyihalari, oʻtkaziladigan tadbirda foydalanish yoki tarqatish uchun xorijiy davlatda tayyorlangan bosma, audiovizual va boshqa materiallar Oʻzbekiston Respublikasi hududiga olib kelish rejalashtirilganda ularning nusxalari (namunalari) tadbir oʻtkazilishidan kamida bir oy oldin adliya organiga kelishish uchun taqdim etilishi lozim.

12. Bosma, audiovizual va boshqa materiallarni kelishish uchun taqdim etilgan yozma murojaatda quyidagi maʼlumotlar koʻrsatiladi:

tayyorlanayotgan bosma, audiovizual va boshqa materiallarning loyihalari;

xorijiy davlatda tayyorlangan bosma, audiovizual va boshqa materiallarning nusxalari (namunalari);

materiallarning nomi, mazmuni, maqsadi;

materiallarni tayyorlagan shaxslar haqida maʼlumotlar (familiyasi, ismi, otasining ismi, fuqaroligi, tugʻilgan joyi va sanasi, ish joyi koʻrsatilgan holda);

materiallarning qayerda, qachon, kimlarga tarqatilishi;

materiallarni moliyalashtirish manbalari;

murojaat qilingan sana, vakolatli shaxsning imzosi.

13. Tadbir yoki tadbirlar rejasini (roʻyxatini), bosma, audiovizual va boshqa materiallarni kelishish uchun taqdim etilgan hujjatlar adliya organi tomonidan oʻn besh kun ichida koʻrib chiqiladi.

14. Hujjatlarni koʻrib chiqish jarayonida tadbirni oʻtkazish bilan bogʻliq oʻzgarishlar boʻlgan taqdirda, NNT bu haqda adliya organiga bir ish kuni ichida oʻzgarishlar bilan bogʻliq maʼlumotlarni ilova qilgan holda yozma ravishda xabar beradi.

15. Tadbir yoki tadbirlar rejasi (roʻyxati) hamda bosma, audiovizual va boshqa materiallar tayyorlanishi va tarqatilishi yuzasidan qoʻshimcha savollar vujudga kelganda adliya organi tomonidan NNTdan asoslantirilgan tarzda qoʻshimcha hujjatlar soʻralishi mumkin.

16. Adliya organi tadbir oʻtkazish, bosma, audiovizual va boshqa materiallarni tayyorlash va tarqatishni kelishish uchun taqdim etilgan hujjatlarning ishonchliligini, ularning qonun hujjatlariga va NNT ustavida (nizomida) belgilangan maqsad va vazifalarga muvofiqligini oʻrganadi.

Zarur hollarda, adliya organi NNT tomonidan taqdim etilgan hujjatlarni ekspertizadan oʻtkazish uchun tegishli tashkilotlarga yuborishga haqli.

Hujjatlarni olgan tashkilot oʻn kun ichida oʻz xulosasini taqdim etishi shart.

Agar xulosada tadbir oʻtkazilishiga, bosma, audiovizual va boshqa materiallar tayyorlanishi va tarqatilishiga rozilik berish maqsadga muvofiq emasligi toʻgʻrisida fikr mavjud boʻlsa, u holda tashkilot ushbu Nizomning 18-bandida nazarda tutilgan holatlar doirasida oʻz xulosasini asoslashi kerak.

17. Adliya organi hujjatlarni koʻrib chiqish natijalari yuzasidan tadbirni oʻtkazishga, bosma, audiovizual va boshqa materiallar tayyorlanishi va tarqatilishiga rozilik berish yoki sabablarini koʻrsatgan holda rozilik berishni rad etish toʻgʻrisida NNTni yozma ravishda xabardor qiladi.

18. Quyidagi hollarda tadbirni oʻtkazishga, bosma, audiovizual va boshqa materiallar tayyorlanishi va tarqatilishiga rozilik berish rad etiladi:

tadbir, bosma, audiovizual va boshqa materiallar Oʻzbekiston Respublikasining konstitutsiyaviy tuzumini zoʻrlik bilan oʻzgartirish, suvereniteti, yaxlitligi va xavfsizligiga putur yetkazish, fuqarolarning konstitutsiyaviy huquq va erkinliklarini kamsitish, urush, ijtimoiy, milliy, irqiy va diniy adovatni targʻib qilish, fuqarolarning sogʻligʻi va maʼnaviyatiga tajovuz qilishga qaratilgan boʻlsa;

mazkur Nizomda nazarda tutilgan hujjatlar (maʼlumotlar) toʻliq taqdim etilmagan boʻlsa;

hujjatlar (maʼlumotlar) ushbu Nizomning 7 va 9-bandlarida belgilangan muddatlarda taqdim qilinmagan boʻlsa;

taqdim etilgan hujjatlarda (maʼlumotlarda) notoʻgʻri axborot keltirilganligi aniqlansa.

19. Tadbir oʻtkazilishiga, bosma, audiovizual va boshqa materiallar tayyorlanishi va tarqatilishiga rozilik berish rad etilganda, NNT rad etishga sabab boʻlgan kamchiliklarni bartaraf etish va adliya organiga takroran murojaat qilishga haqli.

20. Tadbir NNT tomonidan adliya organiga taqdim etilgan hujjatlarga (maʼlumotlarga) muvofiq oʻtkazilishi shart.

21. Tadbirning qonun hujjatlariga va NNT ustavida (nizomida) belgilangan maqsadlarga muvofiq oʻtkazilishi uchun NNT rahbari yoki u tomonidan vakolat berilgan shaxs javobgardir.

22. NNT adliya organi vakiliga monitoring qilish uchun oʻzi oʻtkazayotgan tadbirga erkin kirish imkonini berishi shart.

23. NNT rahbari yoki u tomonidan vakolat berilgan shaxs tadbirni monitoring qilish uchun tashrif buyurgan adliya organi vakiliga tadbirni kuzatish, uning qonun hujjatlariga va NNT ustavida (nizomida) belgilangan maqsadlarga muvofiq oʻtkazilishini baholash uchun barcha materiallar va maʼlumotlar bilan tanishish imkoniyatini yaratishi hamda boshqa zarur shart-sharoitlarni taʼminlab berishi lozim.

24. Qonun hujjatlari va NNT ustavida (nizomida) belgilangan maqsadlarga muvofiq oʻtkazilayotgan tadbirga adliya organi vakili tomonidan aralashishga yoʻl qoʻyilmaydi.

25. NNT adliya organi vakilining tadbir davomida qilgan noqonuniy xatti-harakati yuzasidan belgilangan tartibda shikoyat qilishga haqli.

26. Mazkur Nizom talablari buzilishida aybdor boʻlgan shaxslar qonun hujjatlarida belgilangan tartibda javobgarlikka tortiladi.