Jismoniy shaxslar tomonidan Oʻzbekiston Respublikasi hududiga tovarlar olib kelinishini tartibga solish va ular yuklarini bojxonada rasmiylashtirish tartibini soddalashtirish maqsadida Vazirlar Mahkamasi qaror qiladi:

1. 2002-yil 1-iyundan boshlab tijorat faoliyati uchun moʻljallangan tovarlarni olib keluvchi jismoniy shaxslar uchun:

ularni yuridik shaxs tashkil etmasdan eksport-import operatsiyalarini amalga oshirish va chakana savdo qilish huquqi bilan yakka tartibdagi tadbirkorlar sifatida belgilangan tartibda majburiy roʻyxatdan oʻtkazish;

jismoniy shaxslar tomonidan olib kelinadigan tovarlardan qoʻshilgan qiymat soligʻi, bojxona bojlari va yigʻimlar oʻrniga yagona bojxona toʻlovi toʻlashni nazarda tutuvchi bojxona toʻlovlari undirishning soddalashtirilgan tartibi joriy etilsin.

Belgilansinki, jismoniy shaxslar tomonidan olib kelinadigan aksiz soligʻi solinadigan tovarlarga amaldagi qonun hujjatlarida belgilangan tartibda va stavkalar boʻyicha aksiz soligʻi solinadi.

3. Belgilab qoʻyilsinki, mazkur qarorning 1-bandiga muvofiq yuridik shaxs tashkil etmasdan eksport-import operatsiyalarini amalga oshirish va chakana savdo qilish huquqi bilan yakka tartibdagi tadbirkorlar sifatida belgilangan tartibda roʻyxatdan oʻtkazilgan jismoniy shaxslar tomonidan olib kelingan tovarlarni sotish tovarlarning Oʻzbekiston Respublikasi hududiga olib kirilganligini va bojxona toʻlovlari toʻlanganligini tasdiqlovchi hujjatlar mavjud boʻlgan taqdirda amalga oshiriladi.

4. Oʻzbekiston Respublikasi Moliya vazirligi, Davlat bojxona qoʻmitasi Tashqi iqtisodiy aloqalar vazirligi bilan birgalikda oʻn kun muddatda Yagona bojxona toʻlovini undirish va uning summasini davlat budjetiga oʻtkazish tartibi toʻgʻrisidagi nizomni ishlab chiqsin va belgilangan tartibda tasdiqlasin.

Bunda tabaqalashtirilgan stavkalar qoʻllanilishi nazarda tutilsin, ular olib kelinadigan tovarlarning fizik oʻlchov birliklari va bojxona qiymati bilan oʻzaro muvofiqlashtirilsin.

5. Oʻzbekiston Respublikasi Davlat bojxona qoʻmitasi:

Oʻzbekiston Respublikasi Moliya vazirligi, Davlat soliq qoʻmitasi va Adliya vazirligi bilan birgalikda tovarlarning xususiyatidan, miqdoridan va ularning Oʻzbekiston Respublikasi bojxona chegarasi orqali olib oʻtilishi darajasidan kelib chiqib tovarlarning olib kelinishi maqsadini aniqlash tartibini bir oy muddatda ishlab chiqsin;

Oʻzbekiston Respublikasi Davlat soliq qoʻmitasi bilan birgalikda bir oy muddatda olib chiqilgan va olib kirilgan tovarlar hajmlarining bojxona organlarida elektron hisobga olinishi tizimini ishlab chiqsin va joriy etsin (maʼlumotlar har chorakda soliq organlariga berilgan holda).

6. Davlat soliq qoʻmitasi Nazorat-taftish bosh boshqarmasining va Oʻzbekiston Respublikasi Prokuraturasi huzuridagi Bosh prokuratura huzuridagi Soliq va valyutaga oid jinoyatlarga qarshi kurashish departamentining mansabdor shaxslariga Oʻzbekiston Respublikasi nazorat organlari faoliyatini muvofiqlashtiruvchi Respublika kengashi bilan kelishgan holda:

import qiluvchi jismoniy shaxslarda tijorat faoliyati uchun moʻljallangan tovarlarning Oʻzbekiston Respublikasi hududiga olib kelinishini tasdiqlovchi hujjatlar mavjudligini rejadan tashqari tekshirish huquqi berilsin. Koʻrsatib oʻtilgan hujjatlar mavjud boʻlmagan taqdirda tovar musodara qilinadi;

alkogolli mahsulotlar va tamaki mahsulotlari sotuvchi ulgurji va chakana savdo subyektlarida, shuningdek umumiy ovqatlanish subyektlarida alkogolli mahsulotlar va tamaki mahsulotlari belgilangan tartibga muvofiq sotilishini rejadan tashqari tekshirish huquqi berilsin.

Bunda har chorakda Vazirlar Mahkamasiga mazkur bandning bajarilishi natijalari toʻgʻrisida axborot taqdim etilsin.

8. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida bir oy muddatda Vazirlar Mahkamasiga taklif kiritsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.