Oʻzbekiston Respublikasi Prezidentining 2011-yil 23-avgustdagi PQ–1602-son “Oʻzbekiston Respublikasi Adliya vazirligi faoliyatini yanada takomillashtirish chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi adliya vazirining 2010-yil 20-oktabrdagi 223-mh-son buyrugʻi (roʻyxat raqami 2149, 2010-yil 20-oktabr) (Oʻzbekiston Respublikasi qonun hujjatlari toʻplami, 2010-y., 42-43-son, 369-modda) bilan tasdiqlangan Notarius stajorining faoliyatini tashkil etish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur buyruq davlat roʻyxatidan oʻtkazilsin va bu haqda Idoraviy meʼyoriy hujjatlarni davlat roʻyxatidan oʻtkazish boshqarmasi (B. Boliyev) Idoraviy normativ-huquqiy hujjatlarning davlat reyestriga tegishli yozuv kiritsin.

3. Notariat, advokatura va FHDY organlari boshqarmasi (D. Yakubova) hamda Qonun hujjatlarini turkumlash va huquqiy axborot boshqarmasi (J. Achilov) ushbu idoraviy normativ-huquqiy hujjatni barcha manfaatdor shaxslarga yetkazilishi va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

4. Mazkur buyruq rasmiy eʼlon qilingan kundan eʼtiboran kuchga kiradi.

1. 2-band “Stajirovka” degan soʻzdan keyin “yetarli ish sharoitiga (kompyuter vositalari, ish joyi va shu kabilar) ega boʻlgan” degan soʻzlar bilan toʻldirilsin.

2. 12-bandda:

uchinchi xatboshi “notariat sohasidagi” degan soʻzlardan keyin “ish staji va” degan soʻzlar bilan toʻldirilsin;

quyidagi mazmundagi xatboshi bilan toʻldirilsin:

“Suhbat natijasiga koʻra munosib deb topilgan fuqaroning hujjatlari mazkur Nizomning 13-bandiga muvofiq kelishish uchun Oʻzbekiston Respublikasi Adliya vazirligiga yuboriladi.”.

3. Quyidagi mazmundagi 16¹-band bilan toʻldirilsin:

“16¹. Stajor ishga qabul qilingandan keyin 6 oy oʻtgandan soʻng u Oʻzbekiston Respublikasi Adliya vazirligida sinovdan oʻtkaziladi. Sinov Oʻzbekiston Respublikasi adliya vazirining buyrugʻi bilan tashkil etiladigan sinov komissiyasi tomonidan oʻtkaziladi. Sinov komissiyasi Oʻzbekiston Respublikasi Adliya vazirligining masʼul xodimlari orasidan 5 kishidan iborat tarkibda tuziladi.

Sinovda stajorning siyosiy-huquqiy, fuqarolik va notariat sohasidagi umumiy bilim darajasiga baho beriladi.

Sinov yakuni boʻyicha tegishli adliya boshqarmasiga stajor stajirovkani davom ettirishga loyiq yoki noloyiqligi haqida xulosa yuboriladi. Agar sinov komissiyasi tomonidan stajor stajirovkani davom ettirishga noloyiq deb topilsa, xulosada stajirovka rahbariga nisbatan tegishli choralar koʻrish haqida taklif nazarda tutilishi mumkin.

Sinov komissiyasi taklifiga koʻra stajirovkani davom ettirishga loyiq deb topilgan stajorlar keyinchalik yana bir marta sinovga chaqirilishi mumkin.”.

4. 28¹-band quyidagi tahrirda bayon etilsin:

“28¹. Stajorning notariatga taalluqli nazariy bilimlarni oʻzlashtirish darajasi va amaliy tayyorgarligini nazorat qilish maqsadida maxsus komissiya tomonidan:

stajirovka oʻtash muddatining birinchi yili yakuni boʻyicha Oʻzbekiston Respublikasining Fuqarolik kodeksi va notariat toʻgʻrisidagi qonun hujjatlari normalari;

stajirovka oʻtash muddatining ikkinchi yili birinchi yarim yilligi yakuni boʻyicha notarial tasdiqlanadigan yoki shahodatlanadigan hujjatlar loyihalarini tuzish boʻyicha sinovdan oʻtkaziladi.

Mazkur Nizomning 16-bandi ikkinchi xatboshisida nazarda tutilgan stajorlar ushbu bandning ikkinchi xatboshisida koʻrsatilgan masalalar boʻyicha stajirovka oʻtash muddatining birinchi choragi yakunida, uchinchi xatboshisida koʻrsatilgan masalalar boʻyicha stajirovka oʻtash muddatining uchinchi choragi yakunida sinovdan oʻtkaziladi.”.

5. 39-bandda:

quyidagi mazmundagi sakkizinchi xatboshi bilan toʻldirilsin:

“adliya boshqarmasiga Oʻzbekiston Respublikasi Adliya vazirligida tashkil etilgan sinov komissiyasining stajorni stajirovkani davom ettirishga noloyiqligi haqida xulosa kelib tushganda;”;

sakkizinchi — oʻninchi xatboshilar tegishincha toʻqqizinchi — oʻn birinchi xatboshilar deb hisoblansin.